2 ካታቱዋ 5

ንእማነ ዎልቃማ ኦሉዋ ሀርግያፐ ፓጼዳ

1 ሶርያ ካትያ ኦላ ጋዳዉ ንእማነ ባረ ጎዳን ዳሮፐ ዶሰቴዳነ ቦንቼቴዳ አሳ። አያዉ ጎፐ፥ አ ባጋና መና ጎዳይ ሶርያ ኦላንቻቶ ጾኑዋ እሜዳ። ንእማነ ቶራዉ ቃራ አሳ፤ ግዶፐነ ዎልቃማ ኦሉዋ ሀርጊ አ ኦይቂ ኡቴዳ።✝5:1-14 ሉቃሳ 4:27

2 እት ዎደ ሶርያ ቢታፐ ኦሞድያዋንቱ እስራኤልያ ጋድያ ቤዳዋን፥ እት ጉ ናቶ እስራኤልያፐ ኦሞዴድኖ። ሄ ናታ ንእማና ማቻትዉ ቆማ ግዳዱ። 3 ሄ ናታ ባረ ጎዳቶ፥ "ታ ጎዳይ ሳማርያን ደእያ ትምቢትያ ኦድያዋና ጋከቴዳባ ግዴረኔ! ያትንቶ እ አ ፓና ሽን" ያጋዱ።

4 ንእማነ ባረ ጎዳኮ ቢደ፥ እስራኤልያፐ ዬዳ ናታ ጌዳዋ አዉ ኦዴዳ። 5 ሶርያ ካቲ ንእማና፥ "ባ፥ ታን እስራኤልያ ካትያዉ ዳብዳቢያካ ኪታና" ያጊደ ዛሬዳ። ያትና ንእማነ ሀታሙ ሻአ ጻጋራ ብራ፥ ኡሱፑን ሻአ ዎርቃ ሳንትምያነ ታሙ ኩመን ማዩዋ አኪደ ቤዳ። 6 እስራኤልያ ካትያዉ እ አኪደ አፌዳ ዳብዳቢ፥ "ሀ ዎልቃማ ኦሉዋ ሀርግያፐ ኔን ታ ቆማ ንእማና ፓና ማላ፥ ሀ ዳብዳቢያና ታን አ ኔኮ ኪታድ" ያግያዋ።

7 እስራኤልያ ካቲ ዳብዳቢያ ናባቤዳ፤ ኤለካ ዳጋሚደ፥ ባረ ማዩዋ ፔደ፥ ሀዋዳን ያጌዳ፥ "ታን አ ዎናዉነ ፓናዉነ ጾሴየ? ታን እት አሳ አ ዎልቃማ ኦሉዋ ሀርግያፐ ፓና ማላ፥ ሀ ብታኒ ታኮ አያዉ ኪቲ? እ ታናና ዋላቀታናዉ ጋሱዋ ኮይያዋ በእተ" ያጌዳ።

8 ጾሳ አሳ ግድያ ኤልሳእ እስራኤልያ ካቲ ባረ ማዩዋ ፔዳዋ ስሴዳ ዎደ፥ አኮ አሳ ኪቲደ፥ "ነ ማዩዋ አያዉ ፔዲ? አ ሃ ታኮ የዳ፤ እስራኤልያን ትምቢትያ ኦድያዌ ደእያዋ ታን አ ኤርሳና" ያጌዳ።

9 ንእማነ ባረ ፓራቱዋነ ፓራ ጋረቱዋ አኪደ ቤዳ፤ ኤልሳአ ካረን ኤቄዳ። 10 ኤልሳእ አኮ አሳ ኪቲደ፥ "ባ፥ ዮርዳኖሳ ሻፋን ላፑ ገደ ሙከታ፤ ነ ሀርግያፐ ኔን ፓጻናነ ጌያናነ" ያጊደ አዛዜዳ።

11 ሽን ንእማነ ሀንቀት ደንዲደ፥ "በእተ፥ ታን፥ ቱሙካ እ ታኮ ይ ኤቂደ፥ መና ጎዳ ባረ ጾሳ ሱን ጼሲደ፥ ቃይ ባረ ኩሽያ ሄ ጸለቁዋ ቦላን ቃደ፥ ታና ሀ ዎልቃማ ኦሉዋ ሀርግያፐ ፓ ያጋደ ቆፓድ። 12 ዳማስቆ ሻፋቱ፥ አባንነ ፓርፋር እስራኤልያን ደእያ ሻፋ ኡባፐ ኬክክኖየ? ያትና ታን ኡንቱንቱን ሙከታደ ጌያ ክችክታ?" ያጌዳ። ሀንቀቲደ፥ ጉየ ስሜዳ።

13 አ ካልያዋንቱ አኮ ሺቂደ፥ "ኑ አዎ፥ ትምቢትያ ኦድያዌ ኔን ግታባ ኦናዳን ነዉ ኦድንቶ፥ ዎን ኔን ኦኪየ? ያትና እ ኔና፥ ‘ባደ ሙከታደ ጌያ’ ያጌዳባይ አያ ዴጺ?" ያጌድኖ። 14 ያትና እ ዱገ ዎደ፥ ጾሳ ብታኒ አዉ ኦዴዳዋዳን ዮርዳኖሳ ሻፋን ላፑ ገደ ሙከቲደ ጌዬዳ። አ ቦላይ ቄር ናኣ ቦላዳን ሀኒደ ፓጼዳ፤ ጌዬዳ።

