ዎጋ 23

አማኑዋ ባላ ቦንችያ ማራ

1 መና ጎዳይ ሙሳ ሀዋዳን ያጌዳ፤ 2 "እስራኤልያ አሳዉ ሀዋዳን ያጋደ ኦዳ፤ ‘ጌሻ ሺቁዋ ግ አዋዪደ፥ ህንተ ቦንቻናዉ በስያ ኬረቴዳ መና ጎዳ ባላቱ ሀዋንታ።

3 " ‘ህንተ ኡሱፑን ጋላሳ ኦሱዋ ኦታ፤ ሽን ላፑን ጋላስ ህንተ ሸምፕያ ሳምባታ ጋላሳ፤ ሄ ጋላሳን ጌሻ ሺቁዋ ሺቅተ፤ አያ ኦሶነ ኦፕተ፤ ህንተ ደእያ ሳኣን ኡባን ሄዌ መና ጎዳዉ ሳምባታ።✝23:3 ከሳ 20:8-10፤ 23:12፤ 31:15፤ 34:21፤ 35:2፤ ዛረ. 5:12-14

ፓስጋ ባላነ ማጋገ ኡክ ባላ

4 " ‘ኡንቱንቱ ዎድያን ዎድያን ጌሻ ሺቁዋ ኦ አዋዪደ ህንተ ቦንቻናዉ በስያ መና ጎዳ ባላቱ ሀዋንታ። 5 ኮይሮ አግናን ታማነ ኦይደን ጋላስ ሳአይ ኦማርስያ ዎደ፥ መና ጎዳ ፓስጋይ ዶሜ።✝23:5 ከሳ 12:1-13፤ ዛረ. 16:1-2

6 " ‘ቃይ ሄ አግናንካ ታማነ እቼሸን ጋላሳይ መና ጎዳ ማጋገ ኡክ ባላ ጋላሳ፤ ሄዋ ድራዉ ላፑን ጋላሳቱዋን እርሹ ገልቤና ኡክ ሚተ።✝23:6-8 ከሳ 12:14-20፤ 23:15፤ 34:18፤ ዛረ. 16:3-8 7 ሄ ጋላሳቱዋፐ ኮይሮ ጋላሳን ጌሻ ሺቁዋ ሺቅተ፤ ዳቡርስያ ኦሱዋ አያነ ኦፕተ። 8 ላፑን ጋላሳ ኡባ መና ጎዳዉ ታማን ጹግያ ያርሹዋ ሺሽተ፤ ላፑን ጋላሳን ቃይ ጌሻ ሺቁዋ ሺቅተ፤ ዳቡርስያ ኦሱዋ አያነ ኦፕተ’ ያጋ" ያጌዳ።

ባይራ ካ

9 መና ጎዳይ ሙሳ ሀዋዳን ያጌዳ፤ 10 "እስራኤልያ አሳዉ ሀዋዳን ያጋደ ኦዳ፤ ‘ታን ህንተንቶ እምያ ቢታ ገሊደ፥ ህንተ ካ ጫክያ ዎደ፥ ሄ ካዉ ኮይሮ አይፍያ ምርቂያ ቄስያኮ አክ ዪተ። 11 መና ጎዳይ ህንተዋ አካና ማላ፥ ሳምባታ ዎንተ ጋላስ ቄሲ ሄ ምርቂያ ጾሳ ስንን ቃ። 12 ሄ ህንተ ምርቂያ ቃዳ ጋላስ ትላ ቦላና ደእያ እት ላይ ዶርሳ ኦርግያ ጹግያ ያርሹዋ ኦደ መና ጎዳዉ ሺሽተ። 13 ሄ ያርሹዋና እትፐ ዎጋራ ዛይትያን ሙናቀቴዳ ላኡ ኪሎ ግራመ ሎኦ ልያ ካ ያርሹዋ ኦደ ሺሽተ፤ ሄዌ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ግዳናዋ፤ ሄዋናካ ቃይ እትፐ እት ሊትሮ ግድያ ዎይንያ ኤሳ ሺሽተ። 14 ሀ ያርሹዋ ህንተ ህንተ ጾሳዉ ሺሽያ ጋላሳይ ጋካናዉ፥ ኦራ ጋኬዳ ካፐ ኡክ፥ ዎይ ጺጻ ግድና፥ ቃይያ ግድናካ ሞፕተ። ሀዌ ህንተ ደእያ ሳኣን ኡባን ስንና ይያ የለታዉ ኡባዉ መናዉ ዎጋ።

