ናህምያ 12

ኦሞዱዋፐ ስሜዳ ቄሳቱዋነ ሌዋቱዋ ሱን

1 ሳላትያላ ናኣ ዛሩባቤላናነ ቄሰ ኡባቱዋ ካፑዋ ኢያሱና ኦሞዱዋፐ ስሜዳ ቄሳቱ ሀዋንታ: ሳራያ፥ ኤርማሳ፥ እዝራ፥ 2 አማርያ፥ ማሉካ፥ ሀጹኡሻ፥ 3 ሻካንያ፥ ረሁማ፥ ማረሞታ፥ 4 እዳ፥ ግነቶና፥ አቢያ፥ 5 ምያሚና፥ ማኣድያ፥ ብልጋ፥ 6 ሻማእያ፥ ዮያሪባ፥ ያዳያ፥ 7 ሳላ፥ አሞካ፥ ህልቂያነ ያዳያ። ሀዋንቱ ኢያሱ ላይን ቄሳቶነ ቄሳቱዋ ያራቶ ካፑዋ ግዴዳዋንታ።

8 ኡንቱንቱና እትፐ ስሜዳ ሌዋቱ ኢያሳ፥ ቢኑያ፥ ቃድምኤላ፥ ሸረብያ፥ ይሁዳነ ማታንያ። ማታኒ ሀራ ባረናና ኦያዋንቱና እትፐ ጋላታ ማዝሙርያ የጽያዋንቶ ካፑዋ። 9 ኡንቱንቱና እትፐ የጽያ ባቅቡቀነ ኡኖን ኡንቱንቱፐ ስንና ሃ ስም ኤቂደ የጺኖ።

10 ኢያሱ ዮያቂማ የሌዳ፤ ዮያቂም ኤልያሽባ የሌዳ፤ ኤልያሽብ ዮያዳአ የሌዳ፤ 11 ዮያዳእ ዮናታና የሌዳ፤ ዮናታን ያዱአ የሌዳ። 12 ዮያቂም ቄሰ ኡባቱዋ ካፑዋ ግዴዳ ላይ፥ ሀዋፐ ካሊደ ጻፈቴዳዋንቱ፥ ቄሳቱዋ ያራቱ ካፑዋ ግዴድኖ።

ሳራያ ያራ ካፑ ማራያ።

ኤርማሳ ያራ ካፑ ሀናንያ።

13 እዝራ ያራ ካፑ ማሹላማ።

አማርያ ያራ ካፑ ያሆሀናና።

14 ማሉካ ያራ ካፑ ዮናታና።

ሻባንያ ያራ ካፑ ዮሴፎ።

15 ሀሪማ ያራ ካፑ አዲና።

ማራዮታ ያራ ካፑ ህልቃያ።

16 እዶ ያራ ካፑ ዛካራሳ።

ግነቶና ያራ ካፑ ማሹላማ።

17 አቢያ ያራ ካፑ ዚክራ።

ምንያምናነ ማኣድያ ያራ ካፑ ፕልጻያ።

18 ብልጋ ያራ ካፑ ሻሙአ።

ሻማእያ ያራ ካፑ ዮናታና።

19 ዮያሪባ ያራ ካፑ ማታናያ።

ያዳያ ያራ ካፑ ኡዛ።

20 ሳላያ ያራ ካፑ ቃላያ።

አሞካ ያራ ካፑ ኤቤራ።

21 ህልቂያ ያራ ካፑ ሀሻብያ።

ያዳያ ያራ ካፑ ናታንኤላ።

22 ሌዋቱ ካፓቱ ኤልያሽብ፥ ዮያዳእ፥ ዮሀናንነ ያዱእ ቄሰ ካፑዋ ግዴዳ ዱማ ዱማ ላይን ጻፈቴድኖ። ቃይ ቄሳቱ ፓርሰ ጋድያ አሳ ግዴዳ ዳርዮስ ካተቴዳ ላይን ጻፈቴድኖ። 23 ግዶ ሽን፥ ሌዋቱ ያራቱ ካፓቱ ማዝጎብያን ጻፈቴዳዌ ኤልያሽባ ናኣ ናኣ ዮሀናን ሀይቃና ጋካናዉ ደእያ ዎድያ ጻላላና።

24 ሌዋቱዋ ካለያዋንቱ ሀሻብያ፥ ሸረብያነ ቃድምኤላ ናኣ ኢያሳ። ኡንቱንቱ ጾሳ አሳ ግዴዳ ካቲ ዳዊተ አዛዜዳዋዳን፥ ላኡዋን ሻከት ኤቂደ፥ ካላን ካላን ጾሳ ቦንቺኖነ አዉ ጋላታ ማዝሙርያ የጺኖ።

