እዝራ 6

ቂሮስ ካሰ አዛዜዳ አዛዙ ኮየቲደ ቤቴዳ

1 ሄዋ ድራዉ፥ ካቲ ዳርዮስ አዛዝና፥ ባብሎነ ሚሻቱዋ ዎያ ጎለን ደእያ ታርክያ ማዝጋባቱዋ ኡንቱንቱ ኮዬድኖ። 2,3 ሽን ባብሎነ ካታማን ግደናን ደእሽን፥ ሜዶና ጋድያን ደእያ አህምታ ግያ ካታማን እት ጻጸቶ ማጻፋይ ቤቴዳ። ሄ ማጻፋን ጻፈቴዳባይ ሀዋዳን ያጌ፤*6:2-3 አህምታ፦ ሀ ካታማይ ቃይ ኤክባታና ጌተቴ። "ዎደናዉ ዶገተናዳን፥ ካቲ ቂሮስ ባረ ካተቴዳ ኮይሮ ላይን፥ የሩሳላመን ደእያ ጾሳ ጎልያ ድራዉ፥ ሀዋዳን ያግያ አዋዩዋ ከሴዳ፤ ጾሳ ጎልያ ግድያ፥ ያርሹዋ ያርሽያ ሳአይ ዛረደ ኬጸቶ፤ አ ባሱካ ባሰቶ። ሄ ጌሻ ጎሊ ኡሱፑን ታሙ ዋ አዱሳነ ኡሱፑን ታሙ ዋ አካ ግዶ። 4 ቃይ ሄዙ ማራን ዎልቃማ ሹቻይ ዎና፥ ሄ ማራቱዋ ቦላን ቦላና እት ማራ ምይ ዎ። ሄዎ ኮሽያ ሚሻይ ኡባይ ካትያ ጎለን ሚሻ ዎያ ጎልያፐ እመቶ። 5 ናቡካዳናጾረ፤ ‘የሩሳላመን ደእያ ጾሳ ጎልያፐ ባብሎነ አሄዳ ጾሳ ጌሻ ጎልያ ዎርቃነ ብራ ሚሻቱ ጾሳ ጎልያዉ ጉየ የሩሳላመ ስሚደ፤ ጾሳ ጌሻ ጎልያን ደእኖ’ ያጌዳ።

ካትያ ዳርዮስ ኦሱ ኦሰታናዳን አዛዜዳ

6 "ህንተንቶ ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናያ፥ ሻታርቦዝናነ ኡንቱንቱና ኦያ ኡባደ፥ ሄ ጎልያኮ ሺቆፕተ። 7 ሀ አሳቱ ኬጽያ ጾሳ ጎልያ ኦሶ በ ግዶፕተ። አይሁዳቱዋ ሞድያዌነ አይሁዳ ጭማቱ ጾሳ ጎልያ ካሰ እ ደእያ ሳኣን ዛሪደ ኬጽኖ።

8 "ቃይ ሀ አይሁዳ ጭማቱ ጾሳ ጎልያ ኬጽያ ዎደ፥ ኡንቱንቱ ኦያ ኪታይ ኤቀና ማላ፥ ኡንቱንቶ ኮሽያ ሻሉዋ ኡባ ኤፍራጺሳ ሻፋፐ አዋይ ዉልያ ባጋ ቢታፐ ሺሼዳ ካትያ ጊራ ሚሻፐ ህንተንቱ ኡንቱንቶ እማና ማላ፥ ታን አዛዛድ። 9 የሩሳላመን ደእያ ቄሳቱ ሳሉዋ ጾሳዉ ጹግያ ያርሹዋ ያርሻናዉ ኮሽያባይ ኮሩማቱዋ ግድና፥ ዶርሳ ኮልያ ግድና ቃይ ዶርሳ ማራቱዋ ግዶፐነ ኡንቱንቶ እምተ። ቃይ አያነ ፓጭሰናን ኡንቱንቱ ኮይያ ዛርጋ፥ ማጽንያ፥ ዎይንያ ኤሳነ ዛይትያ ኡንቱንቶ ሀቼ ሀቼ እምተ። 10 ሄዋ ህንተንቱ እምያዌ ኡንቱንቱ ሳሉዋ ጾሳ ሎይ ናሸችያ ያርሹዋ ያርሻናሳነ ካትያነ አ ናና ደኡዋ ድራዉካ ዎሳናዳና።

