2 ካታቱዋ 3

ሞኣበ እስራኤልያና ኦለቴዳ

1 ይሁዳ ካቲ ዮሳፌጸ ካተቴዳ ታማነ ሆስፑን ላይን አካባ ናአይ ዮራመ ሳማርያን እስራኤልያ ቦላ ካተቴዳ፤ እ ታማነ ላኡ ላይ ካተቴዳ። 2 እ መና ጎዳ ስንን ኢታ ኦዳ። ሽን ባረ አዉዋነ ባረ ዳይ ኤልዛቤል ኬሻ ኢታ ግደና፤ አያዉ ጎፐ፥ አ አዉ ኦዳ ባኣላ ኤቃ እ ቆሌዳ። 3 ግዶፐነ ናባጻ ናአይ እዮርባም እስራኤልያ አሳ ኦስሴዳ ናጋራ እ ካሌዳፐ አትና ይስቤና።

4 ሞኣበ ቢታ ካቲ ሜሻእ ዶርሳ ሄሜ። እ እስራኤልያ ካትያዉ ጼቱ ሻአ ቦልትቦልታ ዶርሳቱዋነ ጼቱ ሻአ ኮልያ ዶርሳቱዋ እስክያ ላይን ላይን ጊሬ። 5 ሽን እስራኤልያ ካትያ አካብ ሀይቄዳዋፐ ጉይያን፥ ሞኣበ ካቲ ሜሻእ እስራኤልያ ቦላ ማካሌዳ።

6 ሄ ዎደ ካቲ ዮራመ ሳማርያፐ ከሲደ፥ እስራኤልያ ኡባ ሺሼዳ። 7 ቃይ ይሁዳ ካትያ ዮሳፌጻኮ ኪታ የዲደ፥ "ሞኣበ ካቲ ታ ቦላ ማካሌዳ፤ ሞኣበና ኦለታናዉ ኔን ታናና ባኒ?" ያጌዳ።

ዮሳፌጸ፥ "ኤ ታን ባና። ታን ነ ማላ፤ ታ አሳይካ ነ አሳ ማላ፤ ቃይ ታ ፓራቱካ ነ ፓራቱዋ ማላ" ያጊደ ዛሬዳ። 8 ዮሳፌጸ ቃይ፥ "ኑን ሀቃ ኦግያና ቢደ ኡንቱንታ ኦላኔ?" ያጊደ ኦቼዳ።

ካትያ ዮራመ፥ "ኤዶማ ዎራን ደእያ ኦግያና ቢደ ኦላና" ያጊደ ዛሬዳ።

9 ሄዋ ድራዉ፥ እስራኤልያ ካቲ፥ ይሁዳ ካቲነ ኤዶማ ካቲ ኦላዉ ከሴድኖ። ኡንቱንቱ ላፑን ጋላሳ ኦግያ ዩዬዳዋፐ ጉይያን፥ ኦላንቻቶካ ኡንቱንታ ካሌዳ መህያዉካ አይ ሃነ ባዋ። 10 ሄ ዎደ እስራኤልያ ካቲ፥ "አየ አና! መና ጎዳይ ኑና ሀ ሄዙ ካተቱዋ እትፐ ሞኣበ ካትያዉ አደ እማናዉ ጼሴዳ" ያጌዳ። 11 ሽን ዮሳፌጸ፥ "ኑን አ ባጋና መና ጎዳ ኦቻናዳን ሀዋን ትምቢትያ ኦድያዌ ባዌ?" ያጊደ ኦቼዳ።

እስራኤልያ ካትያ ኦላ ጋዳዋቱዋፐ እቱ፥ "ኤላሳ ማዲደ ደኤዳ ሻፋጻ ናአይ ኤልሳእ ሀዋን ደኤ" ያጊደ ዛሬዳ።

12 ዮሳፌጸ፥ "ኤ፥ እ ቱሙ ትምቢትያ ኦድያዋ" ያጌዳ። ሄዋፐ ጉይያን፥ እስራኤልያ ካቲ፥ ዮሳፌጽነ ኤዶማ ካቲነ ኤልሳአኮ ዱገ ዎድኖ።

13 ኤልሳእ እስራኤልያ ካትያ፥ "ታናናነ ኔናና አዬ ጋያዌ? ባ፤ ባደ ነ አዉነ ነ ዳያነ ኦቼዳ ትምቢትያ ኦድያዋንታ ኦቻ" ያጌዳ።

እስራኤልያ ካቲ ዛሪደ፥ "ቱይት፥ አያዉ ጎፐ፥ ሀ ሄዙ ካተቱዋካ እትፐ ሞኣበ ካትያዉ አደ እማናዉ ኑና ጼሴዳዌ መና ጎዳቴ!" ያጌዳ።

