ካ ያርሹዋ
1 " ‘ኦንነ ካ ያርሹዋ መና ጎዳዉ ሺሽያ ዎደ፥ ሄ ያርሹ ሊቆ ልያ ግዶ፤ አ ቦላ ዎጋራ ዛይትያነ እጻና ጉጆ። 2 ሄዋ እ አሮና ናናቱዋኮ ቄሳቱዋኮ አሆ፤ ቄሳቱ ሄ ሊቆ ልያፐነ ዛይትያፐ እት ኩሽያ ኩን አኪደ፥ እጻና ኡባና አክ፥ ሀሳይስያዋ ኦደ፥ ያርሽያ ሳኣ ቦላ ታማን ጹጎ። ሄዌ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ። 3 ካ ያርሹዋፐ አቴዳዌ አሮናሳነ አ ናናቱዋሳ። ሄዌ መና ጎዳዉ ታማን ጹገትያ ጌሻ ያርሹዋ ኡባፐ እቱዋ ግዴዳ ጌሻ ያርሹዋ።
4 " ‘ያርሾ ሺሽያ ኡክይ ጮጭያን ካኤዳዋ ግዶፐ፥ ዛይትያን ሙናቄዳ ሊቆ ልያፐ ኡከቴዳ እርሹ የገትቤና ኮምፖ፥ ዎይ ዛይትያን ኦከቴዳ፥ እርሹ የገትቤና ሌኦ ኡክ ግዶ።
5 " ‘ያርሾ ሺሽያ ኡክይ ባሽያን ኡከቴዳዋ ግዶፐ፥ ዛይትያን ሙናቄዳ፥ እርሹ ባይና፥ ሊቆ ልያፐ ጊጌዳዋ ግዶ። 6 አ መንደ አ ቦላ ዛይትያ ትጎ፤ ሄዋ ካ ያርሹዋ ኦደ ሺሾ።
7 " ‘ነ ያርሾ ሺሽያ ካ ያርሹ ድስትያን ካኤዳዋ ግዶፐ፥ ዛይትያን ሙናቄዳ ሊቆ ልያፐ ካኤዳዋ ግዶ። 8 ሀዋዳን ጊግሴዳ ካ ያርሹዋ መና ጎዳዉ አሀ፤ ቄስያዉ እማ። ቄሲ ሄዋ አኪደ ያርሽያ ሳኣ ሺሾ። 9 ቄሲ ሄ ካ ያርሹዋፐ አኪደ፥ ሀሳይስያዋ ኦደ፥ ያርሽያ ሳኣ ቦላን ጹግያ ያርሹዋዳን ታማን ጹጎ፤ ሄዌ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ። 10 ካ ያርሹዋፐ አቴዳዌ አሮነሳነ አ ናናቱዋሳ። ሄዌ መና ጎዳዉ ታማን ጹጌዳ፥ ጌሻ ያርሹዋ ኡባፐ እቱዋ ግዴዳ ጌሻ ያርሹዋ።
11 " ‘ጾሳዉ ህንተ አህያ አይ ካ ያርሹነ እርሹዋና ደእያዋ ግዶፖ፤ አያዉ ጎፐ ኔን እርሹዋ ዎይ ኤሳ እልሉዋ ጾሳዉ ታማን ጹጋደ ያርሻናዉ ኮሸና። 12 ህንተ ላይን ላይን ጫከትያ ካፐ ጼራ ከሲደ፥ ጾሳዉ አሀናዉ ዳንዳዪታ፤ ሽን ሄዋ ሳዉዋ ቶሹኩ ግያ ያርሹዋ ኦደ፥ ጾሳዉ ያርሽያ ሳኣ ቦላን ጹገተና። 13 ኔን ሺሽያ ካ ያርሹዋ ኡባን ማጽንያ የጋ፤ አያዉ ጎፐ፥ ነ ጾሳ ቃላ ጫቁዋ ማጽንያ አጎፓ። ሄዋ ድራዉ ነ ካ ያርሹዋ ኡባ ማጽንያን ማልኤ። 14 ኔን ኮይሮ ካፐ ጼራ ከሳደ መና ጎዳዉ አህያ ዎደ፥ ሄ ካይ ጺጸቲደ ሀርጸቴዳ ትሻ ካ ግዳናዉ ኮሼ። 15 አ ቦላ ዛይትያ ትጋ፤ እጻናካ አን ዎ፤ ሄዌ ካ ያርሹዋ። 16 ቄሲ ሄ ዛይቲ ትገቴዳ ሀርጸቴዳ ካፐ ሻኩዋ አኪደ፥ እጻና ኡባናካ ሀሳይስያዋ ኦደ ታማን መና ጎዳዉ ጹጎ።