2 ኦዱዋ 2

ሶሎሞነ ጌሻ ጎልያ ኬጻናዉ ጊግሴዳ

1 ሶሎሞነ መና ጎዳ ሱንዉ ጌሻ ጎልያነ ባረዉ ካትያ ጎልያ ኬጻናዉ ሀልቼዳ። 2 ሄዋ ድራዉ፥ ሶሎሞነ ቶክያዋ ቶሳናዉ ላፑን ታሙ ሻአ አሳቱዋነ ገዝያን ሹቻ ቆአናዉ ሆስፑን ታሙ ሻአ አሳቱዋ ዶሬዳ፤ ቃይ ኡንቱንታ ዎችያ ሄዙ ሻአነ ኡሱፑን ጼቱ አሳቱዋ ኡንቱንቱ ቦላ ሱንዳ።

3 ሄዋፐ ጉይያን፥ ሶሎሞነ ጺሮሳ ካትያ ኪራማዉ ኪታ ኪቲደ፥ "ታ አዉ ዳዊተ ባረዉ ካትያ ጎልያ ኬጻናዉ ኔን ዝጋ የዴዳዋዳን፥ ታዉካ የዳ። 4 ሀእ ታን መና ጎዳ ታ ጾሳ ሱንዉ ጌሻ ጎልያ ኬጻናዉ ሀናይ። ታን ሳዉዋ ቶሽኩ ግያ እጻና ጩዋያናዉ፥ ኡባ ዎደ ጾሳ ስንን ኡክ ዎናዉነ ኡባ ገደ ጉራነ ኦማርሳ፥ ሳምባታ ጋላሳቱዋን፥ አግናይ ጼርያ ዎደቱዋንነ ጾሳ ኑ ጾሳ ባላ ጋላሳቱዋን ጹግያ ያርሹዋ ያርሻናዉ፥ ሄ ጌሻ ጎልያ ዱማያና። እስራኤልያ አሳይ መናዉ ኦናዳን አዛዘቴዳ ኦሶቱ ሀዋንታ።

5 "ኑ ጾሳይ ሀራ ጾሳቱዋ ኡባፐ ዎልቃማ ግድያ ድራዉ፥ ታን ኬጻናዉ ሀንያ ጌሻ ጎሊ ዎልቃማ። 6 ሽን አዉ ጌሻ ጎልያ ኬጻናዉ ዳንዳይያዌ ኦኔ? አያዉ ጎፐ፥ ሳሉዋፐ ቃ ሳሉካ አዉ ግዳናዉ ዳንዳየና! ያትና፥ ታን አ ስንን ያርሹዋ ያርሻናፐ አትና፥ ታን አዉ ጌሻ ጎልያ ኬጻናዉ ኦኔ?✝2:6 1 ካታ. 8:27፤ 2 ኦዱዋ 6:18

7 "ሀእካ አሌቂያዋንታ ከስያ ኪታ፥ ዎርቃ፥ ብራ፥ ናሃስያነ ብራታ ሲልሲደ ትግያ ኦሱዋነ ዞኦ ማዩዋ፥ ኦቻ ቴራ ማላትያ ማዩዋነ ሳሉዋ ማላትያ ማዩዋ ጊግስያ ኪታ ኤራተይ ደእያ አሳ ታዉ የዳ። ታ አዉ ዳዊተ ይሁዳንነ የሩሳላመን ደእያ ኩሽያ ሂላ ኤርያዋንታ ዶር ዎዳ፤ እ ኡንቱንቱና እትፐ ኦና። 8 ሊባኖሳን ደእያ ነ አሳቱ ም ዎት ቃንጽንቶ ኤርያዋ ታን ኤራይ። ሄዋ ድራዉ፥ ኔን ታዉ ሊባኖሳፐ ዝጋ፥ ጽድያነ ሳንዳልያ የዳ። ታ አሳቱ ነ አሳቱዋና ግዲደ፥ 9 ታዉ ዳሮ ም ጊግሳና። አያዉ ጎፐ፥ ታን ከጽያ ጌሻ ጎሊ ግታነ ማላልስያዋ። 10 ም ቃንጽያ ነ ቆማቶ ታን ላታሙ ሻአ ኮንታለ ዛርጋነ ላታሙ ሻአ ኮንታለ ባንጋ፥ ቃይ ኦይዱ ጼቱ ሻአ ሊትሮ ዎይንያ ኤሳነ ኦይዱ ጼቱ ሻአ ሊትሮ ዎጋራ ዛይትያ እማና" ያጌዳ።

11 ጺሮሳ ካትያ ኪራም ሶሎሞናዉ ዳብዳቢያ ኪቲደ፥ "መና ጎዳይ ባረ አሳ ሲቅያ ድራዉ፥ እ ኔና ኡንቱንቱ ቦላ ካተዬዳ" ያጌዳ። 12 ኪራም ቃይካ፥ "መና ጎዳዉ ጌሻ ጎልያነ ባረዉ ካትያ ጎልያ ኬጻናዳን አዳ ኤራንቻ፥ አኬካንቻነ ጭንጫ ናኣ ካትያ ዳዊታዉ እሜዳ፥ ሳሉዋ ሳኣ መዳ መና ጎዳይ፥ እስራኤልያ ጾሳይ ጋላተቶ።

13 "ሀእካ ታን ነዉ ሁራማ ጌተትያ ሂላንቻነ አኬካንቻ ብታንያ የዳድ። 14 አ አታ ዳና ዛርያ፤ ቃይ አ አዉ ጺሮሳ ጋድያ አሳ። እ ዎርቃ፥ ብራ፥ ናሃስያ፥ ብራታ፥ ሹቻነ ም ኦያ አሳ፤ ቃይ ኦቻ ቴራ ማላትያ ማዩዋ፥ ሳሉዋ ማላትያ ማዩዋ፥ ዞኦ ማዩዋነ ሱፍያ ጌተትያ ማዩዋ ጊግስያ ኪታ ኤሬዳ። ቃይካ እ ዱማ ዱማ አሌቂያዋንታ ከሲደ፥ ኦዴዳዋዳን ኡባባ ኦናዉ ዳንዳዬ። ሄዋ ድራዉ፥ ኩሽያ ሂላን ሎሄዳ ነ አሳቱዋናነ ካሰ ነ አዎ፥ ዳዊታዉ ኦዳ አሳቱዋና አ ኦስሳ።

15 "ሀእካ ኔን ታ ጎዳይ እማና ጌዳ ዛርጋነ ባንጋ፥ ዛይትያነ ዎይንያ ኤሳ ታ ቆማቶ የዳ። 16 ኔን ሊባኖሳፐ ኮዮ ም ኬሻ ኑን ቃንጺደ ቃሽሲደ፥ አባ ቦላና ቶከቲደ፥ ኔኮ ዮጰ ባናዳን ኦና። ያቶፐ ኔን ያፐ የሩሳላመ ጋካናዉ አፍሳና" ያጌዳ።

ሶሎሞነ ጌሻ ጎልያ ኬጼዳ

17 አ አዉ ዳዊተ ካሰ ፓይዴዳዋዳን፥ ሶሎሞነ እስራኤልያ ቢታን ደእያ ካረ ቢታ አሳ ኡባ ፓይዴዳ፤ ኡንቱንቱ 153,600 ግዴድኖ። 18 ሶሎሞነ ሄ አሳፐ 70,000 ቶክያዋ ቶሳናዉ፥ 80,000 ገዝያን ሹቻ ቆአናዉ ዶሬዳ፤ ቃይ ኡንቱንታ ዎቻናዉ 3,600 አሳቱዋ ሱንዳ።