2 ኦዱዋ 8

ሶሎሞነ ኦዳ ሀራ ኦሶቱዋ

1 ሶሎሞነ መና ጎዳ ጌሻ ጎልያነ ባረ ካትያ ጎልያ ኬጼዳ ላታማን ላይ ዉርሰን፥ 2 ካቲ ኪራም ዛሪደ እሜዳ ካታማቱዋ ሶሎሞነ ዎ የጊደ ኬጼዳ፤ እስራኤልያ አሳ ሄ ካታማቱዋን ዎዳ።

3 ሄዋፐ ጉይያን፥ ሶሎሞነ ሀማት-ጾባ ጌተትያ ቢታ ቢደ፥ ሄ ቢታ ኦሞዴዳ። 4 ያቲደ መላ ቢታን ደእያ ታጽሞራ ጌተትያ ካታማነ ሻሉዋ ኡባ ምንጅያ ካታማቱዋ ሀማታ ጋድያን ኬጼዳ። 5 ሄዋዳንካ፥ ሶሎሞነ ክል ቤት-ሆሮናነ ህርክ ቤት-ሆሮና ጌተትያ ካታማቱዋ ዛረደ ኬጼዳ፤ ሄ ካታማቱ ድርሳይ፥ ፐንጊነ ጎርዳ ደእያ ድረት ኡቴዳ ካታማቱዋ። 6 ባእላታ ካታማ፥ ሻሉዋ ምንጅያ ካታማቱዋ ኡባ፥ ባረ ፓራቱዋነ ፓራ ጋረቱዋ ዎያ ካታማቱዋ ኡባነ እ ኬጻናዉ አሞቴዳ ኡባ የሩሳላመን ልባኖሳንነ ባረ ሞድያ ቢታ ኡባን ኬጼዳ።

7 ሂተቱፐ፥ አሞራቱፐ፥ ፓርዘቱዋፐ፥ ሂዌቱዋፐነ ያቡሳቱዋፐ አቴዳ አሳቱ ኡባይ እስራኤልያ አሳ ግድክኖ፤ 8 ኡንቱንቱ እስራኤልያ አሳቱ ጋድያፐ ዉርስ ይሰናን አግና፥ ሄ ጋድያን አቴዳ አሳቱዋ ዘረቱዋ። ሶሎሞነ ኡንቱንቱ አይለተን ኦስሴዳ፤ ኡንቱንቱ ሀቼ ጋካናስካ አይለተን ኦኖ። 9 ሽን ሶሎሞነ ባረ ኦሶ እስራኤልያ አሳፐ ኦናነ አይለይቤና፤ ኡንቱንቱ አዉ ኦላንቻቱዋ፥ ኦላ ጋዳዎቱዋ፥ ፓራ ጋረቱዋ ላግያዋንቱ ካፓቱዋነ ፓራ አሳቱዋ ግዲደ ኦድኖ። 10 ሄዋዳንካ፥ ቃይ ኡንቱንቱ ካትያ ሶሎሞነ ኪታ ኦያዋንቱ ካፓቱዋ። ኡንቱንቱፐ ላኡ ጼታነ እሻታማቱ ኪታ ኦያ ኦሳንቻቱዋ ጼሊደ ኦስሴድኖ።

11 ሄዋፐ ጉይያን ሶሎሞነ "መና ጎዳ ታቦታይ ገሌዳ ሳአይ ጌሻ ግድያ ድራዉ፥ ታ ማቻታነ እስራኤልያ ካትያ ዳዊታ ጎለን ደአናዉ በሱኩ" ያጌዳ፤ ግብጼ ካትያ ናቶ ዳዊታ ካታማፐ ደንደ፥ እ እዝዉ ኬጽ ዎዳ ካትያ ጎልያ አሄዳ።

12 ሶሎሞነ ሄ ዎደ ጌሻ ጎልያ ባራንዳ ስንን መና ጎዳዉ ኬጼዳ ያርሽያ ሳኣን ጹግያ ያርሹዋ መና ጎዳዉ ያርሼ። 13 ሙሴ ህጊ አዛዝያዋዳን ሀቼ ሀቼስ በስያ ጹግያ ያርሹዋ ያርሼ። ሶሎሞነ ሳምባታን ሳምባታንነ አግናይ ጼርያ ዎድያን ዎድያን፥ ቃይ ላይፐ ሄዙ ገደነ ቦንችያ ባላቱዋን (እርሹ ገልቤና ኡክ ባላን፥ ሳምንታቱዋ ባላንነ ዳስያ ባላን) ጾሳዉ ያርሹዋ ያርሼ።✝8:13 ከሳ 23:14-17፤ 34:22-23፤ ፓይ. 28:9፤ 29:39፤ ዛረ. 16:16

14 አ አዉ ዳዊተ ካሰ አዛዜዳዋዳን፥ ቄሳቱ ዋ ኡንቱንቱ ኪታን ኪታን ሻክ ሱንዳ፤ ቃይ ጋላስ ጋላስ ማዝሙርያን ሳባናዉነ ቄሳቱ ዋ ማዳናዉ ሌዋቱዋ ሻክ ሱንዳ። ቃይካ ጾሳ አሳ ግዴዳ ዳዊተ አዛዜዳዋዳን፥ ፐንገ ኡባ ካላን ካላን ናጋናዳን ፐንግያ ናግያዋንታ ሻክ ሱንዳ። 15 ሄዋዳንካ፥ ካሰ ዳዊተ ሚሻ ምንጅያ ሳኣባነ ሀራ አላለቱዋ ቄሳቱ ዋነ ሌዋቱዋ አዛዜዳዋዳን፥ እቱነ አተናን ኡባይካ ፖለቴዳ።

16 ሶሎሞነ ሀልቼዳ ኦሱዋ ኡባይ ኦሰቲደ ዉሬዳ፤ መና ጎዳ ጌሻ ጎሊ ባሰቴዳ ዎድያፐ ዶሚደ፥ መና ጎዳ ጌሻ ጎሊ ፖለታና ጋካናዉካ ኦሱዋ ኡባይ ሎኦ ኦሰቴዳ።

17 ሄዋፐ ጉይያን፥ ካቲ ሶሎሞነ ኤዶማ ቢታን ዞኦ አባ ዶናን ደእያ ኤጽዮን-ጋብራነ ኤላታ ጌተትያ ካታማቱዋ ቤዳ። 18 ካትያ ኪራም ማርካበቱዋነ ማርካብያ ላጉዋን ሎሄዳ ባረ አሳቱዋ ሶሎሞናዉ የዴዳ፤ ኡንቱንቱ ሶሎሞነ አሳቱዋና እትፐ ኦፊራ ጋድያ ቤድኖ፤ ያፐ ታማነ እቼሹ ሻአ ኪሎ ግራመ ዴጽያ ዎርቃ ካትያ ሶሎሞናዉ አኪደ ዬድኖ።