1 የሱስ ሄዋ ሃሳዬዳዋፐ ጉይያን፥ ፑደ ሳሉዋ ጼሊደ፥ ሀዋዳን ያጌዳ፤ "ታ አቦ፥ ዎዲ ጋኬዳ፤ ነ ናአይ ኔና ቦንቻና ማላ፥ ኔንካ ነ ናኣ ቦንቻ። 2 አያዉ ጎፐ፥ ኔን አዉ እሜዳ ኡባዉ መና ደኡዋ እ እማና ማላ፥ አሳ ኡባ ቦላን አዉ ማታ እማዳ። 3 አሳይ ኔና እት ቱሙ ጾሳ ግዴዳዋ ኤራና ማላነ፥ ቃይ ኔን ኪቴዳ የሱስ ክርስቶሳ ኤራና ማላ፥ ሀዌ መና ደኡዋ። 4 ኔን ታዉ ኦናዉ እሜዳ ኦሱዋ ፖላደ፥ ኔና ሳኣን ቦንቻድ። 5 ሀእካ ቃይ አዎ፥ አላሚ መታናፐ ካሰ ነ ማታን ታዉ ደእያ ቦንቹዋን ነ ስንን ታና ቦንቻ።

6 "አላምያ አሳፐ ኔን ታዉ እሜዳዋንቶ ነ ሱን ኤርሳድ፤ ኡንቱንቱ ነዋንታ፤ ቃይ ኔን ኡንቱንታ ታዉ እማዳ። ኡንቱንቱ ነ ቃላዉካ አዛዘቴድኖ። 7 ሀእ ኔን ታዉ እሜዳ ኡባባይ ኔፐ ዬዳዋ ኡንቱንቱ ኤሪኖ። 8 አያዉ ጎፐ፥ ኔን ታዉ እሜዳ ቃላ ታን ኡንቱንቶ እማድ፤ ኡንቱንቱካ ሄ ቃላ አኬድኖ። ታን ነ ማታፐ ዬዳዌ ቱማ ግድያዋ ኤሪደ ኔን ታና ኪቴዳዋካ አማኔድኖ።

9 "ታን ኡንቱንቶ ዎሳይ፤ አላመዉ ኔና ዎስከ። ሽን ኔን ታዉ እሜዳ አሳዉ ዎሳይ፤ አያዉ ጎፐ፥ ኡንቱንቱ ነዋንታ። 10 ታዉ ደእያ ኡባባይ ነባ፤ ቃይ ነዉ ደእያ ኡባባይካ ታባ። ታን ኡንቱንቱ ባጋና ቦንቼታድ። 11 ታን ሀዋፐ ጉይያን፥ አላምያን ደእከ፤ ኡንቱንቱ አላምያን ደኢኖ፤ ታን ሀእ ኔኮ ባይ። ጌሻ አዎ፥ ሀ ኔን ታዉ እሜዳዋንቱ ኔንነ ታን እቱዋ ግድያዋዳን፥ ኡንቱንቱ እቱዋ ግዳና ማላ፥ ኡንቱንታ ነ ሱንን ናጋ። 12 ታን ኡንቱንቱና አላምያን ደኣደ፥ ኔን ታዉ እሜዳ ነ ሱን ዎልቃን ኡንቱንታ ናጋድ። ታን ኡንቱንታ ናጋድ፤ ጾሳ ማጻፋይ ጌዳዌ ፖለታና ማላ፥ ባሻይ በስያ ኡራፐ አትን፥ ኡንቱንቱፐ ሀራይ ኦንነ ባይቤና።✝

13 "ሀእ ታን ኔኮ ባይ፤ ኡንቱንቱ ዎዛናን ታ ናሸቻይ ፖለታና ማላ፥ ሀዋ ታን አላምያን ሃሳያይ። 14 ታን ኡንቱንቶ ነ ቃላ እማድ፤ ታን አላምያሳ ግደናዋዳን፥ ኡንቱንቱካ አላምያሳ ግደና ድራዉ፥ አላሚ ኡንቱንታ እጼዳ። 15 ኔን ጻላህያፐ ኡንቱንታ ናጋና ማላ ዎስያዋፐ አትን፥ አላምያፐ ከሳና ማላ ዎስከ። 16 ታን አላምያሳ ግደናዋዳን፥ ኡንቱንቱካ አላምያሳ ግድክኖ። 17 ኔን ቱማተን ኡንቱንታ ነዋንታ ኦ፤ ነ ቃላይካ ቱማተ። 18 ኔን ታና አላምያ ኪቴዳዋዳን፥ ታንካ ኡንቱንታ አላምያ ኪታድ፤ 19 ቃይ ኡንቱንቱ ቱማተን ነዉ ዱማታና ማላ፥ ኡንቱንቱ ድራዉ፥ ታን ታ ሁጲያ ነዉ ዱማያድ።

20 "ታን ኡንቱንቱ ጻላላዉ ዎስከ፤ ሽን ኡንቱንቱ ቃላ ኦድና፥ ታና አማኔዳዋንቶካ ዎሳይ። 21 ኡንቱንቱ ኡባይ እቱዋ ግዳና ማላ፥ ታን ዎሳይ። አዎ፥ ኔን ታ ግዶን ደእያዋዳን፥ ቃይ ታንካ ነ ግዶን ደእያዋዳን፥ ኡንቱንቱ ኑ ግዶን ደኢኖ። ቃይ ኔን ታና ኪቴዳዋ አላሚ አማናና ማላ፥ ኡንቱንቱ እቱዋ ግድኖ። 22 ኔንነ ታን እቱዋ ግድያዋዳን፥ ኡንቱንቱ እቱዋ ግዳና ማላ፥ ኔን ታና ቦንቼዳዋዳን፥ ታንካ ኡንቱንታ ቦንቻድ። 23 ታን ኡንቱንቱ ግዶን ደእና፥ ኔን ታ ግዶን ደእና፥ ቃይ ኔን ታና ሲስያዋዳን፥ ኡንቱንታካ ሲቆዋነ ኔን ታና ሀ አላምያ ኪቴዳዋ አላሚ ኤራናዳን፥ ኡንቱንቱ ኡባ እቱዋ ግድኖ።

24 "አዎ፥ ሳአይ መታናፐ ካሰ ኔን ታና ሲቄዳ ድራዉ፥ ታዉ እሜዳ ታ ቦንቹዋ ኡንቱንቱ በአና ማላ፥ ኔን ታዉ እሜዳዋንቱ ታን ደእያ ሳኣን ታናና ደአና ማላ ኮያድ።

25 "ጽሎ አዎ፥ አላምያ አሳይ ኔና ኤረና፤ ሽን ታን ኔና ኤራይ። ቃይ ኔን ታና ኪቴዳዋ ሀዋንቱ ኤሪኖ። 26 ኔን ታና ሲቄዳ ሲቁ ኡንቱንቱ ግዶን ደአና ማላ፥ ቃይ ታንካ ኡንቱንቱ ግዶን ደአና ማላ፥ ታን ነ ሱን ኡንቱንታ ኤርሳድ፤ ስንዉካ ኤርሳና" ያጌዳ።