ናህምያ 4

ግምቢ ሽረት ግምበተናዳን ድጋናዉ ደንዴዳ ቆፋ

1 ኑን ግምቢያ ድርሳ ኪታ ዶሜዳዋ ሳንባላጽ ስሴዳ ዎደ ሀንቁዋ ኤጽ ከሴዳ፤ ቃይ ሎይ ይሎቲደ፥ ኑና ቅሊጬዳ። 2 ባረ ላገቱዋነ ሳማርያ ኦላንቻቱ ስንን እ ሀዋዳን ያጌዳ፤ "ሀዋንቱ፥ ሀ ፓና አይሁዳቱ አያ ኦኖ? ካታማ ዛረደ ግምባናዉ ኮዪኖየ? ያርሹዋካ ያርሻናዉ ኮዪኖ? ኦሱዋ እት ጋላስ ዉርሳናዋ ኡንቱንቶ ማላቲየ? ግምቢያዉ ሹቻ ዛር ደኡዋን ዎናዉ ዳንዳየት?"

3 አ ምይያን ኤቄዳ አሞና ጋድያ አሳ ግዴዳ ጾቢካ ቃይ ሀዋዳን ያጌዳ፤ "ኡንቱንቱ ቃይ አያነ ግምቢያ ግምባናዉ ዳንዳዪዬ? ኡንቱንቱ ግምቢያ ድርሳ ግምቢያ ቦላን ዎራካናይ ከስንቶነ ኩንድ አጋና"።

4 ሄዋፐ ጉይያን፥ ታን ሀዋዳን ያጋደ ዎሳድ፤ "ኑ ጾሳዉ፥ ኡንቱንቱ ኑና ዎት ዎት ቅሊጭንቶ ሀዋ ስሳ! ኡንቱንቱ ኑና ሸቂያ ሸቃይ ኡንቱንቱ ሁጲያን ስሞ። ባረንቶ ደእያ አቁዋ ቦንቀት ክቺደ፥ አላጋ ጋድያን ኦሞደቴዳ አሳ ግድኖ። 5 ኡንቱንቱ ናቁዋ ገንፓ፤ ኡንቱንቱ ናጋራካ ነ ስንፐ ሙለ ቁጮፓ። አያዉ ጎፐ፥ ግምቢያ ግምቢያዋንታ ኑና ሸቃን ካዉሼድኖ"።

6 ኑን ግምቢያ ድርሳ ኦሱዋ አገናን ኦዳ። ቃይ አሳይካ ኦሱዋ ምኖተን ኦያ ድራዉ፥ ግምቢያ ድርሳ ቃተይ ኤለካ ባካ ኬሻ ግድ አጌዳ።

7 ሳንባላጽ፥ ጾቢ፥ አራባ ጋድያ አሳይ፥ አሞና ጋድያ አሳይነ አሽዶዳ ካታማ አሳይ የሩሳላመ ግምቢያ ድርሳ ኪታይ ሎኦ ሀኖተን ኦሰቲደ ደእያዋነ ኮለቴዳ ሳአቱካ ባረቴዳ ዎደ ሎይ ሀንቀቴድኖ። 8 ሄዋፐ ደንዴዳዋን እትፐ የሩሳላመ ዪደ ኑና ኦላናዉነ ሻቢርሳናዉ ማቀቴድኖ። 9 ሽን ኑን ኑ ጾሳኮ ዎሴዶ፤ ኡንቱቱፐ ደንዴዳዋን ቃማነ ጋላስ ናግያ ናጋንቻቱዋካ ዎዶ።

10 ሄ ዎድያን ይሁዳ አሳይ ሀዋዳን ያጌድኖ፤ "ቶኩዋ ቶክያዌ ካሰዋፐ ኑና ላባን፤ ቃይ ደንናዉ ኮሽያ ግምቢያፐ ኮለቴዳ ዳሮ ሹቻይካ ብሮ ደኤ። ያትና፥ ኑን ሀቼ ሀ ግምቢያ ዋቲደ ግምባናዉ ዳንዳዬቶ?"

