2 ካታቱዋ 18

ህዝቂያሳፐ እዮስያሳ ጋካናዉ

1 ኤልያ ናአይ ሆሴእ እስራኤላን ካተቴዳ ሄዘን ላይን ይሁዳ ካትያ አካዛ ናአይ ህዝቂያሰ ካተቴዳ። 2 እ ካተትያ ዎደ ላይይ አዉ ላታማነ እቼሻ፤ የሩሳላመን እ ላታማነ ኡዱፑን ላይ ካተቴዳ። አ አት ሱንይ አቢ ጌተቴ፤ እዛ ዛካራሳ ናቶ። 3 አ ማይዛ አዉዋ ዳዊተ ኦዳዋዳን፥ ህዝቂያስካ መና ጎዳ ስንን ሱረባ ኦዳ። 4 አሳይ ጎይንያ ቃ ሳኣ እ ድጌዳ። ኤቃ ቱሳቱዋ መንሬዳ። አሼሮ ግያ ጾሳት ምስልያ ቃንጽ ኦሌዳ። ቃይ ሙሴ ናሃስያፐ መዳ ሾሻካ መንሬዳ። አያዉ ጎፐ፥ ሄ ዎዲ ጋካናዉካ እስራኤልያ አሳይ አዉ እጻና ጩዋዪደ ታኬዳ። ሄ ሾሻ ሱንይ ነሁሽታና።✝18:4 ፓይ. 21:9

5 ህዝቂያሰ መና ጎዳ እስራኤልያ ጾሳ አማኔዳ፤ ይሁዳ ካተቱዋ ኡባ ግዶን አ ማላ ካቲ አፐ ካሰ ግድና፥ አፐ ጉየ ግድና ቤትቤና። 6 አያዉ ጎፐ፥ መና ጎዳዉ እ አማነቴዳ፤ መና ጎዳ ካልያዋ አግቤና፤ መና ጎዳይ ሙሳ አዛዜዳ አዛዙዋ ናጌዳ። 7 መና ጎዳይ አናና እትፐ ግዴዳ፤ ያትና እ ኦያባይ ኡባይ አዉ እንጀቴዳ። እ አሶረ ካትያ ቦላ ማካሌዳ፤ አዉ ሞደተናን እጼዳ። 8 እ ፕልስጼማ አሳና ኦለቴዳ፤ ቀር ጉ ሞፐ ቢደ፥ ዎጋ ዎልቃማ ካታማ ጋካናዉ፥ ጋዛካ አ ዩሹዋን ደእያ ቢታቱካ አተናን ኡንቱንቱ ደእያ ሳኣ ኡባ ጾኔዳ።

9 ካቲ ህዝቂያሰ ካተቴዳ ኦይደን ላይን፥ ኤልያ ናአይ እስራኤልያ ካቲ ሆሼእ ካተቴዳ ላፑን ላይን፥ አሶረ ካቲ ሳልማንኤሰር እስራኤልያ ቦላ መቱዋ ጋናዉ ዶዴዳ፤ ሳማርያ ካታማካ ዶዴዳ። 10 ሄዘን ላይ ሶርያ አሳይ ሳማርያ ካታማ ጾኔዳ። ያትና ህዝቂያሰ ካተቴዳ ኡሱፑን ላይን፥ እስራኤልያ ካቲ ሆሴእ ካተቴዳ ኡዱፑን ላይን፥ ሳማርያ ካታማይ ጾነቴዳ። 11 አሶረ ካቲ እስራኤልያ አሳ አሶረ ጋድያ አፌዳ። ሄዋፐ ካላ ኡንቱንታ ሄዋ ሀላሀ ካታማን፥ ሄዋ ሜዶናቱዋ ካታማን፥ ሀራቱዋ ቃይ ጎዛና ቢታን ደእያ ሀቦራ ሻፋ ኤለካ ዎዳ። 12 ሀዌ ሀኔዳዌ ኡንቱንቱ መና ጎዳዉ ባረንቱ ጾሳዉ አዛዘተናን እጺደ፥ መና ጎዳ ቃላ ጫቁዋ፥ መና ጎዳ ቆማይ ሙሴ አዛዜዳ አዛዙዋ ኡባ መንዳ ጋሱዋና። ኡንቱንቱ አ አዛዙዋ ስሳናዉካ አዛዘታናዉካ ኮይቤይክኖ።

አሶረቱ የሩሳላመ ኦላናዉ ናሴድኖ

13 ካቲ ህዝቂያሰ ካተቴዳ ታማነ ኦይደን ላይን፥ አሶረ ካቲ ሳናክሬበ ግምበቱ ኡቴዳ ይሁዳ ካታማቱዋ ኡባ ኦለቲደ ኦይቄዳ። 14 ያትና ይሁዳ ካቲ ህዝቂያሰ ላክሻ ካታማን ደእያ አሶረ ካትያ ሳናክሬማዉ ኪታ የዲደ፥ "ታን ባይዛድ። ሀያና ታ ቢታ የዳደ ከሳ። ኔን ታና ኦቼዳዋ አያነ ታ እማና" ያጌዳ።

