1 መና ጎዳይ ሙሳ ሀዋዳን ያጌዳ፤ 2 "እስራኤልያ አሳዉ ኡባዉ ሀዋዳን ያጋደ ኦዳ፤ ‘ታን፥ መና ጎዳይ፥ ህንተ ጾሳይ ጌሻ ግድያ ድራዉ፥ ህንተካ ጌሻ ግድተ።✝

3 " ‘ህንተፐ እቱነ አተናን ባረ አባነ ባረ ዳዮ ቦንቾ፤ ታ ሳምባታቱዋካ ቦንችተ። ታን፥ ጾሳይ፥ ህንተ ጾሳ።✝

4 " ‘ታና አጊደ ኤቃቶ ጎይኖፕተ፤ ዎይ ቃይ ብራታፐ ሲልሴዳ፥ ጾሳቱዋ ህንተንቶ መፕተ። ታን፥ መና ጎዳይ፥ ህንተ ጾሳ።✝

5 " ‘ህንተ እትፐተ ያርሹዋ መና ጎዳዉ ያርሽያ ዎደ፥ ሄ ያርሹ ህንተ ድራዉ አከታናዳን፥ በስያዋዳን ያርሽተ። 6 ሄ ያርሹ ህንተ ያርሼዳ ጋላሳን ዎይ ዎንተ ጋላሳን ሜተቶ፤ ሄዘን ጋላሳይ ጋካናዉ አቴዳዌ ደኦፐ ሄዌ ጹገቶ። 7 ሄዛን ጋላሳን አ ሞፐ፥ ሄዌ ሸነይያባ፤ ታን ሄዋ አክከ። 8 ሄዋ ምያ ኦንነ ባረ ናጋራን ኦሸቴ፤ አያዉ ጎፐ፥ እ መና ጎዳዉ ጌሻ ግዴዳዋ ቱንሴዳ። ሄ አሳይ ባረ አሳ ግዶፐ ቦሄቶ።

9 " ‘ህንተ ጋድያን ሞኬዳ ካ ህንተ ጫክያ ዎደ፥ ጋድያ ጋጻ ጋካናዉ ጫኮፕተ፤ ቃይ ጫካፐ ስምና ደእያ ቃርምያካ ቃርሞፕተ።✝ 10 ነ ዎይንያ አይፍያ ሙለ ማጻደ ም ካሎዮፓ፤ ሳኣን ዎዳ ዎይንያ አይፍያካ ማጾፓ፤ ሄዋ ህዬሳቶነ በተቶ አጋ። ታን፥ መና ጎዳይ፥ ህንተ ጾሳ።

11 " ‘ህንተ ዉኦፕተ።

" ‘ዎርዶቶፕተ።

" ‘እቱ እቱዋ ጭሞፕተ።✝

12 " ‘ታ ሱንን ዎርዱዋን ጫቆፕተ፤ ያቲደ ህንተ ጾሳ ሱን ቱንሶፕተ። ታን መና ጎዳ።✝

13 " ‘ነ ሾሩዋ ሱጎፓ፤ ዎይ ቦንቆፓ።

" ‘ከራ ኦያ ብታንያ ድርጉዋ ድጋደ፥ እት ቃማነ ነ ማታን አይሶፓ።✝

14 " ‘ቱልያ ሸቆፓ፤ ዎይ ቃይ ቆቅያ ስንን ቢያዋ ዎፓ፤ ሽን ኔን ጾሳዉ ያያ። ታን መና ጎዳ።✝

15 " ‘ፕርዳ ፕርዳደ ደሽሶፓ፤ ህዬሳ አ ህዬሳተ ድራዉ ማዳደ ፕርዶፓ፤ ዱርያካ አ ዱረተ ድራዉ ያያደ አጎፓ። ሽን ነ ሾሮ ቱማተን ፕርዳ።✝

