ይሁዳ ካትያ አመስያሳ
(2 ካታ. 14:2-6)
1 አመስያስ ካተትያ ዎደ፥ ላይይ አዉ ላታማነ እቼሻ፤ እ የሩሳላመን ላታማነ ኡዱፑን ላይ ካተቴዳ። አ ዳይ ሱንይ ይሆኣድኖ፤ አ የሩሳላመ አሳ። 2 አመስያስ መና ጎዳ ስንን ሱረባ ኦዳ፤ ሽን ኩመን ዎዛናፐ ግደና። 3 አመስያስ ካዉተ ሎይ ኦይቄዳ ሳና፥ ባረ አዉዋ ዎዳ ኦሳንቻቱዋ ዎዳ። 4 ሙሴ ህግያ ማጻፋን ጻፈቴዳዋዳን፥ መና ጎዳይ፥ "ናናቱ ኦዳ ናጋራ ድራዉ፥ አዎቱዋ ዎናዉ በሰና፤ ቃይ አዎቱ ኦዳ ናጋራ ድራዉካ፥ ናና ዎናዉ በሰና። አሳይ ኡባይ ባረ ኦዳ ናጋራን ናጋራን ሀይቃናዉ በሰ" ያጊደ አዛዜዳዋዳን፥ ዎዳዋንቱ ናና ዎቤና።25:4 ዛረ. 24:16
ኤዶማ ቦላ ደንዴዳ ኦላ
(2 ካታ. 14:7)
5 አመስያስ ይሁዳ አሳ ሺሺደ፥ ባረንቱ አዎቱዋ ጎለን ጎለን ሻኣ ካፓቱዋነ ጼቱዋ ካፓቱ ሱንተ ግዶን ዎዳ። እ ላታሙ ላይነ ላታሙ ላይፐ ቦላና ደእያ ይሁዳ ዛራቱዋነ ቢንያማ ዘረ ኡባ ፓይዴዳ፤ ጎንዳልያነ ቶራ ኦይቂደ፥ ኦላዉ ጊጌዳ ሄዙ ጼቱ ሻአ ዶረቴዳ አሳቱዋ ደሜዳ። 6 ቃይ እስራኤልያፐ ጼቱ ሻአ ምኖ አሳቱዋ ሄዙ ሻአነ ኦይዱ ጼቱ ኪሎ ግራመ ዴጽያ ብራን አመስያስ ቃጻሬዳ። 7 ሽን ጾሳ አሳ ጌተትያ እት ብታኒ አመስያሳኮ ዪደ፥ "ካትያዉ፥ መና ጎዳይ እስራኤልያናነ ኤፍሬማ አሳና ባዋ ድራዉ፥ እስራኤልያ ኦላንቻቱ ኔናና ቦፕኖ። 8 ኔን፥ ኡንቱንቱ ታና ምንሳና ጋደ ቆፖፐ፥ ጾሳይ ኔና ነ ሞርከቱዋ ስንን ካዉሻና። አያዉ ጎፐ፥ ኤቃናዉ ዎይ ካዉሻናዉ ጾሳዉ ዎልቃይ ደኤ" ያጌዳ።
9 አመስያስ ጾሳ አሳ፥ "ታን እስራኤልያ ኦላንቻቶ ጭጌዳ ሄ ብራይ ኡባይ ዋናኔ?" ያጌዳ።
ጾሳ አሳይ፥ "መና ጎዳይ ነዉ ሄዋፐ አደ እማናዉ ዳንዳዬ" ያጌዳ። 10 ሄዋ ድራዉ፥ አመስያስ ኤፍሬማፐ ባረኮ ዬዶ ኦላንቻቱ ባረንቱ ሶ ሶ ባናዳን ሞይዜዳ። ኡንቱንቱ ይሁዳ አሳ ቦላ ሎይ ሀንቀቲደ፥ ባረንቱ ሶ ሶ ስሜድኖ።
11 ሄዋፐ ጉይያን፥ አመስያስ ባረና ምንሲደ፥ ባረ ኦላንቻቱዋ ካለደ፥ ማጽነ ዎምባ ቤዳ፤ አ ኦላንቻቱ ኤዶማ አሳፐ ታሙ ሻኣ ዎድኖ። 12 ቃይ ኡንቱንቱ ታሙ ሻአ ኦላንቻቱዋ ፓጻ ኦሞዴድኖ፤ ኡንቱንታ አፉዋ ዶናዉ አፌድኖ፤ ሄ አፉዋን ዱገ ኦልና፥ ህርክን ደእያ ሹቻን አሳቱ ኡባይ መኤረቲደ ዉሬድኖ። 13 ሽን ሄ ዎደ አመስያስ ባረናና ኦላዉ ቤናዳን ጉየ የዴዳ እስራኤልያ ኦላንቻቱ ሳማርያፐ ቢደ፥ ቤት-ሆሮና ጋካናዉ ደእያ ይሁዳ ካታማቱዋ ኦሌድኖ። ኡንቱንቱ ይሁዳ አሳፐ ሄዙ ሻኣ ዎደ፥ ዳሮ ኦሞዱዋ አኬድኖ።
14 አመስያስ ኤዶማ አሳቱዋ ዎ ስሚደ፥ ኤዶማ አሳ ጾሳቱዋ ምስለቱዋ አኪደ ዬዳ። ሄ ምስለቱ ባረዋንታ ግዳናዳን ኤሲደ፥ ኡንቱንቶ ጎይኔዳነ እጻና ጩዋዬዳ። 15 ሄዋ ድራዉ፥ መና ጎዳ ሀንቁ አመስያሳ ቦላ ኤጽ ከሴዳ፤ ያትና፥ ጾሳይ እት ትምቢትያ ኦድያዋ አመስያሳኮ ኪቴዳ። ቢደ፥ "ባረንቱ አሳ ነ ኩሽያፐ አሻናዉ ዳንዳይቤና ጾሳቶ ኔን አያዉ ጎይናዲ?" ያጌዳ።
