2 ካታቱዋ 15

ይሁዳ ካትያ ኦዝያና

1 እስራኤልያ ካቲ እዮርባም ካተቴዳ ላታማነ ላፑን ላይን፥ ይሁዳ ካትያ አመስያሳ ናአይ ኦዝያን ካተቴዳ።*15:1 ኦዝያነ፦ እብራዌዋን ካቲ ኦዝያነ ሀ ሸምፑዋን አዛርያ ጌተቴ። 2 እ ካተቴዳ ዎደ፥ ላይይ አዉ ታማነ ኡሱፑና፤ እ የሩሳላመን እሻታማነ ላኡ ላይ ካተቴዳ። አ አት ሱንይ ይኮሎ፤ እዛ የሩሳላመ አሳ። 3 አ አዉ አመስያስ ኦዳዋዳን፥ እካ መና ጎዳ ስንን ሱረባ ኦዳ። 4 ግዶፐነ አሳይ ጎይንያ ቃ ሳኣ ይስቤና፤ ሄ ድራዉ ያርሹዋ ያርሽያዋነ እጻና ጩዋይያዋ አግቤና። 5 መና ጎዳይ ኦዝያና ዎልቃማ ኦሉዋ ሀርግያን ኦይዳ፤ ሀይቃና ጋካናስካ ሄ ሀርጊ አ የድቤና ድራዉ፥ ዱማ ጎለን ባረካ ደኤዳ። ሄ ዎደ ካትያ ናአይ እዮኣታመ ካትያ ጎለን ደኢደ፥ ሄ ቢታ አሳ ሞዴዳ።

6 ኦዝያነ ሀኔዳ ሀራባይነ እ ኦዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 7 ኦዝያነ ሀይቂደ፥ ባረ ማይዛን ጋከቴዳ፤ ዳዊታ ካታማን ባረ ማይዛ አዎቱዋና ሞገቴዳ። አ ኮታን አ ናአይ ዮኣታመ ካተቴዳ።✝15:7 ኢሳ. 6:1

እስራኤልያ ካትያ ዛካራሳ

8 ይሁዳ ካቲ ኦዝያነ ካተቴዳ ሀታማነ ሆስፑን ላይን፥ እዮርባማ ናአይ ዛካራስ እስራኤልያ አሳ ቦላ ሳማርያ ካታማን ካተቴዳ፤ እ ኡሱፑን አግና ካተቴዳ። 9 አ ማይዛ አዎቱ ኦዳዋዳን፥ እካ መና ጎዳ ስንን ኢታባ ኦዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦያዋ አግቤና። 10 ሄዋፐ ጉይያን፥ ያቤሻ ናአይ ሻሉም ዛካራሳ ቦላ ማቀት ደንዲደ፥ ይብላኣማ ግያ ሳን ዎደ አ ኮታን ባረዉ ካተቴዳ።

11 ዛካራስ ሀኔዳ ሀራባይነ እ ኦዳባይ ኡባይ እስራኤልያ ካተቱዋ ታርክያ ማጻፋን ጻፈት ኡቴዳ።

12 ሀዋዳን ሀኒደ፥ መና ጎዳይ ኢዩዉ፥ "ነ ዛሪ ኦይደን የለታ ጋካናዉ፥ እስራኤልያ ካዉተ አራታን ኡታናዋ" ያጊደ ኦዴዳ ቃላይ ፖለቴዳ።✝15:12 2 ካታ. 10:30

እስራኤልያ ካትያ ሻሉማ

13 ይሁዳ ካቲ ኦዝያነ ካተቴዳ ሀታማነ ኡዱፑን ላይን፥ ያቤሻ ናአይ ሻሉም ካተቴዳ፤ እ ሳማርያን እት አግና ካተቴዳ። 14 ሄዋፐ ጉይያን፥ ጋደ ናአይ ምናሄም ትርጻ ግያ ካታማፐ ሳማርያ ቤዳ። ሳማርያን ደእያ ያቤሻ ናኣ ሻሉማ ዎደ አ ኮታን ባረዉ ካተቴዳ።

15 ሻሉም ሀኔዳ ሀራባይነ እ ማቀቴዳ ማቁ እስራኤልያ ካተቱዋ ታርክያ ማጻፋን ጻፈት ኡቴዳ። 16 ሄ ዎደ ምናሄም ትርጻ ካታማፐ ደንዲደ፥ ትፍሳሀ ግያ ካታማ፥ ካታማን ደእያ አሳነ ካታማ ሄራን ደእያ ቢታቱዋ ኡባ ኦሌዳ። ኡንቱንቱ ባረንቱ ካታማ ድርሳ ፐንግያ አዉ ዶየናን እጼዳ ድራዉ፥ ትፍሳሀ ካታማ ኦለቲደ ባይዜዳ፤ ቃይ ሄ ካታማን ደእያ ሻሃራ ማጫ አሳ ኡሉዋ ኡባ ጳልቂ የጌዳ።

እስራኤልያ ካትያ ምናሄማ

17 ይሁዳ ካቲ ኦዝያነ ካተቴዳ ሀታማነ ኡዱፑን ላይን፥ ጋደ ናአይ ምናሄም እስራኤልያ ቦላ ካተቴዳ፤ እ ሳማርያን ታሙ ላይ ካተቴዳ። 18 እ መና ጎዳ ስንን ኢታባ ኦዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦያዋ አግቤና።

