1 የሱስ ባረና ካልያዉንቶ፥ ሳለተናን ኡባ ጋላስ ዎሳናዳን ሌምሱዋን ኦዴዳ። 2 እካ፥ "እት ካታማን ጾሳዉ ያየናዌ፥ አሳካ ቦንቼና እት ዳናይ ደኤ። 3 ሄ ካታማን አምኤ ምሽራታ ደአዉ። እዛካ ሄ ዳናኮ ያደ፥ ‘ታ ሞርከዉነ ታዉ ደእያ የዉዋ ፕርዳ’ ያጋዱ።

4 "ዳሮ ዎድያን እዝዉ ፕርደናን እጼዳ። ሽን ባረ ዎዛናን ቆፒደ፥ ‘ታን፥ ኡባ ጾሳዉ ያያና ዮፐካ፥ አሳካ ቃይ ቦንቻና ዮፐ፥ 5 ሀ አምኤ ምሽራታ ታና ላባንያ ድራዉነ ኡባ ዎደ ታኮ ያደ ታና ዳቡርሰና ማላ፥ ታን እዝዉ ፕርዳና’ ጌዳ።

6 "ሄ ማካላንቻ ዳናይ ጎዋ አኬክተ። 7 ጾሳይ ጋላስነ ቃማ ባረንታ ማዳና ማላ፥ ዳንዳያን አኮ ዋስያ ዶረታዋንቶ ፕርደኔየ? እ ኡንቱንቶ ኤለካ ዛረኔ? 8 ታን ህንተንቶ ያጋይ፤ ኡንቱንቶ ኤሌል ፕርዳና፤ ሽን አሳ ናአይ ይያ ዎደ ሀ ቢታን አማኑዋ ደማኔሻ?" ያጌዳ።

9 ባረንታ ጌሻ ጊደ አማነትያዋንቶነ ሀራ ኡባ ዳሪ ካያዋንቶ፥ የሱስ ሀ ሌምሱዋ ኦዴዳ: 10 "ላኡ አሳቱ ዎሳናዉ ጌሻ ጎልያ*18:10 ዎሳናዉ ጌሻ ጎልያ፦ አይሁዳ አሳይ ኡባ ዎደ ጌሻ ጎልያን ዎንታ ጉራንነ ጋላሳ ዎስኖ። ገሌድኖ። ሄዋንቱፐ እቱ ፓርሳዊያ፤ እቱ ቃይ ቃራጻ ቃንጽያዋ። 11 ፓርሳዊ ደንድ ኤቂደ ባረ ዎዛናን ዎሲደ፥ ‘ጾሳዉ፥ ታን ሀራ አሳዳን: ቦንቂያዋንቱዳን፥ ማካልያዋንቱዳን፥ ዎሹምያዋንቱዳን፥ ዎይ ሀዋዳን ቃራጻ ሺሸና ድራዉ ኔና ጋላታይ። 12 ሳምንታን ላኡ ካላ ጾማይ፤ ታን ደምያ ኡባፐ ታሙ ኩሽያፐ እቱዋ እማይ’ ያጌዳ።

13 "ሽን ቃራጽያ ብታኒ ሃኩዋን ኤቂደ፥ ባረ አይፍያን ፑደ ሳሉዋ ቁ ጊደ ጼላናዉካ ኮይቤና። ሽን ባረ ትራ ባቂደ፥ ‘ጾሳዉ፥ ታን ናጋራንቻ፤ ታና ማራ’ ያጌዳ። 14 ታን ህንተንቶ ኦድያዌ አዬ ጎፐ፥ ካሰ ብታንያፐ አደ ሀ ብታኒ ጽሎ ግዲደ ባረ ጎለ ስሜዳ፤ ባረና ቁ ኦያ ኡባይ ካዉሻና፤ ባረና ቃይ ካዉሽስያ ኡራይ ቁ ጋና" ያጌዳ።

15 የሱስ ባረ ኩሽያ ዎደ አንጃና ማላ አሳይ ጉ ናና አኪደ አኮ ዬድኖ። አ ካልያዋንቱካ በኢደ፥ አሳ አሄና ማላ ጌድኖ። 16 የሱስ ቃይ ጉ ናና ባረኮ ጼሲደ፥ "ጉ ናናይ ታኮ ያና ማላ አግተ፥ ድጎፕተ፤ ጾሳ ካዉተይ ሀዋንቱ ማላሳ። 17 ታን ህንተንቶ ቱሙዋ ኦዳይ፤ ጾሳ ካዉተ ጉ ናኣዳን አከናዋንቱ ኡባይ ሄ ካዉተ ሙለካ ገለና" ያጌዳ።

