1 የሱስካ ሀዋ ኡባ አሳ ስንን ሃሳይ ዉርሶዋፐ ጉይያን ህን ቅፍርናሆማ ቤዳ። 2 ሄዋንካ እት ጼቱዋ ካፑ ደኤ። እ ዳሮፐ ዶስያ አ ቆማይ ሀርጊደ ሀያናዉ ማቴዳ። 3 እካ የሱሳባ ስሴዳ ዎደ፥ ባረ ቆማ ዎሲደ ፓና ማላ ይሁዳ ጭማቱዋ ህን አኮ ኪቴዳ።

4 ኡንቱንቱካ የሱሳኮ ዪደ፥ "ሀ ብታኒ፥ ኔን አ ማዳናዳን ዳሮፐ ኮዬዳ፤ 5 ጋሱካ ኑ አሳ እ ዳሮፐ ዶሲደ አይሁዳቱዋ ዎስያ ጎልያ ኬጽሶዌካ አ" ያጊደ ዳሮፐ ዎሴድኖ።

6 የሱስካ ኡንቱንቱና እትፐ ቤዳ። እካ ህን ጎልያ ሄራ ጋኬዳ ዎደ ጼቱዋ ካፑ ባረ ላገቱዋ ባረኮ ጼሲደ፥ "ታ ጎዳዉ፥ ዳቡሮፓ፤ አያዉ ጎፐ፥ ኔና ታ ጎልያ ካራፐ ጋርሳ ባጋና ገልሳናዉ ታዉ በሰና። 7 ሀዋ ድራዉ ነ ስንን ኤቃናዉካ ሀራይ አቶ በስያዋ ግድከ። ሽን ኔን ቃላ ጻላላ ኦዳ፤ ታ ቆማይካ ፓጻናዋ። 8 ታን ታፐ ቦላና ማታይ ደእያዋንቶ ኤኖ ጋደ ደእያ አሳ። ታፐ ጋርሳናካ ታን ኪትስያ ዎታዳራቱ ደኢኖ። እቱዋ፥ ‘ባ’ ያግያ ዎደ፥ ቤ፤ ሀራካ ቃይ፥ ‘ሃያ’ ጎፐ ዬ። ታ ቆማይካ፥ ሀዋ ‘ኦ’ ግያ ዎደ አዛዘቴ፤ ኦ" ያጌዳ።

9 የሱስካ ሀዋ ስሲደ አ የዉዋን ማላለቴዳ፤ ጉየ ስሚደ አ ካልያ ዳሮ አሳ፥ "ታን ህንተንቶ ቱሙዋ ጋይ፤ ታን ሀዋ ማላ አማኑዋ ሀራይ አቶ፥ እስራኤልያ ጋርሳንካ በአበይከ" ያጌዳ። 10 ካሰ ኪተቴዳ አሳቱካ ጼቱዋ ካፑዋ ጎለ ጉየ ስምያ ዎደ፥ አ ቆማይ ፓጾዋ በኤድኖ።

11 ዎንትሳ ጋላስ የሱስ ባረና ካልያዋንቱናነ ጮራ አሳና እትፐ ናይኖ ጌተትያ ካታማቶ ቤድኖ። 12 የሱስ ካታማ ጋካና ጼቱዋ ዎደ፥ አሳይ ሀይቄዳ አሃ ቶኪደ ከሴድኖ። ሀይቆዌካ ባረ ዳይዉ መጽ እት ናኣ፤ አታካ አስናይ ባይና አምአቶ። ዳሮ ካታማ አሳይካ እዞ ካሌድኖ።

13 የሱስካ እዞ በኤዳ ዎደ ቃረቲደ፥ "ዬኮፓ!" ያጌዳ። 14 ሺቂደ ሻንቻማ ቦቼዳ፤ ቶኮዋንቱካ ኤቄድኖ። የሱስ፥ "ኔኖ ያላጋዉ፥ ደንዳ ጋይ!" ያግና፥ 15 ብታኒ ሱር ኡቴዳ። ሃሳያካ ዶሜዳ። የሱስካ አ፥ አ ዳይዉ እሜዳ።

16 ኡባይካ ያሻን ኩሚደ፥ "ዎልቃማ ናቢ ኑ ጋርሳን ደንዴዳ፤ ጾሳይካ ባረ አሳ አሻናዉ ዬዳ!" ያጊደ ጾሳ ጋላቴድኖ። 17 ሄዌኔካ የሱሳ ዋሪ ይሁዳ ዩሹዋን ደእያ ጋድያ ኡባን ስሰቴዳ።