16 " ‘ነ አሳ ግዶን ኢታ ዝግርሳ አካደ ዩዮፓ።

" ‘ነ ሾሩዋ ዎያዋ አያነ ኦፓ። ታን መና ጎዳ።

17 " ‘ነ እሻ ነ ዎዛናን እጾፓ።

" ‘ነ ሾሩዋ ጋሱዋን ኔን ናጋራ ኦና ማላ፥ አ ሴራ።

18 " ‘ኩሽያ ጭጎፓ፤ ቃይ ነ አሳፐ እቶነ ኡሉዋን ቅምያ ኦይቆፓ። ሽን ነ ሾሩዋ ነ ሁጲያዳን ሲቃ። ታን መና ጎዳ።✝

19 " ‘ታ አዛዞቱዋ ናጋ።

" ‘ነ መህያፐ እት ቆሞ መህያ ሀራ ቆሞ ዱማ መህያን ብራስሶፓ።

" ‘እት ሾይቃን ላኡ ቆሞ ዘረ ዘሮፓ።

" ‘ቃይ ላኡ ቆሙዋፐ ዳደቴዳ ማዩዋ ማዮፓ።✝

20 " ‘እት አሳይ ሀራ አሳ ገላናዉ ጊጋ ኡቴዳ ዳንጋጽራትና ግሶፐ፥ ቃይ ሄ ዳንጋጽራታካ ባረ ዳንጋጽረተፐ ዎዘታቤናኖ ግዶፐ፥ ኡንቱንቱ ሙረታናዉ በሴ፤ ሽን እዛ ባረ ዳንጋጽረተፐ ዎዘታቤና ድራዉ፥ ኡንቱንታ ዎናዉ ኮሸና። 21 ግዶፐነ ሄ ብታኒ ባረ ናቁዋ ያርሾ ግድያ ዶርሳ ኦርግያ ጾሳ ዱንካንያኮ መና ጎዳ ስን አሆ። 22 ቄሲ ሄ ናቁዋ ያርሹዋ ዶርሳ አኪደ፥ ብታኒ ኦዳ ናጋራ መና ጎዳ ስንን አቶ ጊሴ፤ እ ኦዳ ናጋራይካ አቶ ጌተታና።

23 " ‘ህንተ ካናነ ቢታ ገልያ ዎደ፥ አይፍያ ምያ አይ ቆሞ ም ቶኮፐካ፥ ሄ ም አይፍያ ሜተተናዋዳን ፓይድተ፤ ሄዙ ላይይ ዉራናዉ ሄ ም አይፊ ሜተተና፤ አ ሞፕተ። 24 ኦይደን ላይን ሄ ም አይፊ ኡባይ መና ጎዳዉ ጋላታ ሺሽያ ጌሻ ያርሹዋ ግዳናዋ። 25 ሽን ሄ ም አይፊ ህንተንቶ ሎይ ዳራና ማላ፥ እቼሸን ላይ አይፍያ ሚተ። ህንተ ሀዋዳን ኦፐ፥ ህንተ ም አይፊ ዳራና። ታን መና ጎዳይ ህንተ ጾሳ።

26 " ‘ሱይ አ ግዶን ደእያ አይ አሹዋካ ሞፕተ።

" ‘ካዮፕተ ዎይ ሻሬቾፕተ።✝

27 " ‘ህንተ ሁጲያ ብናና ጋርሳና ዩሽ አደ ቃንጾፕተ፤ ቃይ ህንተ ቡቻካ ዩሽ አደ ቃንጾፕተ።✝

28 " ‘ሀይቄዳ አሳ ድራዉ ህንተ ቦላ ቃንጸሬፕተ፤ ዎይ ጫቻ ማላታ ህንተ ቦላን ከሶፕተ። ታን መና ጎዳ።

29 " ‘ቢታይ ዎዳላ ቱናተን ኩሜዳዋ ግደና ማላ፥ ነ ናቶ ሻርሙጻ ኦሶ አ እማደ ቱንሶፓ።✝

30 " ‘ታ ሳምባታቱዋ ቦንችተ፤ ታዉ ጎይንያ ሳኣካ ቦንችተ። ታን መና ጎዳ።✝

31 " ‘ሞይትልያ ሃሳይስያዋንቱኮነ ሻሬቾቱዋኮ ቦፕተ፤ ህንተ ቱነና ማላ ኡንቱንታ ኮዮፕተ። ታን፥ መና ጎዳይ፥ ህንተ ጾሳ።✝

32 " ‘ፑሉሜዳ አሳነ ጭሜዳ አሳ በእያ ዎደ ኡቴዳ ሳኣፐ ደንዳ ኤቃ፤ ኡንቱንታ ቦንቻ፤ ነ ጾሳዉ ያያ። ታን መና ጎዳ።

33 " ‘ህንተ ጋድያን ህንተናና ደእያ በተቱዋ ቦላን ሱገባ ኦፕተ።✝ 34 ህንተ ጋድያን ህንተናና ደእያ በተ አሳ ህንተ ቢታ አሳዳን ጼልተ፤ አ ህንተ ሁጲያዳን ሲቅተ። አያዉ ጎፐ፥ ህንተካ ካሰ ግብጼ ጋድያን በተ ግዲደ ደኤድታ። ታን፥ መና ጎዳይ፥ ህንተ ጾሳ።

35 " ‘ህንተ ጌሳ ልክያባን፥ ሚዛናን ዎደ ልክያባንነ ማክያባን ዎርዶቶፕተ።✝ 36 ህንተ ኪሉዋ ሚዛናይ፥ ህንተ ማክያባይነ ልክያ ሚሻቱ ኡባይ ልከ ግድኖ። ታን ህንተና ግብጼ ጋድያፐ ከሳደ አሄዳ መና ጎዳ ህንተ ጾሳ። 37 ህንተ ታ ህግያነ ታ አዛዙዋ ኡባ ናግተነ ኦተ። ታን መና ጎዳ ያጋ’ " ያጌዳ።