1 የሱስ ባረና ካልያዋንታ፥ "አሳ ባለያዌ ዬናን አተና፤ ሽን ባለያዋ አህያ ኡራዉ አዉ አየ፤ 2 ሄ ብታኒ ሀ ጉቱዋፐ እቱዋ ባለያዋፐ፥ ጋጭያ ዎጻ ባረ ቆያን ቃሸቲደ አባን ምተትያዌ አዉ ሎአ። 3 ህንተ ሁጰዉ ናገትተ።

"ነ እሻይ ኔና ናቆፐ፥ አ ዞራ። ቃይ ናጋራፐ እ ስሞፐ፥ አዉ አቶ ያጋ። 4 እት ጋላስ እ ኔና ላፑ ገደ ናቂደ፥ ላፑ ገደካ፥ ‘ኔና ታ ናቃድ፥ ታና ማራ’ ጊደ ኔኮ ዮፐ፥ አዉ አቶ ጋ" ያጌዳ።

5 ኪተቴዳዋንቱካ ጎዳ፥ "ኑዉ አማኑዋ ጉጃ" ያጊደ ኦቼድኖ።

6 ጎዳይካ፥ "ህንተዉ ሳናፍጭያ አይፍያ ኬና አማኑ ደእንቶ፥ ህንተንቱ ሀ ቦእያ፥ ‘ሀዋፐ ሾደታደ፥ አባን ቶከታ’ ግንቶ ህንተዉ ኤኖ ጋና" ያጌዳ።

7 ቃይካ የሱስ፥ "ህንተፐ ጎሽያዌ ዎይ ምያ ሄምያ ቆማይ ደእያ አሳይ ሀቀት ደኦፐ፥ ጎሻ ጋደፐ ዎይ ምያ ጋደፐ ስሞ ዎደ ኤለካ፥ ‘ሃያ ሸምፓ አካ፥ ቁማ ማናዉ ኡታ’ ያግያዌ ኦኔ? 8 የዉዋን ቃይ፥ ‘ታ ማና ካዉዋ ጊግሳ፤ ታ ማናነ ኡሻና ጋካናዉ ምናደ ታና ኤቃደ ምዛ። ሄዋፐ ጉየ ነዉ ማ፥ ኡሻ’ ያግያዋ ግደኔ? 9 ሄ ቆማይ ኪተቴዳባ ኦዳ ድራዉ፥ ሄ ብታኒ ጋላታናዉ በሰኔ? 10 ሄዋዳንካ ህንተ ቃይ አሳይ ህንተና ኪቶ ኦሱዋ ኦዳ ዎደ፥ ‘ኑን ማደና ቆማቱዋ፤ ኑ ኦሶ ጻላላ ኦዶ’ ያግተ" ያጌዳ።

11 የሱስ የሩሳላመ ቢደ፥ ጋሊላፐነ ሳማርያ ግያ ጋዳቱዋፐ ግዱዋና አዳ። 12 እ እት ጉ ካታማቶ ገልያ ዎድያን፥ ሃኩዋን ኤቄዳ ታሙ ኦሉዋን ኦይቀቴዳዋንቱ አ በኤድኖ። ኡንቱንቱካ ሃኩዋን ኤቂደ፥ 13 ባረንቱ ኮሻ ቁ ኦደ፥ "የሱሳ፥ ጎዳዉ፥ ሀያ ጎዶ ኑና ፓርኪ!" ያጌድኖ።

14 የሱስ ኡንቱንታ በኢደ፥ "ቢደ፥ ህንተንቱ ቦላ ቄሳቱዋ በስተ" ያጌዳ።

ኡንቱንቱካ ቄሳቱዋኮ ብደኢደ ኦሉዋፐ ፓጼድኖ።✝17:14 ዎጋ 14:1-32

15 ኡንቱንቱፐ እቱ ባረ ሀርግያፐ ፓጼዳዋ በኢደ፥ ባረ ኮሻ ቁ ኦደ፥ ጾሳ ቦንቺደ ስሜዳ። 16 ጋላቲደካ የሱሳ ገድያ ማታን ጉልባቴዳ። ሄ ብታኒ ሳማርያ አሳ።

17 የሱስ ዛሪደ፥ "ታሙ ፓጽበይክኖ? ያትና ኡዱፑናቱ ሀቃን ደኢኖ? 18 አይሁዳ አሳ ግደና ሳማርያ ብታንያፐ አትን፥ ጾሳ ቦንቻናዉ ስሜዳዋንቱ ባዋ ጉሴ?" ያጌዳ። 19 የሱስ አ፥ "ደንዳ ባ፤ ነ አማኑ ኔና ፓዳ" ያጌዳ።

20 ፓርሳዋቱ እት ጋላስ፥ "ጾሳ ካዉተይ አዉደ ያኔ?" ጊደ ኦችና የሱስ፥ "ጾሳ ካዉተይ ህንተንቱ ናግያ ኦግያን ዬና" ያግ ዛሬዳ። 21 ቃይካ፥ "ኦንነ፥ ‘ጾሳ ካዉተይ ሀዋን ደኤ’፥ ዎይ ‘ሄዋን ደኤ’ ጋናዉ ዳንዳየና፤ ጾሳ ካዉተይ ህንተንቱ ዎዛና ግዶን ደኤ" ያጌዳ።

