2 ካታቱዋ 21

ይሁዳ ካትያ ምናሳ

1 ምናሰ ካተትያ ዎደ ላይይ አዉ ታማነ ላኣ፤ እ የሩሳላመን እሻታማነ እቼሹ ላይ ካተቴዳ። አ አት ሱንይ ሄፍጺቦ።

2 መና ጎዳይ እስራኤልያ አሳ ስንፐ ላጊደ ከሴዳ አሳቱዋ ደኡዋ ዎጋ፥ ሄ ሸነይያዋ ቁሊደ፥ ምናሰ መና ጎዳ ስንን ኢታባ ኦዳ።✝21:2 ኤር. 15:4 3 አ አዉ ህዝቂያሰ ላሌዳ፥ ጎይንያ ቃ ሳኣ እ ዛረደ ኬጼዳ፤ እስራኤልያ ካቲ አካብ ኦዳዋዳን፥ ባኣላ ግያ ጾሳዉ ያርሽያ ሳአቱዋነ አሼሮ ግያ ጾሳት ምስለቱዋ መዳ። ቃይ ሳሉዋ ጾልንተቶ ኡባዉካ ጎይኔዳነ ኡንቱንቶ ኦዳ። 4 መና ጎዳይ ካሰ፥ "ታን ታ ሱን የሩሳላመን ጼስሳና" ያግ ዎዳ መና ጎዳ ጌሻ ጎልያን ሀራ ጾሳቶ ያርሽያ ሳኣ ጊግሴዳ።✝21:4 2 ሳሜላ 7:13 5 መና ጎዳ ጌሻ ጎልያን ደእያ ላኡ ዳባባቱዋን ሳሉዋ ጾልንተቶ ኡባዉ ያርሽያ ሳኣ ጊግሴዳ። 6 ባረ የሌዳ ናኣ ታማን ጹጊደ ያርሼዳ። እ ባረ ሁጲያዉካ ብትያዋነ ሙሩንያዋ ግዲደ፥ ሻሬቾቱዋነ ሞይትልያ ሃሳይስያዋንታ ዞርያ ኦቼዳ። መና ጎዳ ስንን ዳሮ ኢታባ ኦደ፥ አ ሀንቀዳ።

7 አሼሮ ግያ ጾሳት ምስልያ፥ ማሰት ከሴዳዋ አሂደ፥ መና ጎዳ ጌሻ ጎልያ ግዶን ኤሴዳ። ሄ ጌሻ ጎሊ፥ መና ጎዳይ ዳዊታነ አ ናኣ ሶሎሞና፥ "እስራኤልያ ዛርያ ኡባ ግዶፐ ታን ዶሬዳ ሀ ጌሻ ጎልያንነ የሩሳላመን ታን ታ ሱን መናዉ ጼስሳና።✝21:7-8 1 ካታ. 9:3-5፤ 2 ኦዱዋ 7:12-18 8 እስራኤልያ አሳ ታን አዛዜዳ አዛዙዋ ኡባነ ታ ቆማይ ሙሴ ኡንቱንቶ እሜዳ ህግያ ኡባ ናጊደ ኦፐ፥ ታን ኡንቱንቱ ማይዛ አዋቶ እሜዳ ጋድያፐ ኡንቱንታ ደንደ ቶይላይከ" ያጌዳ። 9 ሽን አሳይ ስሰናን እጼዳ። መና ጎዳ እስራኤልያ አሳ ስንፐ ይሴዳ ጋደ አሳዋፐካ አያ ኢታ ኦና ማላ፥ ምናሰ ኡንቱንታ ባለዳ።

