2 ካታቱዋ 11

ይሁዳ ካታቶ አታሎ

1 አካዝያሳ አታ አታላ ባረ ናአይ ሀይቄዳዋ በኤዳ ዎደ፥ ደንዳደ ካትያ ዛርያ ኡባ ይሳዱ። 2 ሽን ካትያ ዮራማ ናታ፥ አካዝያሳ ምቻታ ይሆሸባአ፥ ሀይቃናዉ ደእያ ካትያ ናናቱዋ ግዶፐ አካዝያሳ ናኣ ዮኣሻ ዉኣደ አካዱ። አነ አ ንያኖነ ሂጻ ጎለን ቆሳደ፥ አታላ ዎናዳን አሻዱ። 3 አታላ ጋድያ ሞድያ ዎደ ኡባን፥ ናአይ ይሆሸባእ ማታን መና ጎዳ ጌሻ ጎልያን ኡሱፑን ላይ ቆሰቲደ ደኤዳ።

4 ላፑን ላይን ዮዳሄ ካትያ ናግያዋንቱነ ካትያ ጎልያ ናግያዋንቱ ካፓቶ ኪቲደ፥ ባረኮ መና ጎዳ ጌሻ ጎልያ አህሴዳ። ኡንቱንቱና ቃላ ጫቁዋ ጫቀቲደ፥ ኡንቱንቱ መና ጎዳ ጌሻ ጎልያን ጫቂሴዳ። ሄዋፐ ጉይያን፥ ኡንቱንቱ ካትያ ናኣ ዮኣሻ በሴዳ። 5 እ ኡንቱንታ፥ "ህንተንቱ ኦናባይ ሀዋ። ሳምባታን ናጎ ገልያ ካላይ ጋኬዳ ህንተንቱ ሄዙ ጭታፐ እት ጭታይ ካትያ ጎልያ ናጎ፤ 6 እት ጭታይ ሱር ግያ ፐንግያ ናጎ፤ ቃይ እት ጭታይ ናግያዋንቱፐ ጉየ ባጋና ደእያ ፐንግያ ናጎ። 7 ቃይካ ሳምባታን ናጉዋፐ ሃ ከስያ የንኮ ላኡ ጩጎቱዋ ኩመንቱ ካትያዉ ጌሻ ጎልያ ናግኖ። 8 ኦላ ሚሻ ኦይቂደ፥ ካትያ ግዶዪደ፥ ካቲ ከስያ ዎደነ ገልያ ዎደ ኡባን አናና እትፐ ደእኖ። ህንተኮ ሺቅያ ኦናካ ዎተ" ያጌዳ።

9 ሄ ካፓቱ ቄሲ ዮዳሄ አዛዜዳዋ ኡባ ኦድኖ። ኡንቱንቱ ኡባይካ ሳምባታ ጋላሳን ናጉዋ ካላይ ጋኬዳዋንታካ ናጉዋ ካላን ፖሌዳዋንታካ አኪደ፥ ቄስያ ዮዳሄኮ ዬድኖ። 10 ቄሲ መና ጎዳ ጌሻ ጎልያን ደእያ፥ በን ካትያ ዳዊታ ጎንዳለቱዋነ ቶራቱዋነ ኡባ ካፓቶ እሜዳ። 11 ናግያዋንቱ እቱ እቱ ኦላ ሚሻቱዋ ባረንቱ ኩሽያን ኦይቂደ፥ ጌሻ ጎልያፐ ሀድርሳ ባጋፐ ዶሚደ፥ ኡሸቻ ባጋ ጋካናዉ፥ ያርሽያ ሳኣ ማታንነ ጌሻ ጎልያ ማታን ካትያ ዩሹዋን ኤቄድኖ። 12 ሄዋፐ ጉይያን፥ ዮዳሄ ካትያ ናኣ ካረ ከሲደ፥ አ ሁጲያን ካላቻ ዎዳ። ካዉተ ካለያ ህግያ ማጻፋፐ ዱቂደ እቱዋ አዉ እሚደ፥ ኦኪደ ካተዬዳ። ካዉነ አሳይ ኩሽያ ባቂደ፥ ባረ ቃላ ቁ ኦደ፥ "ካቲ ሸምፑ ጋምኦ!" ያጌዳ።

13 ካታታ አታላ ናግያዋንቱ ጫቡዋነ አሳ ጫቡዋነ ስሴዳ ዎደ፥ አሳኮ መና ጎዳ ጌሻ ጎልያ ባዱ። 14 ካቲ ካሰ ካተቱ ሀንያዋዳን ቱሳ ማታን ኤቄዳዋ በኣዱ። ካፓቱነ ጹሩምባ ፑንያዋንቱ ካትያ ማታን ደኢኖ፤ ሄ ቢታ አሳይ ኡባይ ናሸቲደ፥ ጹሩምባ ፑኔ። አታላ ባረ ማዩዋ ፔደ፥ "ሀዌ ማካላ! ሀዌ ማካላ!" ያጋደ ዋሳዱ።✝11:14 2 ካታ. 23:3

15 ቄሲ ዮዳሄ ኦላንቻቱ ካፓቱዋ፥ "አታሎ መና ጎዳ ጌሻ ጎልያን ዎፕተ! እዞ ያናነ ሃናነ ሳልፒደ ሳልፐቱዋ ግዱዋን ዎደ፥ ካረ ከስተ። እዞ አሻናዉ ካጄልያ አሳይ ደኦፐ ዎተ!" ያጌዳ። 16 ሄዋ ድራዉ፥ ኡንቱንቱ እዞ ኦይቂደ፥ ካትያ ጎልያ አፌድኖ፤ ፓራ ፐንግያን እዞ ዎድኖ።

ዮዳሄ ቃላ ጫቁዋ ኦራዳ

17 ሄዋፐ ጉይያን፥ አሳይ መና ጎዳ አሳ ግዳና ማላ፥ ዮዳሄ ካቲነ አሳይ መና ጎዳና ቃላ ጫቁዋ ገላና ማላ ኦዳ። ቃይ ካትያፐነ አሳፐነ ግዱዋንካ ቃላ ጫቁዋ ገልሴዳ። 18 ሄ ዎደ ይሁዳ አሳይ ኡባይ ባኣላ ኤቃ ጎልያ ቢደ፥ ሄ ጎልያ ክንቼዳ፤ ያርሽያ ሳአቱዋነ አ ምስለቱዋ ክንቼሬዳ። ቃይ ማታና ግያ ባኣላ ቄስያ ያርሽያ ሳአቱ ስንን ዎድኖ።

ሄዋፐ ስምና፥ ቄስያ ዮዳሄ መና ጎዳ ጌሻ ጎልያን ናግያዋንታ ዎዳ። 19 ባረናና ጋዳዋቱዋ፥ ካትያ ናግያዋንታ፥ ካትያ ጎልያ ናግያዋንታነ ይሁዳ አሳ ኡባ አክና፥ ኡንቱንቱ ካትያ መና ጎዳ ጌሻ ጎልያፐ ዱገ አሂደ፥ ናግያዋንቱ ፐንግያ ግያ ፐንግያ ባጋና ካትያ ጎለ እትፐ ገሌድኖ። ካቲ ባረ ካዉተ አራታን ኡቴዳ። 20 ያትና ይሁዳ አሳይ ኡባይ ናሸቴዳ። አታላ ካትያ ጎለን ማሻን ሀይቄዳዋፐ ጉይያን፥ ካታማይካ ዎፑ ጌዳ።

21 ዮኣሽ ካተትያ ዎደ ላፑን ላይ ናኣ።