ሃ ቦላን ዎዳ ቤጽያ አይፍያ
1 ትምቢትያ ኦድያዋንቱ ጭታይ ኤልሳአ፥ "ሀዋ በአ! ኑን ደእያ ሳአይ ኑና ዳሮፐ ኡንኤ። 2 ኑን ኡባቱካ ም ቃንጻናዉ ዮርዳኖሳ ሻፋ አነ ቦይተ። ያን ኑዉ ደእያ ሳኣ አነ ኬጾይተ" ያጌድኖ።
ኤልሳእ፥ "ቢተ" ያጌዳ።
3 ትምቢትያ ኦድያዋንቱፐ እቱ፥ "ሀያና ኔንካ ነ ቆማቱዋና ኑናና ደንዳርኪ?" ያጌዳ።
ኤልሳእ፥ "ኤኖ ባና" ያጊደ ዛሬዳ፤ 4 ያቲደ ኡንቱንቱና እትፐ ቤዳ።
ኡንቱንቱ ዮርዳኖሳ ጋኬዳ ዎደ፥ ም ቃንጹዋ ዶሜድኖ። 5 ሽን ኡንቱንቱፐ እቱ ም ቃንጽሺና፥ ቤጽያ አይፊ ከስ አኪደ፥ ሃ ግዶን ገሌዳ። ሄ ብታኒ፥ "ሀይ ታ ጎዳዉ፥ ታን ጋርጻ አኬዳዋ፤ ሽን ዋኖሻ!" ያጊደ ዋሴዳ።
6 ጾሳ ብታኒ፥ "ሀቃን ገሌዴ?" ያጊደ ኦቼዳ፤ ብታኒ ገሌዳ ሳኣ በሴዳ። ኤልሳእ ጋትማ ቃንጺደ፥ ሃን ኦሌዳ፤ ቤጽያ አይፊ ሃ ቦላ ከሴዳ። 7 ሄዋፐ ጉይያን፥ ኤልሳእ ብታንያ፥ "ከሳደ አካ" ያጌዳ። ብታኒ ባረ ኩሽያ የዲደ አኬዳ።
ኤልሳእ ሶርያ ኦላንቻቱዋ ቆቅሲደ ዎራ ካለዳ
8 ሶርያ ቢታ ካቲ እስራኤላቱዋና ኦለቲደ ደኤ። ያቴዳዌ ባረ ኦላ ጋዳዋቱዋና ዞረቲደ፥ "ታን ህቃሳን፥ ህቃሳን ጌሱዋ መና" ያጌዳ።
9 ጾሳ አሳይ ኤልሳእ እስራኤልያ ካትያኮ አሳ ኪቲደ፥ "ሶርያ አሳቱ ሄ ሳኣ ዱገ ዎያ ድራዉ፥ ሄ ሳኣና አፓ" ያጌዳ። 10 ሄዋ ድራዉ፥ እስራኤልያ ካቲ ጾሳ ብታኒ ማላቴዳ ሳኣ ኪቲደ፥ ያን ደእያ አሳይ ናገታናዳን ሀሳይሴዳ። ካትያ ናገታና ማላ፥ ኤልሳእ ዎድያን ዎድያን ሀሳይሴዳ።
11 ሀ የዉ ሶርያ ካትያ ሎይ ሀንቀዳ፤ ያትና እ ባረ ኦላ ጋዳዋቱዋ ጼሲደ፥ "ኑ ግዶን እስራኤልያ ካትያ ባጋ ግዴዳዌ ኦነንቶ አነ ታዉ ኦድተ" ያጊደ ኦቼዳ።
12 አ ኦላ ጋዳዋቱዋፐ እቱ፥ "ታ ጎዳዉ፥ ካትያዉ፥ ኑ ግዶን ሄዋ ኦያዌ ኦንነ ባዋ። ሽን ነ ሲርጻን ደኣደ ኔን ሃሳይያዋ ኡባ እስራኤላን ደእያ ትምቢትያ ኦድያ ኤልሳእ እስራኤልያ ካትያዉ ኦዴዳ" ያጌዳ።