18 ይሁዳ ቢታ ሞድያዋንቱፐ እቱ፥ "ሎኦ ታማርስያዎ፥ ታን መና ደኡዋ ላታናዉ አያ ኦናዉ በሲ?" ያጊደ የሱሳ ኦቼዳ። 19 የሱስካ አዉ፥ "አያዉ ታና ሎኦ፥ ያጋይ? እት ጾሳፐ አትን፥ ሎኡ ኦንነ ባዋ፤ 20 ጾሳ አዛዛቱዋ፥ ‘ዎሹሞፓ፥ ዎፓ፥ ዉኦፓ፥ ዎርዱዋ ማርካቶፓ፥ ነ አባነ ነ ዳዮ ቦንቻ ያግያዋ ኤራ’ " ያጊደ ዛሬዳ። 21 ብታኒ ዛሪደ፥ "ሀዋ ኡባ፥ ናአተፐ ዶማደ ናጋድ" ያጌዳ።

22 የሱስካ ሀዋ ስሲደ፥ "እትባይ ኔን ብሮን ኦናን አቶዌ ደኤ፤ ሄዌኔካ፥ ነዉ ደእያዋ ኡባ ዛልኣደ ማንቃቶ እማ፤ ሀዋ ኦፐ ሳሉዋንካ ኔን ዱረታና፤ ሄዋፐ ጉየ ታ ጌዱዋ ካላ" ያጌዳ። 23 ሄ ብታኒ ቃይ ሄዋ ስሲደ ዳሮ ዱረ ግዶ ድራዉ ዳሮ ካዮቴዳ።

24 የሱስካ ሀ ብታኒ ዳሮ ካዮቶዋ በኢደ፥ "ዱረ አሳይ ጾሳ ካዉተ ገላናዉ ዎት መታንዴሻ! 25 ዱረ አሳይ ጾሳ ካዉተ ገላናዋፐ ጋሉ ማርፕያ ጾእያና አናዌ ማታቴ" ያጌዳ። 26 ሄዋ ስሴዳ አሳይ፥ "ስም ኦን አታናዉ ዳንዳዪ?" ያጌድኖ።

27 እካ ቃይ ዛሪደ፥ "አሳዉ ዳንዳየተናዌ ጾሳዉ ዳንዳየቴ" ያጌዳ። 28 ጰጽሮስ ዛሪደ፥ "ስም ኑን ኑዉ ደእያ ኡባ አጊደ ኔና ካሌዶ" ያጌዳ። 29 እካ፥ "ቱሙዋ ጋይ፥ ጾሳ ካዉተ ድራዉ ባረ ጎልያ፥ ዎይ ባረና የላዋንታ፥ ዎይ ባረ ማችያ፥ ዎይ ባረ ናና፥ ዎይ እሻቱዋ አጌዳዌ፥ 30 ሀ ዎድያን ዳሮ ዳኩዋ፥ ስን ይያ ካዉተንካ መና ደኡዋ አከናዌ ኦንነ ባዋ" ያጌዳ።

31 የሱስካ ታማነ ላኡ ባረና ካልያዋንታ ባረኮ ጼሲደ፥ "ስም የሩሳላመ ባና፤ አሳ ናኣባይካ ናባቱ ማጻፋን ጻፈቴዳባይ ኡባይ ያን ፖለታና። 32 አይሁደ ግደናዋንቶ አ አ እማና፥ ቅሊጫና፥ ዳሮ መቶና፥ አ ቦላን ጩቻና፤ 33 ሾጮዋፐ ጉይያን ዎና፥ ሄዘንያ ጋላስ እ ደንዳና" ያጌዳ።

34 ኡንቱንቱካ ሀ የዉዋፐ አያነ አኬክበይክኖ፤ ሀይቁካ ኡንቱንቶ አኬከትቤና ድራዉ እ ሃሳዮባካ ኤርበይክኖ። 35 የሱስ እያርኮኮ ማቴዳ ዎድያን፥ እት ቆቃ ብታኒ ዎሲደ ኦግያ ጋጻን ኡቴዳ። 36 ጮራ አሳይ አያዋ ስሲደ፥ "ሀዌ አዬሻ?" ያግ ኦቼዳ። 37 አሳይካ አዉ፥ "ናዝሬትያ የሱስ ሀዋና አ ደኤ" ያግ ዛሬድኖ።

38 እካ፥ "ዳዊተ ናኣ የሱሳ፥ ታና ማራርኪ" ጊደ ዋሴዳ። 39 አፐ ስንና ቢደ ደእያዋንቱካ፥ ጮኡ ጋናዳን ሀንቀቴድኖ። እ ቃይ፥ "ዳዊተ ናአዉ፥ ታና ማራርኪ" ጊደ ዳሪ ዋሴዳ።

40 የሱስካ ኤቂደ፥ ባረኮ አሀናዳን አሳዉ ኦዴዳ። 41 የሱሳኮ እ ጼቱዋ ዎድያን፥ የሱስ፥ "ታን ነዉ አያ ኦናዳን ኮያይ?" ያጊደ አ ኦቼዳ።

እካ ዛሪደ፥ "ጎዳዉ፥ ጼላናዉ ኮያይ" ጌዳ።

42 የሱስካ፥ "ጼላ፥ ነ አማኑ ኔና ፓዳ" ያጌዳ። 43 ሄ ዎድያንካ ጼል አጌዳ፤ ጾሳካ ቦንቺደ አ ጌዱዋ ካሌዳ።

አሳይ ኡባይ ብታንያ ጼሊደ፥ ጾሳ ጋላቴድኖ።