1 ሶሎሞነ መና ጎዳ ጌሻ ጎልያ ኪታ ኡባ ፖሌዳዋፐ ጉይያን፥ አ አዉ ዳዊተ ጾሳዉ ዱማይ ዎዳ ብራ፥ ዎርቃነ ሀራ ሚሻቱዋ ኡባ አሂደ፥ ጾሳ ጌሻ ጎልያ ሚሻ ምንጅያሳን ዎዳ።
2 ሄዋፐ ጉይያን፥ ካቲ ሶሎሞነ መና ጎዳ ቃላ ጫቁዋ ታቦታ ዳዊታ ካታማፐ፥ ጽዮነፐ አሀናዳን እስራኤልያ ጭማቱዋ፥ ዛራቱዋ ኡባ ካፓቱዋነ እስራኤልያ ጎልያ አሳቱዋ ካለያዋንታ የሩሳላመ ካታማ ሺሼዳ። 3 እስራኤልያ አሳይ ኡባይ ላፑን አግናን፥ ዳስያ ባላይ ቦንቼትያ ዎደ፥ ካትያኮ ሺቄዳ። 4 እስራኤልያ ጭማቱ ኡባይ ጋካናዉ፥ ሌዋቱ ታቦታ ደንድኖ። 5 ሌዋቱነ ቄሳቱ ታቦታ፥ ጾሳ ጋከትያ ዱንካንያነ ዱንካንያ ግዶን ደእያ ጌሻ ሚሻቱዋ ኡባ ቶኪደ አሄድኖ። 6 ካቲ ሶሎሞንነ አናና እትፐ ደእያ እስራኤልያ ያአይ ኩመንይ ታቦታ ስንን ሺቂደ፥ ፓይዳናዉ ዳንዳየተና፥ ጮራ ዶርሳነ መህያ ያርሼድኖ።
7 ሄዋፐ ጉይያን፥ ቄሳቱ መና ጎዳ ቃላ ጫቁዋ ታቦታ ጌሻ ጎልያዉ ግዶ ጌሻ ቆልኡዋ፥ ኡባፐ አያ ጌሻ ሳኣ ግያ ሳኣ አሂደ፥ ክሩበቱዋ ምስለቱ ቀፈቱዋፐ ጋርሳ ባጋና ዎድኖ። 8 ምጨት ኡቴዳ ክሩበቱዋ ቀፈቱ ታቦታነ ታቦታ ቶክያ ካሱዋ ካሜድኖ። 9 ካሶቱ ሎይ አዱሳ ግድያ ድራዉ፥ ኡንቱንቱ ጼራይ ኡባፐ አያ ጌሻ ሳኣ ስንን ደእያ ጌሻ ሳኣን ቤታናዉ ዳንዳዬ፤ ሽን ጌሻ ሳኣፐ ካረና ቤተና። ኡንቱንቱ ሀቼ ጋካናዉ፥ ሄ ሳኣን ደኢኖ። 10 እስራኤልያ አሳይ ግብጼ ጋድያፐ ከሴዳ ዎደ፥ መና ጎዳይ ኡንቱንቱና ቃላ ጫቁዋ ጫቀቴዳ ሲና ደርያን ሙሴ ዎዳ ላኡ ማሰቴዳ ሹቻቱዋፐ አትና፥ ታቦታ ግዶን ሀራባይ አያይነ ባዋ።
11-14 ሄ ሳኣን ደእያ ቄሳቱ ኡባቱ ባረንቱ ኦያ ሳኣን ሳኣን ሻከተናን፥ እትፐ ባረንታ መና ጎዳዉ ዱማይ ዎድኖ። ማዝሙርያ የጽያ ሌዋቱ ኡባቱ፥ አሳፈ፥ ሄማንነ ይዱቱን፥ ኡንቱንቱ ናናይነ ኡንቱንቱ ዳቦቱ ሱፍያ ግያ ማዩዋ ማዬድኖ። ሄ ማዩዋ ማዪደ፥ ዳላቱዋ፥ ዲቱዋነ ማስንቆቱዋ ኦይቂደ፥ ያርሽያ ሳፐ አዋይ ዶልያ ባጋና ኤቄድኖ፤ ጼታነ ላታሙ ቄሳቱ ጹሩምባቱዋ ፑናናዉ ኡንቱንቱና እትፐ ኤቄድኖ። ኡንቱንቱ ኡባይ ጹሩምባቱዋ ፑኒደ፥ ዳላቱዋ ቃደ፥ ዲቱዋ ዲጺደነ ሀራ ካእያ ሚሻቱዋን ካኢደ፥
"መና ጎዳይ ሎአ!
አገና አ ሲቁ መናዋ"
ያጊደ መና ጎዳ ሳቤድኖ።
ቄሳቱ ጌሻ ጎልያፐ ከስያ ዎደ፥ ሻሪ ጾሳ ጌሻ ጎልያ ኩሜዳ፤ ሄ ሻርያ ጋሱዋን ቄሳቱ ባረንቱ ኦሱዋ ኦናዉ ዳንዳይበይክኖ፤ አያዉ ጎፐ፥ ጾሳ ቦንቹ ጾሳ ጌሻ ጎልያ ኩም ኡቴዳ።
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)