2 ኦዱዋ 18

ትምቢትያ ኦድያ ምካይ አካባዉ ጾነትያዋ ኦዴዳ

1 ዮሳፌጸ ሎይ ዱረቴዳነ ቦንቼቴዳ፤ ቃይ አካባናካ ቦሎቴዳ። 2 አማሬዳ ላይፐ ጉይያን፥ ዮሳፌጸ አካባ በአናዉ ሳማርያ ቤዳ። አካብ አዉነ አናና እትፐ ደእያ አሳዉ ዳሮ ዶርሳቱዋነ ቦራቱዋ ሹኬዳ። ያቲደ ዮሳፌጸ ጋላኣደን ደእያ ራሞታ ጌተትያ ካታማ ኦላናዉ ባረናና ባናዳን ማይዜዳ። 3 እስራኤልያ ካቲ አካብ ይሁዳ ካትያ ዮሳፌጻ፥ "ጋላኣደን ደእያ ራሞታ ኦላናዉ ታናና ባኒ?" ያጊደ ኦቼዳ።

ዮሳፌጸ፥ "ኤ፥ ኔን ኦላ ባናዉ ጊግያ ዎደ አዉደነ ታን ጊጋና። ታ ኦላንቻቱ ነ ኦላንቻቱ ማላ፤ ኑን ኔናና ኦላናዉ ባና" ያጌዳ። 4 ቃይካ ዮሳፌጸ እስራኤልያ ካትያ፥ "ግዶፐነ፥ ኔን ካሰታደ መና ጎዳ ኦቻ" ያጌዳ።

5 እስራኤልያ ካቲ ትምቢትያ ኦድያ ኦይዱ ጼቱ አሳቱዋ ሺሺደ፥ "ታን ጋላኣደን ደእያ ራሞታ ካታማ ኦላናዉ ቦ ቦፖ?" ያጊደ ኡንቱንታ ኦቼዳ።

ኡንቱንቱ፥ "ባ፤ አያዉ ጎፐ፥ ጾሳይ ሄ ካታማ ካትያ ኩሽያን አደ እማና" ያጌድኖ።

6 ሽን ዮሳፌጸ፥ "ኑን መና ጎዳ ኦቻናዉ ዳንዳይያ ትምቢትያ ኦድያ ሀራ አሳይ ሀዋን ባዌ?" ያጌዳ።

7 እስራኤልያ ካቲ ዮሳፌጻዉ ዛሪደ፥ "ኑን አ ባጋና መና ጎዳ ኦቻናዉ ዳንዳይያ እት ሀራ ብታኒ ደኤ፤ እ ይምላ ናኣ ምካያ። ሽን ታን አ እጻይ፤ አያዉ ጎፐ፥ እ ኡባ ዎደካ ታዋ ኢታባ ኦዴፐ አትና፥ ሎኦባ ኦድ ኤረና" ያጌዳ።

ዮሳፌጸ፥ "ካቲ ሄዋዳን ጎፖ!" ያጌዳ።

8 ሄዋፐ ጉይያን፥ እስራኤልያ ካቲ ባረ ኦሳንቻቱዋፐ እቱዋ ጼሲደ፥ "ይምላ ናኣ ምካያ ኤለካ አካደ ያ" ያጌዳ።

9 እስራኤልያ ካቲነ ይሁዳ ካቲ ዮሳፌጸ፥ ባረንቱ ካዉተ ማዩዋ ማዪደ፥ ሳማርያ ካታማ ገልያ ፐንግያን ባረንቱ ካዉተ አራታን ኡቴድኖ፤ ትምቢትያ ኦድያ ኡባቱ ኡንቱንቱ ስንን ትምቢትያ ኦዲኖ። 10 ኡንቱንቱፐ እቱ፥ ካናእና ናአይ ጽድቂ ብራታፐ ካጨቱዋ ጊግሲደ፥ አካባ፥ "መና ጎዳይ ሀዋዳን ያጌ፤ ‘ሶረቱ ያና ጋካናዉ፥ ኔን ኡንቱንታ ሀ ካጨቱዋን ቃይጫና’ ያጌ" ያጌዳ።

11 ትምቢትያ ኦድያ ሀራ ኡባቱካ፥ "ጋላኣደን ደእያ ራሞታ ካታማ ባደ ኦላ፤ ጾና። አያዉ ጎፐ፥ መና ጎዳይ ሄ ካታማ ካትያ ኩሽያን አደ እማና" ያጊደ ኦዴድኖ።

