2 ካታቱዋ 25

የሩሳላም ኩንደ

1 ሰደቅያስ ካተቴዳ ኡዱፑን ላይ፥ ታማን አግናን፥ ታማን ጋላስ፥ ባብሎነ ካቲ ናቡካዳናጾረ ባረ ኦላንቻቱዋ ኡባ አኪደ ዪደ፥ የሩሳላመ ዶዴዳ። አ ዩሹዋንካ ቢታ ኬላ ድረዳ።✝25:1 ኤር. 21:1-10፤ 34:1-5፤ ህዝ. 24:2 2 ሰደቅያስ ካተቴዳ ታማነ እተንያ ላይ ጋካናዉ፥ ካታማይ ዶደቲደ ጋምኤዳ።

3 ሄዋ ጋሱዋን ቢታን ኮሻይ ሱልና፥ ሄ ላይ ኦይደን አግናን፥ ኡዱፑን ጋላሳን ሄ ጋድያ አሳዉ ምያባይ ዬዳ። 4 ያን ደእሽን ካታማ ዩሹዋ ግምቢ እት ባጋና ኮለቴዳ። ባብሎነ አሳይ ካታማ ዩይ አደ ናጎፐካ፥ ይሁዳ ካትያ ኦላንቻቱ ሙለ ኡባይ ቃማ ካትያ አታክልትያ ሳኣ አፍያ ኦግያ ኦይቂደ፥ ላኡ ድርሳ ግምበቱዋ እትፐ ጋያ ፐንግያና ከሲደ ባቃቴድኖ። ኡንቱንቱ አራባ ድልባኮ ስሚደ ቤድኖ፤✝25:4 ህዝ. 33:21 5 ሽን ባብሎነ ኦላንቻቱ ካትያ የደርሲደ፥ ያርኮ ደምባ ጋደ ኦይቄድኖ። አ ኦላንቻቱ ኡባይ አፐ ሻከቲደ ላለቴድኖ። 6 ሄዋፐ ጉይያን፥ ኡንቱንቱ አ ርብላ ካታማን ደእያ ናቡካዳናጾራኮ አፌድኖ። ባብሎነ ካቲ ያን ሰደቅያሳ ቦላ ፕርዴዳ። 7 ሰደቅያሳ ናና ሰደቅያስ ጼልሽን ዎድኖ። ሄዋፐ ጉይያን፥ አ አይፈቱዋ ዎጭ ከሲደ፥ ሳንሳላታን አ ቃቼድኖ፤ ያቲደ ባብሎነ ጋድያ አኪደ አፌድኖ።✝25:7 ህዝ. 12:13

ጌሻ ጎሊ ኮለቴዳ

8 ናቡካዳናጾረ ባብሎነን ካተቴዳ ታማነ ኡዱፑን ላይ፥ እቼሻን አግናን፥ ላፑን ጋላስ ካትያ ኦሳንቻቱዋፐ እቱ፥ ካትያ ናግያዋንቱ ካፑ ናቡዛራዳን የሩሳላመ ገሌዳ። 9 መና ጎዳ ጌሻ ጎልያ፥ ካትያ ጎልያነ የሩሳላመን ደእያ ጎልያ ኡባ ጹጌዳ፤ ዎልቃማ ጎልያ ግያ ጎልያ ኡባ ኤ ዉርሴዳ። 10 ባብሎነ ኦላንቻቱ ኡባይ ካትያ ናግያዋንቱ ካፑዋ አዛዙዋን የሩሳላመ ካታማ ዩሹዋን ደእያ ድርሳ ግምቢያ ኡባ ኮሌድኖ። 11 ናቡዛራዳን ካታማን አቴዳ አሳቱዋነ ይሁዳን አቴዳ አሳቱዋ፥ ካዲደ ባብሎነ ኦላንቻቱዋን ጋከቴዳ አሳቱዋናካ ኡባ ኦይቂደ፥ ኦሞዶ አፌዳ። 12 ሽን ናቡዛራዳን ዉርሰ ህዬሳቱዋፐ አማሬዳዋንታ ዎይንያ ቱራ ቶካናዳንነ ጋድያ ጎሻናዳን ይሁዳን አሼዳ።

13 ባብሎነ አሳቱ መና ጎዳ ጌሻ ጎልያን ደእያ ናሃስያፐ መዳ ቱሳቱዋ፥ ሚሻቱዋ ዎያ ጋረቱዋነ አባ ሳኒያ መንሬድኖ፤ ናሃስያ ኡባ ባብሎነ አፌድኖ።✝25:13 1 ካታ. 7:15-26፤ 2 ኦዱዋ 3:15-17 14 ሄዋዳንካ ቃይ ከረቱዋ፥ አካፋቱዋ፥ ጾምፕያ ሻሉዋ ጼራ ፕትያባቱዋ፥ ጭልፓቱዋነ ያርሽያ ዎደ ጎኤትያ ናሃስያ ሚሻቱዋ ኡባ አኪደ አፌድኖ።✝25:14 1 ካታ. 7:45፤ 2 ኦዱዋ 4:16 15 ካትያ ናግያዋንቱ ካፑ ናቡዛራዳን ሙሩታ ብራፐነ ሙሩታ ዎርቃፐ መቴዳ ታማ ካሽያ ሻታቱዋካ ኩይጻሮቱዋካ ኡባ አኪደ አፌዳ። 16 ካቲ ሶሎሞነ መና ጎዳ ጌሻ ጎልያን ኦሰትያባቶ መዳ ላኡ ቱሳቱ፥ አባ ሳኒነ ጋረቱ መቴዳ ናሃስያ ብራታይ ሚዛናን ልካናዉ ዳንዳየተናዋ ኬሻ ዳራ። 17 ላኡ ቱሳቱ እት ማላ ግዲደ፥ እቱዋ እቱዋ ጌሳይ ታማነ ሆስፑን ዋ፤ ቃይ እት እት ቱሳ ሁጲያን ደእያ ጉምቦቱ ሄዙ ዋ አዱሳ። ሄ ጉምቦቱዋ ዩሹ ናሃስያ ቃጽቃሎቱዋንነ ናሃስያፐ መዳ ሮማነ ጌተትያ ቴራ ምስለቱዋን አሌቀት ኡቴዳ።