14 ኤልሳእ፥ "ታን አዉ ኦያ ኡባፐ ዎልቃማ መና ጎዳይ ኤሮ! ይሁዳ ካትያ ዮሳፌጻ ድራይ ባይናዋ ግድንቶ፥ ታን ኔና አይፍያንነ ጼልከነ በእከ ሽን። 15 አነ ታዉ ሀእ ዲ ዲጽያዋ አህተ" ያጌዳ።

ዲጽያዌ ዲጽሽን፥ መና ጎዳ ዎልቃይ አ ቦላ ዎዳ። 16 ኤልሳእ፥ "መና ጎዳይ፥ ‘ሀ መላ ዛንጋራ ኡባን ኦላ ቦክተ’ ያጌ። 17 አያዉ ጎፐ፥ መና ጎዳይ፥ ጫርኩዋ ዎይ እራ በእክታ፤ ሽን ሀ ቦኬዳ ዛንጋራን ሃይ ኩማና፤ ህንተንቱ፥ ህንተንቱ ሚዛይነ ህንተንቱ ሀራ መሂ ኡሻና ያጌ። 18 ሀዌ መና ጎዳ ስንን ላፋባ፤ ቃይ መና ጎዳይ ሞኣባካ ህንተንቶ አደ እማና። 19 ግምበቴዳ ካታማቱዋነ ዎልቃማ ካታማቱዋ ኡባ ህንተንቱ ጾናና። ሎኦ ምቱዋ ኡባካ ቃንጻና፤ ሃ ፑልቶቱዋ ኡባቱዋካ ህንተንቱ ባራና፤ አራዳ ሾይቃቱዋ ኡባ ቦላን ሹቻ ላሊደ ባይዛና" ያጌዳ።

20 ዎንተ ጋላስ ዎንታ ያርሹዋ ያርሽያ ዎዲ ጋክና፥ ኤዶማ ባጋና ሃይ ጎጌዳ፤ ሃይ ቢታን ኤሌዳ።

21 ሞኣበ ቢታ አሳይ ሄዙ ካተቱ ኡንቱንታ ኦላናዉ ዬዳዋ ስሴዳ። ናናይ፥ ጭማይ ኦላ ሚሻ ቶካናዉ ዳንዳይያ አሳይ ኡባይ ጼሰት ዪደ፥ ባረንቱ ቢታ ዛዋ ናጌድኖ። 22 ኡንቱንቱ ዎንታ ጉራና ደንድያ ዎደ፥ ሃ ቦላ ዎዳ ጻልቂ ዞኢደ፥ ኡንቱንቶ ሱ ማላቲደ ቤቴዳ። 23 ያትና ኡንቱንቱ፥ "በእተ፥ ሀዌ ሱ! ካተቱ ባረንቱ ግዶን እቱ እቱዋና ኦለቲደ፥ ሀይቂ ዉሬድኖ። ሞኣበ አሳዉ፥ አነ ቢደ፥ ኡንቱንታ አቁዋ ቆጭሬቶ" ያጌድኖ።

24 ሞኣበ ቢታ አሳይ እስራኤላቱ አቁዋ ቤዳ፤ እስራኤላቱ ደንዲደ፥ ኡንቱንታ ሾጬድኖ። ኡንቱንቱ ጋድያ ቦላን ማዬድኖ፤ ሞኣበ አሳ ዎድኖ። 25 ካታማቱዋካ ኦለቲደ ባይዜድኖ። አሳይ ኡባይ ሁጲያን ሁጲያን እት እት ሹቻ አኪደ፥ አራዳ ሾይቃቱ ኡባቱ ካመታና ጋካናዉ፥ ኡንቱንቱ ቦላ ኦሌዳ። ፑልቶ ኡባ ባሪደ፥ ሎኦ ም ኡባካ ቃንጼድኖ። ቂርሄሬሳ ጌተትያ እት ካታማ ግምበ ጻላላይ ኤቁዋን አቴዳ፤ ሽን ያምባርሻን ኦልያ አሳቱ ሄ ካታማካ ዶዲደ ሾጬድኖ።

26 ሞኣበ ካቲ ኦላይ ባረ ቦላ ጎቤዳዋ በኤዳ ዎደ፥ ማሻ ዳንጪደ ላፑን ጼቱ አሳቱዋ አኬዳ። ኦላ ግዱዋን ዳኪደ፥ ኤዶማ ካትያኮ ፕናናዉ ደንዴዳ፤ ሽን አዉ ሀነናን እጼዳ። 27 ሄዋፐ ጉይያን፥ ባረ ሳኣን ካተታናዉ ደእያ ባረ ባይራ ናኣ አኪደ፥ ካታማ ግምቢያ ቦላን ታማን ጹጊደ ያርሼዳ። ሞኣባቱ እስራኤላቱ ቦላ ሀንቁዋ ሱሌድኖ። ያትና እስራኤላቱ ሄ ካታማ አጊደ፥ ባረንቱ ጋድያ ስሜድኖ።