2 ካታቱዋ 19

ካቲ ህዝቂያሰ ኢስያሳ ዞርያ ኦቼዳ

1 ካቲ ህዝቂያሰ ሄዋ ስሴዳ ዎደ፥ ባረ ማዩዋ ፔደ ዋሩዋ ማዪደ፥ መና ጎዳ ጌሻ ጎልያ ገሌዳ። 2 ካትያ ጎለን አዎትያ ኤልያቂመ፥ ዋና ጻፊ ሼብንነ ካለያ ቄሳቱ ዋሩዋ ማዪደ፥ አሞጻ ናኣ ትምቢትያ ኦድያ ኢስያሳ ኮ ባና ማላ ኪቴዳ። 3 ኡንቱንቱ ኢስያሳ ኮ ቢደ፥ "ህዝቂያሰ ሀዋዳን ያጌ፤ ‘ሀች ጋላሳይ መቶ ጋላሳ፥ ሴራ ጋላሳነ ዬላ ጋላሳ። ሄዌካ ናአይ የለታናዉ ዎዲ ጋክና፥ ባንካደ የላናዉ ምሽራትዉ ዎልቃይ ይያዋ ማላ። 4 ደኡዋ መና ጎዳ ሸቃናዳን፥ አ ጎዳይ፥ አሶረ ካቲ፥ ኪቴዳ ጋዳዋ ቃላ ኡባ መና ጎዳይ፥ ነ ጾሳይ ስሰናን አገና። ቃይ መና ጎዳይ፥ ነ ጾሳይ ሄ ስሴዳ ቦሪያ ቃላ ጋሱዋን አ ሙረናን አገና። ሄዋ ድራዉ፥ ኑ አሳ ግዶን ፓላህ አታናዋንቶ ዎሳ!’ ያጌ" ያጌድኖ።

5 ካትያ ህዝቂያሳ ቆማቱ ኢስያሳ ኮ ዬዳ ዎደ፥ 6 እሳያሰ ኡንቱንታ ሀዋዳን ያጌዳ፤ "ህንተንቱ ጎዳዉ ሀዋዳን ያጊደ ኦድተ፤ ‘መና ጎዳይ ኔና፥ "አሶረ ካትያ ቆማቱ ታና ሸቅሽን፥ ኔን ስሴዳ ሸቃ ቃላዉ ያዮፓ። 7 በአ፥ ኦዱዋ ስሲደ፥ እ ባረ ጋድያ ስማና ማላ፥ ታን አ ግዶን ኢታ አያና ዎና። ያታደ እ ባረ ጋድያ ቢደ፥ ያን ማሻን ሀይቃናዳን ታን አ ኦና" ያጌ’ ያግተ" ያጌዳ።

አሶራቱ ሀራ ናስያ ናሴድኖ

8 አሶረ ካቲ ላክሻ ካታማፐ ደንዲደ ብ ክቼዳዋ አሶረቱ ጋዳዋይ ስሲደ፥ ጉየ ስሜዳ። ካቲ ሊብና ካታማን ኦለትያዋ ደሜዳ።

9 ካቲ ሳናክሬመ፥ "ቶጵያ ካቲ ትርሃቅ ኔና ኦላናዉ ዬዳ" ያግያ ኦዱዋ ስሴዳ። ህዝቂያሳዉ ሀዋዳን ያጊደ ኪቴዳ፤ 10 "ይሁዳ ካትያ ህዝቂያሳ፥ ኔን አማነትያ ጾሳይ ኔና፥ ‘የሩሳላመ አሶረ ካትያ ኩሽያን ገለና’ ያጊደ ጭሞፖ። 11 በአ፥ አሶረ ካተቱ ቢታቱዋ ኡባ ሙለ ይሲደ፥ ኡንቱንቱ ኦዳዋ ኔን ስሳዳ። ያትና ኔን አታይ? 12 በን ታ ማይዛ አዎቱ ባይዜዳ ቢታቱዋ ጾሳቱ፥ ሄዋንቱነ ጎዛና፥ ካራነነ ረጼፋ ቢታቱዋ ጾሳቱነ ታላሳራን ደእያ ኤደነ አሳ ጾሳቱ ሄ ቢታቱዋ ባሻፐ አሼድኖ? 13 ሀማታ ካቲ፥ አርፋደ ካቲ፥ ሳፋርዋይማ ካቲ፥ ሄናአ ካቲነ ኢዋ ካቲ ሀቃን ደኢኖ?" ያጊደ ኪቴዳ።