12 ሄዋፐ ጉይያን፥ ምካያ ጼሳናዉ ኪተት ቤዳ ብታኒ አ፥ "በአ፥ ትምቢትያ ኦድያ ኡባቱ እት ቃላ ግዲደ፥ ካቲ ሀ ኦላ ጾናና ያጊደ ኦዴድኖ። ሄዋ ድራዉ፥ ሀያና ነ ኦዱካ ኡንቱቱፐ እቱዋ ማላ ግዶ፤ ኔንካ ሎኦባ ኦዳ" ያጌዳ።

13 ሽን ምካይ ሄ ብታንያ፥ "መና ጎዳይ ኤሮ! ታ ጾሳይ ኦድያባ ታን ኦዳና" ያጌዳ።

14 ምካይ ካትያኮ ዬዳ ዎደ፥ ካቲ አ፥ "ምካያ፥ ኑን ጋላኣደን ደእያ ራሞታ ኦላናዉ ባኔየ ቦፓነ?" ያጊደ ኦቼዳ።

ምካይ ካትያ፥ "ባ፤ ባደ ኦላ፤ ኦላደካ ጾና። አያዉ ጎፐ፥ ኡንቱንቱ ነ ኩሽያን አ እመታና" ያጌዳ።

15 ካቲ አ፥ "ኔን መና ጎዳ ሱንን ቱሙዋፐ አትና፥ ሀራባ ታዉ ኦደናዳን ታን ኔና አፑን ገደ ጫቀታናዉ ኮሺ?" ያጌዳ።

16 እ፥ "እስራኤልያ ኦላንቻቱ ኡባይ ሄንንቻይ ባይና ዶርሳዳን ደርያን ላለቴዳዋንታ ታን በኣድ። መና ጎዳይ ኡንቱንታ፥ ‘ሀዋንቶ ጎዳይ ባዋ። ኡንቱንቱ ኡባይካ ባረንቱ ሶ ባረንቱ ሶ ሳሮ ቢኖ’ ያጌ" ያጌዳ።✝18:16 ፓይ. 27:17፤ ህዝ. 34:5፤ ማቶሳ 9:36፤ ማር. 6:34

17 ያትና፥ እስራኤልያ ካቲ ዮሳፌጻ፥ " ‘እ ታዋ ኢታባ ኦዴፐ አትና፥ ሎኦባ ኦድ ኤረና’ ጋደ ታን ነዉ ኦዳበይክታ?" ያጌዳ።

18 ምካይ ጉጂደካ ሀዋዳን ያጌዳ፤ "ስም መና ጎዳይ ግያዋ ስሳ! መና ጎዳይ ባረ ካዉተ አራታን ኡትና፥ ሳሉዋ ኦላንቻቱ ኡባይ አ ኡሸቻናነ አ ሀድርሳና ኤቄዳዋንታ ታን በኣድ። 19 መና ጎዳይ፥ ‘እስራኤልያ ካቲ አካብ ጋላኣደን ደእያ ራሞታ ካታማ ቢደ፥ ያን ሀይቃናዳን አ ባለናዌ ኦኔ?’ ያጌዳ። እቱ ሀዋዳን ግያ ዎደ፥ ሀራይ ቃይ ሄዋዳን ጌዳ። 20 ሄዋፐ ጉይያን፥ አያናይ ከሲደ መና ጎዳ ስንን ኤቂደ፥ ‘ታን አ ባለና’ ያጌዳ።"

መና ጎዳይ፥ "ዋታ ባለን?" ያጌዳ።

21 አያናይ፥ "ታን ከሳደ ባደ፥ አዉ ትምቢትያ ኦድያዋንቱ ኡባቱዋ ዶናን ዎርዶትያ አያና ግዳና" ያጌዳ።

መና ጎዳይ፥ "ኤ፥ ኔን አ ባለና፤ ነዉ ሄዌ ሀናና። ባ፤ ባለ ያጌዳ" ያጌዳ።

22 ቃይካ እ፥ "ሄዋ ድራዉ፥ መና ጎዳይ ነዉ ትምቢትያ ኦድያዋንቱ ሀዋንቱ ዶናን ዎርዶትያ አያና ዎዳ፤ አያዉ ጎፐ፥ መና ጎዳይ ነ ቦላ ባሻ አሀናዉ ቃቼዳ" ያጌዳ።

