አስትራ ካታቶ ግዳዱ
1 ሄዋፐ ስሚደ፥ ካትያ አርጸክሲሳ ሀንቁ ዶቼዳ፤ አስጺና ኦዳባነ እካ እዝ ቦላን ከሴዳ አዋዩዋባ ቆፔዳ። 2 ሄ ዎደ ካትያ ጎለን ኦያ ቆማቱ አ ሀዋዳን ያጌድኖ፤ "ሎኦ ማላና ደእያ ዎዶሮ ማጫ ናና ኮዪደ፥ ካትያዉ አሀና ማላ፥ 3 ነ ካዉተ ግዱዋን ደእያ ቢታቱዋ ኡባን ካፓቱዋ ሱን። ኡንቱንቱካ ሎኦ ማላና ደእያ ዎዶሮ ማጫ ናና ዶሪደ፥ ሱሳ ካታማ አሂደ፥ ማጫ አሳ ጊጌዳ ጎለን ዎኖ። ሄዋን ሄ ማጫ አሳው ጎለዉ ሀላፈ ግድያ ካትያ ጎይሩዋ ሄጋያ ኩሽያን ኡንቱንቱ ደእሽን፥ ኡንቱንቱ ማላ ሎይያባይ ኡንቱንቶ እመቶ። 4 ሄዋፐ ጉይያን፥ ካትያ ኡባፐ አ ናሸችያ ወዶራታ አስጺን ኮታን ካታቶ ግዱ" ያጌድኖ። ሄዋፐ ጉየ ሀ ዞሪ ካትያ ናሸቼዳ ድራዉ፥ ካቲ ሄዋዳን ኦዳ።
5 ሄዋን ሱሳ ካታማን ካቲ ደእያ ሳን እት ማርድክዮሳ ጌተትያ አይሁዳ ጋድያ አሳይ ደኤ። እካ ያኢራ ናኣ፤ ያኢር ሽምአ ናኣ፤ ሽምእ ቢንያማ ዛርያ ግዴዳ ቂሳ ናኣ። 6 ባብሎነ ካቲ ናቡካዳናጾረ ይሁዳ ካትያ ዮኣኪናነ ሀራ አይሁዳ አሳ ኦላን ኦሞዲደ አፌዳ ዎደ፥ ማርዶክዮስ የሩሳላመፐ ኡንቱንቱና እትፐ ቤዳዋ።2:6 2 ካታ. 24:10-16፤ 2 ኦዱዋ 36:10 7 እ ሄ ጋድያን ደኢደ፥ ባረ አዉዋ እሻ ናቶ፥ እብራይጸ ቃላን ሀዳሶ ጌተትያ አታነ አዉ ሀይቅኬዳ አስቴሮ ባረናና ዎደ ድቼ። እዝ አዉነ አታ ሀይቆዋፐ ጉይያን፥ ማርዶክዮስ እዞ አፊደ፥ ባረ ማጫ ናቶ ኦደ ድቼዳ። አስትራ መንካ ጌሳንካ ሎይ ማላ ሎአ።
8 ካቲ ከሴዳ አዋዩዋነ አዛዙዋ ማራን፥ ካቲ ደኢያሳ ሱሳ ካታማ ካትያ ጎልያ ዬዳ ዶረቴዳ ሀጋየ አዎተን ኡቴዳ ጮራ ዎዶሮቱዋፐ እትና አስቴሮ። እዛካ ያደ፥ ማጫ አሳው ጊጌዳ ጎለ ሀላፈ ግዴዳ ሄጋያ ግያዋ አዎተን ኡታዱ። 9 ሄጋይ አስትርን፥ ሎይ ናሸቴዳ፤ እዛ አ ስንን ናሹዋ ደማዱ። ያቲደ ኤለካ ማናዉ ቁማነ ቦላ ኦከትያዋ እዝዉ እሜዳ። ቃይ እዝዉ ኦናዉ ካትያ ጎልያፐ ዶረቴዳ ላፑን ዳንጋጽረቱዋ ሱንደ፥ ማጫ አሳዉ ጊጌዳ ጎለን፥ ክፍልያ ኡባፐ አደ ሎእያ ክፍልያን ኦነ እ ዳንጋጽረቱዋ አፊደ ዎዳ።
10 ማርዶክዮስ እዝዉ ካሰቲደ ኦዴዳዋዳን፥ አስትራ ሀቃ አሳፐንቶነ ኦ ቆመንቶ ኦዉነ ኦዳበይኩ። 11 ቃይካ ማርዶክዮስ አስትር ፓጻተነ እዝዉ ሀንያዋ ኤራናዉ፥ ማጫ አሳ ጎልያ ዳባባፐ ስንና ጋላሳን ጋላሳን ያነ ሃነ ሀመቴ።