ይሁዳ አሳይ ኦሞደቲደ ባብሎነ ቤዳ

18 ካትያ ናግያዋንቱ ካፑ ናቡዛራዳን ቄሳቱዋ ኡባቱዋ ካፑ ሳራያ፥ አፐ ካልያ ቄስያ ጻፋንያነ ፐንግያ ናግያ ሀራ ሄዙ አሳቱዋ ኦይቄዳ። 19 ቃይ ሄ ዎደ ጋካናዉ፥ ካታማን ደእያ አሳፐ ይሁዳ ኦላ ጋዳዋ፥ ካትያ ዞርያዋንቱፐ እቼሹ አሳቱዋ፥ ኦላ ጋዳዋ ጻፍያ፥ ሄዌነ ኦላንቻቱዋ አሳ ግዶፐ ቆሪደ ከስያዋነ ሀራ ኡሱፑን ታሙ ዎልቃማ አሳቱዋ አፌዳ። 20 ካፑ ናቡዛራዳን ኡንቱንቱ ኡባ አኪደ፥ ባብሎነ ካትያኮ ርብላ ካታማ አፌዳ። 21 ያን ርብላ ካታማን፥ ሀማታ ጋድያን ባብሎነ ካቲ ኡንቱንታ ኡባ ዎሴዳ። ሄዋዳን ሀኒደ፥ ይሁዳ አሳይ ባረ ጋድያፐ ኦሞደት ደንዲደ ቤዳ።

ገዳሊ ይሁዳ ሞዴዳ

22 ሄዋፐ ጉይያን፥ ካቲ ናቡካዳናጾረ ሳፋና ናኣ ናኣ፥ አህቃማ ናኣ ገዳልያ፥ ባብሎነ ቤናን ይሁዳን አቴዳ አሳ ሞድያ ካፑዋ ኦደ ሱንዳ። 23 ኩሽያ እምቤና ይሁዳ ኦላ ጋዳዋቱነ ኦላንቻቱ ሄዋ ስሲደ፥ ምስጳን ደእያ ገዳልያን ቢደ ጋከቴድኖ። ሄ ጋዳዋቱ ናታንያ ናኣ እስማኤላ፥ ቃሬሀ ናኣ ዮሀናና፥ ናጾፋ ካታማፐ ዬዳ ታንሁሜታ ናኣ ሳራያነ ማእካፐ ዬዳ እት ብታንያ ናኣ ያዛንያ። 24 ገዳሊ ኡንቱንቶነ ኡንቱንቱ ኦላንቻቶ ጫቂደ፥ ሀዋዳን ያጌዳ፤ "ሀዋንቶ ባብሎነ ካፓቶ ያዮፕተ። ሀ ጋድያን ደእተ፤ ያቲደ ባብሎነ ካትያዉ ሞደትተ። ያቶፐ ሙለ ኡባባይ ህንተዉ ሎአ ግዳናዋ" ያጌዳ።

25 ሽን ላፑን አግናን ካትያ ዛርያ ግዴዳ ኤልሻማአ ናኣ ናታንያ ናአይ እስማኤለ ታሙ አሳና ምጽጳ ቢደ፥ ገዳልያነ አናና ደእያ ይሁዳ አሳነ ባብሎነ አሳ ኡባ ዎዳ። 26 ሄዋፐ ጉይያን፥ ባብሎነ አሳዉ ያዪደ፥ ይሁዳ አሳይ፥ ቄራይ ዎጋይ አተናን፥ ኦላ ጋዳዋቱዋናካ ኡባይ ግብጼ ጋድያ ባቃቴድኖ።✝25:26 ኤር. 43:5-7

እኮንያነ ቃሹዋፐ ብለቴዳ

27 ኤዊል-ማሮዳክ ካተቴዳ ላይ ይሁዳ ካትያ እኮንያና ቃሹዋፐ ብሊደ ማሬዳ። ሄዌ ሀኔዳዌ እኮንያነ ኦሞደት ቃሸቲደ ቤዳ ሀታማነ ላፑን ላይ፥ ታማነ ላኤን አግናን፥ ላታማነ ላፑን ጋላሳና። 28 ኤዊል-ማሮዳክ እኮንያናና ማልኦ ቃላ ሃሳዪደ፥ ባብሎነን ኦሞዱዋን ደእያ ሀራ ካተቱዋ ኡባፐ አደ፥ አ ቦንቼዳ። 29 ሄዋ ድራዉ፥ እኮንያነ ቃሾ ጎለን ማዬዳ ማዩዋ ላሜዳ። እ አቴዳ ባረ ደኡዋ ላይ ኡባን ካትያ ማዳፐ ሜዳ። 30 ሀቼ ሀቼ አዉ ኮሽያዋ ኡባ ባብሎነ ካቲ እሜዳ።