23 ሄዋፐ ጉይያን፥ ካናእና ናአይ ጽድቂ ሺቂደ፥ ምካያ ሻይያ ባቂደ፥ "መና ጎዳ አያናይ ታ ማታፐ ዋኒደ ነዉ ኦዳናዉ ቤዴ?" ያጌዳ።

24 ምካይ አ፥ "ኔን ቆሰታናዉ ቆልኦ ገልያ ጋላስ ሄዋ ደማና" ያጌዳ።

25 ሄዋፐ ጉይያን፥ እስራኤልያ ካቲ ባረ ኦላንቻቱዋፐ እቱዋ አዛዚደ፥ "ምካያ ኦይቃ፤ ካታማ ሞድያ አሞናዉነ ታ ናኣ ዮኣሻዉ አፋደ እማ። 26 ኡንቱንታ፥ ካቲ ህንተንታ ሀ ብታንያ ቃሾ ጎለን ቃችተ። ታን ሳሮ ስማና ጋካናዉ፥ ጉ ኡክፐነ ሃፐ ሀራባ አያነ አዉ እሞፕተ" ያጌ ያጋ ያጌዳ።

27 ምካይ አ፥ "ቱሙ ኔን ሳሮ ስምያዋ ግዶፐ፥ መና ጎዳይ ታናን ሃሳይቤና" ያጌዳ። ቃይካ ምካይ፥ "አሳዉ ኡባዉ፥ ታን ኦዴዳዋ አኬክተ" ያጌዳ።

አካባ ሀይቁዋ

28 ሄዋፐ ጉይያን፥ እስራኤልያ ካቲነ ይሁዳ ካቲ ዮሳፌጸ ጋላኣደን ደእያ ራሞታ ካታማ ቤድኖ። 29 እስራኤልያ ካቲ ዮሳፌጻ፥ "ታን ታ ማዩዋ ላማደ፥ ሀራ አሳ ማላታደ፥ ኦላዉ ገላና፤ ሽን ኔን ነ ካትያ ማዩዋ ማያ" ያጌዳ። እስራኤልያ ካቲ ባረ ማዩዋ ላሚደ፥ ሀራ አሳ ማላቲደ ኦላዉ ገሌዳ።

30 ሶርያ ካቲ ባረ ፓራ ጋረቱዋ አዛዝያ አሳቱዋ፥ "ግታትና ጉጽና፥ ሀራ አሳ ኦናናካ ኦለቶፕተ፤ እስራኤልያ ካትያ ጻላላና ኦለትተ" ያጊደ አዛዜዳ።

31 ፓራ ጋረቱዋ አዛዝያዋንቱ ዮሳፌጻ በኤዳ ዎደ፥ "ሀዌ እስራኤልያ ካትያ" ያጌድኖ። አናና ኦለታናዉ ስሜድኖ። ዮሳፌጸ ዋሴዳ፤ መና ጎዳይ ጾሳይ አ ማዲደ፥ ኡንቱንታ ጉየ ዛሬዳ። 32 ፓራ ጋረቱዋ አዛዝያዋንቱ እ እስራኤልያ ካትያ ግደናዋ በኢደ፥ አ የደርስያዋ አግ አጌድኖ።

33 እት ብታኒ ጮ ባረ ዎንዳፍያን ኦላንቻቱ ቦላ ዱኪደ፥ እስራኤልያ ካትያ ኦላ ማዩ ጋከትያ ሄራና ጫዴዳ። ካቲ ባረ ጋርያ ላግያ ብታንያ፥ "ጋርያ ጉየ ዛራደ፥ ታና ኦላ ግዶፐ ከሳ። አያዉ ጎፐ፥ ታን ኢታ ጫቻ ጫደታክቻድ" ያጌዳ። 34 ሄ ጋላስ ኦላይ ሱልያ ዎደ፥ እስራኤልያ ካቲ አካብ ባረ ፓራ ጋርያ ግዶን ዘምፒደ፥ ኦማርስ ጋካናዉ፥ ሶረቱዋ ስንን ታኬዳ። አዋይ ዉልያ ዎደ፥ እ ሀይቄዳ።