16 ትምቢትያ ኦድያዌ ሃሳይሽን፥ ካቲ፥ "ኔን ካትያና ዞረታናዳን ኑን ኔና ሱንዶየ? አጋ! ኔን አያዉ ሀይቃናዉ ኮያይ?" ያጌዳ።
ትምቢትያ ኦድያዌ አግ አኪደ፥ "ኔን ሀዋ ኦዳ ድራዉነ ታን ኔና ዞሬዳዋ ስሳቤና ድራዉ፥ ጾሳይ ኔና ይሳናዉ ቃቼዳዋ ሀእ ታን ኤራድ" ያጌዳ።
እስራኤልያ ቦላ ደንዴዳ ኦላ
(2 ካታ. 14:8-20)
17 ሄዋፐ ጉይያን፥ ይሁዳ ካቲ አመስያስ ባረና ዞርያ አሳቱዋና ዞረቲደ፥ እስራኤልያ ካትያ ዬሁ ናኣ ናኣ፥ ዮአካዛ ናኣ፥ ዮኣሻዉ አሳ ኪቲደ፥ "ሃያ፤ አነ ላኡ ኦላ ጋከቶይተ" ያጊደ ናሴዳ።
18 እስራኤልያ ካቲ ዮኣሽ ይሁዳ ካትያ አመስያሳ ሀዋዳን ያጌዳ፤ "ሊባኖሳን ደእያ ክንድቹ ሊባኖሳን ደእያ ዝጋዉ ኪቲደ፥ ‘ነ ናቶ ታ ናአዉ እማ’ ያጌዳ። ሽን ሊባኖሳን ደእያ እት ዶአይ ሄዋና አደ፥ ሄ ካሽያ የዳ። 19 ኔንካ፥ ‘በአ፥ ኤዶማ ቢታ አሳ ጾናድ’ ያጋደ ነ ዎዛናን ኦቶሩዋን ኩማዳ። ሽን ሀእ ኔን ነ ሶን ዎፑ ጋደ ኡታ አጋ። ነ ቦላነ ነ ጋድያ ይሁዳ ቦላ መቱዋነ ባሻ አህያዋ አያዉ ደንይ?" ያጊደ ዛሬዳ።
20 ሽን አመስያስ ስሳ እጼዳ። ኡንቱንቱ ኤዶማ ጾሳቶ ጎይኔዳ ድራዉ፥ ጾሳይ ኡንቱንታ ኡንቱንቱ ሞርከቱዋ ኩሽያን አደ እማናዉ ኮዬዳ። 21 ሄዋ ድራዉ፥ እስራኤልያ ካትያ ዮኣሽ ኦላናዉ ከስና፥ እነ ይሁዳ ካቲ አመስያስ ይሁዳን ደእያ ቤት-ሸመሻ ጌተትያ ካታማን ኦላ ጋከቴድኖ። 22 እስራኤልያ አሳይ ይሁዳ አሳ ጾኔዳ፤ ይሁዳ አሳይ ኡባይ ባቃቲደ፥ ባረ ሶ ባረ ሶ ቤዳ። 23 ሄዋፐ ጉይያን፥ እስራኤልያ ካቲ ዮኣሽ አካዝያሳ ናኣ ናኣ፥ ዮኣሻ ናኣ፥ ይሁዳ ካትያ አመስያሳ ቤት-ሸመሻን ኦሞዲደ፥ የሩሳላመ አሄዳ። ያቲደ የሩሳላመ ድርሳ ግምቢያ፥ ኤፍሬማ ፐንግያፐ ቢደ ዞዝያ ፐንግያ ጋካናዉ ደእያ፥ ኦይዱ ጼቱ ዋ ግድያ ሳኣ ላሌዳ። 24 ላሊደ ጾሳ ጌሻ ጎልያን ደእያ ዎርቃነ ብራ ኡባ፥ ኦቤድ-ኤዶማ ዘረይ ናግያ ሚሻነ ካትያ ጎለን ደእያ ሻሉዋ ኡባ አኬዳ፤ ቃይ ዋብያዉ ኦይቀቴዳ አሳቱዋካ አኪደ፥ ሳማርያ ስሜዳ።
25 ዮአካዛ ናአይ፥ እስራኤልያ ካቲ ዮኣሽ ሀይቄዳዋፐ ጉይያን፥ ዮኣሻ ናአይ ይሁዳ ካቲ አመስያስ ታማነ እቼሹ ላይ ደኤዳ። 26 አመስያስ ኦዳባይ ኡባይ፥ ኮይሮፐ ዉርሰ ጋካናዉ፥ ይሁዳ ካተቱዋነ እስራኤልያ ካተቱዋ ታርክያ ማጻፋን ጻፈት ኡቴዳ። 27 አመስያስ መና ጎዳ ካልያዋ አጌዳዋፐ ጉይያን፥ ኡንቱንቱ አ ቦላ የሩሳላመን ማቀቴድኖ። እ ላክሻ ካታማ ባቃቴዳ። ሽን ኡንቱንቱ አ ጌዱዋ ላክሻ አሳ ኪትና፥ አ ያን ዎድኖ። 28 አ አሃ ፓራን ጫን አሂደ፥ ዳዊታ ካታማን አ ማይዛ አዎቱዋና ሞጌድኖ።