1 አያዉ ጎፐ፥ ህገዉ ያና ሎኦባ ኤሹዋ ጻላላይ ደኤ፤ አዉ ቱሙ ሌምሱ ባዋ። ኡባ ዎደ ላይን ላይን እት ማላ ያርሹ ያርሸቴ፤ ሄዋ ድራዉ፥ ህጊ ጾሳኮ ሺቅያ አሳ ሄ ያርሹዋን ባላይ ባይና አሳ ኦናዉ ኡባካ ዳንዳየና። 2 ጾሳዉ ጎይንያ አሳይ ባረ ናጋራፐ ኡባና ጌዬዳባ ግድንቶ፥ ሱረ ዎዛናን ላኤንዋ ናጋራ ቆፐና፤ ቃይ ያርሽያዋካ አጋና። 3 ሽን አሳይ ላይን ላይን ሄ ያርሹዋን ባረ ናጋራ ሀሳዬ። 4 አያዉ ጎፐ፥ ኮሩማ ሱይነ ዴሻ ሱይ ናጋራ ይሳናዉ ኡባካ ዳንዳየና።

5 ሄዋ ድራዉ፥ ክርስቶስ ሀ አላምያ ያና ሀኒደ፥ ሀዋዳን ያጌዳ፤

"ኔን ያርሹዋነ እሙዋ ኮያበይካ፤

ሽን ታዉ ቦላ ጊግሳዳ።✝10:5 ማዝ. 40:6-8

6 ኔን ጹግያ ያርሹዋንነ፥

ናጋራ ያርሹዋን ኡባካ ናሸታካ።

7 ታን ሄ ዎደ፥ ‘ጻ ማጻፋን ታባይ ጻፈቴዳዋዳንካ፥

ጾሳዉ፥ ታን ኔን ኮይያዋ ኦናዉ ያድ’ ያጋድ"

ያጌዳ። 8 ያርሹ ያርሸታና ማላ፥ ህጊ አዛዝያዋ ግዶፐነ፥ ክርስቶስ ኮይሮ፥ "ኔን ያርሹዋ፥ እሞታ፥ ጹግያ ያርሹዋነ ናጋራ ያርሹዋ ኡባካ ኮያበይካ፤ ሄዋንቱን ናሸታካ" ያጌዳ። 9 ሄዋፐ ጉይያን ክርስቶስ፥ "ጾሳዉ፥ ታን ኔን ኮይያዋ ኦናዉ ያድ" ያጌዳ። ሄዋ ድራዉ፥ ክርስቶስ ላኤንዋ ኤሳናዉ ኮይሮዋ ይሴ። 10 የሱስ ክርስቶስ ጾሳይ ኮዬዳዋ ኦዳ ድራዉ፥ ባረ አሹዋ ላኤንናን እት ገደ ያርሼዳዋን ኑን ኑ ናጋራፐ ጌይ አጌዶ።

11 ቄሳቱዋ ኡባቱ ሀቼ ሀቼ ኤቂደ፥ ባረ ኦሱዋ ኦኖ፤ ቃይ ናጋራ ይሳናዉ ኡባካ ዳንዳየና እት ማላ ያርሹዋ ዛር ዛሪደ ያርሺኖ።✝10:11 ከሳ 29:38 12 ሽን ክርስቶስ ናጋራ ድራዉ፥ ኡባ ዎደዉ ግዴዳ እት ያርሹዋ ያርሺደ፥ ጾሳፐ ኡሸቻ ባጋና ኡት አጌዳ።✝10:12 ማዝ. 110:1 13 ጾሳይ ስንፐ ክርስቶሳ ሞርከቱዋ ክርስቶሳዉ ገድያን የያዋ ኦና ጋካናዉ፥ ያን ናጌ። 14 አያዉ ጎፐ፥ እ እት ገደ ያርሼዳዋን፥ ናጋራፐ ጌዬዳዋንታ መናዉ ባላይ ባይናዋንታ ኦዳ።

15 ቃይ ጌሻ አያናይ ኑዉ ማርካቲደ፥ ሀዋዳን ያጌ፤

16 "ታን ሄ ጋላሳቱዋፐ ጉይያን፥

ኡንቱንቱና ጫቀትያ ጫቁ ሀዋ:

ታን ታ ህግያ ኡንቱንቱ ቆፋን ዎና፤

ቃይ ኡንቱንቱ ዎዛናንካ ጻፋና"

ያጌ።✝10:16 ኤር. 31:33

17 ቃይ ሄዋፐ ጉየና፥

"ታን ኡንቱንቱ ናጋራነ፥

ኡንቱንቱ ማካላ ኦሱዋ ላኤን ሀሳይከ"