አሶረ ካቲ ይሁዳ ካትያ ህዝቂያሳ፥ "ኔን ታሙ ሻአ ኪሎ ግራመ ብራነ እት ሻአ ኪሎ ግራመ ዎርቃ ታዉ የዳ" ያጌዳ።

15 ህዝቂያሰ መና ጎዳ ጌሻ ጎልያንነ ካትያ ጎልያ ሚሻ ምንጅያሳን ደኤዳ ብራ ኡባ አዉ የዴዳ። 16 ሄ ዎደ ይሁዳ ካቲ ህዝቂያሰ መና ጎዳ ጌሻ ጎልያ ፐንግያ ሳንቃቱዋ ማይ ኡቴዳ ዎርቃነ ቃይ እ ባረ ሁጲያዉ ሄ ፐንገ ቆስለቱዋ ማይዝ ዎዳ ዎርቃ ፖቂ ቃሪደ፥ አሶረ ካትያዉ የዴዳ።

17 ሄዋፐ ጉይያን፥ አሶረ ካቲ ሄዙ ኦላ ጋዳዋቱዋ ጮራ ኦላንቻቱዋና ላክሻ ግያ ካታማፐ ካትያ ህዝቂያሳኮ የሩሳላመ የዴዳ። ኡንቱንቱ ቢደ፥ የሩሳላመ ጋኬድኖ፤ ማዩዋ ሜጭያዋ ጋደ አፍያ ኦግያፐ ቆሞ ባጋና ደእያ፥ ዳጋቴዳ ሃይ ጎግያ ቦይያ ምይያን ኤቄድኖ። 18 ያቲደ ኡንቱንቱ ካትያ ጼሴድኖ። ህልቂያ ናአይ ካትያ ጎለን አዎትያ ኤልያቂመ፥ ዋና ጻፊ ሼብንነ አሳፋ ናአይ ታርክያ ጻፍያ ዮኣህ አኮ ካረ ከሴድኖ።

19 አሶረቱ ጋዳዋይ ኡንቱንታ፥ "ህዝቂያሳዉ ሀዋዳን ያጊደ ኦድተ፤ ‘አሶረ ካቲ፥ ዎልቃማይ ኔና ሀዋዳን ያጌ፤ ኔን ሀዋ ኬና አያን አማነታድ?’ 20 ኔን ጮ መላ፥ ‘ኦላ ኦለታናዉ ታዉ አዳ ኤራይነ ዎልቃይነ ደኤ’ ያጋሳ። ሽን ኔን ኦናን አማነታደ ታ ቦላ ሀዋ ማካላዲ? 21 ኔን ግብጼ ካትያ ማዳና ጋደ ቆፔዳዋ ግዶፐ፥ መኤዳ ማቃ ጋትማን ጉፈትያ አሳ ማላ። አያዉ ጎፐ፥ ጋትማይ መእና፥ ፕንጩ ኩሽያ ጫዴነ ማዱንጽሴ። ግብጼ ካቲ ባረናን አማነትያ አሳ ኡባዉ ሄዋ ማላ።

22 "ሽን ኔን ታዉ፥ ‘ኑን መና ጎዳን ኑ ጾሳን አማነቴቶ’ ያጎፐ፥ ህዝቂያሰ ይሁዳ አሳነ የሩሳላመ አሳ፥ ‘ህንተ የሩሳላመን ደእያ ያርሽያ ሳኣን ጎይናናዉ ኮሸ’ ጊደ፥ አዉ ጎይንያ ቃ ሳአቱዋነ ያርሹዋ ሳኣ ድጌዳ ጾሳ እ ግደኔ?

23 "አነ ሀእ ሃያ! ታ ጎዳ አሶረ ካትያና ናሰታ። ኔን ቶጋናዉ ዳንዳይያ፥ ግድያ አሳ ደሞፐ፥ ላኡ ሻአ ፓራቱዋ ታን ነዉ እማና። 24 ኔን ግብጼቱ ፓራ አሳቱዋና ፓራ ጋረቱዋ ታዉ የዳና ጋደ አማኖፐነ፥ ታ ጎዳ ኦላንቻቱ ካፓቱዋፐ እት ላፍያዋካ ዛራናዉ ዳንዳያካ። 25 ሄዋ ቦላካ ቃይ፥ ታን ሀእ ቱሙ መና ጎዳ አዛዙ ባይናን ሀ ቢታ ይሳናዉ ከሳድታ? መና ጎዳይ ባረ ሁጲያዉ ታና፥ ኔረካ፥ ሄ ቢታ ባደ፥ ኦላደ ባይዛ ያጊደ ኦዴዳ ያጌ ያግተ" ያጌዳ።

