እዝር ሀራ ኦሞደቴዳዋንቱና ስሙሳ
(7:1—10:44)
1 ሄዋፐ ስሚደ፥ ዳሮ ዎድያፐ ጉይያን፥ ፓርሰ ቢታን አርጸክስስ ካተቴዳ ዎድያን እዝራ ጌተትያ እት አሳይ ደኤዳ። እ ሳራያ ናኣ፤ ሳራይ አዛርያ ናኣ፤ አዛሪ ህልቂያ ናኣ፤ ህልቂ ሻሉማ ናኣ፤ 2 ሻሉም ጻዶቃ ናኣ፤ ጻዶቀ አህጹባ ናኣ፤ አህጹብ አማርያ ናኣ፤ 3 አማር አዛርያ ናኣ፤ አዛሪ ማራዮታ ናኣ፤ ማራዮት ዛራህያ ናኣ፤ 4 ዛራሂ ኡዛ ናኣ፤ ኡዝ ቡቃ ናኣ፤ 5 ቡቅ አብሹአ ናኣ፤ አብሹእ ፒንሃሳ ናኣ፤ ፒንሃስ ኤልኣዛራ ናኣ፤ ኤልኣዛረ ቄሰ ኡባቱዋ ካፑዋ አሮና ናኣ።
6 ሀ እዝር ባብሎነፐ ፑደ ዬዳ። እ መና ጎዳይ፥ እስራኤልያ ጾሳይ እሜዳ ሙሴ ህግያ ሎይ ጻናዬዳ ኤራንቻ ጻፍያ። መና ጎዳ አ ጾሳ ኩሺ አ ቦላ ደእያ ድራዉ፥ እ ኦቼዳዋ ኡባ ካቲ አዉ እሜዳ። 7 እስራኤልያ አሳፐ አማሬዳዋንቱነ ቃይ ቄሳቱ ዋፐ፥ ሌዋቱዋፐ፥ ማዝሙርያ የጽያዋንቱፐ፥ ፐንግያ ናግያዋንቱፐነ ጌሻ ጎልያ ቆማቱዋፐ አማሬዳዋንቱ ካቲ አርጸክስስ ካተቴዳ ላፑን ላይን እዝራና እትፐ ፑደ የሩሳላመ ቤድኖ። 8 ካቲ ካተቴዳ ላፑን ላይን እቼሻን አግናን እዝር የሩሳላመ ጋኬዳ። 9 ኮይሮ አግናን ኮይሮ ጋላሳን ባብሎነፐ ፑደ ቡሳ ዶሚደ፥ እቼሻን አግናን ኮይሮ ጋላሳን የሩሳላመ ጋኬዳ። አያዉ ጎፐ፥ አ ጾሳ ሎኦ ኩሺ አ ቦላን ደኤ። 10 ሄዋ ጻላላ ግደናን እዝር መና ጎዳ ህግያ ጻናያናዉነ ኦናዉ፥ ቃይ እስራኤልያን አ ዎጋነ አ ፕርዳ ታማርሳናዉ ባረ ዎዛና ጊግስ ዎዳ።
ካቲ አርጸክስስ እዝራዉ ጻፊ እሜዳ ዳብዳቢያ
11 መና ጎዳይ እስራኤልያዉ እሜዳ ህግያ ጻናዪደ፥ ሎይ ኤርያ ቄሰነ ጻፍያ ግድያ እዝራዉ ካቲ አርጸክሲሰ ዱቅ እሜዳ ዳብዳቢ ሀዋዳን ያጌ፦
12 "ካተቱዋ ካትያ አርጸክስሳፐ፥ ቄስያነ ሳሉዋ ጾሳ ህግያ ሎይ ጻፍያ እዝራ፥ ሳሮተይ ነዉ ግዶ!
