እዝራ 5

ጌሻ ጎልያ ኦሱ ዛረ ዶመቱሳባ

1 ሄ ዎድያን ትምቢትያ ኦድያዋንቱ ሃገነ እዶ ናአይ ዛካራስ ይሁዳንነ የሩሳላመን ደእያ አይሁዳ አሳቶ እስራኤልያ ጾሳ ሱንን ትምቢትያ ኦዴድኖ። 2 ሳላትያላ ናአይ ዛሩብ-ባቤልነ ዮጸዴቃ ናአይ ኢያሱ ደንዲደ፥ የሩሳላመን ደእያ ጾሳ ጎልያ ዛረደ ኬጻናዉ ዶሜድኖ። ትምቢትያ ኦድያዋንቱካ ኡንቱንቱና እትፐ ግዲደ፥ ኡንቱንታ ማዴድኖ።✝5:2 ሃገ 1:12፤ ዛካ. 4:6-9

3 ሄ ዎደ፥ ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናያ ግያዌ፥ ሻታርቦዝና ግያዌነ ኡንቱንቱና ኦያዋንቱ ዪደ፥ "ህንተንቱ ሀ ጎልያ ኬጻና ማላነ ፖላና ማላ፥ ህንተንቶ ኦኔ ኦዴዳዌ?" ያጊደ ኦቼድኖ። 4 ኡንቱንቱ ቃይ፥ "ሀዋ ግምቢያ አሳቱዋ ሱንይ ኦና ኦኔ?" ያጊደ ኦቼድኖ። 5 ሽን ሄ የዉ ዳርዮሳኮ ጋክና፥ አ ማታፐ ዳብዳቢ ጻፈቲደ ያና ጋካናዉ፥ ኡንቱንቱ ባረንቱ ኦሱዋ አግበይክኖ፤ አያዉ ጎፐ፥ ኡንቱንቱ ጾሳ አይፊ አይሁዳ ጭማቱዋ ቦላን ደኤ።

6 ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናይ፥ ሻታርቦዝንነ ኡንቱንቱና ኦያዋንቱ ካትያ ዳርዮሳዉ ኪቴዳ ዳብዳቢ 7 ሀዋዳን ያጌ፦

"ካትያ ዳርዮሳ፥ ኩመን ሳሮተይ ነዉ ግዶ!

8 "ኑን ይሁዳ ጋድያን ደእያ ዎልቃማ ጾሳ ጎልያኮ ቤዶ። ሄ ሹቻን ኬጸቴዳ፤ ቃይ ግምቢያ ጋርሳንካ ምይ ዎዳ። ኦሱካ ዎልቃማ አኬካንነ ኤሌል ኦሰቲደ ደኤ።

9 "ኡንቱንቱ ጭማቱዋ ኑን ሀዋዳን ያጊደ ኦቼዶ፤ ‘ሀ ጎልያ ኬጻና ማላነ ፖላና ማላ፥ ህንተንቶ ኦኔ ኦዴዳዌ?’ ያጊደ ኦቼዶ። 10 ቃይ ነዉ ጻፊደ ኤርሳና ማላ፥ ኡንቱንታ ሀ ኪታን ካለያዋንቱ ሱንይካ ኦነንቶ ኦቼዶ።

11 "ኡንቱንቱ ሀዋዳን ያጊደ ዛሬድኖ፤ ‘ኑን ሳሉዋነ ሳኣ ጾሳ ቆማቱዋ፤ ቃይ ኑን እስራኤልያ ካትያ ግታይ ዳሮ ላይፐ ካሰ ባጋን ኬጽ ፖሌዳ ጌሻ ጎልያ ዛረ ኬጸቶ። 12 ኑ አዎቱ ሳሉዋ ጾሳ ሀንቀዳ ድራዉ፥ እ ኡንቱንታ ባብሎነ ካትያ ናቡካዳናጾራ ኩሽያን አ እምና፥ እ ሀ ጎልያ ኮል አጌዳ፤ አሳካ ባብሎነ ጋድያ ኦሞዶ አኪደ ቤዳ።✝5:12 2 ካታ. 25:8-12፤ 2 ኦዱዋ 36:17-20፤ ኤር. 52:12-15

13 " ‘ሽን ባብሎነ ካቲ ቂሮስ ባረ ካተቴዳ ኮይሮ ላይን፥ ጾሳ ጎልያ፥ ሀዋ ዛረ ኬጻና ማላ፥ አዋዩዋ ከሴዳ።✝5:13 እዝራ 1:2-11 14 ናቡካዳናጾረ የሩሳላመን ደእያ ጾሳ ጎልያፐ አክ አፊደ፥ ባብሎነ ቢታን ደእያ ባረ ጾሳቱዋ ጎለን ዎዳ ዎርቃነ ብራ ሚሻቱዋካ ቂሮስ ዛሪደ የዴዳ።

" ‘ሄ ሚሻቱ ካቲ ቂሮስ ይሁዳ ቢታ ሞዳና ማላ ዶሬዳ ሸሽባጻራ ኩሽያን ሼቴድኖ። 15 ካቲ ቂሮስ አ ሀዋዳን ያጌዳ፤ "ሀ ሚሻቱዋ አካ አፋደ የሩሳላመን ደእያ ጌሻ ጎልያን ዎ፤ ቃይ ጾሳ ጎልያካ ካሰ እ ደእያ ሳኣን ኬጻ" ያጌዳ። 16 ሄዋፐ ጉይያን፥ ሸሽባጻር ዪደ፥ ጾሳ ጎልያ የሩሳላመን ባሴዳ። እ ሀእካ ዉርቤናዋ ግዶፐነ፥ ሄ ዎደፐ ዶሚደ፥ ኬጸቲደ ደኤ’ ያጌድኖ።

17 "ሀእ ስም ሀ የዉ ካትያ ናሸችያባ ግዶፐ፥ አነ ካቲ ቂሮስ ሀ ጎልያ የሩሳላመን ኬጻና ማላ፥ ቱሙካ አዋዩዋ ከሴደንቶ ኤራናዉ ካሰ አዳ ባብሎነ ካተቱዋ ታርክያ ማዝጎባይ ኮየቲደ ጼለቶ። ሄዋፐ ጉይያን፥ ካቲ ኑን ሀ የዉዋ ዋታናዉ በስንቶ ቃቼዳ ቆፋ ኑዉ ኪቶ" ያጊደ ጻፌድኖ።