ዎጋ 10

ናዳብነ አብሁ ኦዳ ናጋራ

1 አሮና አቱማ ናናይ፥ ናዳብነ አብሁ፥ ባረንቱ እጻና ጩውስያ ሚሻ አኪደ፥ አ ቦላን ታማ ዎድኖ፤ ታማ ቦላ ቃይ እጻና ቆሌድኖ፤ ያቲደ፥ መና ጎዳይ ኡንቱንታ አዛዝቤና፥ ሀራ ታማ መና ጎዳ ስንን ሺሼድኖ። 2 ሄዋ ጋሱዋን መና ጎዳ ስንፐ ታማይ ዪደ፥ ኡንቱንታ ሜዳ፤ ኡንቱንቱካ መና ጎዳ ስንን ሀይቄድኖ። 3 ሄዋፐ ጉይያን፥ ሙሴ አሮና፥ "መና ጎዳይ፥

" ‘ታን ታ ማታ ሺቅያዋንታ

ታ ጌሻተ በሳና።

ቃይ አሳ ኡባ ስንን

ታን ቦንቼታና’ "

ጊደ ሃሳዬዳዌ በአ ሀዋ ያጌዳ። አሮን ጮኡ ጌዳ።

4 ሙሴ አሮና አዉዋ እሻ ኡዝኤላ አቱማ ናናቱዋ፥ ምሻኤላነ ኤልጻፋና ጼጊደ፥ "ሃ ዪተ፤ ህንተ አዉዋ እሻ ናናቱዋ አሃ ጾሳ ዱንካንያ ስንፐ ደንደ፥ ዱንካኔዳ ሳኣፐ ጋጻ ከስተ" ያጌዳ። 5 ሄዋ ድራዉ ኡንቱንቱ ዪደ፥ ሙሴ አዛዜዳዋዳን፥ ባረንቱ ቄሰተ ማዩዋና ኡንቱንቱ አሃ ቶኪደ፥ ዱንካኔዳ ሳኣፐ ጋጻ ከሴድኖ።

6 ሄዋፐ ጉይያን፥ ሙሴ አሮናነ አ አቱማ ናናቱዋ፥ ኤልኣዛራነ እታማራ ሀዋዳን ያጌዳ፤ "ህንተ ሀይቀና ማላነ፥ መና ጎዳይ ማባራ ኡባ ቦላን ሀንቀተና ማላ፥ ህንተ ሁጲያ ሜድሶፕተ፤ ህንተ ማዩዋካ ፔፕተ። ሽን ህንተ እሻቱ፥ እስራኤልያ አሳቱ፥ መና ጎዳይ ባረ ኤዳ ታማን ጹጌዳዋንቶ ዬካና ጎፐ ኡንቱንቱ ዬክኖ። 7 ቃይካ ህንተ ዱንካንያ ፐንግያፐ ካረ ከሶፐ ህንተ ሀይቃና፤ አያዉ ጎፐ ጾሳይ ኦክያ ዛይቲ ህንተ ቦላን ደኤ" ያጌዳ። ኡንቱንቱካ ሙሴ ጌዳዋዳን ኦድኖ።

ቄሳቱዋ ዎጋ

8 መና ጎዳይ አሮና ሀዋዳን ያጌዳ፤ 9 "ህንተ ሀይቀና ማላ፥ ዱንካንያ ግዶ ገልያ ዎደ፥ ኔንካ ነ ናናይካ ዎይንያ ኤሳ ዎይ ሀራ ማይያ ኡሻ ኡሾፕተ፤ ሄዌ ስንፐ ያና የለታዉካ መናዉ ህገ ግዲደ ደአና። 10 ህንተ ጌሻነ ጌሻ ግደናባ ቃይ ቱናነ ቱና ግደናባ ሻኪደ ኤርተ። 11 መና ጎዳይ ሙሴ ባጋና ኦዴዳ ዎጋ ኡባካ እስራኤልያ አሳ ታማርስተ" ያጌዳ።

