Lucas 10

ምሽራቹዋ ቃላዉ ኪተቴዳ አሳቱዋ

1 ሀዋፐ ካላ ጎዳይ ሀራ ላፑን ታሙ*10:1 ላፑን ታሙ፦ እት እት ጌሻ ማጻፋ ብለን፥ "ላፑን ታማነ ላአ"። አይሁዳ ዎጋን ቢታ ቦላን ደእያ አሳ ዘረይ ላፑን ታማ። ሽን ካሰ ኤጫ ግሪከ ማጻፋ ብለን ደእያዌ፥ "ላፑን ታማነ ላአ"። ኦን ኤር የሱስ ባረ ቃላ አላምያ ዩሹዋን ጋናዉ ሀ ፓይዱዋና ቃራ አሳ ሱንደ ኪተናን አገና ያግያ ቆፋይ ደኤ። አሳ ሱንደ ላኡዋ ላኡዋ ኦደ እ ባናዉ ደእያ ካታማ ኡባ ኪቴዳ። 2 የሱስ ኡንቱንታ፥✝10:2 ማቶሳ 9:37፣ 38

"ቆይቻዉ ጋኬዳ ካይ ዳራ፤ ኪተትያ አሳይ ጉ። ስም ቆይጨትያ ካ ጎዳይ፥ ቆይቻዉ ኪተትያዋንታ የዳና ማላ ዎስተ። 3 ታን ዶርሳቱዋዳን ዋላቱዋ ግዶ ህንተና ኪታይ፥ ቢተ።✝10:3 ማቶሳ 10:16 4 ህንተንቱ ኦገዉ አያነ ኦይቆፕተ: ቦርሳ፥ ቃርጪትያ፥ ጫማ፥ ግድናካ ኦይቆፕተ፤ አሳና ሳሮተቲደ ኦግያን ዎድያ ዉርሶፕተ።*10:4 አሳና ሳሮተቲደ ኦግያን ዎድያ ዉርሶፕተ፦ ሄ ጋላሳን ጋራተን ኦያ ሳሮታይ ዎድያ ሎይ ምያ ድራዉ፥ ሀዌ ሃሳየቴዳ።✝10:4-11 ማቶሳ 10:7-14፤ ማር. 6:8-11፤ ሉቃሳ 9:3-5

5 "ህንተንቱ ገልያ ጎለ ኡባ ካስያን፥ ‘ሳሮተይ ሀ ጎለዉ ግዶ’ ያግተ። 6 ሄ ጎልያን ሳሮተ ዶስያ አሳይ ደኦፐ፥ ህንተንቱ ሳሮታይ ሄ ጎልያን አቃናዋ፤ ኮየናዋ ግዶፐ፥ ህንተንቱ ሳሮታይ ህንተንቶ ስማናዋ። 7 ሄ ጎልያን ኡንቱንቶ ደእያዋፐ ሚድነ ኡሺደ ደእሽተ፤ ኦሳንቻዉ አ ድርጉዋ ጭጋይ ኮሼ፤ እት ጎልያፐ ሀራ ጎልያ ዩዮፕተ።✝10:7 1 ቆሮ. 9:14፤ 1 ጽሞ. 5:18

8 "አይ ካታማነ ህንተንቱ ገልያ ዎደ፥ አሳይ ህንተና ሞክ አኪደ ምዛናዉ ሺሾዋ አያነ ሚተ። 9 ሄ ካታማትን ደእያ ሀርጋንቻቱዋ ፓደ አሳዉ፥ ‘ጾሳ ካዉተይ ህንተኮ ማቴዳ’*10:9 ጾሳ ካዉተይ ህንተኮ ማቴዳ፦ ሀዋ ጉሳይ፥ "ጾሳ ካዉተይ ሀዋን ዎይ ህንተንቱ ግዶን ደኤ" ጉሳ። ያጊደ ኦድተ። 10 የዉዋን ቃይ አይ ካታማነ ገሎደ፥ አሳይ ህንተንታ ሞክ አከናዋንታ ግዶፐ ሄ ካታማ ቃአኮ ከስኔ፥ 11 ‘ኑን ህንተና ዬላያናዉ፥ ሀራይ አቶ ኑ ገድያ ቦላን ደእያ ህንተንቱ ካታማ ባናካ ህንተንቶ ቆቆፌቶ*10:11 ባናካ ህንተንቶ ቆቆፌቶ፦ ሀዋ ጉሳይ፥ እጹዋ በስያዋ።፤ የዉዋን ቃይ፥ ጾሳ ካዉተይ ህንተንቱኮ ማቴዳዋ ኤርተ’ ያግተ።✝10:11 ኪታ 13:51 12 ፕርዳ ጋላስ ሀ ካታማትፐ ሶዶማ ካታማ ጋኬዳ ሙራይ ካዉሻናዋ ያጋደ ታን ህንተዉ ኦዳይ።✝10:12 ዶመ 19:24-28፤ ማቶሳ 10:15፤ 11:24