11 ኑ ሞርከቱ፥ "ኑን ቢደ ኡንቱንቱ ግዶ ጋካናዉ፥ ኡንቱንቱ ኦሱዋ ኦናዳን ተአናዉነ ኡንቱንታ ዎና ጋካናዉ፥ ኡንቱንቱ ኤርክኖ" ያጌድኖ።

12 ግዶ ሽን፥ አይሁዳቱ ዛር ዛር ኑኮ ዪደ፥ "ኡንቱንቱ ሙለ ባጋና ዪደ፥ ኑና ኦላናዋንታ" ያጊደ ኑዉ ኦዴድኖ።

13 ሄዋ ድራዉ፥ ኑ አሳፐ ማሻ፥ ቶራነ ዎንዳፍያ ኦይቂደ አሳ ኡንቱንቱ ዛርያን ዛርያን ማራደ፥ ኪታይ ዉርቤና ሄራን ግምቢያፐ ዞኮ ባጋና ናጋናዳን ዎድ። 14 አሳይ ሻቢረቴዳዋ ታን በኤዳ ዎደ፥ ደንዳ ኤቃደ፥ ኡንቱንታ፥ ኡንቱንቱ ካለያዋንታነ ሀራ ካፓቱዋ ኡባ ሀዋዳን ያጋድ፤ "ኑ ሞርከቶ ያዮፕተ! ጎዳይ ዎልቃማነ ሆላ ጌተትያዋ ግድያዋ ሀሳይተ። ሄዋ ድራዉ፥ ህንተንቱ ዛረቶ፥ ህንተንቱ አቱማ ናናቶ፥ ህንተንቱ ማጫ ናናቶ፥ ህንተንቱ ማችያዉነ ህንተንቱ ጎልያዉ ኦለትተ" ያጋድ።

15 ኑ ሞርከቱ ኑና ቆሀናዉ ማቀቴዳዋ ኑን ኤሬዳዋ ኡንቱንቱ ስሴድኖ። ቃይ ጾሳይካ ኡንቱንቱ ማቁዋ ሀዳ ከሴዳዋ አኬኬድኖ።

ሄዋፐ ጉይያን፥ ኑን ኡባይካ ስሚደ፥ ኑ ግምቢያ ድርሳ ኦሱዋ ዶሜዶ። 16 ሄ ዎድያፐ ዶሚደ፥ ታ ቆማቱዋፐ ባካይ ኦሱዋ ኦያ ዎደ፥ ባካይ ትራን ዎያ ኦላ ሚሻ ማዪደ፥ ቶራ፥ ጎንዳልያነ ዎንዳፍያ ኦይቂደ ናጋናዳን ኦድ። ቃይ ካፓቱካ ይሁዳ አሳ ኡባፐ ጉየና ኤቂደ ምንኖ። 17 ግምቢያ ድርሳ ግምቢያዋንቱነ ኮሽያዋ ቶክያዋንቱ ኡባይ እት ኩሽያን ኦላ ሚሻ ኦይቂደ፥ እት ኩሽያን ኦሱዋ ኦኖ። 18 ግምቢያ ኦሱዋ ኦያ ኡባይ ማሻ ባረ ጼሳን ዳንጭ ዳንጭ ኡቴዳ። ማላካታ ፑንያዌካ ኡባ ዎደ ታፐ ሻከት ኤረና።

19 አሳ ካለያዋንታ፥ ካፓቱዋነ አሳ ኡባ ታን ሀዋዳን ያጋድ፤ "ግምቢያ ድርሳ ኪታይ ዎልቃማነ ሎይ አካ ግድያዋፐ ደንዴዳዋን፥ ኑን እቱ እቱዋፐ ሻከቲደ ሃኬዶ። 20 ሄዋ ድራዉ፥ ህንተንቱ ማላካታ ፑና ስስያ ዎደ፥ እ ፑነትያ ሳኣ ታኮ ሃ ሺቅተ። ኑ ጾሳይካ ኑ ድራዉ ኦለታናዋ"። 21 ኦሱዋ ዎንቱማ ሳሉ ዞእያ ዎድያፐ ዶሚደ፥ ኦማርስ ጾልንቲ ከሳና ጋካናዉ ኦያ ዎደ ኡባን፥ ባጋይ ኦያ ዎደ፥ ባጋይ ቶራ ኦይቂደ ናጊኖ።

22 ሄ ዎደ ታን አሳዉ ሀዋዳን ያጋድ፤ "ቃማን ኑና ናጋናዉነ ጋላስ ቃይ ኪታ ኦናዉ ህንተንቱ ኡባይካ ህንተንቱ ቆማቱካ የሩሳላመን አቅተ"። 23 ሄዋ ድራዉ፥ ታና ግድና፥ ታ እሻቱዋ ግድና፥ ታ ቆማቱዋ ግድና፥ ዎይ ቃይ ታና ናግያዋንታ ግድናካ፥ ኑን ኡባይካ ኑ ማዩዋ ከሰናን አቄቶ፤ ቃይ ኑ ኦላ ሚሻይካ፥ ኑፐ ኡባካ ሻከተና።