13 ካቲ፥ "ታን አሳ ኪታደ አ ኦሞዳናዳን፥ ቢደ ሀቃን ደእንቶነ ኮይተ" ያጌዳ።
ጉየፐ ኡንቱንቱ፥ "እ ዶታና ጌተትያ ካታማን ደኤ" ያጊደ ኦዴድኖ።
14 ካቲ ዳሮ ኦላንቻቱዋ ፓራቱዋናነ ፓራ ጋረቱዋና ያ የዴዳ። ሄ የዴዳዋንቱ ቃማ ዪደ፥ ካታማ ዶዴድኖ። 15 ጾሳ አሳ ኤልሳአ ቆማይ ዎንተ ጋላስ ጉራና ደንዲደ፥ ካረ ከስያ ዎደ፥ ኦላንቻቱ ፓራቱዋናነ ፓራ ጋረቱዋና ካታማ ዶድ ዎድኖ። ሄ ቆማይ፥ "አየ አና ኑኖ! ታ ጎዳዉ፥ ኑን ዋናኔ?" ያጊደ ኦቼዳ።
16 እ፥ "ያዮፓ! ኑናና ደእያዋንቱ ኡንቱንቱና ደእያዋንቱፐ ዳሪኖ" ያጊደ ዛሬዳ።
17 ሄዋፐ ጉይያን ኤልሳእ፥ "አቤት መና ጎዳዉ፥ እ በአናዳን አ አይፍያ ዶያ" ያጊደ ዎሴዳ። መና ጎዳይ ኤልሳአ ቆማ አይፍያ ዶይና፥ ኤልሳአ ዩሹዋ ኡባን ደእያ ታማ ፓራቱነ ፓራ ጋረቱነ ደርያ ማዬዳዋንታ በኤዳ።
18 ሶረቱ አ ቦላ ዬዳ ዎደ ኤልሳእ፥ "ሀ አሳ አይፍያ ቆቅሳርኪ" ያጊደ መና ጎዳ ዎሴዳ። ኤልሳእ ዎሴዳዋዳን መና ጎዳይ ኡንቱንቱ አይፍያ ቆቅሴዳ። 19 ሄዋፐ ጉይያን፥ ኤልሳእ ኡንቱንታ፥ "ኦጊ ሀዋ ግደና፤ ካታማይካ ሀዋ ግደና። ህንተንቱ ኮይያ አሳ ታን ህንተንታ በሳና፤ ታና ካልተ" ያጌዳ። ኡንቱንታ ካለደ፥ ሳማርያ ካታማ አፌዳ።
20 ኡንቱንቱ ሳማርያ ካታማ ገሎሳናካ ኤልሳእ፥ "አቤት መና ጎዳዉ፥ ሀ አሳቱ ጼላናዳን ኡንቱንቱ አይፍያ ዶያ" ያጌዳ። መና ጎዳይ ኡንቱንቱ አይፍያ ዶይና፥ ኡንቱንቱ ሳማርያ ግዶን ደእያዋ በኤድኖ። 21 እስራኤልያ ካቲ ኡንቱንታ በኤዳ ዎደ ኤልሳአ፥ "ታ አዎ፥ ታን ኡንቱንታ ዎ? ታን ኡንቱንታ ዎ?" ያጊደ ኦቼዳ።
22 ኤልሳእ፥ "ቱይት ዎፓ! ሀዋንቱ አትና፥ ኔን ነ ማሻንነ ነ ዎንዳፍያን ኦሞዴዳዋንታካ ዎናዉ በሰና። ኡንቱንቱ ሚደ ኡሺደ ባረንቱ ጎዳኮ ባናዳን፥ ኡክነ ሃነ ኡንቱንቱ ስን አ" ያጌዳ። 23 ሄዋ ድራዉ፥ እስራኤልያ ካቲ ኡንቱንቶ ባላ ጊግሴዳ። ኡንቱንቱ ሜዳዋፐነ ኡሼዳዋፐነ ጉይያን፥ እ ኡንቱንታ የድና፥ ባረንቱ ጎዳኮ ስሜድኖ። ሄ ዎድያፐ ዶምና፥ ሶረቱ እስራኤላቱ ቦላን ይያዋ አግ ባሼድኖ።