አማነናን እጼዳ ካታማቱዋ

13 "አየ ነዉ ኮራዚነ፤ አየ ነዉ ቤተሳይደ፤ ህንተንቱን ሀኔዳ ማላታቱ ጺሮሳ ካታማንነ ሲዶና ካታማን ሀኔደንቶ፥ ሄዋን ደእያ አሳቱ ካዩዋ ማዩዋ ማዪደ፥ ብድን ቦላን ኡቲደ፥ በንፐ ባረንቱ ናጋራፐ ስማናዋንታሽን። 14 ሀዋ ድራዉ፥ ሙረትያ ጋላስ ህንተንቱፐ አደ ጺሮሳ ካታማዉነ ሲዶና ካታማዉ ሙራይ ካዉሻናዋ። 15 ሀነ ቅፍርናሆመ፥ ኔን ሳሉዋ ፑደ ቁ ጋናዉ ኮያድ? ዱገ ስኦልያ ዎናሳ።✝10:15 ኢሳ. 14:13-15

16 "ህንተንቱ ግያዋ ስስያ አሳይ፥ ታን ግያዋ ስሴ፤ ህንተንታ እጽያ ኡራይ ታና እጼ፤ ታና እጽያ ኡራይ ታና ኪቴዳዋካ እጼ" ያጌዳ።✝10:16 ማቶሳ 10:40፤ ማር. 9:37፤ ሉቃሳ 9:48፤ ዮሃ. 13:20

አ ካልያዋንቱ ኪተቴዳሳፐ ስሜድኖ

17 ላፑን ታሙ አሳቱካ፥ "ጎዳዉ፥ ኢታ አያናቱካ ነ ሱንን ኑዉ አዛዘቴድኖ" ያጊደ ናሸቻን ስሜድኖ።

18 የሱስካ ኡንቱንቶ፥ "ሴጻናይ ዋልቃንዳን ሳሉዋፐ ዎሽን በኣድ። 19 ስም ሾሻነ ሶጉዋ የናዳን ህንተንቱ ሞርክያ ጻላህያ ዎልቃ ጾናና ማላ ማታ እማድ። ህንተንታ ቆሀናዌ አይኔካ ደኤና። 20 ግዶፐ አትን ህንተንቱ ሱንይ ሳሉዋ ማዝጎብያን ጻፈቶ ድራዉ፥ ናሸትተፐ አትን ኢታ አያናቱ አዛዘቶ ድራዉ ናሸቶፕተ" ያጌዳ።

የሱስ ባረ ናሸቻ ቆንጭሴዳ

21 ሄ ዎድያን የሱስ አያና ጌሻን ዳሮ ናሸቲደ፥ "ሳሉዋነ ሳኣ ጎዳዉ፥ ኔን ሀ የዉዋ ታማሮዋንቱፐነ አ ኤራንቻቱዋፐ ገንደ፥ ቄር ናናዉ ቆንጭሶ ድራዉ፥ ኔና ጋላታይ፤ ኤ፥ ታ አቦ፥ አያዉ ጎፐ፥ ሀዋ ኦናዉ ነ ሎኦ ሸነ ግዴዳ።

22 "ኡባ የዉ ታዉ ታ አቡፐ እመቴዳ። ናአይ ኦነንቶ አዉዋፐ አትሽን ኦንነ ኤርያዌ ባዋ፤ ሄዋዳንካ አዉ ኦነንቶ ናኣፐነ እ ቆንጭሳናዉ ኮዮ ኡራፐ አትን፥ ሀራይ ኦንነ ኤርያዌ ባዋ" ያጌዳ።

23 ካሊደካ የሱስ ባረና ካልያዋንቱኮ ስም ዎደ፥ ኡንቱንቱ ጻላላ፥ "ህንተንቱ በእያዋ ጼልያ አይፋቱ አንጀቴዳዋንታ። 24 ታ ህንተዉ ኦድያዌ አዬ ጎፐ፥ ጮራ ናባቱነ ካታቱ ህንተንቱ በእያዋ በአናዉ አሞቴድኖሽን በእበይክኖ፤ ህንተንቱ ስስያዋካ ስሳናዉ አሞቴድኖ፤ ሽን ስስበይክኖ" ያጌዳ።

አሳዉ ቃረትያ ሳማርያ ብታንያ

25 እት ጋላስ ህግያ ኤርያዌ እቱ የሱሳ ፓጫናዉ አኮ ዪደ፥ "ታማርስያዎ፥ መና ደኡዋ ላታናዉ፥ ታን አያ ኦ?" ያግ ኦቼዳ።

26 የሱስ ዛሪደ፥ "ሙሴ ህግያ ማጻፋን ጻፈቶዌ አዬ? ኔን አያ ጋደ ብላይ?" ያጌዳ።

27 ብታኒካ፥ "ሙሴ ህግያ ማጻፋይ፥ ‘ጾሳ ነ ጎዳ ፖሎ ነ ዎዛናፐ፥ ፖሎ ነ ሸምፑዋፐ፥ ፖሎ ነ ዎልቃፐነ ፖሎ ነ ቆፋፐ ሲቃ፤ ሄዋዳንካ ነ ላገካ ነ ሁጲያዳን ዶሳ’ ጌ" ያጌዳ።✝10:27 ዎጋ 19:18፤ ዛረ. 6:5