14 ህዝቂያሰ ዳብዳቢያ አኪየዳ አሳቱዋፐ አኪደ ናባቤዳ። ዳብዳቢያ መና ጎዳ ጌሻ ጎልያ አክ አፊደ፥ መና ጎዳ ስንን ምጬዳ። 15 ያቲደ መና ጎዳ ሀዋዳን ያጊደ ዎሴዳ፤ "አቤት መና ጎዳዉ፥ ክሩበቱዋፐ ግዱዋን ኡትያ እስራኤልያ ጾሳዉ፥ ሳኣ ካዉተቱ ኡባ ቦላ ነ ጻላላይ ጾሳ። ሳሉዋነ ሳኣ ኔን መዳ።✝19:15 ከሳ 25:22 16 አቤት መና ጎዳዉ፥ ነ ሀይ ሃ የጋደ ስሳ። አቤት መና ጎዳዉ፥ ነ አይፍያ ፖካደ ጼላ። ኔና፥ ደኡዋ ጾሳ ሸቃናዉ ሳናክሬመ ኪቴዳ ቃላ ስሳ። 17 አቤት መና ጎዳዉ፥ አሶረ ቢታ ካተቱ ካዉተቱዋነ ኡንቱንቱ ቢታ ባይዜዳዌ ኤ ቱማ። 18 ኡንቱንቱ ጾሳቱዋ ታማን ጹግ ይሴድኖ፤ አያዉ ጎፐ፥ ኡንቱንቱ ጾሳቱ ዎንካ አሳ ኩሺ ማሲደ ከሴዳ ምነ ሹቻነ ግድያ ድራዉ፥ ቱሙ ጾሳቱዋ ግድክኖ፤ ሄዋ ድራዉ፥ ኡንቱንቱ ኡንቱንታ ይሴድኖ። 19 አቤት መና ጎዳዉ፥ ነ ጻላላይ ጾሳ ግድያዋ ሳኣ ካዉተቱ ኡባይ ኤራና ማላ፥ ሀእ ስም፥ መና ጎዳዉ፥ ኑ ጾሳዉ፥ ኔን ኑና አ ኩሽያፐ ዎ አካ!" ያጊደ ዎሴዳ።

እሳያሰ ካትያዉ የዴዳ ኪታ

20 ሄዋፐ ጉይያን፥ አሞጻ ናአይ እሳያሰ ህዝቂያሳዉ ሀዋዳን ያጊደ ኪቴዳ፤ "መና ጎዳይ እስራኤልያ ጾሳይ ሀዋዳን ያጌ፤ ‘ኔን አሶረ ካትያ ሳናክሬማ ጋሱዋን ታና ዎሴዳ ዎሳ ስሳድ’ ያጌ። 21 መና ጎዳይ ሳናክሬባዋ ሀዋዳን ያጊደ ሃሳዬ፤

" ‘ጽዮነን ደእያ ዎዶራታ ኔና ካዉ፤

የሩሳላመ ዎዶራታ ባረ ሁጲያ ቃደ፥

ኔና ቆሳዉ።

22 " ‘ኔን ሸቄዳዌነ

ቶቼዳዌ ኦኔ?

ኔን እዝ ቦላን ነ ቃላ

ቁ ኦደ ሃሳያዲ?

ቃይ ኦቶሩዋን ኦና

ቁ ጋደ ጼላዲ?

ሄዋ ኔን ኦዳዌ ታ ቦላና፥

እስራኤልያ ጌሻ ቦላና ግደኔ!

23 ኔን ኪቴዳ አሳቱዋ ባጋና፥

መና ጎዳ ሸቃዳ።

ቃይ ሀዋዳን ያጋዳ፤

"ታን ታዉ ደእያ ጮራ ፓራ ጋረቱዋን

ቃ ደረቱዋ ሁጲያ፥

ሊባኖሳ ደርያ ኪክያ ከሳድ።

ኡባፐ አዱቂያ ዝጋቱዋነ፥

ኡባፐ ሎእያ ጽደቱዋ ቃንጻድ።

ታን አዉ ዉርሰ ጋጻነ

ሎኦ ዎራ ጋካድ።

24 ታን አላጋ ቢታቱነ ሃ ኦላቱዋ ቦካደ፥

ሃ ኡንቱንቱፐ ኡሻድ።

ግብጼ ቢታን ጎግያ ሃ ኡባ

ታን ታ ገድያ ጎምፓን የደ መልሳድ" ያጋዳ።

25 " ‘ዳሮ ዎድያፐ ካሰ ኔን

ግምበቴዳ ካታማቱዋ ቆቆፋደ፥

ሹቻ ኬላ ከሳና ማላ፥

ታን ቆፋ ቃቻ ዎዳዋ ኔን ኤራበይኪ?