13 "ታ ካዉተ ግዱዋን ደእያ እስራኤልያ አሳፐ ኦንነ፥ ቄሳቱ ዋፐ ዎይ ሌዋቱዋፐ ግዶፐነ፥ የሩሳላመ ባናዉ ኮይያ አሳይ ኡባይ ኔናና እትፐ ባናዳን ታን ኦዳድ። 14 ታንነ ታናና ዞረትያ ላፑን አሳቱ እትፐ ግዲደ፥ ኔን ነ ኩሽያን ደእያ ጾሳ ህግያዳን፥ ባደ ይሁዳንነ የሩሳላመን ደእያ ሀኖታይ አይ ማለንቶ ኦቻናዳን ኔና ኪቴቶ። 15 አዉ ደእያ ሳአይ የሩሳላመን ደእያ እስራኤልያ ጾሳዉ፥ ታን ካቲነ ታናና ዞረትያ አሳቱ ኑ ሸንያን እሜዳ ዎርቃነ ብራ እሞታቱዋ ኔን አካደ ባ። 16 ሄዋ ቦላካ ቃይ ኔን ባብሎነ ቢታ ኩመንፐ ደሜዳ ብራነ ዎርቃ ኡባ፥ ቃይ አሳይነ ቄሳቱ የሩሳላመን ደእያ ባረንቱ ጾሳ ጎልያዉ ባረንቱ ሸንያን እሜዳ እሞታካ አካደ ባ። 17 ሀ ሚሻን ኮሩማቱዋ፥ ዶርሳ ኦርገቱዋነ ዶርሳ ማራቱዋ፥ ቃይ ካ ያርሾነ ኡሻ ያርሾ ሻማነንቶ ኤራ፥ የሩሳላመን ደእያ ህንተንቱ ጾሳ ጎልያን ያርሽያ ሳኣን ያርሻ።
18 "ሄዋፐ ፓላሂደ አቴዳ ብራነ ዎርቃ ኔንነ ኔናና ደእያ ነ ቢታ አሳቱ ኦናዉ ኮይያዋ ህንተንቱ ጾሳ ሸንያዳን ኦተ። 19 ቃይ ህንተንቱ ጾሳ ጎልያ ግዶን ኦሰትያ ኦሶ ህንተንቱ ጎኤታና ማላ፥ ኑን ነዉ እሜዳ ሚሻቱዋ ኡባ የሩሳላመ ጾሳ ስንን ዎ። 20 ሀዋፐ ሀራባይ ህንተንቱ ጾሳ ጎልያዉ ኮሽያባይ አያነ ግዶፐ፥ ሄዎ ኮሽያ ሻሉዋ ካትያ ጎለን ሻሉዋ ዎያ ጎልያፐ አካናዉ ዳንዳያሳ።
21 "ሄዋ ድራዉ፥ ሀእ ታን ካቲ አርጸክስስ ኤፍራጺሳ ሻፋፐ አዋይ ዉልያ ባጋ ቢታን ደእያ ሻሉዋ ጎለን አዎተይ ደእያ ኡባቶ ሀ አዛዙዋ እማድ። ቄስያ ግድያነ ሳሉዋ ጾሳ ህግያ ሎይ ጻፍያ እዝር ህንተንታ ኦችያዋ አያነ ግዶፐነ አዉ እምተ። 22 ቃይ ሄዙ ሻአነ ኦይዱ ጼቱ ኪሎ ግራመ ዴጽያ ብራ፥ እት ጼቱ ኩንታለ ዛርጋ፥ ላኡ ሻአ ሊትሮ ዎይንያ ኤሳነ ላኡ ሻአ ሊትሮ ዎጋራ ዛይትያ፥ ቃይ ኮሽያ ኬሻ ማጽንያና ኡባ እዝራዉ እምተ። 23 ካትያ ቦላነ ካትያ ናና ካዉተ ቦላ ሀንቁ ዬና ማላ፥ ሳሉዋ ጾሳይ አዛዜዳዋ ኡባ ሳሉዋ ጾሳ ጎልያዉ አያነ አሸናን እምተ። 24 ቃይ ቄሳቱ ዋፐ፥ ሌዋቱዋፐ፥ ማዝሙርያ የጽያዋንቱፐ፥ ፐንግያ ናግያዋንቱፐ፥ ጾሳ ጎልያ ቆማቱዋፐነ ዱማ ዱማ ኦሱዋ ኦያ አሳ ኡባፐ ህንተንቱ ጊራነ ቃራጻ አካናዉ ህንተንቶ አይ ማትነ ባዋ።
25 "ኔኖ እዝራ፥ ኔን ቃይ፥ ነዉ ጾሳይ እሜዳ ኤራተዳን ኤፍራጺሳ ሻፋፐ አዋይ ዉልያ ባጋ ቢታን ደእያ ነ ጾሳ ህግያ ኤርያ አሳ ቦላ ፕርዳና ማላ፥ ዳናቱዋነ ፕርድያዋንታ ሱን። ቃይ ሄ ህግያ ኤረናዋንቱ ደኦፐ፥ ኡንቱንቱ ታማርስተ። 26 ነ ጾሳ ህግያዉነ ካትያ ህግያዉ አዛዘተና ኦንነ ደኦፐ፥ እ ኤለካ ሀይቁዋን፥ የደሳን፥ አ ሻሉዋ ቦንቂያዋን ዎይ ቃሹዋን ሙረቶ" ያጌ።
እዝር ጾሳ ጋላቴዳ
27 የሩሳላመን ደእያ መና ጎዳ ጎልያ ሀዋዳን ሎይና ማላ፥ ካትያ ዎዛናን ሀ ቆፋ ዎዳ መና ጎዳዉ፥ ኑ አዎቱዋ ጾሳዉ ጋላታይ ግዶ! 28 ቃይ ካትያ፥ ካትያና ዞረትያዋንቱነ አናና ኦያ ዎልቃማ ካፓቱዋ ኡባ ስንን ባረ አገና ሲቁዋ ታዉ በሴዳ መና ጎዳ፥ ታ ጾሳ ኩሺ ታናና ደእያ ድራዉ፥ ታን ምነታድ። ቃይ እስራኤልያ ካፓቱዋፐ ታናና ፑደ ቢደ፥ የሩሳላመ ባና ማላ ሺሻይ።