2 ኦዱዋ 19

ትምቢትያ ኦድያ ዬሁ ዮሳፌጻ ሴሬዳ

1 ሄዋፐ ጉይያን፥ ካቲ ዮሳፌጸ ባረ ሶ የሩሳላመ ሳሮ ስሜዳ። 2 ትምቢትያ ኦድያ ሀናና ናአይ ዬሁ አናና ጋከታናዉ ከሲደ፥ ካትያ ዮሳፌጻ፥ "ኔን ኢታቱዋ ማዳናዉ ዎይ መና ጎዳ እጽያዋንታ ሲቃናዉ በሲ? ሄዋ ድራዉ፥ መና ጎዳ ሀንቁ ነ ቦላ ዬዳ። 3 ግዶፐነ፥ አሼሮ ግያ ኤቃት ምስለቱዋ ጋድያፐ ድጌዳ ድራዉነ ጾሳ ኮያናዉ ነ ዎዛና ጊግሴዳ ድራዉ፥ ኔን ሎኦባ ኦዳ" ያጌዳ።

ዮሳፌጸ ዳናቱዋ ሱንዳ

4 ዮሳፌጸ የሩሳላመን ደኤዳ። ቃይ ዮሳፌጸ በርሳበሄፐ ዶሚደ፥ ኤፍሬማ ገዝያ ጋካናዉ፥ አሳ ግዶን ዩዪደ፥ መና ጎዳ፥ ኡንቱንቱ አዎቱዋ ጾሳኮ፥ ኡንቱንታ ዛሬዳ። 5 ይሁዳ ቢታን ደእያ ግምበቴዳ ካታማቱዋ ኡባን ዳናቱዋ ሱንዳ። 6 እ ዳናቶ፥ "ህንተንቱ ኦያባን ህንተንታ ኤርተ። አያዉ ጎፐ፥ ህንተንቱ አሳዉ ፕርድክታ፤ መና ጎዳዉ ፕርዲታ። ህንተንቱ ፕርድያ ዎደ፥ እ ህንተናና ደኤ። 7 ሀእካ ህንተንቱ መና ጎዳዉ ያይተ፤ ህንተንቱ ኦያባን ህንተንታ ኤርተ። አያዉ ጎፐ፥ መና ጎዳ ኑ ጾሳ ማታን ናቁ፥ አሳ ስን ጼሊደ ማድያዌነ ማጋንጻ ምያዌ ባዋ" ያጌዳ።

8 መና ጎዳ ህግያ አያዋነ አሳ ግዶን ደንድያ የዉዋ ፕርዳናዳን ሌዋቱዋፐ፥ ቄሳቱ ዋፐነ እስራኤልያ አሳ አዎቱዋ ጎልያ ካፓቱዋፐ አማሬዳ አሳቱዋ ዮሳፌጸ የሩሳላመን ሱንዳ። 9 ሄዋፐ ጉይያን፥ ዮሳፌጸ ኡንቱንታ ሀዋዳን ያጊደ አዛዜዳ፤ "መና ጎዳዉ ያዪደ፥ አማነትያዋንነ ኩመን ዎዛናን ኦተ። 10 ባረንቱ ካታማን ደእያ ህንተንቱ እሻቱ ሸምፑ የዉዋ፥ ዎይ ህግያዋ፥ ዎይ አዛዙዋ፥ ዎይ አዋዩዋባ፥ ዎይ ፕርዳባ ህንተንቱኮ አሆፐ፥ ኡንቱንቱ መና ጎዳ ስንን ባይዛንቻ ግደናዳንነ አ ሀንቁ ህንተንቱ ቦላነ ህንተንቱ እሻቱዋ ቦላ ዬናዳን ኡንቱንታ ሴርተ። ህንተንቱ ኡንቱንታ ሴሮፐ፥ ህንተንቱ ህንተንቱ ሁጲያዉ ባይዛንቻ ግድክታ። 11 መና ጎዳ ባጋ የዉዋ ኡባዉ አዎትያዌ ቄሳቱዋ ካፑዋ አማርያ፤ ቃይ ካትያ ባጋ የዉዋ ኡባዉ አዎትያዌ ይሁዳ ዛራቱዋ ካፑዋ እስማኤላ ናኣ ዛባድያ። ሌዋቱ ህንተንቱ ስንን ካፑዋ ግዳናዋ። ህንተንቱ ምኒደ ኦተ። ሱረባ ሀንያዋንቱና መና ጎዳይ እትፐ ግዶ" ያጌዳ።