አስትሮ 1

ካታታ አስጺና ካትያ አርጸክሲሳ አዛዙዋ እጻዱ

1,2 ሀዌ ካቲ አርጸክስስ ህንደ ጋድያፐ ቶጵያ ጋድያ ጋካናዉ ደእያ፥ ጼታነ ላታማነ ላፑን ቢታቱዋ ሞድያ ዎደ ሀኔዳባ። እ ኡቲደ ሞድያ ዋና ካታማይ ካቲ ደኢያሳ ሱሳ ጌተቴ።✝1:1-2 እዝራ 4:6

3 እ ካተቴዳ ሄዘን ላይን፥ ባረፐ ጋርሳና ሞድያዋንቶነ አናና ኦያዋንቶ ባላ ጊግሴዳ። ሄ ባላ ሳኣን ሜዶናነ ፓርሰ ጋድያ ኦላ ጋዳዋቱ፥ ጋድያ ካፓቱነ አይስያዋንቱ ቤቴድኖ። 4 ካቲ እት ጼታነ ሆስፑን ታሙ ጋላሳ ኩመን ባረ ካዉተ ዱረተነ ባረ ቦንቾ አንጋ ኡባ ጮራ ጋላሳ ኡንቱንታ በሴዳ።

5 ሄ ጋላሳቱዋፐ ጉይያን፥ ካቲ ቃይካ ሀራ ላፑን ጋላሳዉ ጋምእያ ባላ፥ ሱሳ ካታማን ካቲ ደኢያሳ፥ ዱርያፐ ማንቁዋ ጋካናዉ ደእያ አሳ ኡባዉ ጊግሴዳ። ሄ ባላይ ካትያ ጎልያ አታክልትያ ሳኣን ጊጌዳ። 6 ሄ ሳኣን ደእያ ዳባባይ፥ ሊኑዋፐ ዳደቴዳ ቦነ ሳሉዋ ማላትያ ጋርዳቱዋን ፑላት ኡቴዳ። ጋርዶቱካ ቦነ ኦቻ ቴራ ማላትያ ሎኦ ሊኑዋ ባቀን አና፥ እብነባራድያ ጌተትያ ሹቻፐ ኦሰቴዳ ቱሳ ቦላን ደእያ ብራ ምግዳቱዋን ካቀት ኡቴድኖ። ቃይ ዎርቃፐነ ብራፐ ኦሰቴዳ አርሳቱ፥ ዱማ ዱማ ማላይ ደእያ አልኦ ሹቻቱዋፐነ እንቆቱዋፐ ኦሰቴዳ ባሱዋን ማራን የገት ኡቴድኖ። 7 እቱ እቱዋፐ ዱማ ግዴዳ ዎርቃ ቡርጩኩዋን ኡሻይ አሳዉ እመቴ፤ ካቲካ ባረ ሎኦተን ዳሮ ሎአ ዎይንያ ኤሳ ዳርስ እሜዳ። 8 እት እት አሳይ ባረ ኮዮዋ ኬሻ ኡሼ፤ ሄዋ ካቲ ካሰቲደ፥ ባረ ቆማቶ ኦድ ዎዳ።

9 ሄ ዎደ ካታታ አስጺናካ ማጫ አሳ ባላ ካትያ ጎለን ጊግሳዱ።

10 ሾቢ ዶመቴዳ ላፑን ጋላስ፥ ካቲ አርጸክስስ ዎይንያ ኤሳ አሊደ ናሸቴዳ ዎደ፥ ባረ ቆማቱዋ ማሁማና፥ ብዝታ፥ ሀርቦና፥ ቢግታ፥ አባግታ፥ ዘታራነ ካርካሳ ጌተትያ ላፑን ጎይረቴዳዋንታ ጼሲደ፥ 11 "ካታቶ አስጺኖ ካዉተ ካላቻ ዎስሲደ፥ ሃ አኪደ ዪተ" ያጊደ አዛዜዳ። አያዉ ጎፐ፥ አ ሎይ ማላ ሎአ ግድያ ድራዉ፥ ካፓቱነ አሳይ ኡባይ እዞ በአና ማላ፥ ካቲ ኮዬዳ። 12 ሽን ካትያ አዛዙዋ ሱንቱ ኦድና፥ ካታታ አስጺና ካትያ ስንዉ ዬናን እጻዱ። ሄዌ ካትያ ሀንቁዋን ኤዳ።