ታን ሀእ ፖልያ ሀልቾቱዋ

በን ሀልቻ ዎድ።

26 ሄዋ ድራዉ፥ ኡንቱንቱ አሳዉ ዎልቃይ እጽና፥

ኡንቱንቱ ካዉሼድኖነ ዬላቴድኖ።

ኡንቱንቱ ጋደ ማታ ማላ፤

ጎሻን ዶልያ ጫርሻ ማላ።

ኡንቱንቱ ጎልያ ሁጲያን ሞክያ ሻራፋዳንነ

ካኤናን ደእሽን፥ ሌጊ ሜዳ ካዳን ሀኔድኖ።

27 " ‘ሽን ኔን ኡትያሳ፥

ከስያሳ፥ ገልያሳነ

ታ ቦላ ኔን ሀንቀቴዳ ሀንቁዋ ታን ኤራይ።

28 ኔን ታ ቦላ ሀንቀቴዳ ድራዉነ፥

ነ ኦቶሩዋካ ታን ስሴዳ ድራዉ፥

ታን ነ ሲያን ታ ዳፉዋ አና፤

ነ ዶናንካ ታ ብጻላ ባርሳና።

ያታደ ነ ዬዳ ኦግያና ታን ኔና ጉየ ዛራና’

ያጌ" ያጌዳ።

29 ሄዋፐ ጉይያን፥ እሳያሰ ካትያ ህዝቂያሳ ሀዋዳን ያጌዳ፤ "ሀዌ ፖለታናዉ ነዉ ማላታይ ሀዋ: ሀ ላይ ህንተንቱ ዘረናን ዶልያ ካ ማና፤ ላይ ቃይ ሀ ላይ ሞኬዳዋ አዛባ ማና። ሽን ካላ ላይ ህንተንቱ ህንተንቱ ሁጲያዉ ዘርተነ ቆይጭተ፤ ዎይንያ ቱራካ ቶክተነ አ ቴራ ሚተ። 30 ይሁዳ አሳ አተቱ ጻጱዋ ዱገ የዲደ፥ ቦላን አይፍያ አይፍያ ም ማላ ግዳና። 31 አያዉ ጎፐ፥ ዉሪደ አቴዳዋንቱ የሩሳላመፐ፥ ፓላሄዳዋንቱካ ጽዮነፐ ከሳና። ኡባፐ ዎልቃማ መና ጎዳ ምሹ ሄዋ ኦደ ፖላና።

32 "ሄዋ ድራዉ፥ አሶረ ካዉዋ መና ጎዳይ ሀዋዳን ያጌ፤ ‘አሶረ ካቲ ሀ ካታማ ገለና፤ ዎይ ሀዋን ባረ ዎንዳፍያን ዱከና። እ ባረ ጎንዳልያ ኦይቂደ፥ ሀ ካታማ ስን አና፤ ዎይ ቃይ ካታማ ዩሹዋ ቢታ ዶርያን ድረና። 33 አሶረ ካቲ ባረ ዬዳ ኦግያና ጉየ ስማና፤ እ ሀ ካታማ ገለና። ታን መና ጎዳይ ሀዋ ኦዳድ። 34 ታን ታ ቦንቹዋ ድራዉነ ታ ቆማ ዳዊታ ድራዉ፥ ሀ ካታማ ቦሽሰናን አሻ አካና’ ያጌ" ያጌዳ።

35 ሄ ጋላስ ቃማ መና ጎዳ ኪታንቻይ ከሲደ፥ አሶረ አሳይ ዱንካኔዳ ሳኣን እት ጼታነ ሆስፑን ታማነ እቼሹ ሻአ አቱማ አሳ ዎዳ። ያትና አሳይ ዎንታ ደንዲደ በእያ ዎደ፥ ሀይቄዳ አሳ አሃይ ሄዋን ኩሜዳ። 36 ሄዋ ድራዉ፥ አሶረ ካቲ ሳናክሬመ ደንዲደ፥ ጉየ ስም ቢደ፥ ናናዌ ካታማን ኡቴዳ። 37 እት ጋላስ ሳናክሬመ ባረ ጾሳ ንስሮካ ኤቃ ጎለን ጎይኒደ ደእሽን፥ አ ናናይ አድራመሌክነ ሳርኤጸር ማሻን አ ዎድኖ። አራራተ ግያ ጋድያ ባቃቴድኖ። አ ናአይ አሳርህ-ሀዶን አ ሳኣን ካዉቴዳ።