ያጌ።✝10:17 ኤር. 31:34 18 ጾሳይ ሄ ናጋራ አቶ ጌዳ ዎደ፥ ናጋራ ይሳናዉ ሀዋፐ ስንዉ ያርሹዋ ኮሸና።

19 ስም ታናዳን አማንያዋንቶ፥ ኑን የሱሳ ሱ ባጋና ኡባፐ አያ ጌሻ ሳኣ ገላናዉ ኑዉ ጻላተይ ደኤ። 20 ክርስቶስ ኑዉ ኦራ ኦግያነ ደኡዋ ኦግያ ጋርዱዋ ባጋና፥ ሄዋ ጉሳይ ባረ ቦላ ባጋና ዶዬዳ። 21 ኑዉ ጾሳ ጎለን ሱንቴዳ ዎልቃማ ቄሳይ ደእያ ድራዉ፥ 22 ኑን ሱረ ዎዛናና፥ ቱሙ አማኑዋና፥ ኢታ ዎዛናፐ ጌዬዳ ዎዛናናነ ቃይ ጽሎ ሃን ሜጨቴዳ ቦላና ጾሳኮ ሺቆይተ።✝10:22 ዎጋ 8:30፤ ህዝ. 36:25

23 ኑዉ እማና ጌዳ ጾሳይ አማንያ ድራዉ፥ ኑን ደማና ጊደ ናሸቻን ናግ ኡቴዳዋ ሎይ ኦይቆይተ። 24 እቱ እቱዋና ዋን ሲቀታነንቶነ ቃይ ሎኦ ኦሱዋ ዎት ኦነንቶ፥ እቱ እቶ ቆፔቶ። 25 እቱ እቱ ሺቁዋ ዶያ ኦደ ሺቅያዋዳን፥ ኑንካ እትፐ ሺቅያዋ አጎኮ፤ ሽን ጎዳ ጋላሳይ ማታትያዋ ህንተንቱ በእያ ድራዉ፥ እቱ እቱዋ መንቶ።

26 ኑን ቱማተ ኤራ አክ ድጊደ፥ ኤሪደ ናጋራ ኦያዋ ግዶፐ፥ ሀዋፐ ስንዉ ናጋራ ይስያ ያርሹ እትባይነ ባዋ። 27 ሽን ያሽያ ፕርዳ ናግያዌነ ጾሳ እጽያ ኡባ ማናዉ ዎልቃማ ታማይ ደኤ።✝10:27 ኢሳ. 26:11 28 ሙሴ ህገዉ አዛዘተና ኡራይ፥ ላኡ ኡራይ ዎይ ሄዙ ኡራይ አ ቦላ ማርካቶፐ፥ ቃረት ባይናን ሀይቄ።✝10:28 ዛረ. 17:6፤ 19:15 29 ጾሳ ናኣ ካዳ ኡራይ፥ ባረና ናጋራፐ ጌሼዳ ጾሳ ጫቁዋ ሱ ቱናባዳን ቆፔዳ ኡራይ፥ ቃይ አ ኬካተ ጌሻ አያና ቦርያ ኡራይ፥ አይ ኬና ኢታ ፕርዳ አካናዉ በስንቶነ አነ ቆፕተ።✝10:29 ከሳ 24:8

30 አያዉ ጎፐ፥ "ታን ሀሉዋ ከሳናነ ኩሽያ ዛራና" ጌዳዋ ኑን ኤሬቶ፤ ቃይካ፥ "ጎዳይ ባረ አሳ ፕርዳና" ያጌዳ።✝10:30 ዛረ. 32:35፣ 36 31 ደኡዋ ጾሳ ኩሽያን ኩንዳናዌ ዳሮ ያሽያዋ።

32 ህንተንቶ ጾሳ ፖኡ ፖኤዳዋፐ ጉይያን፥ ህንተንቱ ዳሮባን ዋየቲደ፥ ዎልቃማ ዋታን ገንጬዳ በን ዎድያ ሀሳይተ። 33 እት እት ገደ ህንተንታ አሳ ስንን ቦሬድኖነ ፓጻ ካኤድኖ፤ ቃይ ሀራ ዎደ ሄዋዳን ኦዳዋንቱናነ እትፐ ደኤድታ። 34 አያዉ ጎፐ፥ ቃሹዋን ደእያ አሳቶ ህንተንቱ ቃረቴድታ፤ ያቲደ ህንተንቶ መናዉ ዉረና ኡባፐ አያ ሻሉ ሳሉዋን ደእያዋ ህንተንቱ ሁጰዉ ኤሬዳ ድራዉ፥ ህንተባ ኡባ አክ ድጎፐ ህዶታን ገንጬድታ።

35 ሄዋ ድራዉ፥ ዎልቃማ ዎይታና ደእያ ህንተንቱ ጻላተ ኦሎፕተ። 36 ጾሳይ ኮይያዋ ኦደ፥ እ ህንተንቶ እማና ጌዳዋ አካናዉ ገንጫና ኮሼ። 37 አያዉ ጎፐ፥ ጾሳ ማጻፋይ፥

"አማሬዳ ዎዲ አቴዳ።

ይያዌ ያናዋ፤ ጋምኤና።✝10:37 እምባ. 2:3-4

38 ታ ጽሉ አማነቲደ ደአናዋ።

ሽን ኦንነ ጉየ ስሞፐ፥

ታና ናሸቼና"

ያጌ። 39 ኑን አማነቲደ አቴዳዋንቱ ባጋ ግድያዋፐ አትን፥ ጉየ ስሚደ ዬዳዋንቱ ባጋ ግዶኮ።