እትፐተ ያርሹዋ
1 " ‘እት አሳይ እትፐተ ያርሾ ባረ ዉድያፐ ማጫዋ ግድና አቱማዋ ግድና እት መህያ ሺሽያ ዎደ፥ ሄ መሂ ትላ ቦላና ደእያዋ መና ጎዳ ስንን ሺሾ። 2 ያርሻናዉ አሄዳ መህያ ሁጲያን ባረ ኩሽያ ዎደ፥ ጾሳ ዱንካንያ ፐንግያን ሹኮ። ሄዋፐ ጉይያን፥ ቄሳቱ አሮና ናናይ ሱ ያርሽያ ሳኣ ምይያ ኡባ ቦላን ጉሶ። 3 እትፐተ ያርሹዋፐ ታማን ጹግያ ያርሹዋ ኦደ መና ጎዳዉ ሺሾ፤ ሄዌካ ቃን አሹዋ ማዬዳ ሀንዳ ኡባይነ አናና ጋያ ሀንዳይ፥ 4 ላኡ ክላሆቱዋ፥ ኡንቱንቱ ቦላ ደእያ ሀንዳ፥ ጋይልያ ማታን ደእያ ሀንዳነ ትርያ ጼራ ቦላ ደእያ ሀንዳ ክላሆቱዋና ጋደ አኬ። 5 አሮና አቱማ ናናይ ሄዋ ሀራ ጹግያ ያርሹዋና ያርሽያ ሳኣ ቦላ ደእያ ም ቦላ ዎደ ጹግኖ፤ ሄዌ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ።
6 " ‘መና ጎዳዉ እትፐተ ያርሹዋ ሺሽያ ኡራይ ዶርሳ ግድና ዴሻ፥ ማጫዋ ግድና አቱማዋ ትላ ቦላና ደእያዋ ሺሾ። 7 እት ኡራይ ዶርሳ ማራ ያርሽያዋ ግዶፐ፥ መና ጎዳ ስንን ሺሾ፤ 8 ባረ ኩሽያ አ ሁጲያን ዎደ፥ ዱንካንያ ስንን ሹኮ። ሄዋፐ ጉይያን፥ አሮና አቱማ ናናይ ሱ ኦይቂደ፥ ያርሽያ ሳኣ ምይያ ኡባ ቦላን ጉስኖ። 9 እትፐተ ያርሹዋፐ ታማን ጹግያ ያርሹዋ ኦደ፥ መና ጎዳዉ ሺሾ፤ ሄዌካ፥ ዚዝያፐ ቃንጼዳ ናስያ፥ ኡሎ ግዶ አሹዋ ማዬዳ ሞያነ ሀዋንታ ጋ ኦይያ ሞያ ኡባ፥ 10 ላኡ ክላሆቱዋ፥ ኡንቱንቱ ቦላ ደእያ ሀንዳነ ጋይልያ ማታን ደእያ ሞያ፥ ትርያ ጼራ ቦላ ደእያ ሞያ ክላሆቱዋና ጋደ አኬ። 11 ቄሲ ሄ ቁማ ያርሹዋ መና ጎዳዉ ታማን ጹግያ ያርሽያ ሳኣ ቦላ ዎደ ጹጎ።
12 " ‘አ ያርሹ ዴሻ ግዶፐ፥ እ ሄዋ መና ጎዳ ስንን ሺሾ። 13 ያቲደ አ ሁጲያን ባረ ኩሽያ ዎደ፥ ጾሳ ዱንካንያ ስንን ሹኮ። ሄዋፐ ጉይያን፥ አሮና አቱማ ናናይ ሱ ኦይቂደ፥ ያርሽያ ሳኣ ዩሹዋን ኡባን ጉሲኖ። 14 እ ሄ ያርሽያዋፐ አኪደ፥ ታማን ጹግያ ያርሹዋ ኦደ መና ጎዳዉ ሺሾ፤ ሄዌካ ቃን አሹዋ ማዬዳ ሀንዳ ኡባነ ሄ ሀንዳ ጋ ኦይያ ሀራ ሀንዳ፥ 15 ላኡ ክላሆቱዋ፥ ኡንቱንቱ ቦላ ደእያ ሀንዳነ ጋይልያ ማታን ደእያ ሞያነ ትርያ ጼራ ቦላ ደእያ ሞያ ክላሆቱዋና ጋደ አኬ። 16 ቄሲ ሄ ቁማ ታማን ጹግያ፥ ሳዉዋ ቶሹኩ ግያ ያርሹዋ ኦደ ያርሽያ ሳኣ ቦላ ጹጎ። ሀንዳ ኡባይ መና ጎዳሳ።
17 " ‘ሀንዳነ ሱ ህንተ ደእያ ሳኣን ሀቃንነ ሞፕተ። ሀዌ ህንተንቶነ ህንተ የለታዉ መናዉ ናገትያ ዎጋ’ ያጋደ ኦዳ" ያጌዳ።