2 ካታቱዋ 9

ኢዩ. እስራኤልያ ቦላ ካተታናዉ ኦከቴዳ

1 ትምቢትያ ኦድያ ኤልሳእ ትምቢትያ ኦድያዋንቱ ጭታፐ እት ብታንያ ጼሲደ፥ ሀዋዳን ያጌዳ፤ "ነ ካባ ነ ሳቂያን ስርቃደ ሀ ጻሩዋ ዛይትያ አካደ፥ ራሞታ-ጋላኣደ ግያ ካታማ ባ። 2 ጋካደ፥ ዮሳፌጻ ናኣ፥ ንምሻዉ ናኣ ናኣ እያ ኮያ። ደማደ፥ አ ላገቱዋፐ አ ጋጻ ከሳደ፥ ቆልኦ ገልሳ። 3 ሄዋፐ ጉይያን፥ ጻሩዋ ዛይትያ አካደ፥ አ ሁጲያን ትጋደ፥ ‘ኔና መና ጎዳይ፥ "ኔን እስራኤልያ ቦላ ካተታናዳን ታን ኔና ኦካይ" ያጌ’ ያጋ። ያታደ ካርያ ዶያደ፥ ባቃታፐ አትና፥ ጋምኦፓ" ያጌዳ።

4 ሄዋ ድራዉ፥ ትምቢትያ ኦድያ ዎዳላይ ራሞታ-ጋላኣደ ካታማ ቤዳ። 5 እ ያ ጋኬዳ ዎደ፥ ኦላ ጋዳዋቱ እትፐ ዞረትያዋንታ ደሚደ፥ "ኦላ ጋዳዋዉ፥ ታን ነዉ ኦድያባይ ደኤ" ያጌዳ።

ኢዩ፥ "ኑ ግዶፐ ኦስ ኦዳንቴ?" ያጊደ ኦቼዳ።

ትምቢትያ ኦድያዌ፥ "ኦላ ጋዳዋዉ፥ ነዉ ኦዳና" ያጊደ ዛሬዳ።

6 ኢዩ ደንዲደ ሶ ገልና፥ ትምቢትያ ኦድያዌ አ ሁጲያን ዛይትያ ትጊደ፥ "መና ጎዳይ እስራኤልያ ጾሳይ ኔና ሀዋዳን ያጌ፥ ‘ኔን መና ጎዳ አሳ ቦላ፥ እስራኤልያ ቦላ ካተታናዳን ታን ኔና ኦካይ።✝9:6 1 ካታ. 19:16 7 ኔን ነ ጎዳ አካባ ዛርያ ይሳና። አያዉ ጎፐ፥ ታን ኤልዛቤላ ጉሴዳ ትምቢትያ ኦድያ መና ጎዳ ቆማቱዋ ሱነ ታ ሀራ ቆማቱዋ ሱ ሀሉዋ ከሳና። 8 አካባ ዛርያ ኡባይ ያና፤ ታን እስራኤላን አካባ ዛርያፐ አይልያ ግድና፥ ዎማኑዋ ግድና፥ አቱማዋ ኡባ ቆላና። 9 አካባ ዛርያ ናባጻ ናኣ እዮርባማ ዛርያዳንነ አኪያ ናኣ ባእሻ ዛርያዳን ታን ኦና። 10 ኤልዛቤሎ ግዶፐ፥ እዝራኤላ ጎሻን እዞ ካናቱ ማና፤ ኦንነ እዞ ሞገና’ ያጌ" ያጌዳ። ሄዋ ኦዴዳዋፐ ጉይያን፥ ካርያ ዶይ የግነ ዎ ላሲሼዳ።✝9:10 1 ካታ. 21:23

11 ኢዩ ባረ ላገ ግዴዳ ኦላ ጋዳዋቱዋኮ ቤዳ ዎደ፥ ኡንቱቱፐ እቱ አ፥ "ሳአይ ሳሬ? ሀ ጎይያ ብታኒ ኔኮ አያዉ ዬዴ?" ያጊደ ኦቼዳ።

ኢዩ ኡንቱንቶ፥ "ሀ ብታንያነ አ ሃሳያነ ህንተንቱ ኤሪታ" ያጌዳ።

12 ኡንቱንቱ፥ "ሀዌ ዎርዱዋ። አነ ኔን ኑዉ ኦዳ" ያጌድኖ።

ኢዩ፥ "እ ታዉ፥ መና ጎዳይ ኔና፥ ‘ኔን እስራኤልያ ቦላ ካተታናዳን ታን ኔና ኦካድ’ ያጌ ያጌዳ" ያጌዳ።

13 ሄ ዎደ ኡንቱንቱ ኤለካ ባረንቱ ማዩዋ አኪደ፥ ኢዩ የደ ከስያ ደን ዎድኖ፤ ሂጺደ ማላካታ ፑኔድኖ። ባረንቱ ቃላካ ቁ ኦደ፥ "ኢዩ ካተቴዳ!" ያጌድኖ።