13,14 ሄዋ ድራዉ፥ ካቲ ባረ ስን ሺቃናዉነ ባረ ካዉተ ጋርሳን ዎልቃማ ማታይ ደእያ ላፑን ፓርሰነ ሜዶና ሱንቱዋ ጼሲደ ገልሴዳ። ኡንቱንቱ ካርሻና፥ ሸታራ፥ አድማታ፥ ታርሴሳ፥ መሬሳ፥ ማርሳናነ ማሙካና ጌተቲኖ። ሄ አሳቱ አዳ ኤራንቻነ ሄ ጋድያ ህግያ ኡባነ ደኡዋ ዎጋ ምንሲደ ኤሪኖ። ሀዋ ማላባዉ ካቲ ኡባ ዎደካ ኡንቱንታ ኦቼ። 15 ካቲ ኡንቱንታ፥ "ታን፥ ካቲ አርጸክስስ፥ ታ ጎይረቶዋንቱ ቦላ ኪትና፥ ካታታ አስጺና ታ አዛዙዋ ፖለናን እጻዱ። ሄዋ ድራዉ፥ ህጊ ኦድያ ማራን እዞ ዋታናዉ በሲ?" ያጊደ ኦቼዳ።

16 ሄዋፐ ጉየ ኡንቱንቱፐ እቱ፥ ማሙካን ካትያ ስንንነ ካፓቱ ስንን ዛሪደ፥ ሀዋዳን ያጌዳ፤ "ካታታ አስጺና ካትያ ጻላላ ግደናን ደእሽን፥ አ ካፓቱዋ ኡባነ አ ካዉተ ኡባ ግዱዋን ደእያ አሳ ኡባ ናቃዱ። 17 አያዉ ጎፐ፥ ሀ ካዉተ ግዶን ደእያ ማጫ አሳይ ኡባይ ካታታ አስጺና ኦዳዋ ስሲደ፥ ባረ አስና አስና ካናዉ ዶማና። ኡንቱንቱካ፥ ‘ካቲ አርጸክስስ ባረኮ ያናዳን ጼግስና፥ ካታታ አስጺና እጻበይኬየ!’ ያጋና። 18 ሄዋ ጻላላ ግደናን፥ ፓርሰነ ሜዶና ካፓቱ ማቻቱ ሀዋ ስሴዳ ዎደ፥ ሀቼ አዋይ ዉላናዉካ ባረንቱ አስናቱዋ ሄዋዳን ጊደ ካና። ሄዋን ማቼቱዋፐነ አስናቱዋፐ ግዱዋን ካነ ሀንቁ ዳራና።

19 "ሄዋ ድራዉ ካትያዉ፥ ኔን ዶሶፐ፥ አስጺና ላኤን ነ ስን አናዳን ድግያ አዋዩዋ ከሳ፤ ሄ አዋዩካ ላኤን ላመተና ማላ፥ ፓርሰነ ሜዶና ህግያ ግዶን ጻፈቶ። ሄዋፐ ጉይያን፥ አ ካታቶ ግድያ ቦንቹዋ ኢፐ ኬክያ ሀራርዉ እማ። 20 አያዉ ጎፐ፥ ሀ ኔን አዳ አዋዩ ሀ ዎልቃማ ካዉተን ኡባን ኦደትያ ዎደ፥ እት እት ማቻታ ዱረ ግድና፥ ማንቆ ግድና፥ ሻከናን ባረ አስና ቦንቻና" ያጌዳ።

21 ሄዋፐ ጉየ ካቲነ አ ካፓቱ ሀ ዞርያን ናሸቴድኖ። ሄዋ ድራዉ፥ ማሙካን ጌዳዋዳን ካቲ ኦዳ። 22 እ ባረ ካዉተ ግዶን ደእያ ዱማ ዱማ ቢታቱዋ ኡባዉ ኡንቱንቱ ፕዶልያንነ ኡንቱንቱ ቃላን ጻፊደ፥ ዳብዳቢያ ኪቴዳ፤ ሄ አዋዩ፥ እት እት አስናይ ባረ ጎልያ ጎልያ አይሳናዉነ ባረ ቃላን ሃሳያናዉ ካፑዋ ግድያዋ ኦዴ።