1 ሀዌ ኡባይ ፖለቴዳ ዎደ፥ ሄ ሳኣን ደእያ እስራኤልያ ኡባቱ ይሁዳ ካታማቱዋ ቢደ፥ ደእያዋ ኡባ ይሳና ጋካናዉ፥ ኤቃ ቱሳቱዋ ክንቼሬድኖ፤ አሼሮ ግያ ጾሳት ምስልያ ቃንጽ ኦሌድኖ፤ ይሁዳ ቢታንነ ቢንያማ ጋድያን ኡባን፥ ቃይ ኤፍሬማ ቢታንነ ምናሰ ቢታን ደእያ ጎይንያ ቃ ሳአቱዋነ ያርሽያ ሳኣ ላሌድኖ። ኡንቱንቱ ሄዋንታ ኡባ ይሴዳዋፐ ጉይያን፥ እስራኤልያ አሳይ ኡባይ ባረንቱ ካታማ ካታማነ ባረንቱ ሶ ሶ ስሜድኖ።

2 ህዝቂያሰ ቄሳቱ ዋነ ሌዋቱዋ ኡንቱንቱ ኦሱዋ ማራን ጩጉዋን ጩጉዋን ሻክ ኤሴዳ። ኡንቱንቱ ኪታይ ጹግያ ያርሹዋነ እትፐተ ያርሹዋ ጾሳዉ ያርሽያዋነ ጌሻ ጎልያ ፐንግያን መና ጎዳ ጋላትያዋነ ሳቢያዋ። 3 መና ጎዳ ህግያን ጻፈቴዳዋዳን ጉራነ ኦማርስ፥ ሳምባታን፥ አግናይ ጼርያ ዎድያንነ ባላ ጋላሳቱዋን ያርሽያ፥ ጹግያ ያርሾ ኮሽያ መሄቱዋ ካቲ ባረፐ እሜዳ።

4 መና ጎዳ ህግያን ጻፈቴዳዋዳን፥ ቄሳቱ ነ ሌዋቱ ጾሳ ኪታ ኦና ማላ፥ ኡንቱንቶ በስያዋ እማናዳን የሩሳላመን ደእያ አሳ ካቲ አዛዜዳ። 5 ህዝቂያሰ ሄዋ አዛዞ ሳናካ፥ እስራኤልያ አሳይ ካፐ፥ ዎይንያ ኤሳፐ፥ ዛይትያፐ፥ ማ ኤሳፐነ ጎሻን ሞኬዳባፐ ጼራ ጾሳዉ ዳርሲደ እሜድኖ፤ ባረንቶ ደእያ ኡባባፐካ አስራታ መና ጎዳዉ ከሴድኖ። 6 ይሁዳ ካታማቱዋን ደእያ እስራኤልያ አሳይነ ይሁዳ አሳይ ቦራፐነ ዶርሳፐ አስራታነ መና ጎዳዉ፥ ባረንቱ ጾሳዉ፥ ዱማይ ዎዳዋ አሂደ ዶሬድኖ። 7 ኡንቱንቱ ሄዘን አግናን ዶረ ዶሚደ፥ ላፑን አግናን ፖሌድኖ። 8 ህዝቂያስነ ካፓቱ ዶረቴዳዋ በኤዳ ዎደ፥ ኡንቱንቱ መና ጎዳነ ጾሳ አሳ እስራኤልያ ጋላቴድኖ።

9 ሄዋፐ ጉይያን፥ ህዝቂያሰ ዶሪደ ዎዳ እሙዋባ ቄሳቱ ዋነ ሌዋቱዋ ኦቼዳ።

10 ጻዶቃ ያራ ግድያ ቄሰ ኡባቱዋ ካፑ አዛርያስ ህዝቂያሳ፥ "አሳይ ባረንቱ እሙዋ መና ጎዳ ጌሻ ጎልያ አህያዋ ዶምና፥ ኑን ሚደ ካሌዶ። መና ጎዳይ ባረ አሳ አንጄዳ ድራዉ፥ ሀዌ ሎይ ዳሩ አቴዳ" ያጌዳ።

