2 ካታቱዋ 17

እስራኤልያ ካትያ ሆሴአ

1 ይሁዳ ካቲ አካዝ ካተቴዳ ታማነ ላኤን ላይን፥ ኤልያ ናአይ ሆሴእ እስራኤልያ ቦላ ሳማርያ ካታማን ካተቴዳ፤ እ ኡዱፑን ላይ ካተቴዳ። 2 መና ጎዳ ስንን እ ኢታባ ኦዳ፤ ግዶፐነ አፐ ካሰ ደኤዳ እስራኤልያ ካተቱ ኦዳዋ ኬሻ ኢታ ኦቤና።

3 አሶረ ካቲ ሻልማንኤሰር ዪደ፥ አናና ኦላ ጋከቴዳ፤ ሆሴእ ጾነቲደ፥ አዉ ጊራ ጊሬዳ። 4 ሽን አማሬዳ ላይፐ ስምና፥ ካቲ ሆሴእ ሶእ ግያ ግብጼ ካትያዉ ኪታ የዲደ፥ ባረና ማዳና ማላ ኦቼዳ። ያቲደ ካሰዋዳን አሶረ ካትያዉ ጊርያዋ አግ ባሼዳ። ካቲ ሻልማንኤሰር ሄዋ ስሲደ፥ አ ኦይደ፥ ቃሾ ጎልያ ገልሴዳ።

ሳማርያ ኩንደ

5 ሄዋፐ ጉይያን፥ አሶረ ካቲ እስራኤልያ ቢታ ኡባ ቦላ ማዪደ፥ ሳማርያ ካታማ ዶዴዳ፤ ሄዙ ላይ ጋዳ። 6 ሆሴእ ካተቴዳ ኡዱፑን ላይን አሶረ ካቲ*17:6 አሶረ ካቲ፦ እ ላኤን ሳርጎና ግደናን አገና። ሳማርያ ካታማ ኦሞዴዳ። እስራኤልያ አሳ አኪደ፥ አሶረ ጋድያ አፌዳ። ሄዋፐ ካላ ኡንቱንቱ ሄዋ ሀላሀ ካታማን፥ ሄዋ ሜዶናቱዋ ካታማቱዋን፥ ሀራቱዋ ቃይ ጎዛና ቢታን ደእያ ሀቦራ ሻፋ ማታን ዎዳ።

7 ሀዌ ኡባይ ሀኔዳዌ፥ እስራኤልያ አሳይ መና ጎዳ ባረንቱ ጾሳ ቦላ፥ ኡንቱንቱ ግብጼፐ፥ ግብጼ ካትያ ኩሽያፐ ከሴዳዋ ቦላ ናጋራ ኦዳ ጋሱዋና። ቃይ ኡንቱንቱ ሀራ ጾሳቶ ጎይኒደ፥ 8 መና ጎዳይ ኡንቱንቱ ስንፐ ላጊደ ከሴዳ ጋደ አሳቱ ደኤዳ ደኡዋ ዎጋ ካሌዳ ጋሱዋና። ሄዋ ቦላካ ቃይ እስራኤልያ ካተቱ ዶሜዳ ኢታ ዎጋ ካሌዳ ጋሱዋና። 9 እስራኤልያ አሳይ መና ጎዳ ባረንቱ ጾሳ ቦላ ኢታባ ጌማን ኦድኖ፤ ቄር ጉ ሞፐ ቢደ፥ ዎጋ ዎልቃማ ካታማ ጋካናዉ ደእያ ግሹዋን ኡባን ባረንቱ ጎይንያ ቃ ሳኣ መድኖ። 10 ቃይ ኡንቱንቱ ኤቃ ሹቻቱዋነ አሼሮ ግያ ጾሳት ምስለቱዋ ደርያ ሁጲያ ኡባንነ ዳሻ ም ኡባ ጋርሳን ኤሴድኖ።✝17:10 1 ካታ. 14:23 11 ቃይካ ኡንቱንቱ መና ጎዳይ በን ኡንቱንቱ ስንፐ ላጊደ ከሴዳ ጋደ አሳቱ ኦዳዋዳን፥ ቃ ሳኣ ኡባን እጻና ጩዋዬድኖ። ኡንቱንቱ መና ጎዳ ሀንቀያ ኢታባ ኦድኖ። 12 መና ጎዳይ ኡንቱንታ፥ "ኤቃዉ ጎይኖፕተ" ግ ዎና፥ ኡንቱንቱ ኤቃዉ ጎይኔድኖ።

