ሻማኤ ትምቢትያ ኦዴዳ
(1 ካታ. 12:21-24)
1 ሮብኣመ የሩሳላመ ካታማ ጋኬዳ ዎደ፥ እስራኤልያ ቢታ አሳና ኦለቲደ፥ ካዉተ ባረዉ ዛራና ማላ፥ ይሁዳ ዛርያፐነ ቢንያማ ዛርያፐ ዶረቴዳ እት ጼታነ ሆስፑን ታሙ ሻአ ኦላንቻቱዋ ሺሼዳ። 2 ሽን መና ጎዳ ቃላይ ጾሳ አሳ ግድያ ሻማእያኮ ዬዳ፤ 3 "ሶሎሞና ናኣ ይሁዳ ካትያ ሮብኣማዉነ ይሁዳንነ ቢንያማን ደእያ እስራኤልያ አሳ ኡባዉ ሀዋዳን ያጋ፤ 4 ‘መና ጎዳይ ህንተንታ፥ "ህንተንቱ እሻቱዋና፥ እስራኤላቱዋና ኦለታናዉ ቦፕተ። ሀዋ ታን ኦዳ ድራዉ፥ ህንተንቱ ኡባይካ ህንተንቱ ሶ ህንተንቱ ሶ ስምተ" ያጌ’ ያጋደ ኦዳ" ያጌዳ። ኡንቱንቱ መና ጎዳ ቃላ ስሲደ፥ እዮርባማ ኦላናዉ ብያዋ አጊደ ስሜድኖ።
ሮብኣመ ጌሶቱዋ ግምቤዳ
5 ሮብኣመ የሩሳላመን ኡቲደ፥ ሀዋፐ ካሊደ ጻፈቴዳ ይሁዳነ ቢንያማ ካታማቶ ጌሱዋ ግምቤዳ። 6 ሄ ካታማቱካ ቤተሌመ፥ ኤጻማ፥ ታቆአ፥ 7 ቤትጹራ፥ ሶኮ፥ አዱላማ፥ 8 ጋተ፥ ማሬሻ፥ ዚፋ፥ 9 አዶራይማ፥ ላክሻ፥ አዜቃ፥ 10 ጾርአ፥ አያሎናነ ከብሮና። 11 ሮብኣመ ካታማቱዋ ጌሱዋ ምንሲደ፥ ካፓቱዋ ኡንቱንቱን ዎዳ፤ ቃይ ቁማ፥ ዛይትያነ ዎይንያ ኤሳ ኡንቱንቱን ዎዳ። 12 ሄ ግምበቴዳ ካታማቱዋ ኡባን ጎንዳለቱዋነ ቶራቱዋ ዎዳ፤ ያቲደ ኡንቱንታ ሎይ ምንሴዳ። ሄዋዳን ኦደ፥ ይሁዳነ ቢንያማ ቢታቱዋ ሞዲደ ደኤዳ።
ቄሳቱ ነ ሌዋቱ ኡባይ ይሁዳ ዬድኖ
13 እስራኤልያ ኡባን ደእያ ቄሳቱ ነ ሌዋቱ ኡባይ ባረንቱ ደእያ ሳኣፐ ሮብኣማኮ ዬድኖ። 14 ሌዋቱ ባረንቱ ሄን ጋድያነ ባረንቱ ሳኣ አጊደ፥ ይሁዳነ የሩሳላመ ዬድኖ። አያዉ ጎፐ፥ ኡንቱንቱ ቄሰ ግዲደ መና ጎዳዉ ኦናዳን፥ እዮርባምነ አ ናናይ ድጌድኖ። 15 እዮርባም ጎይንያ ቃ ግሹዋን ሀራ ቄሳቱ ዋ ሱንዳ፤ ኡንቱንቱ ጻላሄቶነ እ መዳ ማራቱዋ ምስለቶ ቄሰ ግዲደ ኦድኖ።11:15 1 ካታ. 12:31 16 ሌዋቱ ዬዳዋፐ ጉይያን፥ እስራኤልያ ዛራቱዋ ኡባፐ መና ጎዳዉ፥ እስራኤልያ ጾሳዉ ባረንቱ ዎዛናፐ ጎይናናዉ ኮይያዋንቱ መና ጎዳዉ፥ ባረንቱ አዎቱዋ ጾሳዉ ያርሹዋ ያርሻናዉ ኡንቱንቱ ጌዱዋ ካሊደ፥ የሩሳላመ ዬድኖ። 17 ኡንቱንቱ ዩሳይ ይሁዳ ካዉተ ምንሴዳ፤ ኡንቱንቱ ሄዙ ላይ ኩመን ሶሎሞነ ናኣ ሮብኣማ ማዴድኖ። ኡንቱንቱ ካትያ ዳዊታ ኦግያነ ካትያ ሶሎሞነ ኦግያ ካሊደ፥ ሄዙ ላይ ሳሮ ደኤድኖ።
ሮብኣማ ሶይ አሳ
18 ሮብኣመ ማህላቶ ግያ ምሽራቶ አኬዳ። ማህላት አዉ ዳዊታ ናኣ ያርሞታ፤ እ ዳያ እሰያ ናኣ ኤልኣባ ናቶ አብሀይሎ። 19 ማህላታ ሮብኣማዉ ይኡሻ፥ ሻማርያነ ዛሃማ ጌተትያ አቱማ ናና የላዱ። 20 ሄዋፐ ጉይያን፥ አበሰሎማ ናት ናቶ ማእኮ አኬዳ፤ ማእካ ሮብኣማዉ አቢያ፥ አታያ፥ ዚዛነ ሻሎሚታ የላዱ። 21 ሮብኣመ ባረ ማቼቱዋፐነ ባረ ባኮቱዋ ኡባፐ አበሰሎማ ናት ናቶ ማእኮ አ ሲቄ። አዉ ታማነ ሆስፑን ማጫ አሳቱነ ኡሱፑን ታሙ ባኮቱ ደኢኖ። እ ላታማነ ሆስፑን አቱማ ናናነ ኡሱፑን ታሙ ማጫ ናና የሌዳ። 22 ሮብኣመ ማእክ ናኣ አቢያ ባረፐ ጉይያን ካተያናዉ ቆፔዳ ድራዉ፥ አ እሻቱዋ ቦላ ካፑዋ ኦደ ሱንዳ። 23 ሮብኣመ ጭንጪደ፥ ባረ አቱማ ናና ይሁዳነ ቢንያማ ቢታቱዋ ኡባን ደእያ ግምበቴዳ ካታማቱዋ ኡባን ሻክ ሻክ ዎዳ፤ ኡንቱንቶ ዳሮ ካ እሜዳ። ቃይ ኡንቱንቶ ጮራ ማጫ አሳ እሜዳ።