ሳማርያ ካታማይ ዶደቱሳ
24 ሄዋፐ ጉይያን፥ ሶርያ ካቲ በንሀዳድ ባረ ኦላንቻቱዋ ኡባ ሺሽ፥ ቢደ ሳማርያ ካታማ ዶዴዳ። 25 ኡንቱንቱ ዶዴዳ ጋሱዋን ሳማርያ ካታማን ዎልቃማ ኮሻይ ገሌዳ፤ እት ሀርያ ሁጲ ሆስፑን ታሙ ጻጋራ ብራን፥ ላኡ ጼቱ ግራመ ግድያ ሀራጰቱዋ ሽአይ እቼሹ ጻጋራ ብራን ዛልኤቴዳ።
26 እስራኤልያ ካቲ ካታማ ድርሳ ግምቢያ ቦላና አሽን፥ እት ምሽራታ፥ "ታ ጎዳዉ፥ ካትያዉ፥ ታና ማዳርኪ" ያጋደ ዋሳዱ።
27 ካቲ እዞ፥ "ኔና መና ጎዳይ ማደናን እጾፐ፥ ታን ነዉ ማዱዋ ሀቃፐ ደማናዉ ዳንዳያይታ? ካ ቡክያ ኡዱማፔየ፥ ዎይንያ አይፍያ ጉምእያ ሳኣፔ?" ያጌዳ። 28 ቃይ እ እዞ፥ "ኔን ዋናዲ?" ያጊደ ኦቼዳ።
ምሽራታ ዛራደ፥ "ሀ ምሽራታ ታና፥ ‘ሀች ነ ናኣ ማናዉ አካደ ያ፤ ቃይ ዎንት ኑን ታ ናኣ ማና’ ያጋዱ። 29 ሄዋ ድራዉ፥ ታ ናኣ ዶይሲደ ሜዶ፤ ዎንተ ጋላስ ታን እዞ፥ ‘ኑን ማናዉ ነ ናኣ አካደ ያ’ ያጋድ። ሽን አ ባረ ናኣ ቆሳዱ" ያጋዱ።6:29 ዛረ. 28:57፤ ሴላ 4:10
30 ካቲ ምሽራታ ኦዴዳዋ ስሲደ፥ ባረ ማዩዋ ፖሽ ኦሌዳ። ያቲደ እ ግምቢያ ቦላና አሽን፥ ጋርሳ ባጋና እ ማዬዳ ዋሩዋ አሳይ በኤዳ። 31 ሄዋፐ ጉየ ካቲ፥ "ሻፋጻ ናኣ ኤልሳአ ጉግ አ ቦላ ሀቼ ፔሾፐ፥ ጾስ ታና ዎ!" ያጌዳ።
32 ሄ ዎደ ኤልሳእ ባረ ሶን ኡቴዳ፤ ጭማቱካ አናና እትፐ ደኢኖ። ካቲ ባረፐ ስንዉ አሳ ኪቴዳ፤ ሽን ሄ ብታኒ ጋካናዉ፥ ኤልሳእ ጭማቱዋ፥ "ሀ ሸምፑዋ ዎያዌ ታ ቆያ ሙጭሳናዉ አሳ ኪቴዳዋ ህንተንቱ በኢቴ? ሄ ኪተቴዳዌ ዬዳ ዎደ፥ እፍ ጎርዲደ ገልሶፕተ። አ ጎዳይካ አ ካሊደ ዪደ ደኤ" ያጌዳ።
33 እ ጭማቱዋና ሃሳይሽን፥ ኪተቴዳዌ አኮ ዬዳ። ካቲካ ዪደ፥ "ሀ መቱ መና ጎዳፐ ዬዳ። ያትና ታን ሀዋፐ ዳሩዋ መና ጎዳ አያዉ ናጋይታ?" ያጌዳ።