15 ሄዋፐ ጉይያን፥ ንእማንነ አናና ዬዳ አሳይ ኡባይ ኤልሳአኮ ጉየ ቤዳ። ንእማነ አ ስንን ኤቂደ፥ "እስራኤልያ ቢታናፐ አትና፥ ሳኣ ኡባን ጾስ ባይናዋ ታን ሀእ ኤራድ። ሀያና ሀእ ታን ነ ቆማይ እምያ እሙዋ አካ!" ያጌዳ።

16 ኤልሳእ፥ "ታን አዉ ኦያ መና ጎዳይ ኤሮ! ታን ኔፐ አያነ አክከ" ያጌዳ። ኤልሳእ እሙዋ አካናዳን ናእማነ ዎስናካ፥ እጼዳ።

17 ሄዋፐ ጉይያን ንእማነ፥ "አካና ይያዋ ግዶፐ፥ ኔን ታዉ ላኡ ባቁሉዋ ጫና ቢታ እማናዳን ታን ኔና ዎሳይ። አያዉ ጎፐ፥ ታን ነ ቆማይ ሀቼፐ ህን ባጋን ጹግያ ያርሹዋ መና ጎዳዉ ያርሻናፐ አትና፥ ሀራ ጾሳቶ ያርሽከ። 18 ሽን መና ጎዳይ ታዉ ነ ቆማዉ እትባ አቶ ጎ። ታ ካቲ ርሞና ግያ ኤቃዉ ጎይናናዉ ገልያ ዎደ፥ ታንካ አ አጃባደ ገላደ ጎይናናዉ ኮሼ። መና ጎዳይ ታዉ ነ ቆማዉ ሄዋ አቶ ጎ" ያጌዳ።

19 ኤልሳእ፥ "ሳሩዋን ጋካ!" ያጌዳ። ንእማነ ደንዲደ ቤዳ።

እ ላፋ ዛርዳኢደ ቢሽን፥ 20 ጾሳ አሳ ግዴዳ ኤልሳአ ቆማይ ግያዝ፥ "ታ ጎዳይ ኤልሳእ ሶሪ ንእማነ አሄዳዋፐ አያካ አከናን ጮ የዴዳ። መና ጎዳይ ኤሮ! ታን አ ጌዱዋ ዎጻደ፥ አፐ እትባ አካና" ያጊደ ቆፔዳ። 21 ሄዋ ድራዉ፥ ግያዝ ናእማና ካሌዳ። ባረ ጌዱዋ ዎጽያዋ ንእማነ በኢደ፥ አናና ጋከታናዉ ፓራ ጋርያፐ ዎደ፥ "አዬሻ፥ ሳራ ግደኔ?" ያጊደ ኦቼዳ።

22 ግያዝ፥ "አየነ ባዋ፤ ሳራ! ሽን ታና ታ ጎዳይ፥ ‘ "ኤፍሬማ ገዝያፐ ትምቢትያ ኦድያዋንቱ ዛታ ግድያ ላኡ ዎዳላቱ ሀእ ታኮ ዬድኖ። ሀያና ኡንቱንቶ ሄዙ ሻአ ጻጋራ ብራነ ላኡ ኩመን ማዩዋነ እማ" ጋደ አ ኦቻ’ ያጊደ ኪቴዳ" ያጌዳ።

23 ንእማነ ግያዛ፥ "ያቶፐ ሀያና ኡሱፑን ሻአ ጻጋራ ብራ አካ" ያጌዳ። ንእማነ ግያዛ ሾቢደ፥ ሄ ብራ ላኡ ቃርጪታን የጊደ፥ ላኡ ኩመን ማዩዋና ላኡ ቆማቱዋ ቶሲደ፥ ግያዛፐ ስንዉ የዴዳ። 24 ግያዝ ደእያ ደርያ ኡንቱንቱ ጋክና፥ ብራነ ማዩዋነ ኡንቱንቱፐ አኪደ፥ ሶ ገልሴዳ። ያቲደ ኡንቱንታ ሞይዝና፥ ኡንቱንቱ ቤድኖ።

25 ሄዋፐ ጉይያን፥ ሶ ገሊደ፥ ባረ ጎዳ ኤልሳአ ስንን ኤቄዳ። ኤልሳእ ግያዛ፥ "ሀቃ ባድ?" ያጊደ ኦቼዳ።

ግያዝ፥ "ታን ነ ቆማይ ሀቃነ ባበይከ" ያጊደ ዛሬዳ።

26 ሽን ኤልሳእ ዛሪደ፥ "ብታኒ ኔናና ጋከታናዉ ፓራ ጋርያፐ ዎያ ዎደ፥ ታ አያናይ ኔናና ደኤ ግደኔ? ሀዌ ሚሻነ ማዩዋ፥ ዎይ ዎጋራነ ዎይንያ ቱራ ሳኣ፥ ዎይ ዶርሳ ዉድያነ ሚዛ ዉድያ፥ ዎይ አቱማ ቆማነ ማጫ ቆማ አክያ ዎዴየ? 27 ሄዋ ድራዉ፥ ንእማና ኦይቀዳ ዎልቃማ ኦሉዋ ሀርጊ ኔናነ ነ ዘረ ኡባ መ መናዉ ኦይቃናዋ" ያጌዳ። ግያዝ ኤልሳአ ስንፐ ከሲደ ቢሽን፥ ሄ ሀርጊ አ ኦይቂና፥ አ ጋልባይ ሻቻዳን ቦጽ ባሼዳ።