26 ሄዋፐ ጉይያን፥ ህልቂያ ናአይ ኤልያቂመ፥ ሼብንነ ዮኣህ አሶረቱ ጋዳዋ ሀዋዳን ያጌድኖ፤ "ኑን ብርሸ ኤርያ ድራዉ፥ ሀያና ኔን ኑዉ ነ ቆማቶ ሶርያ ቃላን ኦዳ። ድርሳ ግምቢያ ሁጲያን ደእያ አሳይ ስሰና ማላ፥ እብራዌ ቃላን ኑዉ ኦዶፓ" ያጌድኖ።

27 ሽን ጋዳዋይ ዛረደ፥ "ሀ ቃላቱዋ ታን ህንተዉነ ህንተንቱ ጎዳ ጻላላዉ ኦዳናዉ ታና ታ ጎዳይ ኪቴዴየ? ህንተንቱና እትፐ ባረንቱ ሽኣ ማናዉነ ባረንቱ ሼሻ ኡሻናዉ ደእያ፥ ሀ ድርሳ ግምቢያ ቦላ ኡቴዳ አሳና ኡባዉ ኦዳናሳ ግደኔየ?" ያጌዳ።

28 ሄዋፐ ጉይያን፥ አሶረቱ ጋዳዋይ ደንድ ኤቂደ፥ ባረ ቃላ ቁ ኦደ፥ እብራዌ ቃላን ሀዋዳን ያጌዳ፤ "አሶረ ካቲ ዎልቃማይ ህንተንታ ግያዋ ስስተ! 29 ካቲ ህንተንታ ሀዋዳን ያጌ፤ ‘ህዝቂያስ ህንተንታ ጭሞፖ፤ አያዉ ጎፐ፥ እ ህንተንታ ታ ኩሽያፐ ዎ አካናዉ ዳንዳየና። 30 እ ህንተንታ፥ መና ጎዳይ ቱማ ኑና አሻናዋ፤ ሀ ካታማይካ አሶረ ካትያ ኩሽያን ገለና’ ያጊደ ህንተንታ መና ጎዳን አማንፖ" ያጌ።

31 "ኤ፥ ህንተንቱ ህዝቂያሰ ኦድያዋ ስሶፕተ። አሶረ ካቲ ህንተንታ፥ ‘ታናና ስገትተ፤ ሃ ታኮ ከስተ። ያቶፐ ህንተንቱ ኡባይካ ህንተንቱ ዎይንያ ቴራፐነ ህንተንቱ ባላስያ ቴራፐ ሚሻና፤ ህንተንቱ ቦኬዳ ኦላፐካ ሃ ኡሽሻና። 32 ሄዋፐ ጉይያን፥ ታን ያደ፥ ህንተንታ ህንተንቱ ቢታ ማላትያ ጋድያ አካደ አፋና። ሄ ቢታይ ካይነ ዎይንያ ኤሳ ኡክይነ ዎይንያ አታክልቲ ኩሜዳ ቢታ፤ ዎጋራይነ ማ ኤሳይነ ኩሜዳ ቢታ። ህንተንቱ ታዉ አዛዘቶፐ፥ ፓጻ ደአና፤ ሀይቂክታ’ ያጌ።

"ህዝቂያሰ ህንተንታ፥ ‘መና ጎዳይ ኑና አሻና’ ያጊደ ጭምያዋ ስሶፕተ። 33 አይሁዳ ግደና አሳ ጾሳቱዋፐ ባረ ቢታ አሶረ ካትያ ኩሽያፐ አሼዳ ጾስ ደኢየ? 34 ሀማታ ጾሳቱነ አርፋደ ጾሳቱ ሀቃን ደኢኖ? ሳፋርዋይማ፥ ሄናአነ ኢዋ ጾሳቱ ሀቃን ደኢኖ? ኡንቱንቱ ሳማርያ ታ ኩሽያፐ ዎ አኬድኖ? 35 ሀ ቢታቱዋ ጾሳቱዋ ኡባ ግዶን ባረ ቢታ ታ ኩሽያፐ አያ ጾስ አሼዳዋ ሽን፥ መና ጎዳይ የሩሳላመ ታ ኩሽያፐ አሻኔ?" ያጌዳ።

36 ሽን አሳይ እት ቃላነ አዉ ዉርሰናን ጮኡ ጌዳ። አያዉ ጎፐ፥ ካቲ ኡንቱንታ፥ "አዉ አይነ ዛሪደ ኦዶፕተ" ያግ ዎዳ። 37 ሄዋፐ ጉይያን፥ ህልቂያ ናአይ ካትያ ጎለን አዎትያ ኤልያቂመ፥ ዋና ጻፊ ሼብንነ ታርክያ ጻፊ አሳፋ ናአይ ዮኣህ ባረንቱ ማዩዋ ፔደ፥ ህዝቂያሳኮ ቤድኖ፤ አሶረቱ ጋዳዋይ ጌዳዋ ኡባ አዉ ኦዴድኖ።