28 የሱስ አ፥ "ልከ፥ ቱሙዋ ጋዳ፤ ስም ኔንካ ሀዋ ኦ፤ ደኡዋን ደአናሳ" ያጌዳ።

29 ሙሴ ህግያ ታማርስያ ብታኒ ቃይ ባረና ጽሎ ኦናዉ ኮዪደ የሱሳ፥ "ሀኖሽን፥ ታ ላገይ ኦኔ?" ያጊደ ኦቼዳ።

30 የሱስ ዛሪደ፥ "እት ብታኒ የሩሳላመፐ እያርኮ ቢደ ደእሽን፥ ኦግያ ቦላን ፓናቱ አ ደሚደ፥ አ ማዩዋ ቃሮዋፐ ጉየ ሾጪደ፥ ሀይቃናዉ ፖሉ ጎደ ኦሊደ ቤድኖ። 31 ቆፐናን እት ቄሳይ ሄ ኦግያና ብደእያዌ፥ ሾጨቲደ ኩንዴዳ ብታንያ በኤዳ ዎደ፥ አያነ ኦናን ምይያና አደ ቤዳ። 32 ሄዋዳንካ እት ሌዊ ሄ ኦግያና ብደኤ። እካ ብታንያ በኢደ፥ ምየት አዳ። 33 ሽን ሳማርያ አሳ ግዴዳ እት ብታኒ፥ ሄ ባጋና አደ፥ ሀ ብታንያኮ ዬዳ። አ በኤዳ ዎደ አዉ ቃረቴዳ።✝10:33፣ 34 2 ኦዱዋ 28:15 34 አኮካ ሺቂደ፥ ዛይትያነ ዎይንያ ኤሳ*10:34 ዛይትያነ ዎይንያ ኤሳ፦ ኦራ ጫቁዋ ዎድያን ሀዋንቱ ልያዋንታ ጌተቲደ አከቲኖ። ኡባ ሀዋን ጻፈቴዳ ዛይቲ፥ ኦራ ልያ ማላታ ጌተቴ። ያይ። 5:14 ጼልተ። አ ማይን ትጊደ፥ ቃቼዳ። ሄዋፐ ጉየ ባረ ሀርያ ቶግሲደ፥ እማይ አቅያ ጎልያ አክ ቤዳ፤ ሄዋን ብዪደ ናጌዳ። 35 ዎንተ ጋላስ ጉ ብራ ባረ ኪስያፐ ከሲደ፥ እማይ አቅያ ጎልያ ጎዳዉ እሚደ፥ ‘ሀ ብታንያ ታዉ ሎይ ብያ፤ ሀዋፐ ዳሩዋ ኔን ከሶፐካ፥ ታን ስምያ ዎደ ነዉ ጭጋና’ ያጌዳ።

36 "ስም ሀ ሄዙ አሳቱዋፐ፥ ፓናቱዋ ኩሽያን ሾጨቲደ ኩንዴዳ ብታነዉ፥ ላገ ግዴዳዌ ሀቃዋ ማላቲ?" ያጌዳ።

37 ህግያ ታማርስያዌካ፥ "ሄ አዉ ቃረቶዋ" ያጌዳ።

የሱስካ አ፥ "ስም ባደ ኔንካ ሄዋዳን ኦ" ያጌዳ።

የሱስ ማርትነ ማይራም ሶይ ቤዳ

38 የሱስ ባረና ካልያዋንቱና ኦግያ ቢደ፥ እት ሄራ ጋርሳ ጋኬዳ። ሄዋን ማርቶ ጌተትያ እት ምሽራታ ባረ ጎለን ሞካዱ።✝10:38፣ 39 ዮሃ. 11:1 39 እዝዉካ ማይራሞ ጌተትያ ምቻታ ደአዉ፤ ሄናካ የሱሳ ገድያ ማታን ኡታደ፥ እ ኦድያዋ ሀይዛደ ደአዉ። 40 ማርታ ቃይ ሶይባ ጊግሳደ ዳቡራ ደአዉ፤ ሄዋ ድራዉ የሱሳኮ ሺቃደ፥ "ሀና ታ ምቻታ፥ ኪታ ኡባ ታ ቦላ ኦልና፥ ታን ታረካ ላባኖደ ጼላደ ጮኡ ጋይ? ሀያና ታና ማዳናዳን እዝዉ ኦዳ" ያጋዱ።

41 የሱስካ ዛሪደ እዞ፥ "ማርቴ፥ ማርቴ፥ ኔን ጮራ የዉዋ ቆፓደ ህርጋ፤ ቃይካ መቶታ። 42 ሽን ኮሽያዌ እትባ፤ ማይራማ ባረፐ ኦንነ አከና ሎኦባ ዶራዱ" ያጌዳ።