ዎጋ 7

ናቁዋ ያርሹዋ

1 " ‘ናቁዋ ያርሹዋ ዎጋይ ሀዋ: እካ ጌሻ ኡባፐ እቱዋ ግዴዳ ጌሻ ያርሹዋ። 2 ጹግያ ያርሾ ሺሽያ መህያ ሹክያ ሳኣን ናቁዋ ያርሹዋ መህያካ ሹክኖ፤ አ ሱካ ያርሽያ ሳኣ ምየቱዋን ጭኖ። 3 ቃይ አ ሀንዳ ኡባ: ሄዌካ ናስያ ሀንዳ፥ ቃን አሹዋ ማዬዳ ሀንዳ፥ 4 ላኡ ክላሆቱዋ፥ ሽንጭያ ማታን ደእያ ኡንቱንቱ ማዬዳ ሀንዳነ ትርያ ጼራ ቦላ ደእያ ሞያ ክላሆቱዋና እትፐ ያርሹዋ ኦደ ሺሾ። 5 ታማን ጹጊደ መና ጎዳዉ ያርሽያ ያርሹዋዳን፥ ሄ ሺቄዳ ሀንዳ ቄሲ ያርሽያ ሳኣ ቦላን ጹጎ፤ ሄዌ ናቁዋ ያርሹዋ። 6 ቄስያ ዛረ ግዴዳ አቱማ አሳይ ኡባይ ሄ ያርሹዋ አሹዋ ሞ። ሄ ያርሹ ጌሻ ያርሹዋ ኡባፐ እቱዋ ግድያ ድራዉ፥ ጌሻ ሳኣን ሞ።

7 " ‘ናቁዋ ያርሹ ናጋራ ያርሹዋካ ማላ፤ ኡንቱንቱ ላኡዋ ዎጋይ እቱዋ። ሄዌነ ያርሸቴዳ መህያ አሹ ናጋራ አቶ ጊሳናዉ ያርሹዋ ያርሼዳ ቄስያዉ እመቴ። 8 ኦንነ ጹግያ ያርሹዋ አሆፐ ያርሽያ ቄሲ ሄ መህያ ጋልባ ባረዉ አኮ። 9 ጮጭያን ኮምፐቴዳ ካ ያርሹዋ ኡባይነ ኦቱዋን ዶይሰቴዳ ዎይ ባሽያን ኡከቴዳ ኡባይካ ሄ ያርሹዋ ያርሼዳ ቄስያዉ እመቴ። 10 ቃይ ዛይትያን ሙናቀቴዳ ዎይ ሙናቀትቤና ካ ያርሹዋ ኡባይ አሮና አቱማ ናናቶ ኡባዉ እመቴ፤ ኡንቱንቱ ሄዋ ቃራን ግሽ አክኖ።

እትፐተ ያርሹዋ

11 " ‘አሳይ እትፐተ ያርሹዋ መና ጎዳዉ ያርሽያ ዎደ አዉ ደእያ ዎጋይ ሀዋ: 12 እ ሺሽያ እትፐተ ያርሹ ጋላታ ያርሹዋ ግዶፐ፥ ሄ ያርሹዋና እትፐ ዛይትያን ሙናቄዳ፥ እርሹዋ የገናን ኡኬዳ ኡክ፥ ዛይትያን ኦከቴዳ፥ እርሹ ገልቤና ሌኦ ዳቡዋነ ዛይትያን ሎይ ሙናቄዳ፥ ሊቆ ልያፐ ኡከቴዳ ኮምፑዋ ሺሾ። 13 ሄ ጋላታዉ ሺሽያ እትፐተ ያርሹዋና እትፐ እርሹዋ የጌዳ ሙናቃፐ ኡከቴዳ ኡክካ እሞታ ኦደ ሺሾ። 14 ቃይ ሄ ኡባ ቆሞ ኡክቱዋፐካ እ እቱዋ እቱዋ ደንደ፥ መና ጎዳዉ ያርሹዋ ኦደ አሆ። ሄዌ እትፐተ ያርሹዋ ሱ ጫጫፌዳ ቄስያዉ እመቶ። 15 ሄ መህያ አሹ ጋላታዉ ሺቅያ እትፐተዉ ያርሸቴዳ ጋላስ ሜተቶ፤ ዎንታዉ አያይነ አቶፖ።

16 " ‘ሽን አ ያርሹ ሺቄዳዋ ጋያ ዎይ ባረ ዶሱዋን ጮ እምያ ያርሹዋ ግዶፐ፥ ሄ ያርሹዋ አሹ ሄ ያርሼዳ ጋላስ ሜተቶ፤ አፐ አትያዋ ቃይ ዎንተ ጋላስካ ሜተቶ። 17 ሄ ያርሹዋ አሹዋፐ ፓላሂደ ሄዘን ጋላሳ ጋካናዉ ጋምእያዌ ደኦፐ፥ ሄዌ ታማን ጹገቶ። 18 እት አሳይ ሺሼዳ እትፐተ ያርሹዋ አሹዋፐ ሀቃዌነ ሄዘን ጋላስ ሜተቶፐ፥ አ ያርሹ አከተና፤ እ ያርሼዳዋዳንካ ፓይደተና። ሄ ያርሹ ቱና፤ አፐ ሜዳ ኦንነ ባረ ናጋራን ኦሸቴ።