25 ጌሻ ጎልያ ግምቢያ ፐንግያ ማታን ኬጸቴዳ ዱማ ዱማ ሻሉዋ ዎያ ጎልያ ናግያዋንቱ ማታንያ፥ ባቅቡቅያ፥ ኦባድያ፥ ማሹላማ፥ ጻልሞናነ አቁባ ግያዋንታ። 26 ሀዋንቱ ዮጸዴቃ ናኣ ናኣ፥ ኢያሱ ናኣ ዮያቂም፥ ጋድያ ሞድያ ናህሚነ ቄሰነ ጻፍያ ግዴዳ እዝር ደኤዳ ላይን ኦድኖ።

ናህሚ የሩሳላመ ካታማ ግምቢያ አንጅስያ ባላ ኦዳ

27 የሩሳላመ ግምቢ ግምበቲደ ዉሬዳ ባላ ቦንችያ ዎደ፥ ሌዋቱ ባረንቱ ደኢያሳፐ ሳፐ ኮየቲደ፥ የሩሳላመ ዬድኖ፤ ዳላን፥ ዲንነ ማስንቁዋን ጋላታ ማዝሙርያ ናሸቻን የጺደ፥ ባላ ቦንቼድኖ። 28 ሀ ባላ ቦንቻናዉ ሌዋቱዋ ዛራቱ፥ ማዝሙርያ የጽያዋንቱ ኡባይ ባረንቱ ኬጺደ ኡቴዳ የሩሳላመ ዩሹዋፐነ ናጾፋቱ ጋድያን ደእያ ቄር ካታማቱዋፐ፥ 29 ቤት-ገልጋላፐ፥ ገባአፐነ አዝማዌታፐ ሺቂደ ዬድኖ። 30 ሄዋፐ ጉይያን፥ ቄሳቱ ነ ሌዋቱ ባረንቱ ሁጲያዉ ጌዬድኖ፤ ቃይ አሳይ ኡባይ፥ ግምቢያ ፐንገቱነ ግምቢ ጾሳዉ ጌያናዳን ኦያ ዎጋ ፖሌድኖ።

31 ታን ይሁዳ ካለያዋንታ ግምቢያ ቦላን ሺሻይ፤ ቃይ ማዝሙርያ የጽያዋንታካ ላኡ ጩጉዋን ሻካደ ጾሳ ጋላታና ማላ ኦድ። እት ጩጉ ግምቢያ ሁጲያና ኡሸቻ ስሚደ፥ ፕቱዋ ኦልያ ፐንግያ ባጋ ቤዳ። 32 ሆሻይነ ይሁዳ ካለያዋንቱፐ ባጋቱ ኡንቱቱፐ ጉየና ካሊኖ። 33 ሀራቱ ቃይ ኡንቱንቱና ደእያዋንቱ አዛርያ፥ እዝራ፥ ማሹላማ፥ 34 ይሁዳ፥ ቢንያማ፥ ሻማእያ፥ ኤርማሳነ 35 ጹሩምባ ኦይቂደ ቄሳቱ ዋ። ቃይ ኡንቱንቱፐ ጉየና ዬዳዌ ዛካራሳ፤ ዛካራስ ዮናታና ናኣ፤ ዮናታን ሻማእያ ናኣ፤ ሻማኤ ማታንያ ናኣ፤ ማታኒ ምካያ ናኣ፤ ምካይ ዛኩራ ናኣ፤ ዛኩር አሳፋ ናኣ። 36 ዛካራሳ ያራ ግዴዳ ሻማኤ፥ አዛርኤል፥ ምላላይ፥ ግላላይ፥ ማኣይ፥ ናታንኤል፥ ይሁዳይነ ሀናን ጾሳ አሳ ግዴዳ ዳዊተ ጾሳዉ የጽያ ዎደ ጎኤትያ የ ሚሻ ኡባ አኪደ፥ ዛካራሳፐ ጉየና ካሌድኖ። ኡንቱንቱ ጩጉዋ ካለያዌነ ጻፍያዌ እዝራ። 37 ፑልቱዋ ፐንግያኮ ጋኮዋፐ ጉይያን፥ ዳዊታ ካታማኮ ስሚደ፥ ግምቢያ ቦላን ደእያ ጸካ ከሴድኖ፤ ዳዊታ ጎለ አደ፥ ካታማፐ አዋይ ዶልያ ባጋና ደእያ ሃ ፐንግያኮ ቤድኖ።

