2 ኦዱዋ 36

ይሁዳ ካትያ ዮአካዛ

1 ሄዋፐ ጉይያን፥ ሄ ቢታ አሳይ ዮስያሳ ናኣ ዮአካዛ ዶሬድኖ፤ አ አዉዋ ሳኣን የሩሳላመን ካተዬድኖ። 2 ዮአካዝ ካተትያ ዎደ፥ ላይይ አዉ ላታማነ ሄዛ፤ እ የሩሳላመን ሄዙ አግና ካተቴዳ። 3 ሄዋፐ ጉይያን፥ ግብጼ ካቲ ዮአካዛ የሩሳላመ ካተተፐ ዎዳ፤ ሄዙ ሻአነ ኦይዱ ጼቱ ኪሎ ግራመ ዴጽያ ጻጋራ ብራነ ሀታማነ ኦይዱ ኪሎ ግራመ ዴጽያ ዎርቃ ይሁዳ አሳ ጊርሴዳ። 4 ግብጼ ካቲ ዮአካዛ እሻ ኤልያቅማ ይሁዳ ቦላነ የሩሳላመ ቦላ ካተዬዳ፤ አ ሱን ዮኣቄማ ያጊደ ላሜዳ። ያቲደ ዮኣቄማ እሻ ዮአካዛ ግብጼ አፌዳ።✝36:4 ኤር. 22:11-12

ይሁዳ ካትያ ዮኣቄማ

5 ዮኣቄም ካተትያ ዎደ፥ ላይይ አዉ ላታማነ እቼሻ፤ እ የሩሳላመን ታማነ እት ላይ ካተቴዳ። መና ጎዳ ባረ ጾሳ ስንን ኢታባ ኦዳ።✝36:5 ኤር. 22:18-19፤ 26:1-6፤ 35:1-19 6 ባብሎነ ካቲ ናቡካዳናጾረ አ ኦለቲደ፥ ባብሎነ አፋናዉ ናሃስያ ሳንሳላታን ቃቼዳ።✝36:6 ኤር. 25:1-38፤ 36:1-32፤ 45:1-5፤ ዳኔላ 1:1-2 7 ናቡካዳናጾረ ቃይ መና ጎዳ ጌሽሳ ጎልያፐ ሻሉዋ አኪደ፥ ባብሎነ አፊደ፥ ባረ ካትያ ጎለን ዎዳ።

8 ዮኣቄም ሀኔዳ ሀራባይ፥ እ ኦዳ ቱናባይነ እ ኦዳ ኢታባይ ኡባይ እስራኤልያ ካተቱነ ይሁዳ ካተቱ ታርክያ ማጻፋን ጻፈት ኡቴዳ። እ ሀይቂና፥ አ ኮታን አ ናአይ ዮኣኪነ ካተቴዳ።

ይሁዳ ካትያ ዮኣኪና

9 ዮኣኪነ ካተትያ ዎደ፥ ላይይ አዉ ሆስፑና፤ እ የሩሳላመን ሄዙ አግናነ ታሙ ጋላሳ ካተቴዳ። መና ጎዳ ስንን እ ኢታባ ኦዳ።*36:9 ሆስፑና፦ ላይይ አዉ ሆስፑና ዎይ ታማነ ሆስፑና። 2 ካት። 24:8 ጼላ። 10 ላይይ ላመትያ ዎደ ካቲ ናቡካዳናጾረ አሳ ኪቲደ፥ ዮኣኪናነ መና ጎዳ ጌሻ ጎልያን ደእያ አልኦ ሚሻቱዋ አናና እትፐ ባብሎነ አህሴዳ። ያቲደ አ አዉዋ እሻ ሰደቅያሳ ይሁዳ ቦላነ የሩሳላመ ቦላ ካተዬዳ።✝36:10 ኤር. 22:24-30፤ 24:1-10፤ 29:1-2፤ 37:1፤ ህዝ. 17:12፣ 13

ይሁዳ ካትያ ሰደቅያሳ

11 ሰደቅያስ ካተትያ ዎደ፥ ላይይ አዉ ላታማነ እታ፤ እ የሩሳላመን ታማነ እት ላይ ካተቴዳ።✝36:11 ኤር. 27:1-22፤ 28:1-17 12 መና ጎዳ ባረ ጾሳ ስንን እ ኢታባ ኦዳ፤ ቃይ መና ጎዳ ሱንን ትምቢትያ ኦድያ ኤርማሳ ስንን ባረና ካዉሽቤና።