ሳምንታቱዋ ባላ

15 " ‘ህንተ ቃያ ያርሹዋ ምርቂያ አሄዳ ሳምባታ ዎንተፐ ዶሚደ፥ ላፑን ሳምንታ ኩመን ፓይድተ።✝23:15-21 ከሳ 23:16፤ 34:22፤ ዛረ. 16:9-12 16 ላፑን ሳምባታ ዎንተ ጋላሳይ ጋካናዉ፥ እሻታሙ ጋላሳ ፓይዲደ፥ ኦራ ጋኬዳ ካ ያርሹዋ መና ጎዳዉ ሺሽተ። 17 ህንተ አቅያ ሳኣፐ ላኡ ኪሎ ግራመ ግድያ ሎኦ ልያፐ እርሹዋ የጊደ ኡኬዳ ላኡ ኡክ ቃናዉ አክ ዪተ። ሄዌ ኮይሮ ጋኬዳ ካ አይፍያፐ መና ጎዳዉ ያርሹዋ ግዴ። 18 ሄ ኡክና እትፐ ትላ ቦላና ደእያ እት ላይ ግዴዳ ላፑን ዶርሳ ማራቱዋ፥ እት ኮሩማነ ላኡ ዶርሳ ኦርገቱዋ ሺሽተ። ካ ያርሹዋናነ ኡሻ ያርሹዋና እትፐ መና ጎዳዉ ታማን ጹግያ፥ ሳዉዋ ቶሹኩ ግያ ያርሹዋ ኦደ ያርሽተ። 19 ቃይ እት ዴሻ ኦርግያ ናጋራ ያርሾ፥ እት ላይ ግዴዳ ላኡ ዶርሳ ኦርገቱዋካ እትፐተ ያርሾ ሺሽተ።

20 " ‘ቄሲ ሄ ኮይሮ ጋኬዳ ካ አይፍያ ኡክነ ሄ ላኡ ዶርሳቱዋ ቃያ ያርሹዋ ኦደ፥ መና ጎዳ ስንን ቃ፤ ሄዋንቱ መና ጎዳዉ ጌሻ፤ ቃይ ቄስያዉካ ግሹዋ። 21 ሄ ጋላስካ አዋዪደ ጌሻ ሺቁዋ ሺቅተ፤ ዳቡርስያ ኦሶ አያነ ኦፕተ። ሀዌ ህንተ ደእያ ሳን ኡባን ስንና ይያ የለታዉ ኡባዉ መናዉ ዎጋ።

22 " ‘ህንተ ጋድያን ሞኬዳ ካ ህንተ ጫክያ ዎደ፥ ህንተ ሾይቃ ጋጻ ጋካናዉ ጫኮፕተ፤ ጫክሽን አትያ ቃርምያካ ቆሮፕተ፤ ሄዋ ህዬሳቶነ በተቶ አግ ባሽተ። ታን፥ መና ጎዳይ፥ ህንተ ጾሳ’ ያጋ" ያጌዳ።✝23:22 ዎጋ 19:9-10፤ ዛረ. 24:19-22

ማላካታ ፑንያ ባላ

23 መና ጎዳይ ሙሳ ሀዋዳን ያጌዳ፥ 24 "እስራኤልያ አሳዉ ሀዋዳን ያጋደ ኦዳ፤ ‘ላፑን አግናን ኮይሮ ጋላሳ ሸምፖ ጋላሳ ኦደ ቦንችተ፤ ሀሳይሱዋ ማላካታይካ ፑነትያ ዎደ፥ ጌሻ ሺቁዋ ሺቅተ። 25 ሄ ጋላሳን መና ጎዳዉ ታማን ጹግያ ያርሹዋ ሺሽተፐ አትና፥ ዳቡርስያ ኦሱዋ አያነ ኦፕተ’ ያጋ" ያጌዳ።

ናጋራ አቶ ጊስያ ጋላሳ

26 መና ጎዳይ ሙሳ ሀዋዳን ያጌዳ፥✝23:26-32 ዎጋ 16:29-34 27 "ሀ ላፑን አግናዉ ታማን ጋላሳይ ናጋራ አቶ ጊስያ ጋላሳ፤ ሄ ጋላስ ጌሻ ሺቁዋ ሺቅተ፤ ቃይ ህንተ ሁጲያ ካዉሽተ፤ ያቲደ መና ጎዳዉ ታማን ጹግያ ያርሹዋ ሺሽተ። 28 ሄ ጋላሳይ መና ጎዳ ህንተ ጾሳ ስንን ህንተ ናጋራይ አቶ ጌተታና ማላ፥ ህንተ ናጋራ አቶ ጊስያ ጋላሳ ግድያ ድራዉ፥ ሄ ጋላስ አይ ኦሱዋነ ኦፕተ። 29 ሄ ጋላስ ባረናተ ካዉሸና አሳይ ኦንነ ባረ አሳ ግዶፐ ቦሄቶ። 30 ሄ ጋላስ አያ ኦሱዋ ግዶፐነ ኦያ አሳ ታን አ አሳ ግዶፐ ይሳና። 31 ሄ ጋላስ አይ ኦሱዋነ ኦፕተ። ሀዌ ህንተ ደእያ ሳን ኡባን ስንና ይያ የለታዉ ኡባዉ መናዉ ዎጋ። 32 ሄዌ ህንተ ዋና ሸምፑዋ ሸምፕያ ሳምባታ ጋላሳ። ሄ ጋላሳን ህንተ ሁጲያ ካዉሽተ። ሄ አግናን ኡዱፑን ጋላሳን ኦማርሳፐ ዶሚደ፥ ታማን ጋላሳ ኦማርሳይ ጋካናዉ፥ ህንተ ሳምባታ ቦንችተ" ያጌዳ።

