ሃማን አይሁዳቱዋ ይሳናዉ ሀልቼዳ
(3:5-14)
1 ሄዋፐ ጉይያን፥ ካቲ አርጸክስስ ሀማና ሱንተ ቂሲደ፥ ባረ ካፓቶ ካፑዋ ኦደ ሱንዳ። ሀማዳታ ናኣ ሀማን አይሁዳቱዋ ሞርክያ፥ አጋጋ ዛርያ። 2 ካቲ አዛዝ ዎዳ ድራዉ፥ ካትያ ጎልያ ፐንግያን ደእያ ካፓቱ ኡባቱ ሃማን አያ ዎደ፥ ጉልባቲደ አ ቦንቺኖ። ግዶ ሽን፥ ማርዶክዮስ ሃማናዉ ጉልባተናንነ ቦንቼናን እጼዳ። 3 ሄ ዎድያን ካትያ ጎልያ ፐንግያን ደእያ ካፓቱ ማርድክዮሳ፥ "ካትያ አዛዙዋ ፖለናን አያዉ እጻይ?" ያጊደ፥ 4 ሀቼ ሀቼ ኦዲኖ፤ ሽን እ ኡንቱንቱ ኦድያዋ ስሳናዉ ኮይቤና። ኡባ ቃይ፥ "ታን አይሁዳ አሳ ግድያ ድራዉ፥ ሃማናዉ ጉልባታናዉነ አ ቦንቻናዉ ዳንዳይከ" ያጌዳ።
ሄዋፐ ጉይያን ኡንቱንቱ፥ "ሀ ማርዶክዮስ ኦድያ ጋሱዋ ስሲደ፥ ሃማን ዋናንዴሻ!" ጊደ፥ አዉ ኦዴድኖ። 5 ማርዶክዮስ ባረዉ ጉልባተናዋነ ባረና ቦንቼናዋ ሃማን ኤሬዳ ዎደ፥ ሀንቁዋ ታማዳን ኤጽ ከሴዳ። 6 ሄዋ ቦላካ ቃይ፥ ማርዶክዮስ አይሁዳ አሳ ግድያዋ ኤሬዳ፤ አ ጻላላ ዎያዌ ላፋባ ጊደ ቆፔዳ ድራዉ፥ አርጸክሲሳ ካዉተ ግዱዋን ደእያ አይሁዳ ዛርያ ኡባ ዎናዉ ሀልቼዳ።
7 አርጸክስስ ካተቴዳ ታማነ ላኤን ላይን፥ ንሳና ጌተትያ ኮይሮ አግናን፥ አይሁዳቱዋ ዎያ አግናነ ጋላሳ ኤራናዉ፥ ፑሪማ ጌተትያ ሳማ አ ስንን የጋናዳን፥ ሃማን አዛዜዳ። ሄ ሳማይ ዎዳ ማራን፥ አዳረ ጌተትያ ታማነ ላኤን አግናን፥ ታማነ ሄዘን ጋላሳይ አይሁዳቱ ዉርያ ጋላሳ ግድያዌ ቃሸቴዳ።
8 ሄዋፐ ጉይያን፥ ሃማን ካትያ አርጸክስሳዉ ሀዋዳን ያጊደ ኦዴዳ፤ "ነ ካዉተ ግዱዋን ሙለ ሳኣን ላለቲደ ደእያ እት ዛረ አሳቱ ደኢኖ፤ ኡንቱንቱ ደኡዋ ማራይ ሀራ አሳ ኡባዋፐ ዱማ፤ ሄዋ ጻላላ ግደናን፥ ኡንቱንቱ ካትያ ህግያዉካ ሞደትክኖ። ሄዋ ድራዉ፥ ኔን ኡንቱንቱ ደኢኖ ጋደ ጮኡ ጎፐ፥ ሄዌ ሎአ ግደና። 9 ሄዋ ድራዉ ካትያዉ፥ ሀ ቆፋይ ኔና ናሸቾፐ፥ ሀ አሳቱዋ ዎ ይሳና ማላ፥ አዋዩዋ ከሳ። ሄዋ ነ ኦፐ፥ ታን 340,000 ኪሎ ግራምያ ዴጽያ ብራ ካትያ ሚሻ ምንጅያ ጎለዉ ገልሳናዳን፥ ሀ ኦሱዋ ኦያዋንቶ እማና" ያጌዳ።
10 ሄዋፐ ጉየ ካቲ ባረ ማታ ኤርሳናዉ አዋዩዋ ቦላ ዎያ ምግዱዋ ማታፋ ባረ ብራያፐ ከሲደ፥ አይሁዳቱ ሞርክያ፥ አጋጋ ዛርያ፥ ሀማዳታ ናኣ ሃማናስ እሜዳ። 11 ካቲ ሃማና፥ "ኔን እማና ጌዳ ብራይ ነ ማታን ደኦ፤ ሽን ሀ አሳቱዋ ቦላ ነ ዶሴዳዋ ኪተታ" ያጌዳ።
12 ሄዋ ድራዉ፥ ኮይሮ አግናን፥ ታማነ ሄዘን ጋላሳን፥ ሃማን ካትያ ጻፈቱዋ ጼጌዳ። ሄ አዋዩ ቢታ ኡባን ደእያ አሳዉ ዱማ ዱማ ቃላንነ ዱማ ዱማ ፕዶልያን ጻፈቲደ፥ ካትያፐ ጋርሳና ጋድያ ሞድያዋንቱኮ፥ አዉራጃ ሞድያዋንቱኮነ ደርያ ካፓቱ ኡባኮ ኪተታናዳን አዛዜዳ። አዋዩካ ካትያ አርጸክሲሳ ሱንን ጻፈቲደ፥ ምግዱዋ ማታፋይ አ ቦላ ዎዋፐ ጉየ፥ 13 ኤሌል ዎንቻቱ አ ካዉተ ጋድያ ኡባ ጋናዳን ኪተቴድኖ። ሄ አዋዩ፥ "አዳረ ግያ ታማነ ላኤን አግናን ታማነ ሄዘን ጋላሳን፥ አይሁዳ ኡባ፥ ያላጋ፥ ጭማ፥ ማጫዋ፥ አቱማዋ፥ ናናካ አሸናን መጽ እት ጋላስ ዉርስ ዎተ፤ ኡንቱንቱ አቁዋካ ቦንቂተ" ያጌ። 14 ሄዋ ድራዉ፥ ሄ ኬሬዳ ጋላሳይ ጋክያ ዎደ፥ አሳይ ኡባይ ጊገታናዳን፥ ሄ አዛዙ ቢታዉ ኡባዉ ጻፈቲደ ኪተቴዳ።
15 ካትያ አዛዙዋን ኤሌል ዎንቻቱ ቢታ ኡባካ ኪታ ጋድኖ። ቃይ ሱሳ ካታማን ካትያ ጎልያ ሄራን ጻፈቴዳ ህጊ እመቴዳ። ያትና፥ ሱሳ ካታማ አሳይ ኡባይ ሻቢረቴዳ። ሽን ካቲነ ሃማን እትፐ ኡቲደ፥ ሚኖ።