እስራኤልያ ካትያ ዮራማ ዎድኖ

14 ያትና ዮሳፌጻ ናአይ፥ ንምሻዉ ናኣ ናአይ ኢዩ ዮራማ ቦላ ማቀቴዳ። ሄዌ ሀንያ ዎደ፥ ዮራምነ እስራኤልያ አሳይ ኡባይ ሶርያ ካትያ ሀዛኤላፐ ጋላኣደን ደእያ ራሞታ ግያ ካታማ ናጋናዉ ብድጌድኖ። 15 ሽን ኡንቱንቱፐካ ካቲ ዮራመ ሶርያ ካትያ ሀዛኤላና ኦለቴዳ ዎደ፥ ሶርያ ጋደ አሳቱ አ ጫዴዳ ጫቻ ለታናዉ እዝራኤላ ካታማ ይክቼዳ።

ያትና ኢዩ ጋዳዋቱዋ፥ "ህንተንቱ ቆፋይ ሄዋ ግዶፐ፥ ሀ ካታማፐ እት አሳይነ ከስ ቢደ፥ እዝራኤላ ካታማን ሀ ኦዱዋ ኦደናዳን ተእተ" ያጌዳ። 16 ሄዋፐ ጉይያን፥ ኢዩ ፓራ ጋርያን ከስ ኡቲደ፥ እዝራኤላ ካታማ ቤዳ። አያዉ ጎፐ፥ ዮራመ ፓጽቤናዌ ያን ሸምፔ። ቃይ ይሁዳ ካቲ አካዝያስ አ ኦቻናዉ ያ ዱገ ብ ኡቴዳ።

17 እዝራኤላ ካታማ ግምቢያ ቦላ ኤቂደ ዎችያዌ ጼሲደ፥ "እት ጭታይ ይያዌ ታዉ ቤቴ" ያጌዳ።

ዮራመ፥ "ኡንቱንቱና ጋከታናዳን እት ፓራ አሳ የዳ። ፓራዉ ቢደ፥ ‘ሳአይ ሳሬ?’ ያጎ" ያጌዳ።

18 ፓራዉ ኢዩና ጋከታናዉ ቢደ፥ "ካቲ ኔና፥ ‘ሳአይ ሳሬ?’ ያጌ" ያጌዳ።

ኢዩ፥ "ሳሮባን ኔና ጋያዌ ባዋ። ታ ጉየ አ ታና ካላ" ያጊደ ዛሬዳ።

ያትና ዎችያዌ ካትያ፥ "ኪተቴዳዌ ኡንቱንቱኮ ጋኬዳ፤ ሽን ጉየ ስምቤና" ያጊደ ኦዴዳ።

19 ሄዋ ድራዉ፥ ካቲ ላኤን ፓራዉዋ ኡንቱንቱኮ ኪቴዳ። እ ኡንቱንቱኮ ዪደ፥ "ካቲ ህንተንታ፥ ‘ሳእ ሳሬ?’ ያጌ" ያጌዳ።

ኢዩ ብታንያ፥ "ሳሮባን ኔና ጋያዌ ባዋ። ታ ጉየ አ ታና ካላ" ያጌዳ።

20 ዎችያዌ፥ "ላኤን ፓራዉ ኡንቱንቱኮ ጋኬዳ፤ ሽን ጉየ ዛሪደ ዬና። ቃይ ጋርያ ላጋይ ንምሻ ናኣ ናኣ ኢዩ ላጉዋ ማላ፤ እ ጎይያ አሳዳን ላጌ" ያጊደ ኦዴዳ።

21 ሄዋፐ ጉይያን፥ ካቲ ዮራመ፥ "ታዉ ፓራ ጋርያ ዋጽተ" ያጊደ አዛዜዳ።

ፓራ ጋርያ ዋጼድኖ። እስራኤልያ ካቲ ዮራምነ ይሁዳ ካቲ አካዝያስ ባረንቱ ጋርያን ጋርያን ኡቲደ፥ ኢዩና ጋከታናዉ ቤድኖ። እዝራኤልያ ናቡተ ጋደን አ ደሜድኖ። 22 ዮራመ እያ በኤዳ ዎደ፥ "ኢዩ፥ ሳእ ሳሬ?" ያጊደ ኦቼዳ።