13 መና ጎዳይ እስራኤልያ አሳነ ይሁዳ አሳ ባረ ትምቢትያ ኦድያ ኡባቱዋ ባጋናነ ሳጻን በእያ ኡባቱዋ ባጋና፥ "ህንተና ኤርተ! ህንተንቱ ኢታ ኦግያፐ ስምተ፤ ታን ትምቢትያ ኦድያ ታ ቆማቱዋ ባጋና፥ ህንተንቱ አዎቱ አዛዘታናዳን እሜዳ ህግያን ደእያ ዎጋነ አዋዩዋ ኡባ ናግተ" ያግ ዎዳ። 14 ሽን ኡንቱንቱ ስሰናን እጼድኖ። መና ጎዳ ባረንቱ ጾሳ አማነትቤና ባረንቱ አዎቱዋዳን ሞርግያ ምንሴድኖ። 15 ኡንቱንቱ አ ዎጋ፥ እ ኡንቱንቱ አዎቱዋና ጫቀቴዳ ጫቁዋነ አ ሴራ ካድኖ። ኡንቱንቱ ሹፉሮ ኤቃቶ ጎይኒደ፥ ባረንቱ ሁጲያዉካ ሹፉሮ ግዴድኖ።

መና ጎዳይ ኡንቱንታ፥ "ህንተንቱ ዩሹዋን ደእያ ደረ አሳቱ ኦያዋዳን ኦፕተ" ግ ዎና እጺደ፥ ኡንቱንቱ ኡንቱንቱ ደኡዋ ዎጋ ካሌድኖ። 16 መና ጎዳ ባረንቱ ጾሳ አዛዙዋ ኡባ አግ አጌድኖ። ማራ ማላትያ፥ ላኡ ጎይንያ ምስለቱዋነ አሼሮ ግያ ጾሳቱ ምስልያ መድኖ። ሳሉዋን ደእያ ጾልንትያ ኡባዉ ጎይኔድኖነ ባኣላ ግያ ኤቃዉ ኦድኖ።✝17:16 1 ካታ. 12:28 17 ኡንቱንቱ ባረንቱ አቱማ ናናነ ማጫ ናና ታማን ጹጊደ ያርሼድኖ። ካይያዋነ ሞይትልያ ሃሳይስያዋ ዶዬድኖ። ሄዋዳን ኢታባ ኦናዉ ባረንቱ ሁጲያ ዛልኢደ፥ መና ጎዳ ሀንቀድኖ።✝17:17 ዛረ. 18:10 18 ሄዋ ድራዉ፥ መና ጎዳይ እስራኤልያ አሳ ሎይ ሀንቀቴዳ፤ ኡንቱንታ ባረ ስንፐ ድጌዳ። ይሁዳ ዛርያ ጻላላይ አቴዳ።

19 ሽን ይሁዳ አሳቱካ መና ጎዳ ባረንቱ ጾሳ አዛዙዋ ናግበይክኖ፤ ኡንቱንቱ እስራኤልያ አሳይ ዶሜዳ ደኡዋ ዎጋ ካሌድኖ። 20 ሄዋ ጋሱዋን መና ጎዳይ እስራኤልያ ዘረ ኡባ አግ ባሼዳ። እ ኡንቱንቱ ቱጋዪደ፥ ባረ ስንፐ ድጋና ጋካናዉ፥ ኡንቱንታ ቦንቅክያዋንቱ ኩሽያን የግ ባሼዳ።

