2 ካታቱዋ 12

ይሁዳ ካትያ እዮኣሳ

1 ኢዩ እስራኤልያ ቢታን ካተቴዳ ላፑን ላይን፥ እዮኣስ ይሁዳን ካተቴዳ፤ እ የሩሳላመን ኦይታሙ ላይ ካተቴዳ። አ አት ሱንይ ጺብያ፤ አ በርሳበሀ ካታማፐ ዬዳ አሳ። 2 ቄሲ ዮዳሄ አ ታማርሴዳነ ዞሬዳ ድራዉ፥ እ ደኤዳ ላይ ኡባን እዮኣስ መና ጎዳ ስንን ሱረባ ኦዳ። 3 ግዶፐነ አሳይ ጎይንያ ቃ ሳኣ ይስቤና፤ አሳይካ ሄ ግሹዋን ያርሹዋ ያርሽያዋነ እጻና ጩዋይያዋ አግቤና።

4 እዮኣስ ቄሳቱ ዋ ጼሲደ፥ "መና ጎዳ ጌሻ ጎልያ ይያ ጌሻ ሚሻ ኡባ ሺሽተ። ሄዌካ ሁጲያ ፓይዱዋ ዎደ እመትያ ሚሻነ አሳይ ባረ ሸንያን ጌሻ ጎልያዉ አህያ ሚሻ።✝12:4 ከሳ 30:11-16 5 ያቶፐ ቄሳቱ ኡባይ ሄ ሚሻ አህያ እት እት አሳቱዋፐ ባረንቶ አኪደ፥ ጌሻ ጎልያ ግዶን ኮለቴዳ ሳኣ ኡባ ኦራኖ" ያጌዳ።

6 ሽን ካቲ እዮኣስ ካተቴዳ ላታማነ ሄዘን ላይ ጋካናዉ፥ ቄሳቱ መና ጎዳ ጌሻ ጎልያ ኦራበይክኖ። 7 ሄዋ ድራዉ፥ ካትያ እዮኣስ ቄስያ ዮዳሀነ ሀራ ቄሳቱ ዋነ ጼሲደ፥ "ጌሻ ጎልያ ግዶን ኮለቴዳ ሳኣ አያዉ ኦራክቴ? ሚሻ ጌሻ ጎልያ ኦራናዉ እምተፐ አትና፥ ህንተንቶ እመትያ ሻሉዋ ኦይቆፕተ" ያጌዳ።

8 ቄሳቱ፥ "አሳፐ ሀራ ሚሻ አኮኮ፤ ጌሻ ጎልያ ግዶን ኮለቴዳ ሳአቱዋካ ኦራኮ" ያጊደ ጊጌድኖ።

9 ሄዋፐ ጉይያን፥ ቄስያ ዮዳሄ ሳጽነ እቱዋ አኪደ፥ አ ቁምእያን ጾእያ ሉኬዳ፤ ያርሽያ ሳኣ ማታን መና ጎዳ ጌሻ ጎልያ ገልያሳን ኡሸቻ ባጋና ዎዳ። ገልያ ሳኣ ናግያ ቄሳቱ መና ጎዳ ጌሻ ጎልያ ዬዳ ሚሻ ኡባ ሳጽንያ ግዶን የጊኖ። 10 ሳጽንያ ግዶን ዳሮ ሚሻይ ዳጋቴዳዋ ኡንቱንቱ በኤዳ ዎደ ኡባን፥ ካትያ ጻፊነ ቄሳቱዋ ኡባቱዋ ካፑ ዪኖ፤ መና ጎዳ ጌሻ ጎልያ ዬዳ ሚሻ ፓይዲደ፥ ቃርጪታቱዋን ቆሊኖ።

11 ፓይደቴዳ ሚሻ ልክያ ኤሬዳዋፐ ጉይያን፥ ጌሻ ጎልያ ኦሱዋ ዎቻናዉ ሱንቴዳ አሳቶ እሚኖ። ኡንቱንቱ ሚሻ አኪደ፥ መና ጎዳ ጌሻ ጎልያን አናጸቶነ ግምቢያዋንቶ እሚኖ። 12 ቃይ ሹቻ ማስያዋንቶነ ሹቻ ቆእያዋንቶ ቃንጺኖ። ቃይካ መና ጎዳ ጌሻ ጎልያ ኦራናዉ ሳንቃነ ሹቻነ ኮሽያ ሀራባቱዋ ሻሚኖ። 13 ሽን ጌሻ ጎልያ ዬዳ ሚሻፐ መና ጎዳ ጌሻ ጎልያዉ ብራ ቡርጩቆቱዋ፥ ኦይቂያዋ፥ ከረቱዋነ ጹሩምባቱዋ ዎይ ዎርቃፐነ ብራፐነ መትያ ሀራ ጌሻ ሚሻቱዋ ኦናዉ ከስበይክኖ። 14 ሄ ሚሻ ኡባይ ጌሻ ጎልያ ኦራያ አሳዉ ጭገቲኖ። 15 ጌሻ ጎልያ ኦሱዋ ዎቻናዉ ሱንቴዳ አሳቱዋ ኦንነ፥ "ሚሻን አያ አያ ኦድቴ?" ጊደ ኦችቤና፤ አያዉ ጎፐ፥ አሳቱ አማንያዋንታ።✝12:15 2 ካታ. 22:7 16 ባይዙዋ ድራዉነ ናጋራ ድራዉ ያርሽያ ያርሾ ጭገትያ ሚሻይ ቄሳቶ ገሌፐ አትና፥ መና ጎዳ ጌሻ ጎልያ ኦራያ ሚሻ ሳጽንያን ገለና።✝12:16 ዎጋ 7:7

አዛኤል የሩሳላሞ አዳ

17 ሄ ዎደ ሶርያ ካቲ አዛኤል ቢደ፥ ጋተ ካታማ ኦለቲደ ኦይቄዳ። ያቲደ የሩሳላመ ኦላናዉ ስሜዳ። 18 ሽን ይሁዳ ካቲ እዮኣስ አፐ ካሰ ካተቴዳ ይሁዳ ካተቱ ዮሳፌጸ፥ ዮራምነ አካዝያስ መና ጎዳዉ ዱማይ ዎዳ ሚሻቱዋ፥ ቃይ እ ባረ ሁጲያዉ እሜዳ እሞታነ መና ጎዳ ጌሻ ጎልያነ ካትያ ጎልያ ሚሻ ምንጅያሳን ደእያ ዎርቃ ኡባ አኬዳ። ሶርያ ካትያዉ አዛኤላዉ የዴዳ፤ አዛኤል የሩሳላመ ኦላናዋ አግ ባሼዳ።

19 ካቲ እዮኣስ ሀኔዳ ሀራባይነ እ ኦዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። 20 ሄዋፐ ጉይያን፥ አ ኦሳንቻቱ አ ቦላ ማቀቲደ፥ ሲላ ግያ ሳኣ አፍያ ኦግያን ሚሎ ግያ ሳን ደእያ ጎለን ዎድኖ። 21 አ ኦሳንቻቱ ሽምኣታ ናኣ ዮዛካራነ ሾሜራ ናኣ ይሆዛባዳ። እዮኣስ ዳዊታ ካታማን ባረ ማይዛ አዎቱዋ ዱፉዋን ሞገቴዳ፤ አ ሳኣን አ ናአይ አመስያስ ካተቴዳ።