ኢዩ፥ "ነ ዳይ ኤልዛቤል ኤቃ ጎይናይነ ብታይነ ሄዋ ኬና ዳር ደእሽን፥ ሳሮተይ ዋን ደአናዉ ዳንዳዪ?" ያጊደ ዛሬዳ።

23 ያቶዋን ዮራመ ባረ ፓራ ጋርያ ጉየ ዛሪደ ባቃቴዳ። አካዝያሳ ጼሲደ፥ "አካዝያሳ፥ ሀዌ ማካላ!" ያጌዳ። 24 ሄዋፐ ጉይያን፥ ኢዩ ባረ ዎንዳፍያን ባረ ኩመን ዎልቃፐ ዳፊደ፥ ዮራማ ላኡ ካትሳፐ ግዱዋን ዱኬዳ። ዎንዳፊ አ ዎዛናና አደ ከስና፥ ባረ ጋርያ ግዶ ኩንዴዳ። 25 ኢዩ ብድቃራ፥ "ዮራማ ደንደ፥ ካሰ እዝራኤልያ ናቡተ ጋደን ኦላ። ነነ ታነ እትፐ ዮራማ አዉዋ አካባ ካል ቶጊደ ቢሽን፥ መና ጎዳይ አ ቦላ ትምቢትያ ጊደ ኦዴዳዋ ሀሳያ። 26 ሄ ዎደ መና ጎዳይ፥ ‘ናቡተ ሱነ አ አቱማዋ ናናቱዋ ሱ ታን ዝኖ በኣድ፤ ሄዋ አጩዋ ታን ኔና ቱሙ ሀ ጋደን ጭግሳና’ ያጌዳ። ሀእ ስም መና ጎዳይ ጌዳዋዳን፥ ዮራማ ደንደ፥ ሀ ጋደን ኦላ" ያጌዳ።✝9:26 1 ካታ. 21:19

ይሁዳ ካትያ አካዝያሳ ዎድኖ

27 ይሁዳ ካቲ አካዝያስ ሄዋ በኤዳ ዎደ፥ ቤት-ሀጋና ግያ ካታማ ባቃቲደ ቤዳ። ኢዩ አ ካሊደ የደርሲደ፥ "አካ ዱክተ!" ያጌዳ። ኡንቱንቱ አ ካሊደ፥ ይብላኣማ ካታማ ኤለካ ደእያ ጉራ ግያ ፑደን አ ጋርያ ቦላ ዱኬድኖ። ያትና እ ማግዶ ጌተትያ ካታማ ባቃቲደ፥ ያን ሀይቄዳ። 28 አ ካልያዋንቱ ጋርያን አ አኪደ፥ የሩሳላመ አፌድኖ፤ አ ማይዛ አዎቱዋና ዳዊታ ካታማን ሞጌድኖ።

29 አካባ ናአይ ዮራመ ካተቴዳ ታማነ እተንያ ላይን አካዝያስ ይሁዳን ካተቴዳ።

ካታት ኤልዛቤል ሀይቁዋ

30 ሄዋፐ ጉይያን፥ ኢዩ እዝራኤላ ካታማ ቤዳ። ኤልዛቤላ ሄዋ ስሴዳ ዎደ፥ ባረ አይፍያ ኦካደ፥ ባረ ሁጲያካ ፕጻደ፥ ማስኮትያና ዱገ ኦግያ ጼላዱ። 31 ኢዩ ፐንግያና ገልሽን፥ "ላ ነ ጎዳ ዎዳ ዝምራ፥ ሀዋ ሳሮ ያድ?" ያጋዱ።*9:31 ዝምራ፦ ዝምር ባረ ካትያ ዎዳ። 1 ካት 16:8-12 ጼላ።

32 ኢዩ ፑደ ማስኮትያኮ ጼሊደ፥ "ላ ታ ባጋ ግዳናዌ ኦኔ? አነ ኦኔ?" ያጌዳ። ላኡ ዎይ ሄዙ ሱንቱ አኮ ጼሌድኖ። 33 ኢዩ፥ "ኦ ዱገ ኦል አግተ!" ያጌዳ። ኡንቱንቱ እዞ ዱገ ኦሌድኖ። ያትና እ ሱይ ጎዳ ቦላነ ፓራቱዋ ቦላነ ጫጫፈቴዳ፤ ፓራቱ ባረንቱ ገድያን እዞ የድኖ።

34 ሄዋፐ ጉይያን፥ ኢዩ ካትያ ጎልያ ገሊደ፥ ሜዳነ ኡሼዳነ። ያቲደ እ፥ "ሀ ሸቀቴዳ ምሽራቶ አፊደ ሞግተ፤ አያ ግዶፐነ አ ካትያ ናኣ" ያጌዳ። 35 ሽን ኡንቱንቱ እዞ ሞጋናዉ ቢደ፥ እዝዉ ጉግያፐ፥ ገደቱዋፐነ ኩሸቱዋፐ አትና፥ ሀራባ ደምቤይክኖ።

36 ሄዋ ድራዉ፥ ኡንቱንቱ ስሚደ፥ ኢዩዉ ኦዴድኖ፤ እ፥ "መና ጎዳይ ባረ ቆማ ተስቢያ ኤላሳ ባጋና፥ ‘እዝራኤላን ደእያ ጋደን ኤልዛቤል አሹዋ ካናቱ ማና።✝9:36 1 ካታ. 21:23 37 አቴዳዌካ እዝራኤላን ደእያ ጋድያን ፕቶ ማላ ግዳናዋ። ሄዋ ድራዉ ኦንነ፥ "ሀና ኤልዛቤሎ" ጋናዉ ዳንዳየና’ ያጊደ ኦዴዳ ቃላይ ሀዋ" ያጌዳ።