አስትሮ 5

አስትራ ሾብያ ጊግሳዱ

1 ጾማ ዶሞደፐ ሄዘን ጋላስ አስትራ ካዉተ ማዩዋ ማያደ፥ ካትያ ጎለፐ ስን ባጋና ግዶ ዳባባ ገላደ ኤቃዱ። ሄ ዳባባን ካቲ ኡትያ ዉይግያ አራታይ ደኤ። ካቲካ ባረ ጎልያ ገልያ ፐንግያ ጼልያ ሳን ደእያ፥ ባረ ካዉተ አራታን ኡቴዳ። 2 ካታታ አስትራ ገላደ፥ ግዶ ዳባባን ኤቄዳኖ ካቲ በኢደ እዝን ናሸቴዳ ድራዉ፥ ባረ ኩሽያን ደእያ ዎርቃ ጻምኣ ኢኮ ምጬዳ። አካ ሺቃደ ጻምኣ ጼራ ቦቻዱ። 3 ካቲ እዞ ሀዋዳን ያጌዳ፤ "ካታት አስቴረ፥ ኔን ታኮ አያዉ ያድ? ቃይ ኔን ታና ኦችያባይ አዬ? ሀራይ አቶ ታ ካዉተፐ ባጋ ግዶፐነ፥ ታን ነዉ እማና" ያጌዳ።

4 አስትራ ዛራደ ሀዋዳን ያጋዱ፤ "ካትያዉ፥ ኔና ናሸችያዋ ግዶፐ፥ ታን ነዉ ጊግሴዳ ባላ ማናዉ ኔንነ ሃማን ላኡ ሀቼ ይንቶ ዶሳይ" ያጋዱ።

5 ሄዋፐ ጉይያን ካቲ፥ "ኑን አስትራ ጊግሴዳ ሾብያዉ ባናዉ፥ ሃማና ኤለካ አህተ!" ያጌዳ።

ሄዋፐ ጉየ ላአቱካ ሄ ሳኣ ቤድኖ። 6 ኡንቱንቱ እትፐ ዎይንያ ኤሳ ኡሺደ ደእሽን፥ ካቲ ላኤንዋ አስቴሮ፥ "ኔን ታና ዎስያባይ አዬ? ታን ነዉ እማና። ቃይ ኔን ታና ኦችያባይ አዬ? ሀራይ አቶ ታ ካዉተፐ ባጋ ግዶፐነ፥ ታን ነ ኦሻ ፖላና" ያጌዳ።

7 አስትራ ዛራደ ሀዋዳን ያጋዱ፤ 8 "ካትያዉ፥ ኔን ታናን ናሸቴዳዋ ግዶፐ፥ ቃይ ታን ዎስያዋ እማናዉነ ታ ኦሻ ፖላናዉ ኔን ዶስያባ ግዶፐ፥ ዎንት ታ ጊግስያ ሀራ ግብራዉ ኔንነ ሀማን ያናዳን ኦቻይ። ታን አያ ኮይንቶ፥ ሄ ዎደ ነዉ ቆንጭሳና" ያጋዱ።

ሀማና ማቁዋ

9 ሄ ጋላስ ሃማን ባላ ሳፐ ከሲደ ብያ ዎደ፥ ሎይ ናሸቴዳ ድራዉ፥ ባረ ዎዛናን ኖጩ ጊደ ቤዳ። ሽን እ ካትያ ጎልያ ገልያ ፐንግያ ማታና አደ ብያ ዎደ፥ ሄዋን ኡቴዳ ማርድክዮሳ በኤዳ፤ አዉ ደንድቤናዋነ ያዪደ ኮኮርቤናዋ አኬኪደ፥ ሃማን ሀንቁዋ ኤጽ ከሴዳ። 10 ግዶፐነ፥ ባረ ሀንቁዋ ዳንዳዪደ ቢደ፥ ባረ ሶ ጋኬዳ።

ሄዋፐ ጉይያን፥ ባረ ላገቱዋነ ባረ ማቻቶ ዘሬሾ እትፐ ጼግሲደ፥ 11 ሃማን ባረ ዱረተ ልክያ፥ ባረ አቱማ ናና ፓይዱዋ፥ ካቲ ባረና ኡባባን ቦንቼዳ ቦንቹዋነ ሀራ ሞድያዋንቱፐነ ካትያ ኦሳንቻቱዋፐ አያ ሱንተ አዉ እሚደ፥ ዋቲደ አ ቦንቼደንቶ፥ ኡንቱንቶ ጬቄዳ። 12 ጉጂድካ ሃማን ሀዋዳን ያጌዳ፤ "ሀራይ አቶ ካታታ አስትራካ ባረ ጊግሴዳ ሾብያዉ ካትያና ባናዉ ታፐ አትና፥ ሀራ ኦናነ ጼሳበይኩ። ቃይ ዎንትካ ካትያና ባናዳን ታና ጼሳ ዎዱ። 13 ሽን ሄ አይሁዳይ ማርዶክዮስ ካትያ ጎልያ ገልያ ፐንግያን ኡቴዳዋ በእያ ዎደ፥ ሀ ኡባባይካ ታና ካልሰና" ያጌዳ።

14 ሄ ዎደ አ ማቻታ ዘሬሻነ አ ላገቱ ኡባይ ሀዋዳን ያጌድኖ፤ "ኔን እሻታሙ ዋ አዱሳ ኮጫ ኤስሳ፤ ያታደ ዎንት ጉራና ማርዶክዮስ ሄ ኮጫን ካቀታና ማላ፥ ካትያ ኦቻ። ሄዋፐ ጉይያን፥ ናሸታደ ባላ ማናዉ ባ" ያጌድኖ። ሃማና ሀ ቆፋይ ናሸቼዳ ድራዉ፥ ኡንቱንቱ ጌዳዋዳን ኮጫ ጊግስሴዳ።