2 ኦዱዋ 22

ይሁዳ ካትያ አካዝያሳ

1 አራባቱ ዪደ ዮራማዉ ባይራ ናና ኡባቱዋ ዎዳ ድራዉ፥ የሩሳላመ አሳይ ዮራማ ናኣ ኡባፐ ቴፋ አካዝያሳ አ ኮታን ካተዬድኖ። ሄዋ ድራዉ፥ ዮራማ ናአይ አካዝያስ ካዉተ ዶሜዳ። 2 አካዝያስ ካተትያ ዎደ፥ ላይይ አዉ ኦይታማነ ላኣ፤ እ የሩሳላመን እት ላይ ካተቴዳ። አ አት ሱንይ አታሎ፤ አ ኦምራዉ ናኣ ናቶ።*22:2 ኦይታማነ ላኡዋ፦ አዉ ላይይ ላታማነ ላኡዋ ዎይ ኦይታማነ ላኡዋ። 2 ካት። 8:26 ጼላ።

3 አካዝያስ ኢታተን ባናዳን አ አታ አ ዞሬዳ ድራዉ፥ እካ አካባ ሶይ አሳ ኦግያን ሀመቴዳ። 4 አ አዉ ሀይቄዳዋፐ ጉይያን፥ አካባ ሶይ አሳይካ አ ዞርያ ድራዉ፥ አካባ ሶይ አሳዳን እካ መና ጎዳ ስንን ኢታባ ኦዳ። ያቲደ አ ዮ ጋሶ ግዴድኖ። 5 አካዝያስ አካባ ሶይ አሳ ዞርያ ካሊደ፥ አካባ ናኣ እስራኤልያ ካትያ ዮራማና እትፐ፥ ሶርያ ካትያ ሀዛኤላ ኦላናዉ ጋላኣደን ደእያ ራሞታ ጌተትያ ካታማ ቤዳ። ሶርያ አሳቱ ዮራማ ጫዴድኖ። 6 ሶርያ ካትያ ሀዛኤላና እ ኦለትያ ዎደ፥ ሶርያ አሳቱ አ ራሞታን ጫዴዳ ጫቻ ፓ አካናዉ እዝራኤላ ካታማ ስሜዳ። ሄዋፐ ጉይያን፥ ዮራማ ናአይ፥ ይሁዳ ካቲ አካዝያስ አካባ ናኣ ዮራማ ጫደቴዳዋ ኦቻናዉ ዱገ እዝራኤላ ካታማ ቤዳ።

7 አካዝያስ ዮራማኮ ቤዳዌ አካዝያሳዉ ሀይቆ ግዳናዳን መና ጎዳይ ኦዳ። አካዝያስ ዮራማ በእሽን፥ አካባ ዛርያ ይሳናዳን መና ጎዳይ ዶሬዳ ንምሻ ናኣ ዬሀ ሞካናዉ ላኡ እትፐ ከሴድኖ። 8 ዬሁ አካባ ዛርያ ቦላ ፕርድያዋ ፖሌዳ ዎደ፥ ይሁዳ ካፓቱዋነ አካዝያሳ ማድያ አ እሻቱዋ ናና ደሚደ ዎዳ። 9 ቃይ ዬሁ አካዝያሳ ኮዬዳ፤ ሳማርያን ቆሰት ኡቴዳዋ አ አሳቱ ደሜድኖ፤ ዬሁኮ አሂደ ዎደ፥ "ባረ ኩመን ዎዛናፐ መና ጎዳ ኮዬዳ ዮሳፌጻ ናኣ" ያጊደ ሞጌድኖ።

ሄዋ ድራዉ፥ አካዝያሳ ሶ አሳፐ ካዉተ ኦይቃናዉ ዳንዳይያዌ ኦንነ ባዋ።

ይሁዳ ካታቶ አታሎ

10 አካዝያሳ ዳያ አታላ ባረ ናአይ ሀይቄዳዋ በኤዳ ዎደ፥ ደንዳደ ይሁዳ ካትያ ዛርያ ኡባ ይሳዱ። 11 ሽን ካትያ ናታ ይሆሸባአ፥ ሀይቃናዉ ደእያ ካትያ ናና ግዶፐ አካዝያሳ ናኣ ዮኣሻ ዉኣደ አካዱ። አነ አ ንያኖ ሂጻ ጎለን ቆሳዱ። ሄዋዳን ኦደ፥ አታላ ናኣ ዎናዳን፥ ካትያ ዮራማ ናታ፥ አካዝያሳ ምቻታ፥ ቄስያ ዮዳሄ ማቻታ፥ ይሆሸባአ አ ቆሳዱ። 12 አታላ ቢታ ሞድያ ዎደ ኡባን፥ ናአይ ኡንቱንቱ ማታን ጾሳ ጌሻ ጎልያን ኡሱፑን ላይ ቆሰቲደ ኡቴዳ።