21 መና ጎዳይ እስራኤልያ አሳ ዳዊታ ዘረቱዋ ካዉተፐ በን ሻኬዳ ዎደ፥ እስራኤልያ አሳይ ናባጻ ናኣ እዮርባማ ባረንቶ ካተዬድኖ። ሄዋፐ ጉይያን፥ እስራኤልያ አሳይ መና ጎዳ ካለናዳን እዮርባም ድጌዳ፤ እ ኡንቱንታ ዎልቃማ ናጋራ ኦስሴዳ። 22,23 መና ጎዳይ ትምቢትያ ኦድያ ባረ ቆማቱዋ ኡባቱዋ ባጋና ካሰ ኦድ ዎዳዋዳን፥ ባረ ስንፐ ድጋና ጋካናዉ፥ እስራኤልያ አሳይ እዮርባም ኦዳ ናጋራ ኡባ ኦዳ። ሄዋ ድራዉ፥ እስራኤልያ አሳይ ባረንቱ የለቴዳ ጋድያፐ ኦሞደቲደ፥ አሶረ ጋድያ ቤድኖ፤ ኡንቱንቱ ሀኖ ጋካናስካ ያን ደኢኖ።

አሶረቱ እስራኤልያ ጋድያን ኡቴድኖ

24 ሄዋፐ ጉይያን፥ አሶረ ካቲ ባብሎነ ቢታን ደእያ ኩታ፥ ኢዋ፥ ሀማታነ ሳፋርዋይማ ጌተትያ ካታማቱዋን ደእያ አሳ አሂደ እስራኤልያ አሳ ሳኣን ሳማርያ ካታማቱዋን ዎዳ። ኡንቱንቱ ሄ ካታማቱዋ ላቲደ፥ ኡንቱንቱን ደኤድኖ።

25 ኡንቱንቱ ኮይሮ ያን ደኡሳ ዶሜዳ ዎደ፥ መና ጎዳዉ ጎይንቤይክኖ። ሄዋ ጋሱዋን መና ጎዳይ ኡንቱንቱ ግዶ ጋሞቱዋ የዴዳ፤ ጋሞቱ ኡንቱንቱ ግዶፐ አማሬዳዋንታ መንሬደ ዎድኖ። 26 ያትና አሶረ ካትያ፥ "ኔን ደን አፋደ ሳማርያ ካታማቱዋን ዎዳ አሳይ ሄ ቢታ ጾሳ ዎጋ ኤረና። ኤረናዋ ጋሱዋን እ ኡንቱንታ መንሬ ዎያ ጋሞቱዋ ኡንቱንቱ ቦላ የዴዳ" ያጊደ ኦዴድኖ።

27 አሶረ ካቲ፥ "ህንተንቱ ሳማርያፐ ኦሞዲደ አሄዳ ቄሳቱ ዋፐ እቱዋ ዛሪደ፥ ያ የድተ። እ ያን ደኢደ፥ ሄ ቢታ ጾሳ ዎጋ ኡንቱንታ ታማርሶ" ያጊደ አዛዜዳ። 28 ሄዋ ድራዉ፥ ሳማርያፐ ኦሞዲደ አፌዳ ቄሳቱ ዋፐ እቱ ቤቴለን ደአናዉ ዬዳ፤ መና ጎዳዉ ጎይንያ ዎጋ ኡንቱንታ ታማርሴዳ።