18 ዮሃንሳ ካልያዋንቱ ሀኖዋ ኡባ አዉ ኦዴድኖ። ዮሃንስካ ባረና ካልያዋንቱፐ ላአቱዋ ጼሲደ፥ 19 "ያናዌ ኔኔየ? ዎይ ኑን ሀራ ናጋኔ?" ያግ፥ ኡንቱንቱ ኦቻና ማላ ህን የሱሳኮ ኪቴዳ።

20 አሳቱካ የሱሳኮ ዪደ፥ "ጻማቅያ ዮሃንስ፥ ያና ጌተቴዳዌ ኔኔየ? ዎይ ሀራ ናጋኔ? ያጊደ ኦቻና ማላ ኔኮ ኪቴዳ" ያጌድኖ።

21 ሄ ዎድያን የሱስ ጮራ አሳ ዱማ ዱማ ሀርግያፐ ፓዳ፤ ቱና አያናቱዋካ አሳፐ ከሴዳ፤ ጮራ ቆቃቱዋ አይፍያ ዶዬዳ። 22 የሱስካ ዮሃንስ ኪቶዋንቶ፥ "ቢደ ህንተንቱ በኤዳዋነ ስሴዳዋ ዮሃንሳዉ ኦድተ፤ ቆቃቱ ጼላናዋንታ፤ ጉንዳቱ ሀመታናዋንታ፤ ኦሉ ኦይቆዋንቱ ጌያናዋንታ፤ ቱሌዳዋንቱ ስሳናዋንታ፤ ሀይቄዳዋንቱ ደንዳናዋንታ፤ ህዬሳቶካ ምሽራቹዋ ቃላይ ኦደታናዋ። 23 ታናን በተና አሳይ ኡባይ አንጀቴዳዋንታ" ያጌዳ።

24 ዮሃንስ ኪቴዳዋንቱ ብድጎዋፐ ጉይያን የሱስ አሳዉ ዮሃንሳባ ኦዱዋ ዶሜዳ: "አያ በአናዉ ቢታ ባዙዋ ከሴድቴ? ጫርኩ ቃያ ኡሱን? 25 ዎይ አያ በአናዉ ከሴድቴ? ሎኦ ማዩዋ ማዬዳ አሳ ደኡዋ? ሎኦ ማዩዋ ማዬዳዋንቱነ ባረና ጊግስያዋንቱ ካትያ ጎለን ደኢኖ። 26 ዎይ አያ በአናዉ ከሴድቴ? ናብያ በአናዉ ከሴድቴ? ኤ፤ ታን ህንተንቶ ያጋይ፤ ህንተንቱ በአናዉ ከሶዌ ናብያፐካ አዋ። 27 ጾሳ ማጻፋን፥ ‘ነ ኦግያ ኔፐ ስንና ጊግስያ ኪታንቻ ኔፐ ስንያደ ኪታና’ ጌተት ዮሃንሳባይ ጻፈቴዳዌ ሀዋ። 28 ማጫዋንቱፐ የለቴዳዋንቱ ጋርሳን ጻማቅያ ዮሃንሳፐ አያ ኦንነ ባዋ። ጾሳ ካዉተን ቃይ ኡባፐ ላፋ ጌተትያዌካ አፐ አናዋ" ያጌዳ።

29 ሀራይ አቶ ሽን ቃራጻ ከስያዋንቱ አተናን ሀዋ የሱስ ሃሳዮዋ ስሴዳ ኡባይ ዮሃንሳ ኩሽያን ጻማቀቶዋንቱ ጾሳዉ በስያ ቦንቹዋ እሜድኖ።✝7:29፣ 30 ማቶሳ 21:32፤ ሉቃሳ 3:12 30 ሽን ህግያ ታማርስያዋንቱነ ፓርሳዋቱ ዮሃንሳን ጻማቀትቤና ድራዉ፥ ጾሳይ ኡንቱንቶ ቆፔዳዋ እጼድኖ።

31 የሱስ፥ "ስም ታን ሀ ዎድያ አሳ አያና ሌምሶ? ኡንቱንቱ አያ ማላቲኖ? 32 ኡንቱንቱ ገያሳን ኡቲደ እቱ እቱዋ ጼሲደ፥ ‘ሱሱልያ ህንተንቶ ፑንናካ