ዳስያ ባላ

33 መና ጎዳይ ሙሳ ሀዋዳን ያጌዳ፥✝23:33-36 ዛረ. 16:13-15 34 "እስራኤልያ አሳዉ ሀዋዳን ያጋደ ኦዳ፤ ‘ሀ ላፑን አግናን ታማነ እቼሸን ጋላሳፐ ዶሚደ፥ ላፑን ጋላሳይ መና ጎዳዉ ዳስያ ባላ። 35 ሄ ጋላሳቱዋፐ ኮይሮ ጋላሳን ጌሻ ሺቁዋ ሺቅተ፤ ዳቡርስያ ኦሱዋ አያነ ኦፕተ። 36 ላፑን ጋላሳን ኡባን መና ጎዳዉ ታማን ጹግያ ያርሹዋ ሺሽተ፤ ሆስፑን ጋላሳን ቃይ ጌሻ ሺቁዋ ሺቅተ፤ መና ጎዳዉ ታማን ያርሽያ ያርሹዋካ ሺሽተ። ሄ ጋላሳይ ህንተ ሺቁዋ ፖልያ ጋላሳ ግድያ ድራዉ፥ ዳቡርስያ ኦሱዋ አያነ ኦፕተ።

37 " ‘ታማን ጹግያ ያርሹዋነ ካ ያርሹዋ፥ ቃይ ሀራ ያርሾቱዋ ኡባነ ኡሻ ያርሹዋ፥ ኮሽያዋ ኬና ኬሬዳ ጋላሳን መና ጎዳዉ ሺሻናዉ፥ ህንተ ጌሻ ሺቁዋ ኦደ አዋያና መና ጎዳ ባላቱ ሀዋንታ። 38 ሀ ባላቱ መና ጎዳ ሳምባታቱዋፐ፥ ህንተ እሞታ ኦደ መና ጎዳዉ እምያዋንቱፐ፥ ሺቁዋ ጋያዋንቱፐነ ህንተ ህንተ ዶሱዋን ጮ እምያዉንቱፐ ዱማ።

39 " ‘ላፑን አግናን ታማነ እቼሸን ጋላሳን ህንተ ጋድያን ሞኬዳዋ ጫኪደ ሺሼዳዋፐ ጉይያን፥ መና ጎዳ ባላ ላፑን ጋላሳ ቦንችተ፤ ኮይሮ ጋላሳይነ ሆስፑን ጋላሳይ ህንተንቶ ዋና ሸምፖ ጋላሳ። 40 ኮይሮ ጋላሳን ሎኦ ም አይፍያፐ፥ ዛምባ ታሽያፐ፥ እርጻ ሀይና ደእያ ም ታሽያፐነ ሻፋ ማታን ድጭያ ሌኦ ታሽያፐ አኪደ፥ መና ጎዳ ህንተ ጾሳ ስንን ናሸቲደ፥ ላፑን ጋላሳ ባላ ቦንችተ። 41 ሄ ባላ ላይን ላይን ላፑን ጋላሳ መና ጎዳዉ ቦንችተ። ሄዌ ስንና ይያ የለታዉ ኡባዉ መናዉ ዎጋ። ህንተ ሄዋ ላፑን አግናን ቦንችተ። 42 ሄ ላፑን ጋላሳ ህንተ ዳስያን ደእተ፤ እስራኤልያ ቢታ አሳ ግድያ ኡባይ ዳስያን ደእተ። 43 ሄዌ ስንና ይያ የለታይ ኡባይ እስራኤልያ አሳ ታን ግብጼፐ ከሴዳ ዎደ፥ ኡንቱንቱ ዳስያን ደአናዳን ኦዳዋ ኤራናሳ። ታን መና ጎዳ ህንተ ጾሳ’ ያጋ" ያጌዳ።

44 ሄዋዳን ኦደ፥ ሙሴ መና ጎዳ ባላቱዋ ቦንችያ ዎጋ እስራኤልያ አሳዉ ኦዴዳ።