ጾሳይ ባረ ናኣ ባጋና ሃሳዬዳ
1 ጾሳይ በን ዎደ፥ ኑ አዎቱ ናባቱዋ ባጋና ዱማ ዱማ ኦግያንነ ዳሮ ዎድያን ሃሳዬዳ። 2 ሽን ሀ ዉርሰ ዎድያን፥ ኡባባ አ ላትሲደ፥ የለታ አ ባጋና መዳ ባረ ናኣ ባጋና ኑዉ ሃሳዬዳ። 3 ናአይ ጾሳ ቦንቾ ፖኡዋ ጶሌ፤ ቃይ ኩመን ጾሳ ኤሻ አኪደ፥ ባረ ዎልቃማ ቃላን ሀ ሳኣ ናጌ፤ ያቲደ አሳ ናጋራፐ ጌሺደ፥ ኡባፐ ቦላ ጾሳፐ ኡሸቻ ባጋና1:3 ኡሸቻ ባጋና፦ ቦንቹዋነ ዎልቃሳ ግድያዋ በሴ። ሳሉዋን ኡቴዳ።
ጾሳ ናአይ ኪታንቻቱዋፐ ቦላ
4 ጾሳይ አዉ እሜዳ ሱንተይ ኪታንቻቱዋፐ ቃ ግድያዋዳንካ፥ ኡንቱንቱፐ አ ሎይ ቁ ኦዳ። 5 አያዉ ጎፐ፥ ጾሳይ ባረ ኪታንቻቱዋፐ ኦና፥
"ኔን ታ ናኣ፤
ታን ሀቼ ነዉ አዉዋ ግዳድ"
ጌዴ? ዎይ ቃይ ኦና፥
"ታን አዉ አዉዋ ግዳና፤
እካ ታዉ ናኣ ግዳና"
ጌዴ?1:5 ማዝ. 2:7፤ 2 ሳሜላ 7:14፤ 1 ኦዱዋ 17:13 6 ቃይ ጾሳይ ባረ ባይራ ናኣ ሀ ሳኣ የዳና ሀኒደ፥
"ታ ኪታንቻቱዋ ኡባቱካ አዉ ጎይንኖ"
ያጌዳ።1:6 ዛረ. 32:43 7 ጸሳይ ኪታንቻቱዋባ ሃሳዪደ፥
"ታን ታ ኪታንቻቱዋ ጫርኩዋ ከሳይ፤
ቃይ ታ ኦሳንቻቱዋካ ታማ ላጩዋ ከሳይ"
ያጌ።1:7 ማዝ. 104:4 8 ሽን ባረ ናኣዋ ሃሳዪደ፥
"ጾሳዉ፥ ነ ካዉተ ኦይዲ፥
መ መናዉ ደኤ።
ነ ካዉተ ጽሎተን አሃሳ።1:8-9 ማዝ. 45:6-7
9 ኔን ጽሎተ ሲቃደ፤
ናቁዋ እጻዳ።
ጾሳይ፥ ነ ጾሳይ ኔና፥
ነ ላገቱዋፐ አደ፥
ናሸቻን እልልስያ ዛይትያ ኦኬዳዌ ሀዋሳ"
ያጌ። 10 ጾሳይ ሀዋዳን ያጌ፤
"ጎዳዉ፥ ኮይሮ ኔን ሳኣ መዳ፤
ሳሉዋካ ነ ኩሽያን መዳ።1:10 ማዝ. 102:25-27
11 ሄዋንቱ ኡባይ ያና፤
ሽን ኔን ደአና።
ኡንቱንቱ ኡባይካ አፍላዳን ዉራና።
12 ኔን ኡንቱንታ ጋብያዳን ዳኮያና፤
ቃይ ኡንቱንቱ አፍላዳን ላመታናዋንታ።
ሽን ኔን ኔናካ፤
ነ ላይይ ኡባካ ዉረና"
ያጌ። 13 ሽን ጾሳይ ባረ ኪታንቻቱዋፐ እቱዋነ፥
"ታን ነ ሞርከቱዋ ኔን
ገድያን የያዋ ኦና ጋካናዉ፥
ሀዋን ታፐ ኡሸቻ ባጋን ኡታ"
ግቤና።1:13 ማዝ. 110:1 14 ኪታንቻቱ ኡባይ ጾሳዉ ኦናዉነ አቶተ ደማና አሳቱዋ ማዳናዉ ጾሳይ ኪቴዳ አያናቱዋ ግድክኖዬ?