ካእበይክታ፤

ዬኩዋ የ ከሴዶሽንካ

ዬክበይክታ

ያገትያ ናና ማላቲኖ’ ጌዳ።

33 ጻማቅያ ዮሃንስ ቁማ ሜናን ዎይንያ ኤሳካ ኡሸናን ዪና፥ ‘አ ቦላን ጋሌናይ ደኤ’ ያጌድታ። 34 ታን አሳ ናአይ ማደነ ኡሻደ ዪና፥ ‘ሀዌ ናፍሳማ፤ ዎይንያ ኤሳካ ኡሽያዋ፤ ቃራጽያዋንቶነ ናጋራንቻቶ ዳቡዋ’ ያጊታ። 35 ግዶፐ አትን ጾሳ አ ኤራተይ ባረ ኦሱዋን ቱማ ግዲደ ቤቴዳ" ያጌዳ።

36 ፓርሳዋቱዋፐ እቱ ባረናና ቁማ ማና ማላ ሾቢና፥ የሱስ አ ሶይ ቢደ ማናዉ ኡቴዳ። 37 ሄ ካታማን ናጋራንቻ ጌተቴዳ እት ምሽራታ ደኤዉና፥ የሱስ አ ሶይን ኡቴዳዋ ስሳደ፥ አልባስጽሮሳ ጌተትያ ሹቻፐ ኦሰቴዳ አልባስጽሮሳ ባሬታ ኩሜዳ ሽቱዋ አካ ያዱ። 38 ጉየና አ ገድያ ማታን ኤቃደ፥ ዬካደ አ ገድያካ ባረ አፎን ኦካ ዶማዱ፤ እዝ አፎይ ባይዜዳ አ ገድያካ ባረ ሁጲያ ብናናን ቁጫደነ አ ገድያ የራደ ገድያን ሽቱዋካ ጫጫፋዱ።✝7:38 ማቶሳ 26:7፤ ማር. 14:3፤ ዮሃ. 12:3 39 የሱሳ ባረ ሶይ ጼሴዳ ፓርሳዊካ ሀዋ በኢደ፥ "ሀዌ ናብያ ግዴደንቶ፥ ሀና አ ቦችያ ምሽራታ ኦነንቶነ ቃይካ እዛ ናጋራንቻ ግድያዋ እ ኤራና ሽን" ያጌዳ።

40 የሱስካ ዛሪደ፥ "ስሞና፥ ታን ነዉ ኦድያ የዉ ደኤ" ያግና፥

ስሞንካ፥ "ታማርስያዎ፥ ኦዳ" ያጌዳ።

41 የሱስ፥ "እት ብታንያፐ ሚሻ ታልኤዳ ላኡ አሳቱ ደኢኖ። እቱዋ ማታን እቼሹ ጼቱ ዲናር፥ ቃይ የኩዋ ማታን እሻታሙ ደኤ። 42 ላአቶካ ጭግያዌ ይና፥ ላአቱዋ አጩዋካ ማር አጌዳ። ሀዋንቱፐ ሀቃዌ ሎይ ዶስያዋ ማላቲ?" ያጌዳ።

43 ስሞንካ ዛሪደ፥ "ዳሩዋ አጎዋ ማላቴ" ያጌዳ። የሱስካ፥ "ቱሙዋ ዛራዳ" ያጌዳ።

44 የሱስ ምሽራትኮ ጼሊደ፥ ስሞና ሀዋዳን ያጌዳ፤ "ሀኖ ምሽራቶ በኣዲ? ታን ነ ጎለ ዪና ሀራይ አቶ ሽን ሃካ ታ ገድያዉ እማ በይካ፤ ሽን እዛ ባረ አፎን ታ ገድያ እርጽሳዱ፤ ባረ ሁጲያ ብናናንካ ቁጫዱ። 45 ኔን ታና የራ በይካ፤ ሽን እዛ ታን ገሎደፐ ዶማደ ታ ገድያ የርያዋ አጋ በይኩ። 46 ኔን ታ ሁጲያን ዛይትያ ኦካ በይካ፤ ሽን እዛ ታ ገድያን ሽቱዋ ጫጫፋዱ። 47 ሀዋ ድራዉ ታ ህንተንቶ ኦዳይ: ዳሮፐ እዛ ዶሴዳዋ ድራዉ፥ ዳሮ ናጋራይ እዝዉ ደእያዌ ማረቴዳ፤ ጉይ ማረትያዌ ጉ ዶሴ" ያጌዳ።

48 የሱስ ምሽራቶ፥ "ነ ናጋራይ ቁጨቴዳ" ያጌዳ።

49 የሱሳና እትፐ ቁማ ማናዉ ኡቴዳዋንቱ ባረንቱ ዎዛናን፥ "ናጋራ ማራናዉ ዳንዳይያዌ ሀዌ ኦኔ?" ያጌድኖ።

50 የሱስ ምሽራቶ፥ "ነ አማኑ ኔና አሼዳ፥ ሳሮተን ነ ጎለ ባ" ያጌዳ።