1 ኑን የሱስ ክርስቶሳ ኦሳንቻቱ ጳዉሎስነ ጽሞቶስ፥ ክርስቶሳ የሱሳን ደእያዋንቶ፥ ፕልጵስዮሳ ግያ ካታማን ደእያ ጌሻቶ ኡባቶ፥ አማንያዋንታ ካለያዋንቶነ ማድያዋንቶ ሀ ዳብዳቢያ ጻፌቶ።

2 ኑ አዉዋ ጾሳፐነ ጎዳ የሱስ ክርስቶሳፐ አ ኬካተይነ ሳሮተይ ህንተንቶ ግዶ።

3 ታን ህንተና ሀሳይያ ዎደ ኡባን ታ ጾሳ ጋላታይ። 4,5 ህንተ ኮይሮ ጋላሳፐ ሀኖ ጋካናዉ፥ ምሽራቹዋ ቃላ ኦድያዋን ታና ማዴዳ ድራዉ፥ ታን ኡባ ዎደ ህንተንቶ ኡባዉ ናሸቻን ጾሳ ዎሳይ። 6 ቃይ ህንተንቱ ግዶን ሎኦ ኦሱዋ ዶሜዳ ጾሳይ፥ ክርስቶስ የሱስ ስምያ ጋላሳይ ጋካናዉ ፖላናዋ ኤራይ።

7 ታን ህንተንቶ ኡባዉ ሄዋዳን ቆፓናዉ በሴ፤ አያዉ ጎፐ፥ ታን ህንተና ኡባ ዎደ ሀሳያይ። ሀእ ታን ቃሹዋን ደእያዋንነ ዎንጋላዉ ሞተትያዋን፥ ቃይ ዎንጋላ ምንሳ ኤስያዋንነ፥ ጾሳይ ታዉ ካጬዳ ካጫ ህንተካ ታናና ግሽ አኬድታ። 8 አያዉ ጎፐ፥ ታን ህንተና ኡባቱዋ ክርስቶስ የሱሳፐ ይያ ሲቁዋን አይ ኬና ሲቅንቶ፥ ጾሳይ ታዉ ማርካ።

9,10 ቃይ ታን ህንተንቶ ጾሳ ዎስያዌ ሀዋ፤ ሎኦባ አያኔካ ዶራናዉ ህንተንቱ ዳንዳያናዳንነ፥ ቃይ ህንተንቱ ሲቁ ቱሙ ኤራተናነ አኬካ ኡባና እትፐ ጉጅ ጉጅ ድጫናዳን፥ ጾሳ ዎሳይ፤ ያቲደ ክርስቶስ ስምያ ጋላሳን ህንተንቱ ሱረነ ፖኩ ባይናዋንታ ግዳና። 11 ቃይ ህንተንቱ ሸምፑካ ጾሳ ቦንቾነ ጋላታዉ የሱስ ክርስቶሳ ባጋና ቤትያ ጽሎተ አይፍያ አይፋና።

12 ታናዳን ጾሳ ካልያዋንቶ፥ ሀ ታና ጋኬዳዌ ምሽራቹዋ ቃላይ አካናዳን ቱሙ ማዴዳዋ ህንተንቱ ኤራና ማላ ኮያይ። 13 ታን ክርስቶሳ ድራዉ ቃሸቴዳዋ፥ ካትያ ጎልያ ናግያ ኡባቱነ ሀዋን ደእያ ሀራቱ ኡባቱ ኤሪኖ። 14 ቃይ ታን ቃሸቴዳዌ ኑ እሻቱዋፐ ዳርያዋንቱ ጎዳን ሎይ አማነቲደ፥ ጾሳ ቃላ ያሽ ባይናን ካሰዋፐ ጻሊደ ኦዳናዳን ማዴዳ።