38 ላኤን ማዝሙርያ የጽያዋንቱ ጩጉ ግምቢያ ሁጲያ ኦይቂደ፥ ሀድርሳ ስሚደ ቤዳ። ታን አሳፐ ባጋና እትፐ ግዳደ ኡንቱንቱፐ ጉየና ካላድ። እቶንያ አዱሳ ግምቢያፐ አደ፥ አኮ ግምቢያ ጌተትያ ሳኣ ጋኬዳ። 39 ቃይ ሄዋፐካ ስሚደ፥ ኤፍሬማ ፐንግያ፥ ኤጫ ፐንግያ፥ ሞልያ ፐንግያ፥ ሀናንኤላ አዱሳ ግምቢያነ ጼቱ አዱሳ ግምቢያ ጋካናስካ ቤዳ። ዉርሰን ዶርሳ ፐንግያ ማታና ቢደ፥ ናግያዋንቱ ፐንግያ ጋኪደ ኤቄዳ።

40 ማዝሙርያን ጾሳ ጋላትያ ላኡ ጩጉካ ጾሳ ጌሻ ጎልያኮ ጋኬድኖ፤ ቃይ ታንካ ታናና እትፐ ደእያ ካለያዋና ጋካድ። 41 ኑፐ ሀራቱ ሀዋፐ ካሊደ ጻፈቴዳ፥ ጹሩምባ ፑንያ ቄሳቱ ካ ጋኬድኖ። ሄዋንቱካ ኤልያቂማ፥ ማእሴያ፥ ምንያምና፥ ምካያ፥ ኤልዮኤናያ፥ ዛካራሳነ ሀናንያ። 42 ኡንቱንቱ ካሊደ ጋኬዳዋንቱ ማእሴያ፥ ሻማእያ፥ ኤልኣዛራ፥ ኡዛ፥ ያሆሀናና፥ ማልክያ፥ ኤላማነ ኤጼራ። ኑን ኡባይ ደንድ ኤቆዋፐ ጉይያን፥ ማዝሙርያ የጽያዋንቱ ይዝራሄ ኡንቱንታ ካለና፥ ባረንቱ ኮሻ ቁ ኦደ የጼድኖ።

43 ሄ ጋላስ ዳሮ ያርሹዋ አሳይ ጾሳዉ ያርሼዳ፤ አያዉ ጎፐ፥ ጾሳይ ኡንቱንቱ ዎልቃማ ናሸቻን ናሸቼዳ፤ ማጫ አሳይካ ናናይካ ናሸቴድኖ። ሄዋ ድራዉ፥ የሩሳላመ አሳይ ናሸትያ ናሸቻይ ሃኩዋን ስሰቴዳ።

44 ሄ ጋላስ አሳይ እምያ እሞታቱዋ፥ አስራታነ ላይን ካእያ ካ አይፍያ ኮይሩዋ ሺሺደ፥ ሚሻቱዋ ዎያ ጎለን ዎደ፥ ናግያ ካፓቱዋ ዶሬድኖ። ሀ ዶሬዳ አሳቱ ዱማ ዱማ ካታማቱዋን ደእያ ሾይቃቱዋፐ ህጊ አዛዝያዋዳን፥ ቄሳቶነ ሌዋቶ በስያ ቆሙዋ ሺሽኖ። አያዉ ጎፐ፥ ይሁዳ አሳይ ኡባይ ቄሳቱ ዋንነ ሌዋቱዋን ሎይ ናሸቴድኖ። 45 ኡንቱንቱ ጾሳይ አዛዜዳዋ ኦድኖ፤ ቃይ ጌይያ ዎጋካ ፖሌድኖ። ኡንቱንቱ ጻላላ ግደናን፥ ማዝሙርያ የጽያዋንቱነ ፐንግያ ናግያዋንቱ ዳዊተነ አ ናኣ ሶሎሞነ አዛዜዳ ኦሱዋ ፖሌድኖ።✝12:45 1 ኦዱዋ 25:1-8፤ 26:12 46 ካሰ ዳዊታነ አሳፋ ዎድያፐ ዶሚደካ ማዝሙርያ የጽያዋንቱ ጩጉዋ ካለያዋንቱ ጾሳ የን ጋላታናዉነ ቦንቻናዉ ደእያዌ ኤረቲደ ደእያዋ። 47 ዛሩባቤላ ላይንነ ናህምያ ላይን እስራኤልያ ኡባይ ማዝሙርያ የጽያዋንቶነ ፐንግያ ናግያዋንቶ በስያ ቆሙዋ ሀቼ ሀቼ እሜድኖ፤ ቃይ ሌዋቶካ ኡንቱንቶ ዱማዬዳ ቆሙዋ እሜድኖ። ሌዋቱካ ቃይ አሮና ያራቱዋ ግዴዳ ቄሳቶ ኡንቱንቶ ዱማዬዳ ቆሙዋ እሜድኖ።