አስትሮ 8

አይሁዳቱ ባረንቱ ሞርከቱዋ ኩሽያ ጭገቴድኖ

1 አይሁዳቱ ሞርኪ ሀማን ሱለቴዳ ጋላስ ካቲ አርጸክስስ ሀማና አቁዋ ኡባ ካታት አስትርዉ አደ እሜዳ። ቃይ ማርዶክዮስ እዝዉ ማታ ዳቦ ግድያዋ አስትራ ካትያዉ ኦዳዱ። ሄዋ ድራዉ፥ ሄ ጋላሳፐ ዶሚደ፥ ማርዶክዮስ ካትያኮ ገላናዉ ዳንዳዬዳ። 2 ካቲካ ሃማናፐ ጉየ አኬዳ ባረ ምግዱዋ ማታፋ ከሲደ፥ ማርዶክዮሳዉ እሜዳ። አስትራ ማርድክዮሳ ሃማና አቁዋ ቦላን አዎያደ ሱንዱ።

3 ሄዋፐ ጉይያን፥ አስትራ ዬካደ፥ ካትያ ገድያ ቦላን ዛራ ኩንዳደ፥ አጋጋ ዛርያ ግዴዳ ሃማን አይሁዳቱ ቦላን ቱኬዳ ኢታ ማቁ ኪታን ፔሸናዳን ካትያ ዎሳዱ። 4 ያትና፥ ካቲ ባረ ዎርቃ ጻምኣ እዝዉ ምጭና፥ አ ደንዳ ኤቃደ፥ ሀዋዳን ያጋዱ፤ 5 "ካትያዉ፥ ኔን ታናን ናሸቴዳዋ ግዶፐ፥ ቃይ ታ ኦሻካ ፖላናዉ ኔን ዶሴዳዋ ግዶፐነ ታ ኦሻይ በሴ ጋደ ቆፖፐ፥ ነ ካዉተ ግዶን ደእያ አይሁዳ ኡባ ዉርሲደ ዎና ማላ፥ አጋጋ ዛርያ ግዴዳ ሀማዳታ ናአይ ሃማን ከሴዳ አዋዩዋ ሻርያ ሀራ አዋዩዋ ኔን ከሳናዳን ዎሳይ። 6 ሀ ኡባ ባሻይ ታ አሳ ቦላን ጋክያ ዎደ፥ ታን ዋና ጼላናዉ ዳንዳያይታ? ቃይ ታ ዳቦቱዋካ ኡባ ይስያ ዎደ፥ ታን ዋና ጼላናዉ ዳንዳያይታ?" ያጋዱ።

7 ሄዋፐ ጉይያን፥ ካቲ አርጸክስስ፥ ካታቶ አስቴሮነ አይሁዳ ማርድክዮሳ ሀዋዳን ያጌዳ፤ "ሃማን አይሁዳቱዋ ዎናዉ አዋዩዋ ከሴዳ ድራዉ፥ ታን ም ኮጫን አ ካቅሴዳዋነ አ አቁዋካ ኡባ ካታት አስትርዉ እሜዳዋ ህንተንቱ ኤሪታ። 8 ግዶፐነ፥ ካትያ ጎልያ ማታፋይ ዎና፥ ካትያ ሱንን ከሴዳ አዋዩ ላመታናዉ ዳንዳየና። ሄዋ ድራዉ፥ ህንተንቱ ህንተንቱ ባጋና አይሁዳቱዋ ጎአናዉ ኮዬዳዋ ጻፍተ። ሄዋ ታ ሱንን ጻፊደ፥ ካትያ ማታፋ አ ቦላን ዎተ" ያጌዳ።