10 መና ጎዳይ ትምቢትያ ኦድያ ባረ ቆማቱዋ ባጋና ሀዋዳን ያጌዳ፤ 11 "ይሁዳ ካቲ ምናሰ ሀ ቱና ኪታ ኦዳ፤ ባረፐ ካሰ ደኤዳ አሞረ አሳ ኡባ ናጋራፐካ አያ ኢታ ኦዳ፤ ይሁዳ አሳ ባረ መዳ ኤቃ ምስልያዉ ጎይንሲደ፥ ናጋራ ኦስሴዳ። እ ሄዋ ኦዳ ድራዉ፥ 12 ታን መና ጎዳይ እስራኤልያ ጾሳይ ሀዋዳን ያጋይ፤ ‘ስስያ አሳ ኡባ ሀይዉ ኢትያ ባሻ ታን የሩሳላመ ቦላነ ይሁዳ ቦላ አሀና ሀናይ። 13 ታን ሳማርያ ቦላ ጎቼዳ ዎዶሩዋ፥ የሩሳላመ ቦላ ጎቻና፤ አካባ ሶይ አሳ ቦላ የዴዳ ቱምቢያካ፥ የሩሳላመ ቦላ የዳና። እት አሳይ ከርያ ቁጭ ጉፋንደ መልስያዋዳን፥ ታን የሩሳላመ ቁጫደ ጉፋንና። 14 ታ ላታቱዋፐ አቴዳዉንታ ታን ኦላና፤ ታን ኡንቱንታ ኡንቱንቱ ሞርከቱዋ ኩሽያን አደ እማና። ኡንቱንቱ ሞርከቱ ኡባይ ኡንቱንታ ኦይቃናነ ቦንቃና። 15 ኡንቱንቱ ማይዛ አዎቱ ግብጼፐ ከሶደፐ ዶም፥ ሀቼ ጋካናዉ፥ ኡንቱንቱ ታ ስንን ኢታባ ኦዳ ድራዉነ ታና ሀንቀዳ ድራዉ፥ ታን ሀዋዳን ኦና’ ያጋይ" ያጌዳ።

16 ምናሰ ይሁዳ አሳ መና ጎዳ ስንን ናጋራ ኦስሴዳዋ ቦላካ ጉጂደ፥ ጽሎ አሳ ዎዳ፤ የሩሳላመን ሀ ጋጻፐ ያ ጋጻ ጋካናዉ፥ ሱ ኩንዳ።

17 ምናሰ ሀኔዳ ሀራባይ፥ እ ኦዳባይ ኡባይነ እ ኦዳ ናጋራባይ ይሁዳ ካተቱ ታርክያ ማጻፋን ጻፈት ኡቴዳ። 18 ምናሰ ሀይቂደ፥ ባረ ማይዛን ጋከቴዳ፤ ያቲደ ባረ ጎልያ ማታን ደእያ ኡዛ አታክልትያ ሳኣ ግያ ሳኣን ሞገቴዳ። አ ኮታን አ ናአይ አሞነ ካተቴዳ።

ይሁዳ ካትያ አሞና

19 አሞነ ካተትያ ዎደ፥ ላይይ አዉ ላታማነ ላኣ፤ እ የሩሳላመን ላኡ ላይ ካተቴዳ። አ ዳይ ሱንይ ማሹለሜቶ፤ እዛ ያጽባ ካታማን ደእያ ሀሩጻ ናቶ። 20 አ አዉ ምናሰ ኦዳዋዳን፥ አሞንካ መና ጎዳ ስንን ኢታባ ኦዳ። 21 እ ባረ አዉ ሀመቴዳ ኦግያን ኡባን ሀመቴዳ፤ ባረ አዉ ኦዳ ኤቃቶ እካ ኦዳነ ኡንቱንቶ ጎይኔዳ። 22 መና ጎዳ፥ ባረ ማይዛ አዎቱዋ መና ጎዳ አግ ባሼዳ፤ መና ጎዳ ኦግያንካ እ ሀመትቤና።

23 አሞና ኦሳንቻቱ አ ቦላ ማቀቲደ፥ አ ካትያ ጎለን አ ዎድኖ። 24 ሄዋፐ ጉይያን፥ ይሁዳ አሳቱ ካትያ አሞና ቦላ ማቀቴዳ ኡባቱዋ ዎድኖ። አሞና ኮታን አ ናኣ ዮስያሳ ካተዬድኖ።

25 አሞነ ሀኔዳ ሀራባይነ እ ኦዳባይ ኡባይ ይሁዳ ካተቱ ታርክያ ማጻፋን ጻፈት ኡቴዳ። 26 አሞነ ኡዛ አታክልትያ ሳኣ ግያ ሳኣን ደእያ ባረ ዱፉዋን ሞገቴዳ፤ አ ኮታን አ ናአይ ኢዮስያሰ ካተቴዳ።