15 ቱሙፐ እቱ እቱ ቃናትያ ድራዉነ ፓሉምያ ድራዉ፥ ክርስቶሳዋ ኦዲኖ፤ ሽን ሀራንቱ ሎኦ አሙዋን ኦዲኖ። 16 ሀዋንቱ ጾሳይ ታዉ ዎንጋላ ናግያ ኦሱዋ እሜዳ ድራዉ፥ ሲቂደ ቃላ ኦዲኖ። 17 ሽን የኮንቱ ታን ቃሹዋን ደእሽን፥ ታ ቦላ ዋይያ አሀናዋ ኡንቱንቶ ማላትና፥ ባረና ሲቅያ ዎልቃማ አሙዋን ክርስቶሳዋ ኦድኖፐ አትን፥ ዎዛናፐ ኦድክኖ።

18 አይነ ባዋ፤ ማላትስያ ኦዶነ ግዶ ዎይ ቱሙ ኦዶነ ግዶ፥ አይ ኦግያንነ ክርስቶሳዋ ኦዶፐ፥ ታን ሄዋን ናሸታይ። ስንናዉካ ቃይ ታን ናሸታና። 19 አያዉ ጎፐ፥ ታን ህንተንቱ ዎሳንነ የሱስ ክርስቶሳ አያናፐ ይያ ማዱዋን አታናዋ ኤራይ። 20 ታ ዎልቃማ አሙነ ጾሳፐ አካና ጋደ ታን ናሸቻን ናግያ ናጉ አዬ ጎፐ፥ ታን ፓጻ ደእናካ ዎይ ሀይቂናካ ያየናን፥ ካሰዋዳን ሀእካ ታ ኩመን አሳተን ክርስቶስ ቦንቼታናዋፐ አትን፥ ታን ሀራይ አቶ እትባንካ ዬላተናን አታናሳ። 21 አያዉ ጎፐ፥ ታዉ ደኡ ክርስቶሳ፤ ቃይ ሀይቁካ ታዉ ጎአ። 22 ሽን ታን ፓጻ ደእያዋን ዳሮ ጎእያዋ ኦናዋ ግዶፐ፥ ሀቃዋ ዶራነንቶ ታዉ ኤረተና። 23 ታን ሀ ላኡ የዋቱዋን መቶታይ፤ ሀ ደኡዋፐ ሻከታናዉነ ቃይ ክርስቶሳና እትፐ ደአናዉ አሞታይ፤ ክርስቶሳና እትፐ ደእያዌ ኡባፐ አዳ ዳሮ ሎኦባ። 24 ሽን ታን ሀይቂያዋፐ ህንተንቱ ድራዉ ፓጻ ደእያዌ ህንተና ዳሮ ኮሽያዋ።

25 ሀዌ ቱማ ግድያዋ ታን ጌሻደ ኤራይ፤ ቃይ አማኑዋን ህንተንቱ ድጫናዳንነ ናሸታናዳን፥ ታን ህንተናና ኡባና ፓጻ ደአና። 26 ሄዋ ድራዉ፥ ታን ህንተናና ላኤንዋ ይያ ዎደ፥ ክርስቶሳ የሱሳና ህንተ ደእያ ደኡዋን፥ ታባን ጬቀትያባይ ህንተንቶ ዳራና።

27 ግዶፐካ፥ ህንተንቱ ህንተንቱ ሁጰዉ ክርስቶሳ ዎንጋላዉ በስያ ደኡዋ ደእተ፤ ታን ህንተና ባደ ዎይ በአና ይና፥ ህንተንቱ እት ቆፋን ምኒደ ኤቄዳዋነ፥ ቃይ ዎንጋላ አማኖ እት ዎዛና ግዲደ እትፐ ባጸትያዋ ስሳና። 28 ህንተ ሞርከቶ አያንካ ያዮፕተ፤ ሄዌ ኡንቱንቶ ኡንቱንቱ ባሻ ሽሴ፤ ሽን ጾሳይ ህንተና ጾንስያ ድራዉ፥ ህንተንቶ አቶተ ሽሴ። 29 አያዉ ጎፐ፥ ክርስቶሳዉ ኦያ ካጫይ ህንተና ጋኬዳዌ ህንተንቱ አን አማናና ጻላላሳ ግደናን አ ድራዉ ዋይያካ አካናሳ። 30 ታን ካሰ ባጸትሽን ህንተንቱ በኤዳዋ ማላ ባጺነ ቃይ ሀእካ ታን ባጸትያዋ ህንተንቱ ስስያዋ ማላይ ህንተና ጋኬዳ።