9 ሲዋና ግያ ሄዘን አግናን፥ ላታማነ ሄዘን ጋላሳን፥ ማርዶክዮስ ካትያ ጻፈቱዋ ጼጌዳ፤ ህንደፐ ቶጵያ ጋካናዉ ደእያ፥ ጼታነ ላታማነ ላፑን ቢታቱዋ ካትያፐ ጋርሳና ሞድያዋንቶ አይሁዳቶ፥ አዉራጃ ሞድያዋንቶነ ጋድያ ካፓቶ የድያ አዋዩዋ ኡባባ ጻፍሴዳ። አዋዩ ዱማ ዱማ ቃላንነ ዱማ ዱማ ፕዶልያን ጻፈቴዳ፤ ቃይ አይሁዳቶካ ኡንቱንቱ ቃላንነ ኡንቱንቱ ፕዶልያን ጻፈቴዳ። 10 ማርዶክዮስ ሄ አዋዩዋ ኡባ ካትያ አርጸክሲሳ ሱንን ጻፍሲደ፥ ካትያ ማታፋ ዎዳ። ያትደ ኤሌልያ ካትያ ፓራቱዋ ቶግያ አሳቱዋ ቦላ ቢታዉ ኡባዉ ኪቴዳ።

11 ካቲ ከሴዳ አዋዩ ካታማቱዋ ኡባን ደእያ አይሁዳቱ እትፐ ሺቃናዉነ ባረንቱ ቦላ ይያዋ ኦለቲደ ተአናዉ ዳንዳያና ማላ፥ ማታ ኡንቱንቶ እሜ። ቃይ ኦላ ሚሻ ኦይቅኪደ፥ አይ ቢታፐ ግዶፐነ፥ ኡንቱንታ ኦላናዉ ይያዋንታ፥ ኡንቱንቱ ናናነ ኡንቱንቱ ማቼቱዋና ኡባ እቱዋነ አሸናን ዉርስ ዎናዉነ ኡንቱንቱ አቁዋካ ቦንቂደ አካናዉ ማታ እሜ። 12 አይሁዳቱ ካትያ አርጸክሲሳ ካዉተን ሄዋ ኦናዉ ኬረቴዳ ጋላሳይ፥ አዳረ ግያ ታማነ ላኤን አግና፥ ታማነ ሄዘን ጋላሳ። 13 ካትያ አዋዩዋ ቢታቱዋ ኡባን ደእያ አሳይ ኤራናዳን፥ ህግያ ግዲደ አዋየቴዳ፤ ሄዌካ አይሁዳቱ ባረንቱ ሞርከቱዋ ቦላን ሀሉዋ ከሳናዉ ባረንታ ጊግሳናዉ ዳንዳይሴ። 14 ኪተትያዋንቱ ካትያ ጎልያ ፓራቱዋ ቶጊደ፥ ካትያ አዛዙዋ ጋናዉ ኤሌሊደ ቤድኖ። ቃይ ሱሳ ካታማንካ ካቲ ደእያ ሳን ሀ አዋዩ አሳ ኡባዉ እመቴዳ።

15 ማርዶክዮስ ሳሉዋ ማላትያነ ቦ ካዉተ ማዩዋ ማዪደ፥ ኦቻ ቴራ ማላትያ ካባ፥ ሊኑዋፐ ዳደቴዳዋ ቦላና ጉጄዳ፤ ቃይ ዎልቃማ ዎርቃ ካላቻካ ዎደ፥ ካትያ ስንፐ ከሴዳ። ሱሳ ካታማይ እልሌዳነ ናሸቻዉ ኖጩ ጌዳ። 16 ሄዌ አይሁዳቶ ቃይ ዎልቃማ ናሸቻነ እልልሳ፥ ዎፓነ ሾብያ ዎደ ግዴዳ። 17 ሄዋ ድራዉ፥ ካትያ አዋዩ ጋክና ናባበቴዳ ቢታንነ ካታማ ኡባን ደእያ አይሁዳቱ ኡባይ፥ ናሸቲደነ ባላ ሚደ ፔሼድኖ። ሄዋ ጋሱዋን አይሁዳቶ ያዪደ፥ ሄዋን ደእያ ሀራ ዛርያ አሳፐ ዳራቱ አይሁዳ ግዴድኖ።