11 "ሀ አዋዩዋ ላምያ ኦንነ ደኦፐ፥ ‘አ ጎልያ ቱሳ ሾዲደ፥ ሄ ቱሳ ጼራ ፖጼዳዋን ሉከቲደ ሀይቆ፤ አ ኬይካ ፕቱዋ ኦልያ ሳኣ ግዶ’ ጋደ ጉጃደካ አዛዛድ። 12 ሀ አዛዙዋ ላማናዉነ ቃይ የሩሳላመን ደእያ ጾሳ ጎልያ ኮላናዉ ኩሽያ ደንያ አይ ካትያ ዎይ አሳ ግድና፥ ባረ ሱንይ ጼሰታና ማላ የሩሳላመ ዶሬዳ ጾሳይ አ ይሶ። ታን ዳርዮስ ሀዋ አዛዛድ። ሀ የዉዋ አሳይ ኡባይ ምኖተን ፖሎ" ያጌ።

ጌሻ ጎልያ አንጁዋ ባላ

13 ሄዋፐ ጉይያን፥ ኤፍራጺሳ ሻፋፐ አዋይ ዉልያ ባጋ ቢታ ሞድያ ታታናይ፥ ሻታርቦዝንነ ኡንቱንቱና ኦያ ኡባቱ ካቲ ዳርዮስ አዛዜዳዋዳን ምኖተን ኦደ ፖሌድኖ። 14 ሄዋ ድራዉ፥ አይሁዳ ጭማቱ ባረንቱ ኪታ አገናን ኦድኖ፤ ቃይ ትምቢትያ ኦድያዌ ሀዌነ እዶ ናአይ ዛካራስ ኦዴዳ ቃላንካ ምንሴድኖ። እስራኤልያ ጾሳይ አዛዜዳዋዳንነ ፓርሰ ቢታ ካተቱ ቂሮስ፥ ዳርዮስነ አርጸክሲሰ አዋዬዳዋዳን ጌሻ ጎሊ ኬጸቲደ ዉሬዳ።✝6:14 ሃገ 1:1፤ ዛካ. 1:1 15 ዳርዮስ ካተቴዳ ኡሱፑን ላይን አዳረ ጌተትያ አግናን ሄዘን ጋላሳን፥ ጎልያ ኪታይ ፖለቴዳ።

16 ሄዋፐ ጉይያን፥ እስራኤልያ አሳይ፥ ቄሳቱ፥ ሌዋቱነ ኦሞዱዋፐ ስሜዳ አሳይ ኡባይ ጾሳ ጎልያ አንጁዋ ባላ ናሸቻን ቦንቼድኖ። 17 ሄ ጾሳ ጎልያ አንጁዋ ባላ ቦንችያ ዎደ፥ ኡንቱንቱ እት ጼቱ ኮሩማቱዋ፥ ላኡ ጼቱ ዶርሳ ኦርገቱዋነ ኦይዱ ጼቱ ዶርሳ ማራቱዋ ያርሼድኖ፤ ቃይ ናጋራ ያርሾ ታማነ ላኡ እስራኤልያ ዛራቱዋ ፓይዱዋን ታማነ ላኡ ዴሻ ኦርገቱዋካ ያርሼድኖ። 18 ሙሴ ማጻፋን ጻፈቴዳዋዳን፥ የሩሳላመን ደእያ ጾሳዉ ኦና ማላ፥ ቄሳቱ ዋ ባረንቱ ማራዳንነ ሌዋቱዋካ ኡንቱንቱ ዘረዳን ዎድኖ።

ፓስጋ ባላ

19 ኦሞዱዋፐ ስሜዳ አሳቱ ኮይሮ አግናን ታማነ ኦይደን ጋላሳን ፓስጋ ባላ ቦንቼድኖ።✝6:19 ከሳ 12:1-20 20 ቃይ ቄሳቱ ነ ሌዋቱ ባረና ጌሼድኖ፤ ሄዋ ድራዉ፥ ኡንቱንቱ ኡባይካ ጌሻ። ሄዋፐ ጉይያን፥ ሌዋቱ ኦሞዱዋፐ ስሜዳ ኡባዉ፥ ቄሳቶነ ባረንቱ ሁጲያዉ ፓስጋ ዶርሳ ሹኬድኖ። 21 ኦሞዱዋፐ ስሜዳ እስራኤልያ አሳይነ አይሁዳ ግደና አሳቱ ኦያ ቱናተፐ ባረንታ ሻክ፥ መና ጎዳኮ፥ እስራኤልያ ጾሳኮ ስሜዳ አሳይ ኡባይ ፓስጋ ሜድኖ። 22 ቃይ ኡንቱንቱ ላፑን ጋላሳዉ ማጋገ ኡክ ባላ ናሸቻን ቦንቼድኖ፤ አያዉ ጎፐ፥ መና ጎዳይ ኡንቱንቱ ናሸቼዳ፤ ቃይ መና ጎዳ፥ ሄዌካ እስራኤልያ ጾሳ ጎልያ ኡንቱንቱ ኬጺደ ፖላና ማላ፥ አሶረ ካትያ ቆፋ ጾሳይ ላምና፥ ካቲ ኡንቱንታ ማዴዳ።