12 ሙሴ አሮናነ አቴዳ አ አቱማ ናናቱዋ ኤልኣዛራነ እታማራ ሀዋዳን ያጌዳ፤ "መና ጎዳዉ ታማን ጹግያ ያርሹዋፐ አቴዳ ካ ያርሹዋ አኪደ፤ እርሹዋ የገናን ኡክተ፤ ያቲደ እ ሎይ ጌሻ ግድያ ድራዉ፥ ያርሽያ ሳኣ ማታን አ ሚተ።✝10:12-13 ዎጋ 6:14-18 13 መና ጎዳዉ ታማን ጹግያ ያርሹዋፐ ሄዌ ኔናነ ነ አቱማ ናናቱዋ ጋክያ ህንተ ግሹዋ ግድያ ድራዉ፥ ሄዋ ህንተ ጌሻ ሳኣን ሚተ፤ አያዉ ጎፐ፥ ጾሳይ ታና ሄዋዳን ኦና ማላ አዛዜዳ። 14 ሽን ቃዳ አንጎሱዋነ ሺቄዳ ገድያ ኔን፥ ነ አቱማ ናናይነ ነ ማጫ ናናይ ዎጋዳን ጌሻ ሳኣን ሚተ። አያዉ ጎፐ፥ ሄዌ እስራኤልያ አሳይ ሺሽያ እትፐተ ያርሹዋፐ ኔናነ ነ አቱማ ናናቱዋ ጋክያ ህንተ ግሹዋ።✝10:14-15 ዎጋ 7:30-34 15 መና ጎዳዉ ያርሼዳ ገድያነ ቃዳ አንጎሱዋ አሳይ ታማን ጹግያ ሞያና እትፐ ጋደ፥ መና ጎዳ ስንን ቃያ ያርሹዋዳን ቃናዉ አሀና። መና ጎዳይ አዛዜዳዋዳን፥ ሄዌ ነዉነ ኔናና ደእያ ነ አቱማ ናናቶ መናዉ ህንተና ጋክያ ህንተ ግሹዋ ግዳናዋ" ያጌዳ።

16 ሙሴ ናጋራ ያርሹዋ ዴሻይ ዋኔደንቶነ ኤራናዉ ኮዪደ ኦቼዳ፤ እ ጹገት ድጌዳዋ ኤሬዳ ዎደ፥ አቴዳ አሮና አቱማ ናናቱዋ፥ ኤልኣዛራነ እታማራ ሀንቀቴዳ፤ ኡንቱንቱ፥ 17 "ናጋራ ያርሹ ሎይ ጌሻ ግዴዳዋንቱ ግዱዋፐ እቱዋ ግዴዳ ጌሻ፤ ቃይ ሄዌካ አሳ ናጋራ መና ጎዳ ስንን አቶ ጊሳና ማላ ህንተንቶ እመቴዳ፤ ያትና ህንተ አ ሎይ ጌሻ ሳኣን አያዉ ምበይክቴ?✝10:17 ዎጋ 6:24-26 18 ሄ መህያ ሱይ መና ጎዳ ዱንካንያ ግዶ ገልቤናዋ ግዶደ፥ ታን ህንተና አዛዜዳዋዳን፥ ህንተ አ ሄ ጌሻ ሳኣን ማናዉ በሴ፤ ሽን አጌድታ" ያጌዳ።

19 አሮን ሙሳ፥ "በአ፤ አሳቱ ሀች ባረንቱ ናጋራ ያርሹዋነ ጹግያ ያርሹዋ መና ጎዳ ስን አሄድኖ፤ ግዶፐነ ቃይ ሀዋ ማላባይ ታ ቦላ ጋኬዳ። ያትና ዎን ታን ናጋራ ያርሹዋ ሀች ሜዳዋ ግድንቶነ፥ መና ጎዳይ ናሸታናዋ ሽን አቴዴሻ?" ያጌዳ። 20 ሙሴ ሄዋ ስሴዳ ዎደ፥ ሄ ዛሩ አ አሌዳ።