እዝራ 1

አይሁዳ አሳይ ባረንቱ ቢታ ስማና ማላ ቂሮስ አዋዬዳ

1 ፓርሰ ካቲ ቂሮስ ካተቴዳ ኮይሮ ላይን፥ ትምቢትያ ኦድያ ኤርማሳ ባጋና መና ጎዳይ ሃሳዬዳዋ ፖሌዳ። ፓርሰ ካቲ ቂሮስ ባረ ካዉተ ግዶን ኡባ ሳን ሀዋዳን ያጊደ አዋያናዳንነ ጻፊደ ዎናዳን መና ጎዳይ አ አያና ደንዳ፤✝1:1 ኤር. 25:11፤ 29:10 2 "ፓርሰ ካቲ ቂሮስ ሀዋዳን ያጌ፤ ‘መና ጎዳይ ሳሉዋ ጾሳይ ሳኣ ካዉተቱዋ ኡባ ታዉ እሜዳ፤ ቃይ ይሁዳን ደእያ የሩሳላመን ታን አዉ ጌሻ ጎልያ ኬጻናዳን ታና ሱንዳ።✝1:2 ኢሳ. 44:28 3 ጾሳ አሳ ግዴዳ ኦንነ ያ ቦ። አ ጾሳይ አናና ግዶ! ህንተንቱ ይሁዳን ደእያ የሩሳላመ ቢደ፥ ያን የሩሳላመን ደእያ መና ጎዳ፥ እስራኤልያ ጾሳ ጌሻ ጎልያ ዛረደ ኬጽተ። 4 ዱማ ዱማ ቢታን ደእያ አሳይ ኡባይ አይሁዳቱዋፐ አቴዳዋንቱ ብራ፥ ዎርቃ፥ ዱማ ዱማ ሚሻቱዋነ መህያ እሚደ ማድኖ፤ ቃይ የሩሳላመን ደእያ ጾሳ ጎለውካ ባረንቱ ሸንያን እምያ እሞታ እምኖ’ ያጌዳ" ያጌ።

5 ሄዋፐ ጉይያን፥ ይሁዳ ዛራቱነ ቢንያማ ዛራቱዋ ካፓቱ፥ ቄሳቱ ነ ሌዋቱ፥ ቃይ ጾሳይ ኡንቱንቱ ዎዛና ደንዳ ኡባቱ የሩሳላመን መና ጎዳ ጎልያ ኬጻናዉ ባናዉ ደንዴድኖ። 6 ቃይ ኡንቱንቱ ሾሩዋን ደእያዋንቱካ ባረንቱ ሸንያን እሜዳዋ ቦላ ጉጂደ፥ ብራ ሚሻነ ዎርቃ ሻሉዋ፥ ሀራ ዱማ ዱማ ሚሻቱዋነ መህያ እሚደ፥ ኡንቱንታ ማዴድኖ። 7 ሄዋ ቦላካ ቃይ ካቲ ቂሮስ ናቡካዳናጾረ የሩሳላመፐ አፊደ ባረ ጾሳቱዋ ጎለን ዎዳ መና ጎዳ ጎልያ ሚሻቱዋ እሜዳ። 8 ፓርሰ ካቲ ቂሮስ ሚሻቱዋ ዎያ ጎልያ ካፑዋ ምትረዳታን ከስሲድነ ፓይድሲደ፥ ይሁዳ ሞድያ ሸሽባጻራ ኩሽያን ሼዳ። 9 ስሜዳ ሚሻ ፓይዱ ሀዋ: ሀታሙ ዎርቃ ሳነቱዋ፥ እት ሻአ ብራ ሳነቱዋ፥ ላታማነ ኡዱፑን ጎሎዶቱዋ፥ 10 ዎርቃፐ ኦሰቴዳ ሀታሙ ሚሻቱዋ፥ ብራፐ ኦሰቴዳ ኦይዱ ጼታነ ታሙ ሚሻቱዋነ እት ሻአ ሀራ ዱማ ዱማ ሚሻቱዋ። 11 ዎርቃ ሚሻቱነ ብራ ሚሻ ፓይዱ ኡባና እቼሹ ሻአነ ኦይዱ ጼታ፤ ሀ ሚሻቱዋ ኡባ ኦሞዱዋን ቤዳ አሳይ ባብሎነፐ የሩሳላመ ስምያ ዎደ ሸሽባጻር አኪደ ዬዳ።