19 ሄዋፐ ጉይያን፥ አሶረ ጋድያ ካቲ ትግላት-ፓለሴር እስራኤልያ ቢታን ዶዴዳ። ምናሄመ ካዉተን ባረና ምንሳና ማላነ ማዳና ማላ፥ ትግላት-ፓለሴራዉ ሀታማነ ኦይዱ ሻአ ኪሎ ግራመ ጻጋራ ብራ እሜዳ። 20 ምናሄም ሄ ሚሻ እስራኤልያ አሳ ዎልቃን ጭግሴዳ፤ አሶረ ቢታ ካትያዉ እማናዉ ዱረ አሳ ኡባይ እቱ እቱ እሻታሙ ጻጋራ ብራ ፔድኖ። ሄዋዳን ኦና፥ አሶረ ካቲ እስራኤልያ ቢታ አጊደ፥ ባረ ጋድያ ስሜዳ።

21 ምናሄም ሀኔዳ ሀራባይነ እ ኦዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ። 22 ምናሄም ሀይቂደ፥ ባረ ማይዛን ጋከቴዳ፤ አ ኮታን አ ናአይ ፓቃህ ካተቴዳ።

እስራኤልያ ካትያ ፓቃሀ

23 ይሁዳ ካቲ ኦዝያነ ካተቴዳ እሻታማን ላይን፥ ምናሄማ ናአይ ፓቃህ እስራኤልያ ቦላ ሳማርያን ካተቴዳ፤ እ ላኡ ላይ ካተቴዳ። 24 ፓቃህ መና ጎዳ ስንን ኢታባ ኦዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦያዋ አግቤና። 25 አ ኦላ ጋዳዋቱዋፐ እቱ፥ ራማልያ ናአይ ፓቁሀ ግያዌ አ ቦላ ማቀቲደ ደንዴዳ። ጋላኣደ አሳፐ እሻታሙ አቱማ አሳ ባረናና አክ ቢደ፥ ሳማርያ ካታማን ካትያ ጎለን ደእያ ጌሱዋ ገሌዳ። ፓቁህ ፓቃሀ አርጎባራካ ሃርያናካ እትፐ ዎደ አ ኮታን ባረዉ ካተቴዳ።

26 ፓቃህ ሀኔዳ ሀራባይነ እ ኦዳባይ ኡባይ እስራኤልያ ካተቱዋ ታርክያ ማጻፋን ጻፈት ኡቴዳ።

እስራኤልያ ካትያ ፓቁሀ

27 ይሁዳ ካቲ ኦዝያነ ካተቴዳ እሻታማነ ላኤን ላይን፥ ራማልያ ናአይ ፓቁህ እስራኤልያ ቦላ ሳማርያን ካተቴዳ፤ እ ላታሙ ላይ ካተቴዳ። 28 ፓቁህ መና ጎዳ ስንን ኢታባ ኦዳ፤ ናባጻ ናአይ እዮርባም እስራኤልያ አሳ ኦስሴዳ ናጋራ ኦያዋ አግቤና።

29 እስራኤልያ ካትያ ፓቁሀ ዎድያን አሶረ ካቲ ትግላት-ፓለሴር ዪደ አይኖ፥ አቤል-ቤትማእካ፥ ያኖሀ፥ ቀዴሻነ ሀጾራ ጌተትያ ካታማቱዋ ኦለቲደ ኦይቄዳ፤ ቃይካ ጋላኣደ፥ ጋሊላነ ንፍታሌማ ቢታቱዋ ኡባ ኦለቲደ፥ አሳ አሶረ ጋድያ ኦሞዲደ አፌዳ።

30 ኦዝያና ናአይ ዮኣታመ ካተቴዳ ላታማን ላይን፥ ኤልያ ናአይ ሆሼእ ራማልያ ናኣ ፓቁሀ ቦላ ማቀት ዎደ አ ሳኣን ባረዉ ካተቴዳ።

31 ፓቁህ ሀኔዳ ሀራባይነ እ ኦዳባይ ኡባይ እስራኤልያ ካተቱ ታርክያ ማጻፋን ጻፈት ኡቴዳ።

ይሁዳ ካትያ እዮኣታማ

32 ራማልያ ናአይ፥ እስራኤልያ ካቲ ፓቁህ ካተቴዳ ላኤን ላይን፥ ይሁዳ ካትያ ኦዝያና ናአይ እዮኣታመ ካተቴዳ። 33 እዮኣታመ ካተትያ ዎደ አዉ ላይይ ላታማነ እቼሻ፤ እ የሩሳላመን ታማነ ኡሱፑን ላይ ካተቴዳ። አ አት ሱንይ ያሩሾ፤ ያሩሻ ጻዶቃ ናቶ። 34 ባረ አዉ ኦዝያነ ኦዳዋዳን፥ እዮኣታምካ መና ጎዳ ስንን ሱረባ ኦዳ። 35 ግዶፐነ አሳይ ጎይንያ ቃ ሳኣ ይስቤና፤ ሄ ድራዉ ያርሹዋ ያርሽያዋነ እጻና ጩዋይያዋ አግቤና። እዮኣታመ መና ጎዳ ጌሻ ጎልያ ገልያ ቆሞ ባጋ ፐንግያ ዛረደ ኦዳ።

36 እዮኣታመ ሀኔዳ ሀራባይነ እ ኦዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 37 ሄ ዎድያን መና ጎዳይ ሶርያ ካትያ ራጺናነ ራማልያ ናኣ፥ እስራኤልያ ካትያ ፓቁሀ ይሁዳ ቢታ ኦልሳናዉ ዶሜዳ። 38 እዮኣታመ ሀይቂደ፥ ባረ ማይዛን ጋከቴዳ፤ ባረ ማይዛ አዉዋ ዳዊታ ካታማን ባረ ማይዛ አዎቱዋና ሞገቴዳ። አ ሳኣን አ ናአይ አካዝ ካተቴዳ።