22 የሱስ ባረና ካልያዋንቶ ኦዲደ፥ "አሳ ናአይ ቆንጭያ ጋላሳቱዋፐ እቱዋ በአናዉ ህንተንቱ አሞትያ ዎዲ ያና፤ ሽን በእክታ። 23 ቃይ ኡንቱንቱ ህንተና፥ ‘ሀዌኩ ሀዋና’ ዎይ ‘ሄዋና’ ያጋናዋንታ። ሽን ኡንቱንታ ካሊደ፥ ኡንቱንቱና ቦፕተ። 24 ዋልቃንይ ሳሉዋን ዎልቃምያ ዎደ፥ ሀ ጋጻፐ ህን ጋጻ ፖኡ ፖእያዋዳን፥ አሳ ናኣ ዩሳይካ ሄዋዳን ሀናናዋ። 25 ሽን ኮይሮቲደ አሳ ናአይ ዳሮ መቱዋ መቶታናዉነ ሄ ዎድያን ደእያ የለታን እጸታናዉ በሴ።

26 "ኖሄ ዎድያን ሀኖዋዳንካ፥ አሳ ናአይ ቆንጭያ ጋላሳንካ ሄዋዳን ሀናናዋ።✝17:26 ዶመ 6:5-8 27 ኖሄ ማርካብያ ገሎ ጋላሳይ ጋካናዉ ኡንቱንቱ፥ ሚድነ ኡሺደ፥ አኪድነ አከቲደ ደእሽን፥ ባሻ ሃይ ዪደ ኡባ አሳካ ባይዜዳ።✝17:27 ዶመ 7:6-24

28 "ሄዋዳንካ፥ ሎጸ*17:28 ኖሄ፥ ሎጸ፦ ጾሳይ ቢታ ባሻ ሃን ባይዜዳ ዎደ፥ እ ኖሀነ አ ጎለ አሳ አሼዳ። ጾሳይ ሶዶማነ ጋሞራ ካታማቱዋ፥ እዝን ደእያ ኢታ አሳቱዋ ኡባ ታማን ባይዜዳ ዎደ፥ ሎጻነ አ ጎለ አሳ አሼዳ (ዶመ 19:1-29 ጼልተ)። ዎድያን፥ አሳይ ሚድነ ኡሺደ፥ ዛልኢደ፥ ቶኪድነ ጎልያ ኬጺደ ደኤድኖ። 29 ሽን ሎጸ፥ ሶዶማፐ ከሶ ጋላሳን ቃይ ሳሉዋፐ ታማይነ ኤጽያ ቦንቆ ሹቻይ ቡኬዳ፤ ኡባባካ ሚደ ዉርሴዳ።✝17:29 ዶመ 18:20—19:25

30 "አሳ ናአይ ቆንጭያ ጋላሳንካ ሀዋዳን ሀናናዋ። 31 ሄ ጋላሳን፥ ጎልያ ሁጲያን ደእያዌ፥ ጎለ ጋርሳን ደእያ ሚሻ አካናዉ ዎፖ፤ ሀዋዳንካ ጎሻ ጋደን ደእያዌ፥ ጉየ ስሞፖ።✝17:31 ማቶሳ 24:17፣ 18፤ ማር. 13:15፣ 16 32 አነ ሎጸ ማቻትባ ቆፕተ!✝17:32 ዶመ 19:26 33 ባረ ሸምፑዋ አሻናዉ ኮይያ ኡባይ፥ ባይዜ፤ ባረ ሸምፑዋ ባይዝያ ኡባይ፥ ደኡዋን ናጌ።✝17:33 ማቶሳ 10:39፤ 16:25፤ ማር. 8:35፤ ሉቃሳ 9:24፤ ዮሃ. 12:25 34 ታ ህንተዉ ኦድያዌ አዬ ጎፐ፥ ሄ ቃማን ላኡ አሳቱ እት ግሱዋን ግሳናዋንታ፤ ኡንቱንቱፐ እቱ አከትና ላኤንያዌ አታናዋ። 35 ላኡ ማጫ አሳቱ እት ዎጻን ጋጫናዋንታ፤ እትና አከትና፥ እትና አታናዉኑ። 36 ላኡ አሳቱ ጎሻ ጋርሳን ደኢኖ፤ እቱ አከታናዋ፥ ላኤንያዌ አታናዋ" ያጌዳ።✝17:36 ማቶሳ 24:40

37 አ ካልያዋንቱ የሱሳ፥ "ጎዳዉ፥ ሄዌ ሀቃን ሀናናዌ?" ያጌድኖ።

እካ ዛሪደ፥ "ባኩታይ ደኢያሳ ሾርቲ ሺቃናዋ" ያጌዳ።