ማናዉ በስያ መታቱዋ
(ዛረ. 14:3-21)
1 መና ጎዳይ ሙሳነ አሮና ሀዋዳን ያጌዳ፤ 2 "እስራኤልያ አሳዉ ሀዋዳን ያጊደ ኦድተ፤ ‘ቢታ ቦላን ደእያ መህያ ኡባፐ ህንተ ማና መሄቱነ ዶአቱ ሀዋንታ። 3 ጹጉንይ ዉር ጳልቀቴዳዋንታነ ዋሞትያ መሄቱዋ ኡባ ሚተ። 4 ሽን ዋሞ ጻላላ ዋሞትያዋንታ ዎይ ቃይ ጹጉን ጻላላይ ጳልቀቴዳዋንታ ሞፕተ። ጋሉ ዋሞቴ ሽን ጹጉንይ ጳልቀትቤና ድራዉ እ ህንተንቶ ቱና። 5 ጉፓሊ ዋሞቴ ሽን ጹጉንይ ጳልቀትቤና ድራዉ እ ህንተንቶ ቱና። 6 ሀርባይን ዋሞቴ ሽን ሞፕተ፤ አያዉ ጎፐ፥ እ ዋሞትያዋ ግዶፐነ፥ አዉ ጹጉንይ ጳልቀ ግደና ድራዉ፥ እ ህንተንቶ ቱና። 7 ጉዱንካ ሞፕተ፤ አያዉ ጎፐ፥ አዉ ጹጉንይ ጳልቀ ግዶፐነ፥ ዋሞተና ድራዉ፥ እ ህንተንቶ ቱና። 8 ህንተ ሀዋንቱ አሹዋ ሞፕተ፤ ኡንቱንቱ ባኩታካ ቦቾፕተ፤ ኡንቱንቱ ህንተንቶ ቱና።
9 " ‘ሃ ግዶን ደእያ መታቱዋ ኡባፐ ህንተ ማናዋንቱ ሀዋንታ። አባ ግዶን ግድና ዎይ ቃይ ጎግያ ሃ ግዶን ግድና ደእያ ኡባፐ ሞልያ ማላ ቀፊነ ፖቁ ደእያ ኡባ ሚተ። 10 ሽን አባ ግዶን ዎይ ሻፋን ሻምእሻምእያ መታቱዋፐነ ሸምፑ ደእያ፥ ቃጽያ መታቱዋፐ ሞልያ ማላ ቀፊነ ፖቁ ባይና ኡባይ ህንተንቶ ቱና። 11 ሀዋንቱ ህንተንቶ ቱና፤ ኡንቱንቱ አሹዋ ሞፕተ፤ ኡንቱንቱ ባኩታካ ቦቾፕተ። 12 ቀፊነ ፖቁ ባይና ሃ ግዶን ደእያ መታቱ ኡባይ ህንተንቶ ቱና።
13 " ‘ካፎቱዋፐ ቱና ግድያ ድራዉ ህንተ ሜናዋንቱ ሀዋንታ: አርጋን፥ ባዙዋ አንኩዋ፥ ካረ አንኩዋ፥ 14 ጽንግልያ፥ ቆል ዛርያ ኡባ፥ 15 ቁሩዋ ዛርያ ኡባ፥ 16 ሶጎንያ፥ ሀዛዝያ፥ ሃ ካፉዋ፥ ጋጭያ ዛርያ ኡባ፥ 17 ቄር ጉቱዋ፥ ብዩዋ፥ ዎጋ ጉቱዋ፥ 18 ሃ ኩቱዋ፥ ሞልያ ካፉዋ፥ ባኩታ ምያ አንኩዋ፥ 19 ሽማላነ ሳቢሳ ግያ ሃ ካፎቱዋ ዛርያ ኡባ፥ ጅንጅላትያነ ሻልያ።
20 " ‘ቀፍያና ደእያ ኦይዱ ገድያን ሀመትያ ቄር መታቱ ኡባይ ህንተንቶ ቱና። 21 ግዶፐነ፥ ቀፊ ደእያ ኦይዱ ገድያን ሀመትያዋንቱፐ ኡንቱንቱ ገድያፐ ቦላና ጉፓናዉ ማድያ ገዲ ደእያዋንታ ሚተ። 22 ሄዋንቱካ፥ ቦልያ ዛርያ ኡባ፥ ኡኩቦ ዛርያ ኡባነ ቡምቡረ ዛርያ ኡባ። 23 ሽን ሀራ ቀፍያና ደእያ ኦይዱ ገዲ ደእያ መታቱ ኡባይ ህንተንቶ ቱና።
24 " ‘ሀዋንቱ ህንተና ቱንሳና፤ ኡንቱንቱ ባኩታ ቦችያ ኡባይ ኦማርስ ጋካናዉ ቱና ግዳናዋ። 25 ሀዋንቱ ባኩታ ደንያ ኦንነ ባረ ማዩዋ ሜጮ፤ ሽን ግዶፐነ ኦማርስ ጋካናዉ እ ቱና። 26 ጹጉንይ ደኢደ ጳልቀ ግደናዋንታ ዎይ ቃይ፥ ዋሞተናዋንቱ ኡባይ ህንተንቶ ቱና፤ ኡንቱንቱ አሃ ቦችያ ኦንካ ቃይ ቱና። 27 ኦይዱ ገደቱዋን ሀመትያ መህያ ኡባፐ አዳነቱዋ ግንድያ ማላ ግንድያን ሀመትያዋንቱ ህንተንቶ ቱና፤ ቃይ ኡንቱንቱ ባኩታ ቦችያ ኦንካ ኦማርስ ጋካናዉ ቱና። 28 ሄዋንቱ ባኩታ ደንያ ኦንነ ባረ ማዩዋ ሜጮ፤ ሽን ግዶፐነ ኦማርስ ጋካናዉ እ ቱና። ኡንቱንቱካ ህንተንቶ ቱና።