12 እት እት ወዶራታ ካትያኮ ገላናፐ ካሰታደ ማጫዋንቶ አዛዘቶ ማራዳን፥ እዛ እት ላይ ኩመን ባረ ማላ ሎይደ ጋምአዉ፤ ሄዌካ፥ ኮይሮ ኡሱፑን አግና ካርቢያ ዛይትያን ጎርፐታደ ጋምኣደ፥ ላኤን ኡሱፑን አግና ቃይ፥ ሎኦ ሳዊያ ሽቱዋንነ ማላ ሎይያባን ጎርፐታዉ። 13 ሄዋፐ ጉይያን፥ እት ወዶራታ ካትያኮ ገልያ ዎዲ ጋክያ ዎደ፥ እዛ ኮዮዌ ኡባይ እመትና፥ ማጫ አሳ ጎልያፐ ከሳደ፥ ካቲ ደእያ ሳኣ ገላዉ። 14 ቃማ ገላደ፥ ካትያና አቄዳዋፐ ህን ባጋን፥ ዎንትና ጉራ ከሳዉ። ካትያና አቅ ከሴዳ ማጫዋንቱ ደእያ ሀራ ጎልያ እዞ አፊኖ። ሄ ጎልያዉ ሀላፈ ግድያ ካትያ ጎይሩ ሻእሻጋዝ እዞ ናጌ። ካቲ ዶሲደነ እ ሱን ጼሴዳ፥ "ኤበሎ አህተ" ጋና ዮፐ፥ አ ላኤን ካትያኮ ገላናዉ ዳንዳዩኩ።
15 ሄዋ ግዶደ፥ ካትያኮ ገልያ ካላይ አስቴሮ ጋኬዳ። አስትራ ማርድክዮሳ አዉዋ እሻ አብሀይላ ናቶ፤ ማርዶክዮስ ባረ ናቶ ኦደ ድቼዳኖ። እዛ ማጫ አሳይ ጊግያ ጎለዉ ሀላፈ ግድያ ካትያ ጎይሩ ሄጋይ ዞሬዳዋፐ አትና እዛ አይነ ኦቻበይኩ። ኦ በኤዳ ኡባይ እ ማላ ናሼዳ። 16 አርጸክስስ ካተቴዳ ላፑን ላይን፥ ተቤታ ጌተትያ ታማን አግናን አስቴሮ ካቲ ደእያ ሳኣ አፌዳ።
17 ካቲ ሀራ ማጫዋንቱ ኡባፐ አደ፥ እዞ ዶሴዳነ ሀራ ዎዶሮቱዋ ኡባፐ እዝን ናሸቴዳ። ሄዋ ድራዉ፥ ካዉተ ካላቻ እ ሁጲያን ዎደ፥ እዞ አስጺን ሳኣን ካታቶ ኦዳ። 18 ሄዋፐ ጉይያን፥ ካቲ አስትር ቦንቾ ዎልቃማ ባላ ጊግሲደ፥ ሞድያዋንታነ አናና ኦያዋንታ ጼሴዳ። ቃይ ባረ ካዉተ ግዶን ናሸቻ ባላይ ቦንቼታና ማላ አዋዪደ፥ እሞታካ ባረ ኬካተ ኬሻ እሜዳ።
ማርዶክዮስ ካትያ ሸምፑዋ አሼዳ
19 ዎዶራቱ ላኤንዋ ሺቄዳ ዎደ ማርዶክዮስ ካትያ ጎለ ፐንግያን ማታይ እመትና ኡቴዳ። 20 አስትራ ሀቃ አሳፐንቶነ ኦ ቆመንቶ ኦነ ኦዳበይኩ። ኦ ማርዶክዮስ፥ "ኦዶፓ" ጌዳ ድራዉ፥ ካሰ ናአተን አዛዘትያዋዳን፥ ሀእካ አዉ አዛዘታዱ።
21 ማርዶክዮስ ካትያ ጎለ ፐንግያን ኡቴዳ ሄ ዎደ፥ ካቲ ደእያ ክፍለቱዋ ገልያ ፐንግያ ናግያ ካትያ ጎይረቶዋንቱፐ ላአቱ፥ ብግታንነ ተረሽ ካትያ አርጸክሲሳ ሞርኪደ፥ ዎናዉ ማቀቴድኖ። 22 ኡንቱንቱ ማቁዋ ማርዶክዮስ ስሲደ፥ ካታት አስትርዉ ኦድና፥ እዛካ ማርድክዮሳ ሱንን ካትያዉ ኦዳዱ። 23 ካቲ የዉዋ ሎይደ፥ ቆሪደ ጼልያ ዎደ፥ የዉ ቱማ ግዲደ ቤትና፥ ሄ ላኡ አሳቱዋ ኮጫን ካቂደ ዎዳ። ሀ ሀኖተይካ ካትያ አርጸክሲሳ ታርክያ ጻፍያ ማጻፋን እ ደእያ ሳኣን ጻፈቴዳ።