2 ካታቱዋ 24

1 እዮኣቄማ ዎደ ባብሎነ ቢታ ካትያ ናቡካዳናጾረ ይሁዳ ቦላ ዎራጄዳ። ያትና እዮኣቄም አዉ ሄዙ ላይ ሞደቴዳ። ሄዋፐ ጉይያን ዛሪደ፥ ናቡካዳናጾራ ቦላ ማካሌዳ።✝24:1 ኤር. 25:1-38፤ ዳኔላ 1:1-2 2 መና ጎዳይ ባብሎነ ቢታ ጩጉዋ፥ ሶርያ ቢታ ጩጉዋ፥ ሞኣበ ቢታ ጩጉዋነ አሞና ቢታ ጩጉዋ እዮኣቄማ ቦላ የዴዳ፤ ትምቢትያ ኦድያ ባረ ቆማቱዋ ባጋና መና ጎዳይ ካሰ ሃሳዬዳዋዳን፥ ይሁዳ ቢታ ባይዛናዳን ሀዋንታ የዴዳ። 3,4 ካቲ ምናሰ ኦዳ ናጋራ ኡባ ድራዉ፥ ቃይ ጽሎ አሳ ሱ እ ጉሲደ፥ የሩሳላመን ኩንዳ ድራዉ፥ መና ጎዳይ ይሁዳ አሳ ባረ ስንፐ ድጋናዉ ሀ ባሻ የዴዳ፤ መና ጎዳይ ምናሰዉ ሄ ናጋራ አቶ ጋናዉ ኮይቤና።

5 እዮኣቄም ሀኔዳ ሀራባይነ እ ኦዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ። 6 እዮኣቄም ሀይቂደ፥ ባረ ማይዛን ጋከቴዳ። አ ኮታን አ ናአይ እኮንያነ ካተቴዳ።

7 ግብጼ ቢታ ካቲ ላኤን ባረ ጋድያፐ ደንዲደ፥ ኦላዉ ይቤና፤ አያዉ ጎፐ፥ ግብጼ ሻፋፐ ዶሚደ፥ ቢደ ኤፍራጺሳ ሻፋ ጋካናዉ፥ ግብጼ ካቲ ሞዴዳ ቢታ ኡባ ባብሎነ ካቲ አክ ድጌዳ።

ይሁዳ ካትያ ዮኣኪና

8 ዮኣኪነ ካተትያ ዎደ ላይይ አዉ ታማነ ሆስፑና፤*24:8 ታማነ ሆስፑና፦ ላይይ አዉ ታማነ ሆስፑና ዎይ ሆስፑና። 2 ኦድ። 36:9 ጼላ። ዮኣኪነ የሩሳላመን ሄዙ አግና ካተቴዳ። አ ዳይ ሱንይ ነሁሽታ፤ እዛ የሩሳላምያ ኤልናታና ናቶ። 9 ዮኣኪነ ባረ አዉ ኦዳዋዳን፥ መና ጎዳ ስንን ኢታባ ኦዳ።

10 ሄ ዎደ ባብሎነ ካትያ ናቡካዳናጾራ ኦላንቻቱ የሩሳላመ ዪደ፥ ካታማ ዶድ ዎድኖ። 11 ባብሎነ ካቲ ናቡካዳናጾረ ሄ ካታማ ዬዳ። 12 ይሁዳ ካቲ ዮኣኪነ፥ አ ዳያ፥ አ ቆማቱ፥ አ ካፓቱነ ካትያ ጎልያ ኦሳንቻቱ ኡባቱ ባብሎነ ካትያዉ ኩሽያ እሜድኖ።

ዮኣኪነ ካተቴዳ ሆስፑን ላይን፥ ባብሎነ ካቲ ዮኣኪና ቃቼዳ።✝24:12 ኤር. 22:24-30፤ 24:1-10፤ 29:1-2 13 መና ጎዳ ጌሻ ጎልያንነ ካትያ ጎለን ደእያ ማጹዋ ኡባ ሄ ሳፐ ደንደ አፌዳ። መና ጎዳይ ካሰ ሃሳዬዳዋዳን ካቲ ሶሎሞነ መና ጎዳ ጌሻ ጎልያን ጊግሴዳ ዎርቃ ሚሻቱዋ ኡባ ባብሎነ ካቲ ቃንጸሬዳ። 14 ናቡካዳናጾረ የሩሳላመ አሳ፥ ካፓቱዋ ኡባ፥ ኦላንቻቱዋ ኡባ፥ ኩሽያ ሂላንቻቱዋ ኡባነ ብራታ ቆጽያዋንታ ኡባ፥ ሙለ ታሙ ሻአ አሳ፥ የሩሳላመፐ ኦሞዲደ አፌዳ፤ ቢታን ህዬሳ አሳ ጻላላይ አቴዳ።

15 ናቡካዳናጾረ ዮኣኪና ኦሞዲደ፥ ባብሎነ አፌዳ፤ አናና ካታቶ አ ዳዮ፥ አ ማቻቱዋ፥ አ ኦሳንቻቱዋነ ቢታን ደእያ ዎልቃማ አሳ ኡባ አኪደ ቤዳ።✝24:15 ህዝ. 17:12 16 ሄ አሳፐ ላፑን ሻአቱ ኦላንቻቱዋ፤ እት ሻአ አሳቱ ዱማ ዱማ ኩሽያ ሂላንቻቱዋ፤ ኡንቱንቱ ኡባይካ ምናነ ኦላ ኦለታናዉ ዳንዳይያዋንታ። እ ሄ ኡባቱዋ ባብሎና አፌዳ። 17 ሄዋፐ ጉይያን፥ ባብሎነ ካቲ ዮኣኪና ኮታን አ አዉዋ እሻ ማታንያ ካተዬዳ። አ ሱን ሰደቅያሳ ያጊደ ላሜዳ።✝24:17 ኤር. 37:1፤ ህዝ. 17:13

ይሁዳ ካትያ ሰደቅያሳ

18 ሰደቂያስ ካተትያ ዎደ፥ ላይይ አዉ ላታማነ እታ፤ የሩሳላመን እ ታማነ እት ላይ ካተቴዳ። አ ዳይ ሱንይ ሀሙጻሎ፤ እዛ ሊብና ካታማን ደእያ ኤርማሳ ናቶ።✝24:18 ኤር. 27:1-22፤ 28:1-17 19 እዮኣቄም ኦዳዋዳን፥ ሰደቅያስካ መና ጎዳ ስንን ኢታባ ኦዳ። 20 መና ጎዳይ ሀንቀቴዳ ድራዉ፥ የሩሳላመ አሳ ቦላነ ይሁዳ አሳ ቦላ ሀዌ ሀኔዳ፤ ዉርሰን ኡንቱንታ እ ባረ ስንፐ ድጌዳ።

ሰደቅያስ ባብሎነ ካትያ ቦላ ማካሌዳ።✝24:20 ህዝ. 17:15