11 ሄዋፐ ጉይያን፥ ህዝቂያሰ መና ጎዳ ጌሻ ጎልያን አየንቶ ምንጅያ ክፍለቱዋ ጊግሳናዳን አሳ አዛዝና አሳይ ጊግሴዳ። 12 አሳይ እሙዋ፥ ባረዉ ደእያዋፐ አስራታነ ጾሳዉ ዱማይ ዎዳዋ አማነት እሚደ፥ ሄ ክፍለቱዋ ገልሴድኖ። ሌዊ ኮናኒ ኡንቱንቱ ቦላ ሱንቴዳ፤ አ እሻይ ሽምእ አ ካሊደ ሱንቴዳ። 13 ካቲ ህዝቂያስነ ጾሳ ጌሻ ጎልያን ካፖትያ አዛርያስ አዛዝና፥ ይህኤል፥ አዛዚ፥ ናሃት፥ አሳሄል፥ ያርሞት፥ ዮዛባድ፥ ኤልኤል፥ ይስማከ፥ ማሃትነ ባናይ ሱንቴድኖ፤ ኡንቱንቱ ኮናንያነ አ እሻ ሽምአ አዎተፐ ጋርሳና ኦናዉ ሱንቴድኖ። 14 ሌዊያ ይምና ናአይ ቆሪ፥ አዋይ ዶልያ ባጋ ፐንግያ ናግያዌ፥ አሳይ መና ጎዳዉ ባረ ሸንያን ጮ አሄዳ እሙዋነ ዱማይ ዎዳዋ አካናዉነ ሻክ ሻክ እማናዉ ሱንቴዳ። 15 ቄሳቱ ደእያ ካታማቱዋን ዎጋፐ ላፋ ጋካናዉ ደእያ ባረንቱ እሻቶ አማነቲደ፥ ኡንቱንቱ ኦሱዋዳን ኦሱዋዳን ሻክ ሻክ እማናዳን ኤደን፥ ምንያምን፥ ኢያሱ፥ ሻማኤ፥ አማረነ ሻካነ ቆረፐ ጋርሳና ሱንቴድኖ። 16 ባረንቱ ጩጉዋን ጩጉዋን ባረንቱ ኪታ ጋላስ ጋላስ መና ጎዳ ጌሻ ጎልያን ኦያዋንቶ፥ ላይይ ሄዙዋ ጋኬዳነ ሄዙዋፐ ቦላ ግዴዳ አቱማ አሳ ኡባዉ ኡንቱንቱ ጋክያዋ ጋክያዋ ሻክ እሜድኖ። 17 ባረንቱ አዎቱዋ ጎለን ጎለን ፓይደት ኡቴዳ ቄሳቶካ እሜድኖ። ቃይ ላይይ ላታሙ ጋኬዳነ ላታሙዋፐ ቦላ ግዴዳ ሌዋቶ ባረንቱ ኦሱዋዳን ኦሱዋዳን ባረንቱ ጩጉዋን ጩጉዋን ሻክተ ፓይደቴዳዋንቱ ኡንቱንቱ ጋክያዋ ሻክ እሜድኖ። 18 ቄሳቱ ነ ሌዋቱ ባረንቱ የለታዳን የለታዳን ፓይደትያ ዎደ፥ ኡንቱንቱ ባረንቱ ጉ ናናቱዋና፥ ባረንቱ ማጫ አሳቱዋና፥ ባረንቱ ማጫ ናናነ ባረንቱ አቱማ ናናቱዋና እትፐ ጻፈቴድኖ፤ አያዉ ጎፐ፥ ኡንቱንቱ አማነቲደ፥ ባረንቱ ሁጲያዉ ጌዬድኖ። 19 ቃይ ባረንቱ ካታማቱዋ ዩሹዋን ደእያ ሄን ጋደቱዋን ዎይ ሀራ ካታማቱዋን ደእያ አሮና ያራ ግዴዳ ቄሳቶ፥ ቄሳቱዋ ዛርያ ግድያ አቱማ አሳቱዋፐ ኡባዉነ ባረንቱ የለታዳን ፓይደቴዳ ሌዋቱ ኡባዉ ኡንቱንቱ ጋክያ ቁማ ሻካናዉ አሳቱ ሱንቴድኖ።

20 ካቲ ህዝቂያሰ መና ጎዳ ባረ ጾሳ ስንን ሎኦ ሱረነ ቱማ ግዴዳዋ ይሁዳ ጋድያ ኡባን ኦዳ። 21 ህዝቂያሰ ጾሳ ጌሻ ጎልያዉ ኦዳ ኦሱዋ ኡባን፥ ህግያንነ አዛዙዋን ጻፈቴዳዋዳን ጾሳ ባረ ኩመን ዎዛናፐ ኮዮዋ ድራዉ፥ አዉ ኡባባይ እንጀቴዳ።