19 " ‘ቱናባ አያነ ቦቼዳ አሹ ሜተቶፖ፤ እ ታማን ጹገታናዉ ኮሼ። አሹ ጌሻ አሹዋ ግዶፐ፥ ዎጋን ጌሻ ግድያ አሳይ ኦንነ ማና ጎፐ ሞ። 20 ሽን እት አሳይ ቱና ግድ ኡቲደ፥ መና ጎዳዉ ሺሼዳ እትፐተ ያርሹዋ አሹዋፐ ምያዋ ግዶፐ፥ ሄ አሳይ ባረ አሳ ግዶፐ ቦሄቶ። 21 ቃይ እት አሳይ ቱናባ አያነ ቦቾፐ አሳ ቱናተ ግድና ዎይ ቱና መህያ ግድና፥ ዎይ ሀራ ሸነይያ ቱናባ ቦቾፐ ስሚደ መና ጎዳዉ ያርሼዳ እትፐተ ያርሹዋ አሹዋፐ ሞፐ፥ ሄ ኡራይ ባረ አሳ ግዶፐ ቦሄቶ’ ያጋ" ያጌዳ።

ሱነ ሞዋ ሙሳይ ድገቴዳ

22 መና ጎዳይ ሙሴዉ ሀዋዳን ያጊደ ኦዴዳ፤ 23 "እስራኤልያ አሳዉ ሀዋዳን ያጋ፤ ‘ኮሩማ ዎይ ዶርሳ ዎይ ዴሻ አሹዋን ሞያ ዛዋ ሙለካ ሞፕተ። 24 ሀይቄዳ መህያ ዎይ ዶአይ ዎዳ መህያ ሞያካ ሀራባዉ ጎኤትተፐ አትና፥ አፐ አያነ ሞፕተ። 25 አያዉ ጎፐ፥ መና ጎዳዉ ታማን ጹግያ ያርሾ ሺሽያ መህያ ሞያ ምያ ኦንነ ባረ አሳ ግዶፐ ቦሄቶ። 26 ህንተ ደእያ ሳኣን ሀቃን ግዶፐካ፥ ካፉዋ ሱ፥ መህያ ሱ ዎይ ሀራባ አያ ሱነ ሞፕተ።✝7:26-27 ዶመ 9:4፤ ዎጋ 17:10-14፤ 19:26፤ ዛረ. 12:16፣ 23፤ 15:23 27 ሱ ምያ አይ አሳይነ፥ ሄ አሳይ ባረ አሳ ግዶፐ ቦሄቶ’ ያጋ" ያጌዳ።

ቄስያ ጋክያ ግሹዋ

28 መና ጎዳይ ሙሴዉ ሀዋዳን ያጊደ ኦዴዳ፤ 29 "እስራኤልያ አሳዉ ሀዋዳን ያጋ፤ ‘መና ጎዳዉ እትፐተ ያርሹዋ ሺሽያ አይ አሳይነ ሄ እትፐተ ያርሹዋፐ ሻኪደ፥ ባረ ሁጰ እሞታ ዱማዪደ መና ጎዳዉ ሺሾ። 30 ሄዋ እ መና ጎዳዉ ታማን ጹግያ ያርሹዋ ኦደ፥ ባረ ኩሽያን አኪደ አሆ፤ ቃይ ሞዋካ አንጎሱዋና አሆ፤ አንጎሱዋ ዉጻክያ ያርሹዋ ኦደ፥ መና ጎዳ ስንን ቃ። 31 ቄሲ ያርሽያ ሳኣ ቦላን ሞዋ ጹጎ፤ ሽን አንጎሱ አሮናሳነ አ አቱማ ናናቶ እመቶ። 32 ህንተ እትፐተ ያርሹዋፐ ኡሸቻ ገድያ እሞታ ኦደ ቄስያዉ እምተ። 33 ሄዌ ኡሸቻ ገዲ አሮና አቱማ ናናቱዋፐ እትፐተ ያርሹዋ ሱነ ሞድያ ያርሽያዎ አ ጋክያ አ ግሹዋ። 34 ታን እስራኤልያ አሳ እትፐተ ያርሹዋፐ ቃዳ አንጎሱዋነ ያርሾ ሺሼዳ ገድያ አካደ፥ ቄስያ አሮናሳነ አ አቱማ ናናቶ እማድ፤ ሄዌ ኡንቱንታ ጋክያ ኡንቱንቱ ግሹዋ ግድያ ድራዉ፥ እስራኤልያ አሳይ መናዉ ሄዋ ኡንቱንቶ እሚደ ደአና’ ያጋደ ኦዳ" ያጌዳ።

35 አሮንነ አ አቱማ ናናይ ቄስያ ግዲደ፥ መና ጎዳዉ ኦናዉ ሱንቴዳ ጋላስ መና ጎዳዉ ሺሼዳ ታማን ጹግያ ያርሹዋፐ ሄዌ ኡንቱንቶ ግሹዋ ግዲደ እመቴዳ። 36 መና ጎዳይ ኡንቱንቱ ቄሰተዉ ኦከቴዳ ጋላስ፥ ሄዋ ኡንቱንቶ እማና ማላ፥ እስራኤልያ አሳ ኡባ አዛዜዳ፤ ስን የለታን ኡባንካ ሀዌ ዎጋ ግዲደ ኦሰቴ።

37 ስም ሀዋንቱ፥ ጹግያ ያርሾ፥ ካ ያርሾ፥ ናጋራ ያርሾ፥ ናቁዋ ያርሾ፥ ቄሳተዉ ኦከትያ ዎደ ያርሽያ ያርሾነ እትፐተ ያርሾ እመቴዳ ዎጋቱዋ። 38 ሀ ዎጋቱ እስራኤልያ አሳይ ሲና መላ ሳኣን ባረንቱ ያርሹዋ መና ጎዳዉ ያርሻና ማላ መና ጎዳይ አዛዜዳ ጋላስ፥ ሲና ደርያ ቦላን መና ጎዳይ ሙሳ አዛዜዳ ዎጋቱዋ።