29 ግዶፐነ ሳማርያ ዪደ ኡቴዳ አሳይ ባረዉ ጎይንያ ኤቃ ምስለቱዋ ባረ ደእያ ሳኣን ደእያ ሳኣን መዳ። ሳማርያ አሳይ ኬጼዳ ጎይንያ ቃ ግሹዋን ዎዳ። 30 ሄዋ ማራን ባብሎነ አሳይ ሱኮት-ባኖባ ግያ ኤቃ ምስለቱዋ መዳ። ኩታ አሳይ ነርጋላ ግያ ኤቃ ምስለቱዋ መዳ። ሀማታ አሳይ ቃይ እሺማ ግያ ኤቃ ምስለቱዋ መዳ። 31 ኢዋ አሳይ ንብሃዛነ ታርታቃ ጌተትያ ማሻቱዋ ምስለቱዋ መዳ። ሳፋርዋይማ አሳይ ቃይ አድራመሌካነ አናመለካ ጌተትያ ባረንቱ ጾሳቶ ባረንቱ ናና ታማን ጹጊደ ያርሼዳ። 32 ኡንቱንቱ መና ጎዳዉ ያዬድኖ፤ ሽን ባረንቱ ግዶፐ ዱማ ዱማ አሳ ዶሪደ፥ ያርሽያ ቃ ግሹዋን ቄሳቱዋ ኦደ ሱንድኖ። 33 ኡንቱንቱ መና ጎዳዉ ያዬድኖ፤ ሽን ባረንቱ ዬዳ ቢታ ቢታ አሳ ሜዝያ ካሊደ፥ ባረንቱ ጾሳቶካ ጎይኔድኖ። 34 ኡንቱንቱ ሀቼ ጋካናስካ ካሰ ባረንቱ ሜዝያዳን ኦኖ።

ኡንቱንቱ ቱሙፐ መና ጎዳዉ ያይክኖ ዎይ መና ጎዳይ እስራኤልያ ጊደ ሱንዳ ያቆባ ዘረዉ እሜዳ አዋዩዋነ ዎጋ፥ ህግያነ አዛዙዋ ናግክኖ።✝17:34 ዶመ 32:28፤ 35:10 35 መና ጎዳይ እስራኤልያ አሳና በን ጫቀቴዳ ዎደ፥ ኡንቱንታ ሀዋዳን ያጊደ አዛዜዳ፤ "ሀራ ጾሳቶ ጎይኖፕተ፤ ኡንቱንቶ ጉልባቶፕተ፤ ኡንቱንቶ ኦፕተ ዎይ ኡንቱንቶ ያርሾፕተ።✝17:35 ከሳ 20:5፤ ዛረ. 5:9 36 ሽን ግብጼፐ ህንተንታ ባረ ዎልቃማ ዎልቃንነ ባረ ምጨቴዳ ኩሽያን ከሴዳ መና ጎዳዉ ኦተ፤ አዉ ጉልባትተ፤ አዉ ያርሹዋ ያርሽተ።✝17:36 ዛረ. 6:13 37 ታን መና ጎዳይ ህንተንቶ ጻፌዳ አዋዩዋነ ዎጋ፥ ህግያነ አዛዙዋ ኡባ ዎደ ናግተ፤ ሀራ ጾሳቶ ጎይኖፕተ። 38 ታን ህንተናና ጫቀቴዳ ጫቁዋ ዶጎፕተ፤ ሀራ ጾሳቶካ ጎይኖፕተ። 39 ሄዋ አጊደ፥ መና ጎዳዉ ህንተንቱ ጾሳዉ ጎይንተ። ህንተንቱ ሞርከቱዋ ኡባፐ ህንተንታ አሻናዌ ታና" ያጊደ አዛዜዳ። 40 ኡንቱንቱ አዉ ኤኖ ገናን እጺደ፥ ካሰ ባረንቱ ዶያካ ባቂ ኦይቄድኖ።

41 ሄ አሳቱ መና ጎዳዉ ያዪደካ፥ እት ባጋና ባረንቱ ኤቃ ምስለቶ ጎይኒኖ። ሀቼ ጋካናስካ ኡንቱንቱ ዘረይ ኡንቱንቱ አዎቱ ጎይንያዋዳን ጎይኒደ ደኤ።