ዎጋ 17

ሱይ ሜተተናዳን ድገቱሳ

1 መና ጎዳይ ሙሳ ሀዋዳን ያጌዳ፤ 2 "አሮናዉ አ አቱማ ናናቶነ እስራኤልያ አሳ ኡባዉ ሀዋዳን ያጋደ ኦዳ፤ ‘መና ጎዳይ አዛዜዳዌ ሀዋ: 3 እስራኤልያ አሳፐ ኦንነ ቦራ ዎይ ዶርሳ ዎይ ዴሻ ዱንካኔዳ ሳኣን ዎይ ዱንካኔዳ ሳኣፐ ጋጻና ሹኪደ፥ 4 መና ጎዳዉ እሞታ ኦደ እማናዉ መና ጎዳ ዱንካንያ ፐንግያ መና ጎዳ ስን አሀና ዮፐ፥ ሄ ሱን እ ኦሸቴ፤ ሄ አሳይ ሱ ጉሴዳ። ሄዋ ድራዉ እ ባረ አሳ ግዶፐ ቦሄቶ። 5 ሄዋ ድራዉ እስራኤልያ አሳይ ባረንቱ ያርሹዋ መህያ ጮ ደምባን ሹክያዋ አጊደ፥ ሃ መና ጎዳኮ፥ መና ጎዳ ዱንካንያ ፐንግያን ደእያ ቄስያኮ አህኖ። ቄሲ ሄዋ አኪደ፥ መና ጎዳዉ እትፐተ ያርሹዋ ኦደ ሹኮ። 6 ቃይ ቄሲ መና ጎዳ ዱንካንያ ፐንግያን ደእያ መና ጎዳዉ ያርሽያ ሳኣ ቦላን ሄ ሱ ጫጫፎ፤ ሀንዳካ መና ጎዳዉ ሳዉዋ ቶሹኩ ግያ ያርሹዋ ኦደ ጹጎ። 7 እስራኤልያ አሳይ ጾሳ ካልያዋ አጊደ ካሌዳ ጻላሄቶ ላኤን ባረንቱ ያርሹዋ ያርሾፕኖ። ሀዌ ኡንቱንቶነ ይያ የለታ ኡባዉ መናዉ ዎጋ ግዶ’ ያጋ።

8 "ኡንቱንታ ሀዋዳን ያጋ፤ ‘እስራኤልያ አሳፐ ግድና ዎይ ኡንቱንቱ ግዶን ደእያ ሀራ ቢታ አሳፐ ግድናካ፥ ኦንነ ጹግያ ያርሹዋ ዎይ ሀራ ያርሹዋ ሺሽያ ዎደ፥ 9 መና ጎዳዉ ያርሻናዉ መና ጎዳ ዱንካንያ ፐንግያ አሀና ዮፐ፥ ሄ አሳይ ባረ አሳ ግዶፐ ቦሄቶ።

10 " ‘እስራኤልያ አሳፐ ዎይ ኡንቱንቱ ግዶን ደእያ ሀራ ቢታ አሳፐ ኦንነ ሱ ሞፐ፥ ሄ ሱ ምያ አሳ ቦላን ታን ታ ዴሙዋ ቱካና፤ ታን ሄ ብታንያ አሳ ግዶን ቦሀና።✝17:10 ዶመ 9:4፤ ዎጋ 7:26-27፤ 19:26፤ ዛረ. 12:16፣ 23፤ 15:23 11 አያዉ ጎፐ አሹዋ ማዬዳ ኡባ ደኡ አ ሱ ግዶን ደኤ፤ ሱይካ ቃይ ደኡዋ ሸምፑ አ ግዶን ደእያዋፐ ደንዴዳዋን ናጋራ አቶ ጊስያዋ ግድያ ድራዉ፥ ህንተ ናጋራ አቶ ጊሳናዳን፥ ታን ህንተንቶ ያርሽያ ሳኣ ቦላን ያርሻናዳን እማድ።✝17:11 እብራ. 9:22 12 ሄዋ ድራዉ ታን እስራኤልያ አሳ፥ "ህንተፐ ዎይ ህንተ ግዶን ደእያ ሀራ ቢታ አሳፐ ኦንነ ሱ ሞፖ" ያጋድ።

13 " ‘እስራኤልያ አሳፐ ዎይ ኡንቱንቱ ግዶን ደእያ ሀራ ቢታ አሳፐ ኦንነ ምያ ዶኣ ዎይ ካፉዋ ሻንካቲደ ዎፐ፥ አ ሱ ሳኣን ጉሲደ፥ ቢታ ካሞ። 14 አያዉ ጎፐ አሹዋ ማዬዳ ኡባ ሸምፑ አ ሱ ግዶና። ሄዋ ድራዉ ታን እስራኤልያ አሳ፥ "አሹዋ ማዬዳ መታ ኡባ ሸምፑካ አ ሱ ግዶን ደእያ ድራዉ፥ ሱ ሞፕተ፤ ቃይ ምያ ኦንነ ባረ አሳ ግዶፐ ቦሄቶ" ያጋድ።

15 " ‘እስራኤልያ አሳ ግድና ዎይ ኡንቱንቱ ግዶን ደእያ ሀራ ቢታ አሳ ግድና፥ ኦንነ ባኩታ ዎይ ዶአይ ኦይቂደ ዎዳ አሹዋ ሞፐ፥ ባረ ማዩዋ ሜጮ፤ ባረ ቦላካ ሜጨቶ፤ ያቲደ ኦማርስ ጋካናዉ እ ቱና። ሄዋፐ ጉይያን፥ እ ጌሻ። 16 ባረ ማዩዋ ሜጫና ዮፐ፥ ባረ ቦላካ ሜጨታና ዮፐ፥ እ ባረ ናጋራን ኦሸቴ’ ያጋ" ያጌዳ።