የሩሳላመ ኩንደነ አሳይ ባብሎነ ኦሞደቱሳ

13 ሰደቅያስ አማነታናዳን ባረና ጾሳ ሱንን ጫቀዳ ናቡካዳናጾራ ቦላ ማካሌዳ። መና ጎዳኮ እስራኤልያ ጾሳኮ ስምያዋ አጊደ፥ ባረ ሞርግያ ዞዝሴዳ፤ ባረ ዎዛናካ ሙምሴዳ።✝36:13 ህዝ. 17:15 14 ቃይ ይሁዳ አሳይነ ኡንቱንታ ካለያ ቄሳቱ፥ ኡባካ አማነተናዋንታ ግዴድኖ። ኡንቱንቱ ሀራ ካዉተ አሳይ ኦያ ሸነይያ ኦሳቱዋ ቁሊደ፥ መና ጎዳይ የሩሳላመን ጌሼዳ አ ጌሻ ጎልያካ ቱንሴድኖ።

15 መና ጎዳይ፥ ኡንቱንቱ ማይዛ አዎቱዋ ጾሳይ ባረ አሳዉነ ባረ ጌሻ ጎልያዉ ቃረትያ ድራዉ፥ ባረ ትምቢትያ ኦድያዋንታ ኡንቱንቶ ዛር ዛሪደ ኪቴዳ። 16 ሽን መና ጎዳ ሀንቁ ኡንቱንቱ ቦላ ዎናዋ ጋካናዉነ ኡንቱንቶ ከስ አክያ ሳአይ ያና ጋካናዉ፥ ኡንቱንቱ ጾሳይ ኪቴዳዋንቱ ቦላ ቅሊጬድኖ፥ አ ቃላ ካድኖነ ትምቢትያ ኦድያዋንቱ ቦላ ሚጬድኖ።

17 ሄዋ ድራዉ፥ ጾሳይ ባብሎነ ካትያ ኡንቱንቱ ቦላ ደንደ አሄዳ። ያትና ኡንቱንቱ ያላጋ አቱማ አሳ ጌሻ ጎልያ ግዶን ማሻን ዎዳ፤ ያላጋ አቱማ አሳቶ፥ ዎይ ጌላዮቶ፥ ዎይ ጭማቶ፥ ቃረተናን፥ ጾሳይ ኡንቱንታ ኡባ ናቡካዳናጾራ ኩሽያን አደ እሜዳ።✝36:17 ኤር. 21:1-10፤ 34:1-5 18 ባብሎነ ካቲ ጾሳ ጌሻ ጎልያን ደእያ ሚሻቱዋ ኡባ፥ ዳሩዋነ ላፋ፥ መና ጎዳ ጌሻ ጎልያን ደእያ ሚሻ፥ ካትያ ሚሻነ አ ኦሳንቻቱ ሚሻ ኡባ አኪደ፥ ባብሎነ አፌዳ። 19 ሄዋፐ ጉይያን፥ ባብሎነ ኦላንቻቱ ጾሳ ጌሻ ጎልያ ታማን ጹጊደ፥ የሩሳላመ ድርሳ ግምቢያካ ላሌድኖ። ካትያ ጎልያ ኡባ ታማን ጹጊደ፥ ያን ደእያ አልኦ ሻሉዋ ኡባ ይሴድኖ።

20 ካቲ ማሻፐ ፓላሂደ አቴዳዋንታ ኦሞዲደ ባብሎነ አፌዳ። ፓርሰ ካዉተይ ዎልቃማና ጋካናዉ፥ ኡንቱንቱ አዉነ አ ናናዉ ቆማ ግዴድኖ። 21 ሄዋን መና ጎዳይ ትምቢትያ ኦድያ ኤርማሳ ባጋና ኦዴዳ ቃላይ ፖለቴዳ። ዉርሰን ቢታይ ላፑን ታሙ ላይ ኩመን አሳይ ባይና ሳኣ ግዲደ ሸምፔዳ፤ ሄዌነ፥ ላፑን ላፑን ላይ ሳምባታ ኦደ፥ ጋድያ ሸምፕስያዋ አሳይ አጌዳ ግሻሳ።✝36:21 ኤር. 25:11፤ 29:10

ቅሮሰ አይሁዳቱ ስማናዳን አዛዜዳ

22 ፓርሰ ካቲ ቂሮስ ካተቴዳ ኮይሮ ላይን፥ ትምቢትያ ኦድያ ኤርማሳ ባጋና መና ጎዳይ ሃሳዬዳዋ ፖሌዳ። ፓርሰ ካቲ ቂሮስ ባረ ካዉተ ግዶን ኡባ ሳን ሀዋዳን ያጊደ አዋያናዳንነ ጻፊደ ዎናዳን መና ጎዳይ አ አያና ደንዳ፤ 23 "ፓርሰ ካቲ ቂሮስ ሀዋዳን ያጌ፤ ‘መና ጎዳይ፥ ሳሉዋ ጾሳይ ሀ ሳኣ ካዉተቱዋ ኡባ ታዉ እሜዳ፤ ቃይ ይሁዳን ደእያ የሩሳላመን ታን አዉ ጌሻ ጎልያ ኬጻናዳን ታና ሱንዳ። መና ጎዳ አሳ ግዴዳ ኦንነ ያ ቦ። መና ጎዳይ አ ጾሳይ አናና ግዶ!’ ያጌ" ያጌዳ።✝36:23 ኢሳ. 44:28