29 " ‘ሳኣና ሀመትያዋንቱፐ ሀዋንቱ ህንተንቶ ቱና: ኦጩ፥ ኤጨሪ፥ ዱማ ዱማ ቆሞ ዛሪ፥ 30 ጌግ፥ ሀይላሹ፥ ኮርቺ፥ ዋካላይነ ሻቃንቻይ። 31 ሳኣና ሀመትያ ኡባቱዋፐ ህንተንቶ ቱና ግድያዋንቱ ሄዋንታ፤ ኡንቱንቱፐ ሀዬዳዋ ቦችያ ኡባይ ኦማርስ ጋካናዉ ቱና። 32 ኡንቱንቱፐ ሀይቄዳዌ አያ ቦላ ኩንዶፐካ ሄ ኡንቱንቱ አ ቦላ ኩንዴዳ ሚሻይ ቱና፤ ም ሚሻ ዎይ ማዩዋ ዎይ ጋልባ ዎይ ኬሻቱዋ ግድናካ፥ ጎኤትያ ሚሻ ኡባ ሃ ግዶን ዎተ፤ ሄዌ ኦማርስ ጋካናዉ ቱና፤ ሄዋፐ ጉይያን፥ ጌሻ ግዳናዋ። 33 ሀ ሳኣና ሀመትያዋንቱፐ እቱዋ ባኩታይ አይ ኡርቃ ሚሻ ግዶን ኩንዶፐካ፥ አ ግዶን ደእያባይ ኡባይ ቱና፤ ሄ ሚሻ መንተ። 34 ሄ ሚሻ ግዶን ደእያ ሃፐ ሜተትያ አይ ቁማ ቦላ ጾኮፐካ፥ ሄ ቁማይ ቱና፤ ቃይ ኡሽያባ አያነ ግዶ፥ ሄ ሚሻ ግዶን ደኦፐ፥ እካ ቱና። 35 ሀዋንቱ አሃይ አ ቦላ ኩንድያባይ አያ ግዶፐካ ቱና። ጮጭያ ዎይ ካያ ኡርቃ ሚሻ ግዶፐካ መንተ፤ ኡንቱንቱ ህንተንቶ ቱና። 36 ሀዋንቱ ባኩታይ ቦችያባይ ኡባይ ቱና ግዶፐነ፥ ፑልቱነ ሃ ኦላይ ጌሻ። 37 ኡንቱንቱ ባኩታፐ እቱ ዘራናዉ ዎዳ ዘረ ካ ቦላ ኩንዶፐ፥ ሄዌ ቱነና። 38 ሽን ሄ ዘረ ቦላ ሃይ ጉክ ስምና፥ ኡንቱንቱ ባኩታፐ እቱነ አ ቦላ ኩንዶፐ፥ ሄ ዘረይ ህንተንቶ ቱና።
39 " ‘ቃይ ህንተ ምያ መሄቱዋፐ እቱ ሀይቂና፥ አ ባኩታ ቦችያ ኦንነ ኦማርስ ጋካናዉ ቱና። 40 ኦንነ ሄ መህያ ባኩታፐ ሞፐ፥ ባረ ማዩዋ ሜጮ፤ ኦማርስ ጋካናዉ እ ቱና፤ ቃይ ኦንነ አ ባኩታ ቶኪደ ደንፐ፥ ባረ ማዩዋ ሜጮ፤ ኦማርስ ጋካናዉ እ ቱና።
41 " ‘ሳኣና ጎሸትያ መታ ኡባይ ህንተንቶ ቱና፤ አ ሞፕተ። 42 ኡሉዋን ጎሸትያዋ ግድና፥ ዎይ ኦይዱ ገድያን ሀመትያዋ ግድና፥ ዎይ ቃይ ዳሮ ገዲ ደእያዋ ግድናካ፥ ሳኣና ጎሸትያ መታ ኡባይ ቱና ግድያ ድራዉ አ ሞፕተ። 43 ሳኣና ጎሸትያ መታቱዋ ኡባን ሚደ ህንተ ሁጲያዉ ቱኖፕተ፤ ቃይ ኡንቱንቱን ህንተ አሳተ ቱንሶፕተ። 44 ታን፥ መና ጎዳይ፥ ህንተ ጾሳ። ታን ጌሻ ግድያ ድራዉ፥ ህንተካ ህንተና ዱማዪደ፥ ጌሻ ግድተ። ሳኣና ጎሸትያዋንቱን ህንተ አሳተ ቱንሶፕተ።11:44 ዎጋ 19:2፤ 1 ጰጽ. 1:16 45 አያዉ ጎፐ፥ ታን ህንተ ጾሳ ግዳናዉ፥ ህንተና ግብጼ ጋድያፐ ከሴዳ መና ጎዳ። ሄዋ ድራዉ፥ ታን ጌሻ ግድያ ድራዉ፥ ህንተካ ጌሻ ግድተ ያግተ ያጌዳ።
46 " ‘መሄቱዋ፥ ካፎቱዋ፥ ሃ ግዶን ፓጻ ቃጽያ መታቱዋ ኡባቱነ ሳኣና ሀመትያ መታቱዋ ኡባቱዋ ዎጋይ ሀዋ። 47 ሄዌነ ህንተ ቱናነ ጌሻ፥ ቃይ ሸምፑ ደእያ መታቱዋፐ ምያዋንታነ ሜናዋንታ ሻኪደ ኤራናሳ።’ "